¿Kunjam jakasiñassa Diosajj muni?

PERIODICONSA, televisionansa jan ukajj radionsa, jan wali yatiyäwinakakiw yatiyasiski, ukanjja jan wali luräwinakata, guerranakata jan ukajj jaqe jiwayirinakatakwa yatiyasiski. Inas jumajj usuntat uñjassta jan ukajj familiaramat maynejj jiwchi, ukhaman uñjasisajj llakitaw jikjjataspachäta.

Inas akham jisktʼassta:

• ¿Diosajj akham jakañajti munpacha?

• ¿Kawkinsa jan waltʼäwinakar saykatañatakejj yanaptʼa jikjjatirista?

• ¿Suma jakañajj utjaspati?

Uka jisktʼanakarojj Bibliaw sum qhanañchi.

JAN WALINAK CHHAQTAYASAJJ SUMA JAKASIÑ DIOSAJJ APANJJANI SASAW BIBLIAN YATICHI.

• Janiw jiwañasa, llakisiñasa, jachañasa jukʼamp utj-jjaniti (Apocalipsis 21:4).

• Cojonakajj taruja qallunakjamaw tʼijnaqapjjani (Isaías 35:6).

• Juykhunakajj uñj-jjapjjaniwa (Isaías 35:5).

• Jiwatanakajj jaktanipjjaniwa (Juan 5:28, 29).

• Janiw khitis usuntjjaniti (Isaías 33:24).

• Aka oraqenjja taqenitakiw manqʼañajj utjani (Salmo 72:16).

  

¿KUNJAMSA BIBLIAN YATICHÄWIPAJJ YANAPTʼISTU?

Nayrïr paginanak liytʼasajja, inas jumajj uka arunakajj janiw phoqaskaspati sasin amuysta. Ukampis Diosaw ukanak lurañ amti, niyaw phoqarakini. Taqe ukanakajj kunjamas phoqasini ukjja Bibliaw sum qhanañchi.

Kunjamatsa jiwasajj jichha tiempon kusisit jakassna uksa Bibliajj qhanañcharakiwa. Kunanakas llakisiytam ukanakat mä jukʼa amuytʼam. Inas qollqe toqeta jan ukajj familiamat llakisisksta, jan ukajj inas usutästa, inas familiamat khitis jiwchi. Bibliaw uka llakinakar saykatañatakejj yanaptʼätam. Aka jisktʼanakar qhanañchasaw Bibliajj chuymachtʼätam:

• ¿Kunatsa tʼaqestanjja?

• ¿Kunjamsa jan waltʼäwinakar saykatsna?

• ¿Kunjamatsa mä familiajj kusisit jakasispa?

• ¿Jiwatanakajj kawkinkapjjesa?

• ¿Jiwat familiaranakasampejj mayamp jikissnati?

• ¿Kunatsa Diosajj arunakap phoqapuniniw sasin confiytanjja?

Aka libro liyisajja, Biblian yatichäwinakap wal yateqañ munatamwa uñachtʼayta. Aka librojj wal yanaptʼätam. Sapa parrafonwa jisktʼanakajj utji, ukaw Bibliat sum yateqañatakejj yanaptʼätam. Aka librompejja, walja jaqenakaw Jehová Diosan Testigonakapamp Bibliat yateqasipki, jumas ukham yateqarakismawa. Bibliajj kunsa yatichi uk yateqañamatakejj Diosaw bendisïtam.