Mä viuda warmin wawaparuw Jesusajj jaktayäna

Ejerciton oficialapan esclavopar kʼumaraptayasajja, Jesusajj Naín markaruw saräna, uka markajj Capernaúm markat 32 kilometronak aynach toqer sarañankänwa. Jesusamp chikajj discipulonakampi, walja jaqenakampiw sarapjjäna. Naín markar puriñampejjapjjäna ukhajj niyaw jaypʼuntaskäna. Ukanwa walja judionakar mä jiwatar kallasipkir uñjapjjäna. Uka judionakajja, mä jiwat waynaruw uka markat anqäjjar imantañatak kallasipkäna.

Mayninakat sipansa, uka jiwat waynan mamapaw jukʼamp jachaskäna. Uka warmisti viudänwa, jichhajj wawapaw jiwjjarakïna. Esposopajj jiwjjäna ukhajj mä sapa wawanikiw qheparäna. Ukhamasti yoqapajj wali munatäpachänwa, ‘jupaw nayar uñjasiskitani yanapaskitani’ sasaw sarakpachäna. Ukampis jichhajj munat wawapajj jiwatäjjänwa. ¿Khitis uka warmirojj jichhajj uñjani yanaptʼarakini?

Jesusajj uka warmir uñjasajja, wal jupat sinttʼasïna, chuymaps chʼalljjtayasïnwa. Ukatwa munasiñampi ukhamarak qhana arunakampi uka warmirojj akham säna: “Jan jachjjamti” sasa. Ukatjja, Jesusajj jakʼachasisaw jiwatanak apañ camillar llamktʼäna (Lucas 7:13, 14). Jesusajj kuntï lurkäna uk uñjasajja, jaqenakajj sarkasin saytʼapjjänwa. Waljanirakiw akham sasin jisktʼasipjjäna: ‘¿Kunatsa ukham sispacha, kuns lurpachäni?’ sasa.

Jichhajja Jesusampi chika sarir jaqenakat parltʼarakiñäni. Jupanakajja Jesusarojj milagronak lurasin jaqenakar waliptayir uñjapjjänwa, ukampis janjamakiw mä jiwatar jaktayir jichhakam uñjapkänti. Walja maranak nayrajj jiwat jaqenakat mä qhawqhanir jaktayaschïnsa, ¿Jesusajj jiwatanakar jaktayaspänti? (1 Reyes 17:17-23; 2 Reyes 4:32-37). Jesusajj akham sasaw säna: “Wayna, nayaw sissma, sartam” sasa (Lucas 7:14). Jiwatajj qonthapisaw parlañ qalltäna, taykapajj uk uñjasajj wal musparäna, kusisirakïnwa. Jesusajj juparuw wawap katuyjjäna, jichhajj taykapajj janiw sapakëjjänti.

Jaqenakajj waynajj jakaskatap uñjapjjäna ukhajja, jakañ churir Jehová Diosaruw jachʼañchapjjäna, akham sasa: “Mä jachʼa profetaruw Diosajj jiwas taypin saytʼayi” sasa. Kuntï Jesusajj lurkäna uk uñjasajj akham sapjjarakïnwa: “[Diosajj] markapatsa amtasirakiwa” sasa (Lucas 7:16). Uka milagrotjja, taqe uka jakʼankir markanakanwa yatisïna. Jesusajj jakkäna uka Nazaret markansa yatisirakpachänwa, uka markajj Naín markat 10 kilometronak sarañankakïnwa. Aynachankir Judea toqensa ukhamarakiw uka milagrot yatipjjäna.

Bautisir Juanajj carcelankaskänwa, Jesusan luratanakapat wal yatiñ munarakïna. Juanarojj discipulonakapaw Jesusan milagronakapat yatiyapjjäna. ¿Uk yatisajj kamspachänsa?