Jehová Diosan Testigonakapamp yatjjatañajja, Biblian cheqa yatichäwinakap uñtʼañatakiw yanaptʼawaytamjja. Diosamp sum apasiñamatakisa paraíso oraqen wiñayatak jakasiñ suytʼañatakis yanaptʼawayaraktamwa. Jichhajj taqe chuymaw Diosan Arupar confiytajja. Maysa toqetjja Diosan markapankasajj walja bendicionanakwa katoqtajja, kunanaksa Jehová Diosajj servirinakap laykojj jichhürunakan luraski uksa amuyaraktawa (Zac. 8:23).

Bautisasiñatak wakichtʼaskasajja, cristianonakajj kunanakarus creyipjje uk ancianonakamp amtañajj wal yanaptʼätam (Heb. 6:1-3). Jehová Diosajj jupar uñtʼañatak chʼamachasitamarojj wal bendisini, wiñay jakañsa churarakïtamwa (Juan 17:3).

1. ¿Kunatsa jumajj bautisasiñ munta?

2. ¿Khitis Jehová Diosajja?

• “Jehová Diosaw alajjpachansa oraqensa cheqpach Diosajja, janiw yaqhajj utjkiti” (Deut. 4:39).

• “Jaqenakajj ak yatipjjpan, juman sutimajj Jehová satawa, juma sapakiw taqe oraqpach apnaqer Jachʼa Diosätajja” (Sal. 83:18).

3. ¿Kunatsa Diosan sutip aytañajj wali wakiskirejja?

• “Jumanakajj akham sasaw orasipjjañama: ‘Alajjpachankir nanakan Awkija, sutimajj jachʼañchatäpan’” sasa (Mat. 6:9).

• “Taqe khititï Jehová Diosan sutip artʼaski ukajj salvatäniwa” (Rom. 10:13).

4. Bibliarjamajja, ¿Jehová Diosarojj kunjamanakatsa uñtʼasiraki?

• “Mä thiyat mä thiyakam oraqe Lurir Jehová Diosajja wiñayans wiñayapatak Diosawa” (Is. 40:28).

• “Alajjpachankir nanakan Awkija” (Mat. 6:9).

• “Diosajj munasiñawa” (1 Juan 4:8).

5. ¿Kunsa Jehová Diosarojj churasma?

• “Jehová Diosamarojj taqe chuymamampi, taqe almamampi, taqe amuyumampi, taqe chʼamamampi munasiñamawa” (Mar. 12:30).

• “Jehová Diosamaruw adorañama, jupa saparukiw serviñama” (Luc. 4:8).

6. ¿Kunatsa Jehová Diosat janipun jitheqtañ munkta?

• “Nayan wawaja, yatiñanïmaya, chuymajarus kusisiyam, ukhamat khititï nayat jan wal parlki ukar jan cheq parlatap uñachtʼayañajataki” (Prov. 27:11).

7. ¿Khitirus jumajj orasta ukat khitin sutipjjarus orasta?

• Jesusajj akham sänwa: “Cheqpachapuniw sapjjsma, jumanakatejj alajjpachankir Awkir kuns mayipjjäta ukhajja, jupajj nayan sutij-jjaruw churapjjätam” sasa (Juan 16:23).

8. ¿Kunanakatsa orasisma?

• “Jumanakajj akham sasaw orasipjjañama: ‘Alajjpachankir nanakan Awkija, sutimajj jachʼañchatäpan. Reinomajj jutpan. Munañamajj luratäpan, kunjamatï alajjpachan luraski ukhamarak aka oraqens luraspan. Jichhürutak tʼantʼa churapjjeta; manunakajsa perdonapjjarakita, kunjamtï nanakajj manüpkitu ukanakar perdonapktjja ukhama. Janirak yantʼarus puriyapjjestati, jan ukasti Supayat salvapjjeta’ sasa” (Mat. 6:9-13).

• “Jiwasanakajj janiw jupat payachasktanti, jiwasatï munañaparjam kunsa mayiñäni ukhajja, jupajj istʼistaniwa” (1 Juan 5:14).

9. ¿Kunatsa Jehová Diosajj maynin oracionap jan istʼkaspa?

• “Jehová Diosaruw yanapa mayiñatakejj artʼasipjjani, ukampis jupajj janiw jayskaniti [...] jupanakan jan wali luratanakap layku” (Miq. 3:4).

• “Jehová Diosan nayranakapajja cheqapar sarnaqer jaqenakjjankiwa, jiñchunakapajj jupanakan ruwtʼasitanakaparuw istʼaskaraki. Ukampis Jehová Diosajj jan wali luririnak contrawa” (1 Ped. 3:12).

10. ¿Khitis Jesucristojja?

• “Simón Pedrojj akham sänwa: ‘Jumajj Cristötawa, jakkir Diosan Yoqapätawa’ sasa” (Mat. 16:16).

11. ¿Kunatakis Jesusajj aka oraqer jutäna?

• ‘Jaqen Yoqapajj janiw serviyasir jutkiti, jan ukasti yaqhanakar serviriw juti, vidap churañatakiw jutaraki, ukhamat waljanir juchat kutsuyañataki’ (Mat. 20:28).

• “[Jesusajj] akham sasaw jupanakar säna: ‘Diosan Reinopat suma yatiyäwinak yaqha markanakar yatiyir sarañajajj wakisirakiwa, nayajj ukataki khitanitätwa’ sasa” (Luc. 4:43).

12. Jesusajj jiwasanak layku jiwawayki ukatjja, ¿kunjamsa yuspäratam uñachtʼayasma?

• “Jupajj taqenitakiw jiwäna, ukhamat khitinakatï jakasipki ukanakajja, jan jupanak pachpataki jakjjapjjañapataki, jan ukasti khititï jupanak layku jiwki, jaktayatäkaraki uka Cristotak jakjjapjjañapataki” (2 Cor. 5:15).

13. ¿Jesusajj qhawqha autoridadanisa?

• “Diosaw taqe autoridad churitu, alajjpachansa ukhamaraki aka oraqensa” (Mat. 28:18).

• “Diosajj jukʼamp jilankki uka puesto churäna, munasiñatwa taqe sutinakat sipansa jukʼamp suma suti churäna” (Filip. 2:9).

14. Cuerpo Gobernantejj Jesusan uttʼayata ‘suma phoqeri amuyasir esclavowa’ ¿sasat jumajj amuyta?

• “Cheqpachansa ¿khitis suma phoqeri amuyasir esclavojja, khitirutï uywiripajj utapan servirinakapjjar uttʼayki, jupanakar tiempopar manqʼap churir esclavojja?” (Mat. 24:45).

15. ¿Espíritu santojj mä jaqëpachati?

• “Angelajj jupar sarakïnwa: ‘Espíritu santow jumjjar jutani, Jachʼa Diosan chʼamapaw chʼiwipamp imjjatätam. Ukatwa naskani uka wawajj santo ukhamarak Diosan Yoqapa satäni’” sasa (Luc. 1:35).

• “Jumanakajj jan wali jaqëkasinsa, wawanakamar suma regalonak churañ yatipjjtawa. Ukhamajj ¿janit alajjpachankir Awkejj mayipki ukanakarojj espíritu santo churkarakini?” (Luc. 11:13).

16. ¿Kunanaksa Jehová Diosajj espíritu santopampejj lurawayi?

• “Jehová Diosan arsutaparjamaw alajjpachanakajj luratäna, taqe kunanakatï ukan utjki ukanakajj lakapankir espiritup taypiw luratarakïna” (Sal. 33:6).

• “Espíritu santojj jumanakjjar jutkani ukhaw chʼam katoqapjjäta, [...] nayat qhanañchapjjarakïta [...] taqe aka oraqpachana” (Hech. 1:8).

• “Qellqatankki uka profecía arunakajja, janiw ni mayas jaqen amuyunakapat jutkiti. Profecía arunakajja, janiw kunapachas jaqen munañapat parlatäkänti, jan ukasti espíritu santon yanaptʼapampiw jaqenakajj Diosat parlapjjäna” (2 Ped. 1:20, 21).

17. ¿Kunas Diosan Reinopajja?

• “Alajjpachankir Diosajj yaqha reino uttʼayarakini, uka reinojj janipuniw tukjatäkaniti, janirakiw yaqha markan amparapar katuyatäkaniti. Uka reinow taqe uka reinonakarojj tʼunjani, chhaqtayani, uka reinokiw wiñayatak utjarakini” (Dan. 2:44).

18. ¿Kunsa Diosan Reinopajj juma laykojj lurani?

• “[Jehová] Diosajj taqe jachanakapwa nayranakapat picharani, janiw jiwañajj jukʼamp utj-jjaniti, janirakiw llakisiñasa, jachañasa ni usuyasiñasa jukʼamp utj-jjaniti. Kunanakatï nayrajj utjkäna ukanakajj tukusjjewa” (Apoc. 21:4).

19. Diosan Reinopajj niyaw aka oraqer apnaqjjani sasajj ¿kunatsa sistajja?

• “Jesusajj Olivos qollun qontʼatäskäna ukhajja, discipulonakaw jupar jakʼachasisajj akham sasin sapapar jisktʼapjjäna: ‘Sapjjetaya: ¿kunapachas ukanakajj pasani, jumajj kuttʼankäta uka tiemposa akapachajj niya tukusiñampïskani ukhasa kuna señalas utjani?’ sasa. Jesusasti jupanakar sarakïnwa: ‘[...] Mä jachʼa markajj yaqha jachʼa marka contraw nuwasini, mä gobiernosti yaqha gobierno contrarakiw nuwasini. Manqʼat pistʼañanakasa terremotonakas ukjan akjan utjarakini. Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani’” sasa (Mat. 24:3, 4, 7, 14).

• “Qhepa urunakanjja chʼama tukuña jan wali tiemponakaw utjani. Jaqenakajj akhamäpjjaniwa: jupanak pachpa munasirinaka, qollqe sinti munirinaka, pʼeqe waytat sarnaqerinaka, jachʼa jachʼa tukurinaka, Dios contra jaqe contra jan wal parlirinaka, awkiparus taykaparus jan istʼirinaka, jan yuspärasirinaka, jaqe masipar jaytanukurinaka, jan munasirinaka, jan kuna acuerdorus mantañ munirinaka, kʼarintirinaka, munañapampi apnaqayasirinaka, qhorunaka, kunatï walïki uk uñisirinaka, traicioneronaka, jan amuytʼañ munirinaka, jachʼañchasirinaka, Diosar munasiñat sipansa pachpa munañapak thaqerinaka, Dios chuymäpkaspas ukham tukurinaka, janirak ukarjam sarnaqerinaka” (2 Tim. 3:1-5).

20. Diosan Reinopajj jumatak wali importantëtap ¿kunjamsa uñachtʼayasma?

• “Ukhamasti Diosan Reinopsa kunatï Diosatakejj cheqapäki uksa nayraqat thaqasipkakim” (Mat. 6:33).

• “Akham sasaw Jesusajj discipulonakapar säna: ‘Maynitejj nayar arkañ munchitojja, jupa pachpat armtʼaspan, tʼaqesiñ lawap apjjarusin jan qheparas arkitpan’” sasa (Mat. 16:24).

21. ¿Supayasa demonionakas khitinakäpjjesa?

• “Jumanakan awkimajj Diablowa [...]. Jupajj qalltkäna ukhatpach jiwayirïnwa” (Juan 8:44).

• “Jachʼa dragonajja, mä arunjja nayra asirojj aynachar jaqoqanitänwa, khititejj Diablo ukhamarak Supaya satäki, khititejj oraqen taqe jakirinakar engañjaski ukajja oraqer jaqoqanitänwa, angelanakapas jupamp chika jaqoqanitäpjjarakïnwa” (Apoc. 12:9).

22. ¿Kunjamsa Supayajj Jehová Diosarusa servirinakaparus kʼarintäna?

• “Warmejj akham sasaw asirur sarakïna: ‘Jardinan utjki uka qoqanakan achupjja manqʼasipkiristwa. Ukampis jardinan chika taypinkki uka qoqan achupatjja Diosajj akham siwa: “Uka qoqan achupjja janiw manqʼapjjañamäkiti ni llamktʼapjjañamäkisa, uk lurapjjäta ukhajja jiwapjjätawa” sasa’. Uk satajja asirojj warmir sarakïnwa: ‘Jumanakajj janiw jiwapkätati. Diosajj yatiwa, kuna uruntï uka qoqan achupat manqʼapjjäta ukhajja, nayranakamajj jistʼartaniwa. Ukatsti Diosjamäpjjätawa, kunatï walïki jan walïki uksa uñtʼapjjarakïtawa’ sasa” (Gén. 3:2-5).

• “Supayajj akham sasaw Jehová Diosar säna: ‘Kunapachatï maynejj niya jiwañan uñjasi ukhajja, vidap salvasiñatakejj kunanakatï jupan utjki taqe ukanakwa churaspaʼ” sasa (Job 2:4).

23. ¿Kunjamsa kunanaktï Supayajj siskäna ukanakan kʼarïtap uñachtʼayasma?

• ‘Jehová Diosarojj phoqat chuymampi servirakim’ (1 Crón. 28:9).

• “¡Jiwañajkamajj janipuniw Diosar taqpach chuymamp serviñ apanukkäti!” (Job 27:5).

24. ¿Kunatsa jaqenakajj jiwapjje?

• “Mä sapa jaqen juchapatwa juchajj aka mundor mantani, uka juchan utjatapatwa jiwañajj mantaniraki, ukhamatwa jiwañajj taqe jaqenakar katunti, taqenin juchachasipjjatap layku” (Rom. 5:12).

25. ¿Jiwatanakajj kunjamäsipkisa?

• “Jakir jaqenakajja jiwjjapjjañap yatisipjjewa, ukampis jiwatanakajj janiw kunsa yatipkiti” (Ecl. 9:5).

26. ¿Jiwatanakajj jaktanipjjaniti?

• “Cheqapar sarnaqer jaqenakasa jan cheqapar sarnaqer jaqenakas jaktanipjjapuniniwa” (Hech. 24:15).

27. ¿Qhawqha jaqenakas Jesusamp apnaqañatakejj alajjpachar sarapjjani?

• “Corderoruw Sion Qollu patjjan saytʼat uñjta, jupamp chikajja 144.000 ukhaniruw uñjarakta, jupanakan paranakapanjja jupan sutipampi Awkipan sutipampi qellqatänwa” (Apoc. 14:1).

Bibliat yatjjatañajja, Jehová Diosan leyinakaparjam sarnaqañataki ukhamarak mayitanakap phoqañatakiw yanaptʼawaytamjja. Ukatwa jichhajj sum sarnaqañatak chʼamachastajja, jakañ vidarus kunjamtï Diosajj uñjki ukhamwa uñj-jjaraktajja. Jehová Diosatakjam sarnaqañ amtatamatwa jichhajj suma yatiyäwinak yaqhanakar yatiytajja.

Akjjar jutki uka jisktʼanakajja, Jehová Diosan leyinakap jan armañatakiw yanaptʼätam. Jupan serviripjam katoqatäñatakejja, kun lurañamas wakisi kunanaksa jan lurañamäkaraki ukanakwa amtayarakïtam. Ukatjja Bibliarjam yatichat concienciamarjam taqe kun lurañataki ukhamarak Jehová Diosar jachʼañchkir taqe kuns lurañatakiw yanaptʼätam, janirakiw uk armkätati (2 Cor. 1:12; 1 Tim. 1:19; 1 Ped. 3:16, 21).

Jichhakamajj walja toqenakatwa Bibliat yateqawaytajja, ukatwa Jehová Diosamp apnaqatäñsa, jupan markapankañsa wal munpachätajja. Jichhajj yatjjatkañäni uka jisktʼanakasa textonakasa, kunjamsa congregacionansa, familiansa Diosar respetatam uñachtʼayañama, kunjamsa marka apnaqerinakar uñjañama uk amuyañatakiw yanaptʼätam. Kuntï Jehová Diosajj markapar wakichtʼañatakisa chʼamañchtʼañatakis luraski uk valoranit uñjañatakiw yanaptʼarakïtam. Tantachäwinakar saraskakiñatakisa ukan arstʼañatakis chʼamañchtʼarakïtamwa.

Yatjjatkañäni uka jisktʼanakajja, sapa phajjsi predicañasa kuntï Jehová Diosajj jaqenak layku luraski uk yatichañas wali wakiskirïtap amuyañatakiw yanaptʼätam (Mat. 24:14; 28:19, 20). Ukatjja Jehová Diosar jakañ vida katuyasiñasa bautisasiñas kamsañsa muni uk jan armañatakiw yanaptʼarakïtam. Jehová Diosan jachʼa khuyapayasiñap uñjasaw jupar taqe chuyma serviñ amtawaytajja, ukajj Jehová Diosar wal kusisiypacha.

1. ¿Casarat chacha warminakat kamsis Bibliajja? ¿Bibliarjamajj kuna jucha utjipanaksa maynejj divorciasispa?

• “¿Janit liytʼapkta? Khititejj qalltatpach jupanakar lurki ukajja, chacha warmi luräna. Jupajj akham sänwa: ‘Ukatwa chachajj awkiparus taykaparus jaytjjani, ukatsti warmipampiw mayachasjjarakini, panipasti mä jañchikëjjapjjaniwa’ sasa. Ukhamasti janiw paninëjjapjjeti, jan ukasti mä jañchikëjjapjjewa. Ukhamajj kuntï Diosajj mayachki ukjja, jan khiti jaqes jaljtaypanti”. “Khititejj jan qʼañu jucha utjkipan warmipat divorciaski, ukatsti yaqhampi casaraski ukajja, adulterio juchwa luri” (Mat. 19:4-6, 9).

2. Chacha warmjam jakapki ukanakajja, ¿kunatsa leyinakarjam casaratäpjjañapa? Jumatï casaratästajja, ¿matrimoniomajj markan leyinakaparjam suma qellqantatati?

• “Jilatanakarojj akanak amtayaskakim: jupanakajj gobiernonakarusa autoridadanakarusa istʼapjjañapawa” (Tito 3:1).

• “Casarasiñajj taqeninsa respetomp uñjatäpan, casadonakan ikiñapas jan qʼañuchatäpanti, qʼañu jucha luririnakarusa adulterio juchan sarnaqerinakarusa Diosaw juchañchani” (Heb. 13:4).

3. ¿Familian kun lurañas waktʼtamjja?

• “Nayan wawaja, awkiman cheqañchäwiparojj istʼam, taykaman yatichäwinakap jan apanukumti” (Prov. 1:8).

• “Chachajj warmipan pʼeqepawa, kunjamtï Cristojj congregacionan pʼeqepäki ukhama”. “Casarat chachanaka, warminakamarojj munasisipkakim, kunjamtï Cristojj congregacionar munaski [...] ukhama” (Efes. 5:23, 25).

• “Awkinaka, jan wawanakamarojj colerasiyapjjamti, antisas kunjamtï Jehová Diosajj munki ukarjam cheqañchasa ewjjtʼasa uywasipkakim” (Efes. 6:4).

• “Wawanaka, awk taykamarojj taqe kunansa istʼapjjam, ukaw Tatiturojj wal kusisiyi” (Col. 3:20).

• “Casarat warminaka, chachanakamar ukhamarakiw istʼapjjañama” (1 Ped. 3:1).

4. ¿Kunatsa jakañ vidarojj respetomp uñjañasa?

• “[Diosaw] taqenirus jakañsa, samansa, taqe kunsa churi”. “Jiwasas jupïpanwa jakasktanjja, sarnaqasktanjja, utjaskaraktanjja” (Hech. 17:25, 28).

5. ¿Kunatsa jaqerusa janïr naski uka wawarus janipun jiwayasiñapäki?

• “Pä chachanakatï nuwasisin mä usur warmir usuchjapjjani, ukatjja uka [...] warmitï jan ukajj wawapatï jiwani ukhajja, jakañatjja jakaña [churañapawa]” (Éx. 21:22, 23).

• “Janïr nayajj naskayäta ukhaw nayranakamajj nayar uñjitäna, cuerpojan taqpach partenakapaw libroman qellqantatäjjäna, cuerpojan partenakapajj kuna urunakansa formasïna ukas qellqantatäjjänwa, janïr ukanakajj utjkäna ukhaw qellqantatäjjäna” (Sal. 139:16).

• ‘Jehová Diosajj jan juchan jaqer jiwayañjja uñisiwa’ (Prov. 6:16, 17).

6. ¿Jehová Diosajj wila toqet kamsisa?

• “Wilatsa, jaychjat animalanakatsa [...] jitheqtasipkakim” (Hech. 15:29).

7. ¿Kunatsa jilat kullakanakasar munasiñasa?

• “Nayajj mä machaq mandamiento churapjjsma, jumanakajj maynit maynikam munasipjjam. Kunjamtï nayajj munasipksmajja, ukhamarak jumanakajj maynit maynikam munasipjjam. Cheqpachans jumanakatejj maynit maynikam munasipjjätajja, taqeniw nayan discipulonakajäpjjatam yatipjjani” (Juan 13:34, 35).

8. Mayninakaru contagioso usumpi jan contagiañatakejja: 1) ¿kunatsa usutäki ukajj mayninakar jan qhomantañapäki ni jampʼattʼañapäkisa? 2) Mayninakajj jan utapar invitapkani ukhajja, ¿kunatsa contagioso usunïki ukajj jan chuym ustʼayasiñapäki? 3) Maynitï contagioso usumpi contagiasitap amuyaschi ukhajja, ¿kunatsa casarasiñatak maynimp janïr uñtʼaskasajj análisis de sangre lurayasiñapa? 4) Maynitï contagioso usunïchi ukhajja, ¿kunatsa coordinador del cuerpo de ancianos jilatar janïr bautisaskasajj yatiyañapa?

• “Jan khitirus kunansa manüpjjamti, antisas maynit maynikamajj munasiñak manüpjjam. [...] ‘Jaqe masimarojj juma kikparjam munasiñamawa’. Khititejj munasiñanïki ukajj janiw jaqe masipar jan walinak lurkiti” (Rom. 13:8-10).

• “Jan jumanak pachpatak llakisipjjamti, jan ukasti mayninakat llakisipjjarakim” (Filip. 2:4).

9. ¿Kunatsa Jehová Diosajj mayninakar perdonañas muni?

• “Maynitejj yaqha contra quejasiñatak razonanïchi ukhasa, maynit maynikam aguantasisipkakim, jumanakkamajj taqe chuyma perdonasisipkakim. Jehová Diosajj taqe chuymaw perdonapjjtamjja, ukhamarak jumanakajj perdonasipjjam” (Col. 3:13).

10. Mä jilatatï jan ukajj mä kullakatï kʼarintätam jan ukajj engañjätam ukhajja, ¿kunsa lurañama?

• “Jilamatï juma contra juch lurchejja, kunansa jupajj pantjasi uk qhanañchir saram, panimakiw parlapjjäta. Jupatï istʼätamjja, jilamarojj cheqa thakiruw kuttʼayanjjäta. Janitejj istʼañ munkani ukhajja, mayniru jan ukajj paninir irpjjarusiwayam, ukhamat paya jan ukajj kimsa testigonakan qhanañchatap istʼasajj taqe kunas cheqati janicha ukajj yatisiñapataki. Jupanakar jan istʼañ munkani ukhajja, congregacionar yatiyam. Janirak congregacionarus istʼañ munkani ukhajja, akapachankir jaqëkaspasa jan ukajj impuesto cobrir jaqëkaspas ukhamak uñj-jjam” (Mat. 18:15-17).

11. ¿Kunsa Jehová Diosajj aka jan wali luräwinakat amuyi?

▪ Qʼañu jucha lurañata

▪ Idolonakar adorañata

▪ Chachapura jan ukajj warmi pura ikintasiñata

▪ Lunthatasiñata

▪ Apuestanak lurañata jan ukajj qollqe layku anatañata

▪ Machañanakata

• “Jan jumanak pachpajj engañjasipjjamti. Qʼañu juchan sarnaqerinakasa, idolonakar adoririnakasa, adulterio juchan sarnaqerinakasa, warmir tukurinakasa, chachapura ikintasirinakasa, lunthatanakasa, taqe kun munirinakasa, machirinakasa, jaqe masipar jiskʼachjirinakasa, mayninakat kʼarimp kʼarimpi apaqerinakasa, janiw Diosan Reinop katoqapkaniti” (1 Cor. 6:9, 10).

12. Jumatï qʼañu jucha lurañar (qʼañu jucha lurañajj jan casadökasin maynimp ikintasiñawa) purtʼasirjamäkäta ukhajja, ¿kun lurañsa amtäta?

• “Qʼañu juchat jitheqtapjjam” (1 Cor. 6:18).

13. ¿Kunatsa vicio katuyiri jan ukajj pʼeq mayjtʼayiri qollanakamp qolljasiñajj jan walïki? ¿Kunatsa doctoran mayitaparjamak uk lurañasa?

• “Mä sacrificior uñtatay cuerponakam loqtapjjam, uka sacrificiojj jakkiri, santo, Diosan chuymapar purtʼkiri ukhamäñapawa, ukhamatwa Diosarojj suma amuyumpi servipjjäta. Jan jukʼampejj akapachankir jaqenakat yateqasis sarnaqjjapjjamti, jan ukasti amuyunakam machaqar tukuyapjjam, ukhamat machaqar tukupjjañamataki, ukhamatwa jumanak pachpajj Diosan munañap yatipjjäta. Diosan munañapajj sumawa, perfectowa, jupan chuymapsa kusisiyarakiwa” (Rom. 12:1, 2).

14. ¿Jehová Diosajj demonionakamp chikachasiñar uñiski ukanakat mä qhawqhajj kawkïrinakasa?

• “Janiw jumanak taypinjja [...] yatirinakasa, magia luririnakasa, kun uñasinsa jutïrit yatirinakasa, layqanakasa, layqasiñatak arsut arunakamp layqjjerinakasa, jiwatanakamp parlirinakar jisktʼasirinakasa, yatirinakar jisktʼasirinakasa, jan ukajj jiwatanakar jisktʼasirinakas utjañapäkiti” (Deut. 18:10, 11).

15. Maynitï jachʼa juchar purtʼasispa ukhajja, ¿kunsa Jehová Diosamp sum apasiskakiñatakejj jankʼak lurañapa?

• “Juchajwa nayajj jumar arsusiyäta, janiw pantjasitaj imtʼkayätti. Akham sarakiyätwa: ‘Jehová Diosaruw jan wal luratanakaj-jja arsusëjja’ sasa” (Sal. 32:5).

• “Maynitejj jumanak taypin usutächi ukhajja, congregacionankir ancianonakar jawspan, ukhamatwa jupanakajj Jehová Diosan sutipjjaru aceitempi uchtʼasinjja jupatak oración lurapjjani. Oracionajj Diosar confiyasa lurasini ukhajja, usutarojj waliptayaniwa, Jehová Diosajj sartayaniwa, juchanak lurchi ukhasa, perdonarakiniwa” (Sant. 5:14, 15).

16. Mä cristianon jachʼa jucha luratap yatïta ukhajja, ¿kunsa lurañama?

• “Maynitï yaqhar jan wal lurir uñjchi jan ukajj uka toqet istʼchi, testigot sarañapatak mä yatiyäwi istʼarakchi, ukampis jan yatiykchi ukhajja, jupajj juchanïniwa, juchapat castigatarakïniwa” (Lev. 5:1).

17. “Janiw Jehová Diosan Testigopäjjeti” sasin maynit yatiyasini ukhajja, ¿kunjamsa jupar uñjañasa?

• “Maynitï jilatäkasina qʼañu juchan sarnaqerïchi, taqe kun munir jaqëchi, idolonakar adorirïchi, yaqhanakar jiskʼachjir jaqëchi, machirïchi, jan ukajj lunthatasirïchi ukhajja, jan jukʼampi uka jaqempejj chikachasipjjamti janirak manqʼapjjamsa” (1 Cor. 5:11).

• “Maynitejj jumanakan ukar jutchi, Criston yatichäwinakapsa jan apankarakchi ukhajja, jan utanakamar katoqapjjamti, janirak aruntapjjamsa” (2 Juan 10).

18. ¿Kunatsa Jehová Diosar munasipki ukanakak juman suma amigonakamäpjjañapa?

• “Khititï yatiñan jaqenakamp sarnaqki ukajja yatiñan jaqeruw tukuni, ukampis khititï jan amuytʼasir jaqenakamp chikachaski ukajja jan waliruw purtʼasini” (Prov. 13:20).

• “Jan engañayasipjjamti. Jumanakatejj jan wali jaqenakampi chikachasipjjätajja, kuna suma luräwinaktï lurasipkta ukjja armasjjapjjätawa” (1 Cor. 15:33).

19. ¿Kunatsa Jehová Diosan Testigonakapajj politicar jan mitisipki?

• ‘Jupanakajj janiw aka mundonkirïpkiti, kunjamtï naya Jesusajj jan aka mundonkirïkta ukhama’ (Juan 17:16).

20. ¿Kunatsa jumajj autoridadanakar istʼañama?

• “Taqe jaqenakaw jilïr autoridadanakar istʼañapa. Janitï Diosäkaspajja janiw autoridadanakajj utjkaspati. Utjki uka autoridadanakajj Diosan permisopampiw lugaranakapar uchatäpjje” (Rom. 13:1).

21. ¿Jaqenakan apsut mä leyitï Jehová Diosan leyip conträspa ukhajj kamachasmasa?

• “Jaqenakar istʼañat sipansa Diosar istʼapjjañajawa” (Hech. 5:29).

22. Mä trabajo janïr katoqkasajja, ¿kawkïr textonakas akapachar jan mitisiñatakejj yanaptʼiristam?

• “Markanakajja janiw yaqha markanak contrajj espada aytjjapjjaniti, janirakiw jukʼampejj guerran nuwasiñatak yateqjjapjjaniti” (Miq. 4:3).

• “Nayan markaja, uka taypit [jan ukajj Jachʼa Babiloniat] mistjjapjjam, janitejj jumanakajj jupamp chika juchachasiñ munapksta, janitejj plaganakapsa katoqañ munapksta ukhajj uka taypit mistjjapjjam” (Apoc. 18:4).

23. ¿Kuna kasta anatañanaksa ukhamarak kusistʼañanaksa ajlliñama, kawkïrinaksa apanukuñamaraki?

• “Jehová Diosajj [...] khititï nuwasiñanakar munaski ukarojj uñisiwa” (Sal. 11:5).

• “Kunatï jan walïki ukjja uñisipjjam, kunatï walïki ukat katjjarusipjjam” (Rom. 12:9).

• “Taqe kunatejj cheqäki, taqe kunatejj wakiskirïki, taqe kunatejj cheqapäki, taqe kunatejj qʼomäki, taqe kunatejj munkañäki, taqe kunatejj respetomp uñjatäki, taqe kunatejj sumäki, taqe kunatejj jachʼañchkañäki taqe ukanakat amuytʼasipkakim” (Filip. 4:8).

24. Jehová Diosan Testigonakapajja, ¿kunatsa yaqha religionanakan cultonakaparu jan ukajj lurañanakapar jan mitisipki?

• “Janirakiw ‘Jehová Diosan mesapampita’ demonionakan mesapampit manqʼapkasmati” (1 Cor. 10:21).

• “Jehová Diosajj akham siwa: ‘Jupanak taypit mistjjapjjam, jitheqtjjapjjam, jan jukʼampi uka qʼañunak llamktʼapjjamti, nayajj katoqasipjjämawa’ sasa” (2 Cor. 6:17).

25. Mä fiestar sarätati janicha uk amuytʼasiñatakejja, ¿kawkïr textonakas yanaptʼiristamjja?

• “Jupanakajj markanakampiw chikachasipjjäna, uka markanakan costumbrenakaparjamaw sarnaqjjapjjarakïna. Jupanakan idolonakapar servisipkakïnwa, uka idolonakapajj mä tramparuw jupanakatakejj tukjjäna” (Sal. 106:35, 36).

• “Jiwatanakajj janiw kunsa yatipkiti” (Ecl. 9:5).

• “Jupanakajj janiw aka mundonkirïpkiti, kunjamtï nayajj jan aka mundonkirïkta ukhama” (Juan 17:16).

• “Jumanakajj walja tiempow akapachankir jaqenakan munañanakap lurjjapjjtajja, jan phenqʼani jucha lurasa, jan walinak wal munasa, jiljañamp machjasisa, jan wali loqhe fiestanakana, machjasiñ fiestanakan sarnaqasa ajjtaskañ idolonakar adorasa ukhamaw nayrajj sarnaqapjjayätajja” (1 Ped. 4:3).

26. Biblian qellqatäki uka sarnaqäwinakajj cumpleañonak amtätati janicha uk amuytʼasiñatakejj ¿kunjamsa yanaptʼiristamjja?

• “Kimsa uru pasatatjja faraonan cumpleañopänwa. Jupasti mä jachʼa manqʼäwi taqe servirinakapatakejj wakichäna, ukatjja servirinakapan nayraqataparuw coperonakan pʼeqtʼiripampiru panaderonakan pʼeqtʼiripampir irptayanïna. Coperonakan pʼeqtʼiriparojj nayra trabajoparuw kuttʼayjjäna [...]. Ukampis panaderonakan pʼeqtʼiriparojj mä lawaruw warkkatayäna” (Gén. 40:20-22).

• “Herodesan cumpleañop amtapjjäna ukhajja, Herodías warmin phuchapaw uka horasan invitadonak nayraqatan thoqtʼäna. Uk uñjasasti Herodesajj walpun kusisïna, ukatwa jupajj kuntï maykitäta uk churäma sasin uka tawaqor mä juramentompi arsüna. Uk satasti mamapan yatichataw uka tawaqojj akham säna: ‘Bautisir Juanan pʼeqep mä bandejar churita’ sasa”. “[Reyisti] khitasajj Juanan pʼeqepwa carcelan apaqayanïna” (Mat. 14:6-8, 10).

27. ¿Kunatsa jumajj ancianonakan ewjjtʼanakapar istʼañama?

• “Khitinakatejj jumanak taypin irpirïpki ukanakarojja istʼapjjam, humilde chuymampi istʼapjjarakim, jupanakajj jumanakaruw cuidasipktamjja, uka luräwipatjja Diosaruw cuenta churapjjarakini. Ukhamat uka luräwip llakita phoqañat sipansa, wali kusisit phoqapjjañapataki, janitejj ukhamäkaspajja jumanak pachpatakejj jan walïspawa” (Heb. 13:17).

28. Sapüru Biblia liyiñataki ukhamarak Bibliat yatjjatañatak tiempo apstʼasiñajja, ¿kunatsa jumatakisa familiamatakis wali wakiskirïñapajja?

• “Jupajj Jehová Diosan leyiparojj wal munasi, uruy arumaw Diosan leyipat liytʼi lupʼiraki. Uka jaqejj jawiranak jakʼan ayruntat mä qoqjamäniwa, uka qoqajj tiempoparuw achoqani, janirakiw laphinakapas wañskaniti. Taqe kuntï jupajj lurkani ukajj sumaruw sarani” (Sal. 1:2, 3).

29. ¿Kunatsa tantachäwinakar sarañasa ukan arstʼañasa gusttamjja?

• “Jilanakajaruw nayajj sutimat yatiyäjja, congregación taypinwa nayajj jachʼañchäma” (Sal. 22:22).

• “Mayninakajj kunjamäsipkisa ukjja amuyapjjapuniñäni, ukhamat munasiñasa suma luräwinakasa jukʼamp utjañapataki. Tantachäwinakasjja janirak jaytanukupjjañäniti, kunjamtï yaqhepanakajj jaytanukuñar yatitäpki ukhamjja, antisas maynit maynikam chʼamañchtʼasipjjañäni, Diosan urupajj jakʼankjjatap yatisajj jukʼamp uk lurapjjañäni” (Heb. 10:24, 25).

30. ¿Kuna wakiskir luräwsa Jesusajj jaytawayistu?

• “Ukhamasti sarapjjam, taqe markanakankir jaqenakar nayan discipulojar tukuyapjjam, bautisapjjam [...]. Ukatsti taqe kuntï nayajj jumanakar yatichapksma ukanak phoqañ yatichapjjarakim” (Mat. 28:19, 20).

31. Contribución churktan ukhasa jilat kullakanakar yanaptʼktan ukhasa, ¿kunjam chuymamp churañassa Jehová Diosajj muni?

• “Wali valorani yänakamampi Jehová Diosar jachʼañcham” (Prov. 3:9).

• “Sapa maynejj kunjamtï chuymapan amtki ukarjam churpan, janiw pä chuymajj churañapäkiti, ni obligatas churañapäkiti, Diosasti kusisit chuymampi churirirojj munasiwa” (2 Cor. 9:7).

32. ¿Kuna jan walinakansa cristianonakajj uñjasiñäni?

• “Kusisiñanïpjjew cheqapar sarnaqapjjatap layku arknaqata uñjasirinakajja, alajjpachankir Reinojj jupanakankiwa. Kusisiñanïpjjtawa naya layku jaqen insultata, arknaqata, kunayman jan wali arunakampi kʼarintata uñjasirinakajja. Ukhamarakiw nayrajj profetanakarus arknaqapjjäna. Jumanakajj kusisipjjam, wal kʼuchisipjjarakim, mä jachʼa bendicionaw jumanakatakejj alajjpachan utji” (Mat. 5:10-12).

33. Jehová Diosan Testigopjam bautisasiñajj ¿kunatsa wali kusiskañajja?

• “Arunakamasti wali kusisiñaruw tukjjaraki, chuymajan wali kusisiñaparu, kuna laykutejj nayajj juman sutim apta, ejercitonakan Jehová Diosapa” (Jer. 15:16).

Jilapartejja Jehová Diosan Testigonakapan asambleanakapanwa bautisasipjje. Jupanakatak waktʼayat discurso tukuyarojja, arstʼir jilatajj saytʼasipjjañapatakiw bautisasirinakar mayi, ukjjarusti aka pä jisktʼanakar jachʼat jaysapjjañapatakiw mayiraki:

1. ¿Juchanakamat arrepentisjjtati, Jehová Diosar jakañ vidam katuyasjjtati, “Jesucristo toqew Diosajj salvistu” sasin confiyaraktati?

2. Bautisasisajj Jehová Diosan Testigopätama ukhamarak Diosan markapankjjatamwa uñachtʼayasktajja, ¿uk amuytati?

Uka jisktʼanakar “jïsa” sasin sapjjatapajja, Jesusajj sacrificiot loqtasiwayki ukar confiyapjjatapa ukhamarak Jehová Diosar jakañ vidap taqe chuyma katuyasipjjatapwa bautisasiñ munirinakajj uñachtʼayapjje (Rom. 10:9, 10). Ukampis bautisasiñ munirinakajja, janïräkipanwa oracionan Diosar mayisisajj uka jisktʼanakat lupʼipjjañapa. Ukhamatwa bautisasiñ urojj “jïsa” sasin taqe chuym sapjjani.

¿“Jumarukiw servïma, kuntï jumajj munkta uk lurañaw nayatakejj nayrankani” sasin Jehová Diosar jakañ vidam katuyasiñatak mä oración lurjjtati?

¿Bautisasiñatak wakichtʼatäjjatamti amuyasta?

¿Kunjam isinis maynejj bautisasiñapa? (1 Tim. 2:9, 10; Juan 15:19; Filip. 1:10).

‘Humilde chuymampi wali amuyumpiw’ isisiñasa, ukhamatwa ‘Dios chuymätas’ uñachtʼayañäni. Ukhamasti bautisasirinakajj janiw jan walinak piensayirjam isinak uchasipjjañapäkiti, isipajj janirakiw kuna letranakanïñapäkisa ni dibujonakanïñapäkisa. Uka isinakajj qʼomäñapawa, bautismor respetompi uñjatapwa uñachtʼayañaparaki.

Bautisasiñ horasajj ¿kunanak lurañas jan walïki? (Luc. 3:21, 22).

Jesusan bautisasitapajja cristianonakatakejj wali yateqaskayawa. Bautismojj wali respetomp uñjatäñapajj kunja wakiskirisa ukjja, Jesusajj luratanakapampiw uñachtʼayäna. Ukhamajj bautismo horasan mayninakar laruyirjam parlañasa, anatañasa, yaqha ukhamanak lurañas janiw walïkaspati, uman nadañas janirakiw walïkaspati. Umat mistjjasajja, mä jachʼa regalsa katoqkaspa ukham janiw bautisasirejj amuyañapäkiti, ni jachʼañchasiñapäkisa. Bautisasiñ urojj wali kusiskañ uruwa, ukampis wali respetomp uñjatäñapawa.

Tantachäwinakar jan faltasis sarañasa jilat kullakanakamp chikachasiñasa, ¿kunjamsa Jehová Diosar wiñayatak serviñ arsuwaykta uk phoqañatak yanaptʼätamjja?

Bautisaskäta uka qhepatjja, ¿kunatsa Bibliat yatjjataskakiñatakisa predicaskakiñatakis tiempo apstʼasiñama?