Ezequielajj pusi angelanakwa uñjäna

Ezequielajj inas toronakaru leonanakaru uñtasit jachʼa estatuanak palacio punkunakana templo punkunakan uñjchïna, ukanakajj jan walinakat jarkʼaqasiñatak uchatänwa, uka estatuanakajj chheqanakani, jaqe pʼeqeni ukhamäpjjänwa. Taqe cheqanwa nayra Asiria ukhamarak nayra Babilonia markanakan utjarakïna. Jaqenakajj inas uka jachʼa estatuanak uñjasajj wal musparapjjchïna, Ezequielas ukhamarakiw musparpachäna, yaqhep estatuanakajj 6 metronakanïnwa. Uñkatatajj wali chʼamanïpkaspas ukhamänwa, ukampis qalat luratakïpjjänwa, janirakiw vidanïpkänti.

Ezequielajj visionan uñjkäna uka angelanakajj janiw uka estatuanakjamäkänti, jan ukasti jakkir angelanakänwa. Uk uñjasajja, Ezequielajj wal musparpachäna, ukatwa Ezequiel libro qalltan 11 kuti ‘angelanaka’ sasin sispachäna (Ezeq. 1:5-22). Visionan uñjkäna uka angelanakajja, Diosan tronop manqhanwa juntuki ukhamarak mä toqeruki sartapjjäna, uk uñjasajja Diosajj taqe luratanakapar apnaqatapwa Ezequielajj amuypachäna. Jichhürunakanjja, Ezequielajj uñjkäna uka visionajj jiwasatak wali musparkañarakiwa, Jehová Diosajj wali jachʼätapa, wali chʼamanïtapwa uñachtʼayistu, taqe luratanakapar apnaqatapwa uñachtʼayarakistu (1 Crón. 29:11).