3 JISKTʼA
¿Kunjamatsa awk taykajamp sum parltʼasiristjja?
¿KUNSA JUMAJJ LURASMA?
Guillermo sat waynat amuytʼañäni, jupajj 17 maraniwa. Mä miércoles jaypʼojja, tareanakap tuktʼayasaw televisión uñtañatak wali sum qontʼasi.
Ukhamaruw awkipajj cuartor mantanisin akham toqenoqe:
“¡Guillermo! Televisionak uñchʼukisktajja. Sullkamar tareanakap lurañ yanaptʼanim. ¡Jumajj ukham jan istʼasiripunïtawa!” sasa.
“Toqesiñakistï” sasaw Guillermojj jiskʼatak arsusin coleri.
“¡Kamsta!” sasaw awkipajj jupar jakʼachasi.
“Janiw kamsksmasa” sasaw Guillermojj saraki.
Uk istʼasajja, “¡janiw ukham parlaskitätati!” sasaw awkipajj wali colerat toqenoqe.
Ukhaman jan uñjasiñatakejja, ¿kunsa jumajj lurasmäna?
NAYRAQAT SUM AMUYTʼASIM
Awk taykamamp sum parltʼasiñajja, auto apnaqañamp sasispawa. Thakin jan waltʼäwinak utjaspa ukhajja, ¿janit yaqha thakinjam sarañ amtkasma?
AMUYTʼAÑATAKI:
Leah tawaqojj akham siwa: “Nayatakejja, awkijamp parlañajj chʼamakiwa. Inamayakis jupar parljjaykirista ukham amuyasta. ‘Nayarut parljjayista’ sasakiw awisajj situ”.
LEAH TAWAQOJJ AKANAKWA LURASPA:
Awkipar toqjjaspawa.
“¡Istʼitaya! ¡Akajj wali wakiskiriwa!” sasaw Leah tawaqojj awkipar toqjje.
Amuktʼjjakispawa.
Leah tawaqojj janiw awkipar llakinakap yatiyañ munjjeti.
Yaqha horasanwa awkipamp parlaspa.
Leah tawaqojj yaqha horasanwa awkipamp parli, jan ukajj mä carta toqew kunjamsa jikjjatasi uk qellqtʼi.
Jumatakejj ¿kawkïr lurañapas wakisispa?
AK AMUYTʼAM: Leah tawaqon awkipajj yaqha toqenakat lupʼiskatap laykojj janiw phuchapan parljjayatap amuykiti. Ukhamajj Leah tawaqotï awkipar toqjjaspa ukhajja, kunatsa ukham colerasi uk janiw awkipajj amuykaspati. Ukham lurasajj janiw awkipar respetatapsa uñachtʼaykaspati, ni jupan yanaptʼapsa katoqkaspati (Efesios 6:2). Ukhamajj awkipar toqjjañajj janiw jupatakis ni awkipatakis askïkaspati.
Jan waltʼäwinak utjkipansa, awk taykamamp sum parltʼasiñataki ukat sum apasiñatakiw chʼamachasiñama.
Amuktʼjjañajj waljamäspawa, ukampis janiw walïkaspati. ¿Kunatsa? Jan waltʼäwinak askichañ munchi ukhajja, awkipamp parlañapawa. Awkipasti, kunas phuchapar llakisiyi uk yatiñaparakiwa, ukhamatwa jupar sum yanaptʼaspa. Ukhamajj Leah tawaqotï jan kamskani ukhajja, janiw kuns jikjjatkaniti.
Yaqha horasan awkipamp parlañajj jukʼamp askïspawa, ¿kunatsa? Awkipajj qalltan janis istʼkchinejja, Leah tawaqojj yaqha horasanwa jupamp parlani. Mä carta toqes awkipar yatiyani ukhajja, chuymapan sumakiw jikjjatasini.
Carta qellqasajja, kunjamsa jikjjatasi uk sumwa Leah tawaqojj awkipar qhanañchaspa. Awkipasa, cartap liytʼasajj sumwa amuyarakispa. Ukhamajj yaqha horasan awkipamp parlañajja, Leah tawaqotakisa awkipatakisa jukʼamp askïspawa. Awkipamp parlasasa jan ukajj mä carta qellqasasa, “kunanakatejj sumankaña apanki ukanak thaqaskakiñäni” sasin Bibliajj ewjjtʼkistu ukarjam luratapwa Leah tawaqojj uñachtʼayani (Romanos 14:19).
¿Kunanaksa Leah tawaqojj lurarakispa?
Kunanaksa Leah tawaqojj lurarakispa ukat ukham lurasajj kuna askinakas utjaspa uk amuytʼasim.
QHANA ARUNAKAMPIW PARLTʼAÑAMA
Ak janipun armamti: kuntï awk taykamar siskäta uk inas jupanakajj jan sum amuyapkchiniti.
AMUYTʼAÑATAKI:
“¿Kunatsa coleratäta?” sasin awk taykaman jisktʼatajja, “janiw uka toqet parlañ munkiti” sasma ukhajj ¿kunsa amuyapjjaspa?
“Janiw awk taykajar confiyjjti. Antisas jupanakamp parlañat sipansa amigonakajampiw parlä” siskasmas ukhamwa awk taykamajj amuyapjjaspa.
Jan waltʼäwins uñjaskasma ukham amuytʼañäni, awk taykamajj yanaptʼañ munapjjtamwa, ukampis “jan llakisipjjamti, nayaw uk askichaskä” sasma ukhajja, ¿kunjamakïspasa?
¿Awk taykamajj kunsa amuyapjjaspa?
¿Kun sañas jukʼamp askïspa?