Walja jaqenakaw iglesianakapar jan sarjjapjjeti, ukanakan janiw chuymachtʼatas jikjjatasipkiti, ni jisktʼanakaparus khitis qhanañchkiti. Ukhamajj ¿kunatsa Jehová Diosan Testigonakapan tantachäwinakapar sarañama? Ukat ¿kunsa ukan jikjjatasma?

Wali munasiri jilat kullakanakaw utji. Diosar yupaychañataki, Qollan Qellqatanakat yatjjatañataki ukat ‘maynit mayniru wayttʼasiñatakiw’ nayrïr cristianonakajj tam tama tantachasipjjerïna (Hebreos 10:24, 25). Ukat wali munasiri jilat kullakanakamp tantachasisajja, cheqpach amigonak taypins jikjjatasipkaspa ukham amuyasipjjäna (2 Tesalonicenses 1:3; 3 Juan 14, 15). Jehová Diosan Testigonakapajja, uka cristianonakjamaw tantachasipjje ukat jupanakjamarakiw wali kusisit jikjjatasipjje.

Biblian ewjjtʼanakaparjam sarnaqañatakiw yanaptʼapjjeristam. Kunjamsa Biblian yatichäwinakaparjam sarnaqsna uk amuytʼayir mä yatjjattʼat jilatar istʼañatakiw tantachasipjje. Ukat Bibliajj qellqaskäna uka tiemponjamarakiw chachanakasa, warminakasa ukat wawanakas tantachtʼasipjje (Deuteronomio 31:12; Nehemías 8:8). Yaqhep tantachäwinakapajja, jisktʼanakampiw sarayasi ukat taqeniw ukan arstʼapjjaspa, qʼochuñ librotsa qʼochupjjarakispa, ukhamatwa kunsa Bibliarjamajj suytʼasipki uk sapa maynis qhanañchtʼaspa (Hebreos 10:23).

Diosar jukʼamp iyawsañamatakiw yanaptʼapjjeristam. Pablojj akham sasaw mä tamar qellqatayna: “Jumanakarojj uñjañwa munta, [...] ukhamat maynit mayniru yanaptʼasiñasataki kawkïr iyawsañatejj jumanakansa nayansa utjki ukarjama” sasa (Romanos 1:11, 12). Jilat kullakanakampi tantachäwinakan jikisisajja, Diosar jukʼamp iyawsañatakiw jupanakar yanaptʼi ukat Biblian yatichäwinakaparjam sarnaqañatakis chʼamañchtʼarakiwa.

Juma pachpaw kuntï aka yatichäwin siski uk uñjasma, ukhamajj ¿janit aka mayan tantachäwinakapar sarañ munkasma? Wali munasiñampiw katoqapjjätam. Ukat janiw kuna qollqes ukan mayiskiti, tantachäwinakajj gratisakiwa.

• ¿Kunjamsa nayra tiempon tantachasipjjerïna, ukat kunjamsa Jehová Diosan Testigonakapajj tantachasipjjaraki?

• Tantachäwinakapar sarasajja, ¿kuna askinaksa jikjjatasma?

Chʼumi chʼumi tayp sarañäskchisa, jan ukajj thayapach tiempöskchisa, Jehová Diosan Testigonakapajj tantachäwinakapar sarapjjapuniwa. Jakäwin kunaymanin jikjjatasisasa, jan ukajj trabajot wali qarit purisasa, ¿kunatsa cristiano jilat kullakanakampi tantachasiñatak wal chʼamachasipjje?

Sum jikjjatasiñatakiw yanaptʼiristam. Tantachäwinakar sarañ toqet parlkasajja, apóstol Pablojj akham sänwa: “Uñjasipjjarakiñäni purapata” sasa (Hebreos 10:24, MT). Uka arunakampejja, maynit maynikam sum uñtʼasipjjam ukat mayninakats llakisipjjarakim, sañwa apóstol Pablojj munaskäna. Kunapachatï Jehová Diosan Testigonakapajj taman yaqha jilat kullakanakar uñtʼapjje ukhajja, kunjamsa jupanakjam jan waltʼäwin uñjasisajj nayrar sartasipki ukwa amuyapjje, ukat pachpa jilat kullakanakarakiw nayrar sartañatak yanaptʼapjje.

Suma amigonak jikjjatañatakiw yanaptʼiristam. Tantachäwinakanjja, janiw jan uñtʼatarjam uñjasipkiti, jan ukasti wali suma amigonakäpjjewa. Ukat yaqha horasanakans kusistʼañatak tantachasipjjarakiwa. Ukham sarnaqañajja, ¿kunjamsa yanaptʼi? Jukʼamp sumwa purapat uñjasipjje ukat maynit maynikam jukʼamp munasipjjañapatakiw yanaptʼaraki. Ukat kunapachatï maynejj jan waltʼäwin uñjaski ukhajja, purapat wali suma amigöpjjatap laykojj jankʼakirakiw yanaptʼasipjje (Proverbios 17:17). Taqpach tamankirinakamp sum apasisajja, ‘maynit maynita llakisipjjatap’ uñachtʼayapjje (1 Corintios 12:25, 26).

Diosan munañap lurasipki jupanak taypit mä amigo jikjjatañamajj wali askïspawa. Jehová Diosan Testigonakap taypitwa ukham amigonak jikjjatasma. Jupanakamp chikajj kunjamats tantachasiñamapuniwa.

• Cristiano jilat kullakanakamp chika tantachasiñajja, ¿kunatsa wali askejja?

• ¿Kuna horasas Jehová Diosan Testigonakapan mä tantachäwipar sarañ munasma?

Nayrïr cristianonakajja, qʼochunakampi, oracionanakampi, liytʼañanakampi ukat Qollan Qellqatanakat yatjjatañampiw tantachäwinak sarayapjjerïna (1 Corintios 14:26). Jehová Diosan Testigonakapan tantachäwinakapar sarasma ukhajja, uka kikpa tantachäwinakwa uñjarakisma.

Aski yatichäwinakwa Bibliarjam yatichapjje. Sábado, jan ukajj domingonakajja, taqe tamanakaw Bibliat apstʼat arstʼäwi istʼañatak tantachasipjje, ukanwa kunjamsa Diosan Arupajj qhepa urunakankatas uñachtʼayistu ukat jakäwisansa yanaptʼistu, ukanak 30 minutonakan sum qhanañchtʼapjje. Ukat tantachasirinakajj Bibliapampiw arktapjjaspa. Ukjjar jutïr mä horanjja, Yatiyañataki revistat taman yatjjatañataki, sat tantachäwimpiw qalltapjje, ukanwa Yatiyañataki revistan mä yatichäwipat yatjjatapjje ukat tantachasirinakajj arstʼapjjarakispawa. Uka yatichäwiw kunjamsa maynejj Diosan Aruparjam sarnaqaspa uk qhanañchi. Ukat oraqpachankir 110.000 jila tamanakanwa pachpa yatichäwit yatjjatapjje.

Sum yatichañatakiw yateqapjje. Semanan mä arumaw tantachasipjje, ukat kimsar jaljat mä programarjamaw sarayapjje. Uka tantachäwejj Cristianjam Jakañataki ukat Yatiyañataki satawa, ukajj Tantachäwin yatjjatañataki sat qellqatarjamaw sarayasi. Sapa phajjsiw uka qellqatajj purini. Uka tantachäwejj akhamaw apasi: Maya, Biblian suma yatichäwinakapa, ukajj kuntï Bibliat liytʼaniwayapki uk sum amuytʼapjjañapatakiw tantachasirinakar yanaptʼi. Paya, Sum yatichañatak chʼamachasiñäni, ukanjja demostracionanakampiw kunjamsa jaqenakamp Diosan arunakap parlsna uk uñachtʼayasi. Ukat mä jilatarakiw kunjamsa jukʼamp sum liytʼapjjaspa jan ukajj parltʼapjjaspa uka toqet ewjjtʼi (1 Timoteo 4:13). Kimsa, Cristianjam jakañataki, ukanjja kunjamsa Biblian yatichäwinakaparjam sarnaqsna ukaw sum qhanañchasi. Ukatakejj tantachasirinakan arstʼapjjañapatakiw jisktʼanakajj lurasi.

Tantachäwipar sarkäta ukhajja, kunja sumsa Bibliat yatichapjje uk uñjasajj wal muspharasma (Isaías 54:13).

• Jehová Diosan Testigonakapan tantachäwipar sarkäta ukhajja, ¿kunanaksa uñjanïta?

• ¿Kawknïr tantachäwinakaparus sarañ munasma?

Kunjamtï aka folleton uñjaskejja, Jehová Diosan Testigonakapajj yäpar suma isthaptʼataw tantachäwinakapar sarapjje. ¿Kunatsa yäpar isthaptʼasipjjpacha ukat kʼachachtʼasipjjpacha?

Diosar respetapjjatapwa uñachtʼayapjje. Cheqansa, Diosajj janiw jaqen uñnaqapaki uñjkiti (1 Samuel 16:7). Ukampis kunapachatï Jehová Diosan Testigonakapajj Diosar yupaychañataki tantachasipjje ukhajja, Diosaru ukat jilat kullakanakaru respetapjjatapwa uñachtʼayañ munapjje. Amuytʼañataki, kunapachatï maynejj mä presidentempi, jan ukajj mä reyimpi parlir sarki ukhajja, sum isthaptʼasisaw sarawayi. Ukhamarakiw Jehová Diosan Testigonakapajj yäpar isthaptʼasipjje, ukhamatwa ‘wiñay Jehová Dios reyirusa’ ukat yupaychañ utarusa wali respetompi uñjapjjatap uñachtʼayapjje (1 Timoteo 1:17).

Biblian ewjjtʼanakaparjam sarnaqapjjatapwa uñachtʼayapjje. “Kunatejj isisiñäki ukak isisipjjpan” sasaw Bibliajj cristianonakar ewjjtʼi (1 Timoteo 2:9, 10). ¿Uka arunakajj kamsañs muni? Suma, yäpar isisiña sañ muni, ukhamajj jan wali isinakampi, jan ukajj maynir pantjayirjama, jan walinak amuyayiri isinakampi isisiñajj janiw walïkaspati, ukat janirakiw jan wal isthapita sarnaqañäkaspati, ukwa uka arunakajj sañ muni. Ukampis Biblian ewjjtʼanakaparjam amuytʼasajja, sapa mayniw kunjamsa isisini uk amtjjañapa. Yäpar sum isthaptʼasisaw maynejj ‘Diosan yatichäwinakap kʼachachtʼaspa’ ukat jan parlasakiw yaqhanakar Diosar jachʼañchapjjañapatak yanaptʼaspa (Tito 2:10, MT; 1 Pedro 2:12). Jehová Diosan Testigonakapajj tantachäwinakapar yäpar isthapit sarapjje ukhajja, Diosan markapajj suma uñjatäñapatakiw yanaptʼapjjaraki.

“Janiw jupanakjam isinïkti, janjakiw tantachäwinakapar sarkiristti”, sasin jan pächasimti. Yäpar sum isisiñatakejja, janiw jila alani isinakampi isisiñajj wakiskiti.

• ¿Kunatsa Diosar yupaychañatakejj yäpar isthaptʼasiñajj wali wakiskirejja?

• ¿Biblian kawkïr ewjjtʼanakaparjamas maynejj isisiñapa?

Jumatï Jehová Diosan Testigonakapampi Bibliat yateqaskstajja, janiräkipanwa sum yateqañatak wakichtʼaspachätajja. Tantachäwinakar sarañatakejj wakichtʼasiñamarakiwa, ukhamatwa jukʼamp yatjjataskakïta. Ukat jumatï mä programarjam wakichtʼasïtajja, jukʼamp askïniwa.

Kawkinsa ukat kuna horasas wakichasisma ukwa amtañama. Sum yateqañatakejja, ¿kuna horanakas yatjjatasma? Inas alwächispa, janïr trabajomp qalltkasina, jan ukajj arumjjarüchispa, wawanakajj ikitäjjapjje ukha. Ukampis tiempomatï jan utjkanejja, qhawqha tiempsa yatjjatañatak apstʼasïta uk amuytʼañamawa, ukat janirakiw yaqha lurañanakampejj tiempo apaqayasiñamäkiti. Ukat kawkhansa sum yatjjatasma uksa amuyañamarakiwa, ukatakejj radio, televisión, celular ukanaksa jiwtʼayañamawa. Janïr qalltkasasti, Diosaruw mä oracionan maytʼasiñama, ukaw llakinak armañatakis yanaptʼätam ukat Jehová Diosan arunakapatsa sum yateqarakïta (Filipenses 4:6, 7).

Qhanstkir arunakwa marktʼasiñama, ukat arstʼañatakis wakichtʼasiñamarakiwa. Kuna toqetsa yatichäwejj qhanañchi uk amuytʼañamawa. Ukatakejj yatichäwin jan ukajj jaljan pʼeqeñchäwipwa uñjattʼañama, ukat kunjamsa jiskʼa pʼeqeñchäwinakajj uka yatichäwir yanaptʼi uksa amuyañamawa. Fotonaksa, qhanstkir yatichäwinak amtayir jisktʼanaksa uñjjattʼañamarakiwa. Ukat sapa tʼaqa liytʼasajj jisktʼanakan qhanañchäwinakapwa thaqhañama. Bibliat kawkïr jiskʼa tʼaqanakas jan copiaqatäki ukanak thaqhasajja, kunjamsa yatichäwir yanaptʼi uk amuytʼañamarakiwa (Hechos 17:11). Kunapachatï jisktʼan qhanañchäwip jikjjatäta ukhajja, kawkïr arunakas uk amtañatak yanaptʼirïstam ukwa marktʼasiñama. Ukhamatwa tantachäwin arstʼañ munäta ukajj pachpa arunakamampi arstʼarakisma.

Sapa semanaw tantachäwinakanjja, kunaymaninak yatichasi, ukanak istʼañaw Bibliat jukʼamp yateqañamataki yanaptʼätam (Mateo 13:51, 52).

• ¿Kuna horasas tantachäwinakat wakichtʼasisma?

• ¿Kunjamsa tantachäwinakan arstʼañatakejj wakichtʼasisma?

Jehová Diosampi ukat familia taypin sum apasipjjañapatakejja, nayra tiempotpachwa Jehová Diosajj familianakan tantachtʼasipjjañap munäna (Deuteronomio 6:6, 7). Ukatwa Jehová Diosan Testigonakapajj familjam Diosar yupaychañatak semanan mä kuti tantachtʼasiñatak tiempo apstʼasipjje, ukhamatwa kuntï sapa maynitakejj wakiski ukarjam Bibliat yatjjatapjje, ukajj janiw taman tantachäwinakjamäkiti. Ukat sapäpki ukanakasa, Diosar jukʼamp jakʼachasiñatakiw kuntï Bibliat yatjjatañ munapki uk yatjjatañatak tiempo apstʼasipjjaspa.

Diosaruw jukʼamp jakʼachasipjje. “Diosar jakʼachasipjjam, jupasti jumanakarojj jakʼachasirakiniwa.” (Santiago 4:8.) Kunjam Diosasa ukat kunanak luririsa ukanak maynejj Biblian liytʼki ukhajja, jukʼampwa Jehová Diosar uñtʼi. Ukhamajj Biblia liytʼasaw familjam Diosar yupaychañ qalltapjjasma, ukatakejj Cristianjam Jakañataki ukat Yatiyañataki tantachäwin programaparjamaw Bibliat liytʼasispa. Ukat sapa mayniw mä jukʼakam liytʼasin kunanaktï yateqki ukanak arstʼaspa.

Familjam sum apasiñatakiw yanaptʼi. Chacha warminakasa, jan ukajj awk taykanakas wawanakapamp Bibliat liytʼapki ukhajja, jukʼamp munasiñampiw uñjasipjje. Ukatwa familjam Diosar yupaychañatak tantachäwejja, taqens wali suytʼata ukat kusiskañ tantachäwiñapawa. Yaqhep awk taykanakajja, qhawqha maranis wawanakapajja ukat kunas jupanakar yanaptʼaspa, ukarjamaw Yatiyañataki revistatsa, Bibliat apstʼat yaqha qellqatanakatsa, jan ukajj Internetat jw.org/ay sat cheqatsa yatjjatapjje, ukat kuna jan waltʼäwinsa wawanakapajj escuelan uñjasipjje ukat kunjamsa ukanak askichapjjaspa ukanakwa amuykiptʼapjje. Awk taykanakajja, JW Broadcasting (tv.jw.org) siski ukwa wawanakapamp uñtapjjaspa ukat kunsa yateqawayapjje uksa arstʼapjjarakispawa. Ukatjja, kawkïr qʼochunakas jutïr tantachäwin qʼochusini ukanaksa qʼochtʼapjjarakispawa. Ukat tukuyatarojj juntuw kuns manqtʼasipjjarakispa.

Familjam Diosar yupaychañatak sapa semana tantachtʼasisajja, Diosan Arupat liytʼañajj wali kusiskañ horasañapatakiw yanaptʼi, ukat Jehová Diosas ukham chʼamachasipjjatapatjja, bendicirakiniwa (Salmo 1:1-3).

• ¿Kunatsa semanan familjam Diosar yupaychañatak tiempo apstʼasipjje?

• Uka tantachäwin sum apasiñapatakejja, ¿kunsa awk taykanakajj lurapjjaspa?

Aka fotonakanjja, ¿kunja kusisitas jilat kullakanakajj jikjjatasipjje uk amuytati? Jehová Diosan Testigonakapan mä jachʼa tantachäwipankasipkiwa. Ukham walja jilat kullakanakampi tantachasisajj wali kusisitaw jikjjatasipjje, kunjamtï Diosan nayra servirinakapajj jikjjatasipkäna ukhama, jupanakajj maran kims kutiw tantachasipjjañapäna (Deuteronomio 16:16). Jehová Diosan Testigonakapajj sapa maraw kimsa jachʼa tantachäwinak apapjjaraki, Asamblea de Circuito satäkis ukjja maran pay kutiw mä urukam apapjje. Ukatjja, Asamblea Regional satäkis ukjja maran may kutiw apapjjaraki, ukajj kimsa uruw apasi. ¿Kuna askinaksa ukanakar sarasajj jikjjatapjje?

Jukʼamp munasipjjañapatakiw yanaptʼi. Walja jaqenakamp Jehová Diosar jachʼañchañajj israelitanakatak wali kusiskañänwa, ukhamarakiw Jehová Diosan Testigonakapajj walja jilat kullakanakampi Diosar yupaychasajj wali kusisit jikjjatasipjje (Salmo 26:12; 111:1). Ukanwa yaqha tamankiri, jan ukajj yaqha markanakat jutiri jilat kullakanakamp jikisipjje. Ukat manqtʼasiñ horasarojj juntukiw manqtʼasipjjaraki, ukhamatwa Diosar yupaychasajj amigonakapampis sum parltʼasipjje (Hechos 2:42). Aka oraqpachankir jilat kullakanakajj qhawqha munasiñampis uñjasipjje, ukwa tantachäwinakan qhan uñachtʼayapjje (1 Pedro 2:17).

Diosar yupaychañan nayrar sarantaskakiñatakiw yanaptʼi. Israelitanakatakejj Qollan Qellqatanakat amuytʼañajj wali askipunïnwa (Nehemías 8:8, 12). Jehová Diosan Testigonakapatakejja, kuntï jachʼa tantachäwinakan yatichasi uk istʼañajj wali askirakiwa. Taqe ukanakajj Bibliarjam apstʼatawa. Arstʼäwinakampi ukat uñachtʼäwinakampiw kunjamsa maynejj Diosan munañap luraspa uk yatichasi. Aka jan wali urunakanjja, waljaniw cristianöpjjatap laykojj jan walinakan uñjasipjje, ukampis kunjamsa ukanak atipapjje uk istʼañas wali chʼamañchkiriwa. Asamblea Regional satäkis uka tantachäwinjja, Bibliat apstʼat dramanakaw utjaraki, ukanjja kunjamtï nayrajj isisipjjerïna ukham isthapisisaw Biblian utjki uka sarnaqäwinak sum uñachtʼayapjje, ukanakajj wal sapa maynir yanaptʼaspa. Ukat Diosar katuyasitap uñachtʼayañ munapki ukanakatakejja, sapa jachʼa tantachäwinwa bautisasiñajj utjaraki.

• ¿Kunatsa jachʼa tantachäwinakar sarañajj wali kusiskañajja?

• ¿Kunjamsa jachʼa tantachäwinakar sarañajj jumar yanaptʼiristam?

“Diosan reinopat aka suma yatiyäwisti aka oraqpachanwa yatiyatäni, ukhamat taqe markanakan yatipjjañapataki, ukatsti akapachan tukusiñapaw jutani” sasaw Jesusajj janïr jiwkasin säna (Mateo 24:14). Ukhamajj ¿kunjamsa suma yatiyäwinakajj Oraqpachan yatiyasiñapäna? Kunjamtï Jesusajj Diosan arunakap yatiykänjja, ukhamwa yatiyasiñapäna (Lucas 8:1).

Utanakaparuw visittʼir sarapjje. Suma yatiyäwinak utat uta yatiyapjjañapatakiw Jesusajj arkirinakapar yatichäna (Mateo 10:11-13; Hechos 5:42; 20:20). Uka nayrïr yatiyirinakatakejja, kawkhantï yatiyapjjañapäkäna uka cheqanakajj suma jalanoqtʼatänwa (Mateo 10:5, 6; 2 Corintios 10:13). Jichha tiemponjj ukhamarakiw Jehová Diosan Testigonakapajja, kawkhanakansa sapa tamajj yatiyani uk sum jalanoqtʼapjje. Ukhamatwa Jesusan arunakapar phoqhasajj taqe ‘jaqenakar qhanañchir’ sarapjje (Hechos 10:42).

Kawkhantï jaqenakajj jikjjatasipki ukaruw sarapjje. Jesusajj kawkinkkasas yatiyapunïnwa, qota lakanakansa ukat kawkharutï jaqenakajj uma apsur sarapjjerïna uka phuju jakʼanakansa (Marcos 4:1; Juan 4:5-15). Ukhamarakiw Jehová Diosan Testigonakapajj kawkinkkasas Diosan arunakapat yatiyapjjapuniwa: callenakana, qhathunakana, plazanakana ukat telefonots parlapjjarakiwa. Janiw ukakïkiti, Diosar iyawsapjjatapat yatiyañjamäki ukhajja, uta jakʼankirinakarusa, trabajonsa, escuelansa, jan ukajj familiaranakaparus yatiyapjjarakiwa. Ukhamatwa waranq waranqa jaqenakajj Diosan qhespiyasiñ arunakap istʼapjje (Salmo 96:2).

Diosan Reinopat suma yatiyäwinakata ukat kunjamsa uka Reinojj jaqenakar yanaptʼani uka toqenakatjja, khitirus yatiyañ munasma uk amuytʼasiñamawa. Qhespiyasiñ yatiyäwinak jan jumatakik imasimti, antisas khitirutï yatiyañjamäki ukar yatiyaskakiñamawa.

• ¿Kuna ‘suma yatiyäwinaksa’ jaqenakar yatiyasiñapa?

• ¿Jehová Diosan Testigonakapajj kunjamsa Jesusjam yatiyapjjaraki?

Precursor siski uka arojja, mayninakan sarapjjañapatak thak jistʼariri sañ muni. Jesusajj uka casta precursorarakïnwa, jupaw jaqenakan qhespiyasipjjañapatak aka Oraqen mä thakhi jistʼarawayi (Mateo 20:28). Jehová Diosan Testigonakapajj ukhamarakiw jaqenakar Jesusan arkiripar tukuyañatak wal chʼamachasipjje (Mateo 28:19, 20). Yaqhepajj precursorjamaw irnaqtʼapjje.

Sapürunjamaw Diosatak irnaqtʼapjje. Jehová Diosan Testigonakapajj taqeniw suma yatiyäwinak yatiyapjje. Ukampis yaqhepajj precursores regulares ukham irnaqtʼañatakiw tiempo apstʼasipjje, jupanakajj 70 horanakwa phajjsin phoqhapjje. Ukamp phoqhañatakejj chika tiempokiw trabajapjje. Ukat yaqhepajj precursores especiales ukham irnaqtʼapjjañapatakiw ajllitäpjje, jupanakajj kawkhantï Diosan arunakapat yatiyirinakajj wal munaski uka cheqaruw sarapjje ukat 130 horanaka, jan ukajj jukʼampwa phajjsin yatiyapjje. Precursoranakajja, Jehová Diosaw kunatï wakiski ukanak churaskistani sasin atinisisaw kunatï jakañatak munaski ukampik kusisit jakasipjje (Mateo 6:31-33; 1 Timoteo 6:6-8). Khitinakatï precursores regulares, jan ukajj precursor especiales ukham jan irnaqtʼirjamäpki ukanakajja, precursores auxiliares ukhamwa irnaqtʼapjjarakispa, jupanakajj 30, jan ukajj 50 horanakaw phajjsin yatiyapjjaspa.

Diosaru ukat jaqe masipar wal munasipjjatap laykuw ukham yatiyapjje. Jaqenakajja, Diosar yupaychañan wali aynachtʼatäpjjewa, ukwa Jehová Diosan Testigonakapajj Jesusjam amuyapjjaraki (Marcos 6:34). Ukampis jutïr urunak suma chuymamp suytʼapjjañapatakejj kunas uka jaqenakarojj jichhatpach yanaptʼaspa uksa yatipjjarakiwa. Ukatwa precursoranakajj jaqe masipar wal munasipjjatap laykojj tiempsa apstʼasipjje ukat chʼamapampis Diosar jakʼachasipjjañapatak yanaptʼapjjaraki (Mateo 22:39; 1 Tesalonicenses 2:8). Ukanak lurañaw Diosamp sum apasiñataki ukat Jupar jukʼamp atinisipjjañapatak yanaptʼi, ukatwa precursoranakajj wali kusisitäpjjaraki (Hechos 20:35).

• Precursor siski uka arojja, ¿kamsañs muni?

• ¿Kunatsa yaqhepajj precursorjam irnaqtʼañ qalltapjje?

Jehová Diosan Testigonakaparojja, jilat kullakanakar yatichtʼapjjatapatwa uñtʼasi. Cheqansa, Diosan Reinopat sapürunjam yatiyasipki uka jilat kullakanakarojja, jukʼamp sum yatiyapjjañapatakiw wakichtʼasi (2 Timoteo 4:5).

Precursoranakatak Escuela. Precursorjam mä mara irnaqtʼasaw maynejj sojjta urutaki uka escuelar saraspa. Uka escuelajj mä Tantachasiñ Utanwa apasispa. ¿Kuna amtampis uka escuelajj wakichasiwayi? Jehová Diosar jukʼamp jakʼachasipjjañapataki, Diosan arunakap sum yatiyapjjañapataki ukat Diosatak irnaqtʼasipkakiñapatakiw uka escuelajj precursoranakar yanaptʼi.

Diosan Reinopat Yatiyirinakataki Escuela. Jukʼamp yatiyirinakajj munaski uka cheqanakar sarirjamäpki uka precursoranakar wakichtʼañatakiw uka escuelajj apasi. Pä phajjsitakiw ukar sarapjjaspa. Jupanakajj akham sapjjewa: “Akankasktwa nayajj, nayar khitasita” sasa. Ukhamatwa Jesusat yateqasipjje, jupaw aka Oraqer jutasajj Diosan arunakap sum yatiyäna (Isaías 6:8; Juan 7:29). Yaqha cheqar sarjjasajja, kunatï jakañatak wakiski ukampikiw precursoranakajj jakapjje. Kunaymanin jakasir markanakaw utji, yaqha costumbrenakani, yaqhepajj juntʼu jan ukajj thaya, ukat manqʼanakas mayj mayjarakiwa, ukhampachaw jupanakajj uka markanakar sarapjje. Awisajj yaqha aru parlañwa yateqapjjañaparaki. Ukhamajj uka cheqanakan sum irnaqtʼapjjañapataki ukat Jehová Diosarusa markaparus jukʼamp yanaptʼapjjañapatakiw uka escuelajj precursoranakar yanaptʼi. 23 maranit 65 marankamaw soltero jilat kullakanakasa ukat casarat jilat kullakanakas uka escuelar sarapjjaspa.

Escuela Bíblica de Galaad de la Watchtower. Hebreo arunjja, Galaad sutejj “qhanañchañatak qala montona” sañwa muni. 1943 maranwa uka escuelajj apasiñ qalltasiwayi, ukhat jichhakamajja, 8.000 jila jilat kullakanakaruw misioneronakjam ‘taqe akapachankir jaqenakaru’ yatiyir sarapjjañapatak khithasiwayi (Hechos 13:47). Nayrïr misioneronakajj Perú markar puripjjäna ukhajja, janiw ni mä tamas utjkänti, jichhajj 1.000 jila tamanakaw utj-jje. Ukat Japón markar puripjjäna ukhajja, jilat kullakanakajj janiw ni tunkarus puripkänti, jichhajj 200.000 jiläjjapjjewa. Galaad escuelar sarapki ukanakajja, phesqa phajjsinwa Diosan Arupat sum yatjjatapjje. Misioneronaka, tamanak tumptʼirinaka, sucursalanakan irnaqtʼapki uka jilat kullakanaka ukat precursores especiales sasin uñtʼatäpki ukanakaw uka escuelar sarapjjaspa. Oraqpachan yatiyaski ukajj nayrar sartaskakiñapataki ukat tamanakar chʼamañchtʼapjjañapatakiw jilat kullakanakarojj Galaad escuelan wakichtʼasi.

• ¿Kuna amtampis Precursoranakatak Escuelajj wakichasiwayi?

• Diosan Reinopat Yatiyirinakataki Escuelarojja, ¿khitinakas sarapjjaspa?