1, 2. Ezequiel 47:1-12 textorjamajja, ¿kunsa Ezequielajj visionan uñjäna, kunsa ukat yateqarakïna? (Aka yatichäwi qalltan utjki uka dibujo uñjjattʼäta).

EZEQUIELAJJ mä visionan templo uñjkäna ukat yatjjataskakiñäni. Uka visionanjja templot mä jawir misturwa uñjäna, jupajj kawknämtï chʼuwa umajj sarkäna uka lado sararakpachäna (Ezequiel 47:1-12 liytʼañataki). Uka umajja santuarion punkupat mistusajj taqpach templo pasäna, ukatsti inti jalsu toqenkir punku jakʼa pasarakïna. Ezequielamp sarkäna uka angelajja, templo anqaruw Ezequielar irpsüna, ukatsti sarkasajj qhawqsa templot jayarstʼapjjäna ukwa midtʼarakïna. Angelasti walja kutiw jawir paskatañap mayïna, ukhamatwa Ezequielajj uka jawiran jukʼamp manqhäjjatap amuyäna. Uka jiskʼa jawirajj jachʼa jawiraruw tukjjäna, janirakiw kayuk paskatañjamäjjänti.

² Uka jawirajj Mar Muerto qotar puritapwa Ezequielajj uñjäna. Kawkirutï jawirajj purkäna uka cheqarojj suma umaruw tukuyäna, jakañ vida utjayäna, chawllanakas waljaw utj-jjarakïna. Uka jawira jakʼanjja, kunayman fruta alinakaw utjäna, sapa phajjsirakiw frutanakajj achoqäna, laphinakapas wali qollarakïnwa. Taqe ukanakajja wal Ezequielar chuymachtʼpachäna, jutïr urunaksa kusisit suyañatakiw yanaptʼarakpachäna. Ukampis ¿uka profeciajj kunjamsa Ezequielatakisa yaqha markar apata judionakatakis phoqasïna? ¿Kunjamsa jichhürunakan phoqasiraki?

¿Yaqha markar apata judionakatakejj kunjamsa Ezequielan profeciapajj phoqasïna?

3. ¿Ezequiel tiempon jakiri judionakajj kunatsa uka visionajj janiw cheqpach jawirat parlkiti sasin amuyapjjpachäna?

³ Ezequiel tiempon jakir judionakajja, ‘cheqapuniw mä jawirajj utjani’ sasin janiw amuyapkpachänti. Ezequielan profeciap istʼasajja, inas jupanakajj kuntï Joel profetajj pä patak maranak nayrajj siskäna uk amtapjjchïna (Joel 3:18 liytʼañataki). Joel profetajj akham sasaw qellqäna: ‘Qollunakat mosqʼa vinow chʼaqarani, jiskʼa qollunakat lechew jalarani [...]. Jehová Diosan utapat mä uma jalsuw mistuni’ sasa. Ukampis yaqha markar apata judionakajj Joel profetan profeciap istʼasajja, janiw kunjamtï siskäna ukhampun phoqasiñap suyapkänti.a Ukatwa Ezequielan profeciaparjamajj ‘janiw cheqpachapun mä jawirajj utjkaniti’ sasin uka judionakajj amuyapjjpachäna. Ukhamasti ¿kunsa Jehová Diosajj yatichañ munäna? Ezequielan visionapat yaqhep cheqanakajj kamsañsa muni ukajj Biblian qellqatawa. Jichhajja, uka profecianakajj phoqasipuniniwa sañatakejj kimsa razonanakat yatjjatañäni, ukajj Jehová Diosan wali munasirïtapwa uñachtʼayistu.

4. 1) Ezequielan visionap istʼasajja, ¿kun phoqasiñapsa judionakajj suyapjjpachäna? 2) ¿Yaqhep textonakan jawira, uma sasajj kun qhanañchañatakis apnaqasi? ¿Kun suytʼañatakis ukajj yanaptʼistu? (“Jehová Diosan bendicionanakapa” sat recuadro uñjjattʼäta).

⁴ Walja bendicionanaka. Jehová Diosajj qhawqsa bendisistu uk qhanañchañatakejja, Biblian umampita jawiranakampitwa parli. Ezequielajj templot mä jawir misturwa uñjäna. Judionakatï Diosar adorasipkakispäna ukhajja, Jehová Diosajj walwa jupanakar bendisispäna, uk amuyañatakiw Ezequielan visionapajj judionakar yanaptʼpachäna. ¿Kuna bendicionanaksa Diosajj jupanakar churaspäna? Sacerdotenakajj mayampiw Diosan arunakap yatichas yanaptʼapjjañapäna. Ukhamarusa niyakejjay sacrificionak templon mayampi loqtjjapjjañapächïnjja, ‘juchanakasat perdonatäjjañäniwa’ sasaw judionakajj confiyapjjpachäna (Ezeq. 44:15, 23; 45:17). Ukhamasti mayampiw judionakajj qʼomachatäjjapjjañapäna, templot misturi suma umampis jareqasipkaspa ukhamäjjañapänwa.

5. Taqenitak bendicionanak utjañapjja, ¿kunjamsa Ezequielan visionapajj uñachtʼayäna?

⁵ Diosan bendicionanakapajj wiñayatakiw taqenitak utjañapäna, janiw kunat llakisiñas utjañapäkänti ¿kunatsa ukham sistanjja? Uka jiskʼa jawirajj mä qhawqha kilometronakwa manqha jachʼa jawirar tukjjäna, ukajj mä milagrönwa (Ezeq. 47:3-5). Jerusalenar kuttʼasajja inas judionakajj waljaptapjjchispäna, ukhamäspäna ukhajj Diosan bendicionanakapajj waljaptarakispänwa, ukhamat kunatï wakiski ukajj markapan utjañapataki. Uka jawirajj taqe kun jilarkir utjañapwa uñachtʼayäna.

6. 1) ¿Jawirat parlki uka visionajj kunjamsa judionakar wal chuymachtʼäna? 2) ¿Kuna ewjjtʼas Ezequielan visionapan utjarakïna? (Qhanañchäwi uñjjattʼäta).

⁶ Jakañ churir uma. Ezequielan visionapanjja jawirajj Mar Muerto qotaruw purïna, ukatsti kawkjarutï purkäna uka cheqanakanjja jakañ vida utjayäna. Ak amuytʼañäni, kawkjarutï jawirajj purkäna ukanjja, Mar Grande mä arunjja Mediterráneo qotanjamarakiw kunayman chawllanakajj utjäna. Uka qota jakʼanjja pä markanakaw jaya jayan utjäna, uka pä markanak chikjanjja walja chawllanak katuri mä empresar uñtataw utjäna. Ezequielamp chikäkäna uka angelajj akham sänwa: ‘Kawki cheqtï jawirajj paskani uka cheqanakan taqe kunaw jakani’ sasa. Uka arunakarjamajja ¿jawirajj taqpach Mar Muerto qotarut phoqantañapäna? Janiwa. ‘Ñeqʼeni jiskʼa qotanakarojja’ jakañ churiri umajj janiw purkaniti sasaw angelajj säna, uka lugaranakajj ‘jayukʼarakïskaniwa’ sasaw sarakïna (Ezeq. 47:8-11).b Ukhamasti Ezequielan profeciapajj mä suma promesa utjatapwa qhanstayäna. Jehová Diosar adorañajj jakañ vidwa markapar churañapäna, suman jakasiñaw utjañaparakïna. Ukampis Ezequielan profeciapanjja ewjjtʼa arunakaw utjarakïna, janiw taqenejj Jehová Diosan bendicionanakap katoqapjjañapäkänti, ukatwa jan taqenejj qollatäpjjañapäkänti.

7. Jawir ladonakan utjkäna uka qoqanakajja, ¿yaqha markar apata judionakarojj kun suytʼapjjañapatakis yanaptʼäna?

⁷ Manqʼanak utjayiri qolliri qoqanaka (arbolanaka). Ezequielajj visionan uñjkäna uka jardinan wali sumäñapatakiw uka qoqanakajj yanaptʼäna. Ukampis janiw ukakïkiti, Ezequielatakisa mayni judionakatakisa uka qoqanakan achunakap manqʼañajj kunja sumäspasa uk yatiñajj wali munkañäpachänwa. Sapa phajjsi frutanak apthapiñas wali kusiskañäpachänwa. Ukajj kunjamsa Jehová Diosajj jupar servisipkakiñapatak yanaptʼaspäna ukwa uñachtʼayarakïna. Janiw ukakïkänti qoqanakan laphinakapas ‘qollañatakiw’ servïna (Ezeq. 47:12). Yaqha markar apatanakajj Jerusalenar kuttʼjjapjjäna ukhajja, Diosar serviskakiñatak yanaptʼatäña, mä arunjja qollatäñwa munapjjäna. Ukatwa Diosajj jupanakar yanaptʼañ arsüna, kunjamsa yanaptʼäna uka toqetjja yaqha profecianakaw qhanañchi. Ukajj 9 yatichäwinwa qhanañchasi.

8. ¿Ezequielan visionapajj qhepatwa jukʼamp phoqasiñapäna sasajj kunatsa sissna?

⁸ Kunjamtï 9 yatichäwin yateqaniwayktanjja, Jerusalenar kuttʼapkäna uka judionakajj mä qhawqha tiempokiw Jehová Diosan bendicionanakap katoqapjjäna. Ukham pasañapatakejj jupanakpachpaw juchanïpjjäna. Judionakajj janiw Diosar istʼjjapjjänti, nayra jan wali luräwinakaparuw kuttʼjjapjjäna, Jehová Diosar adorañsa janiw valoranit uñj-jjapjjänti, ukatwa Diosajj jupanakar jan bendisjjänti. Ukham jan walinak lurapjjatapajj Diosat jan jitheqtiri judionakarojj wal aynachtʼayäna, chuyms ustʼayarakïna. Ukhampachasa Jehová Diosajj promesanakap phoqapuniniwa sasaw confiyapjjäna (Josué 23:14 liytʼañataki). Ukhamasti ¿kuntï Ezequielajj visionan uñjkäna ukajj kunapachas jukʼamp phoqasiñapäna?

Diosan bendicionanakapajj jawirar uñtataw jalaski

9. ¿Ezequielajj visionan uñjkäna ukajj kunapachas jukʼamp phoqasiñapäna?

⁹ Kunjamtï 14 yatichäwin yatjjataniwayktanjja, Ezequielajj uñjkäna uka bendicionajj ‘tukuya urunakanwa’ phoqasiñapäna, ukapachaw Diosar serviñajj jukʼamp jachʼar aptatäñapäna (Is. 2:2). ¿Kunjamsa Ezequielan profecianakapajj jichhürunakan phoqasiski?

10, 11. 1) ¿Kuna bendicionanaksa jichhürunakan katoqtanjja? 2) ¿Kunjamsa Diosan bendicionanakapajj aka qhepa urunakan jukʼamp jiljjattawayi?

¹⁰ Walja bendicionanaka. Diosan templopat umajj mistkäna ukajj ¿kuna bendicionanaksa amtayistu? Kunanakatï Jehová Diosar serviñatak yanaptʼkistu, chʼamañchtʼkarakistu taqe ukanakwa amtayistu. Jesusajj jiwas layku jiwawayki ukaw jukʼamp jachʼa bendicionajja. Jupan jiwatapajj qʼomachistuwa, mä arunjja juchanakasat perdonatäñatakiw yanaptʼistu. Maysa toqetjja, Diosan arunakapan utjki uka yatichäwinakajj qʼomachiri jakañ churiri umamp sasiwa (Efes. 5:25-27). ¿Kunjamsa Diosan bendicionanakap jichhürunakan katoqasktanjja?

¹¹ Jehová Diosan servirinakapajj 1919 maran jukʼanikïpjjänwa, Diosar serviñataki yanaptʼanak katoqasajj jupanakajj wali kusisitäpjjänwa. Ukhat jichhakamajja Diosan markapajj jukʼampiw jiljjattaski, jichhürunakanjja 8 millonatsa jukʼamp jaqenakaw Diosar servisktanjja. Diosan bendicionanakapajj jiljjattawayarakiwa. Jehová Diosar serviñatakis walja yanaptʼanakaw utjistu. Nayra maranakatpachwa walja bendicionanak katoqtanjja, ukatwa Biblianakasa, libronakasa, revistanakasa, folletonakasa, tratadonakasa waljapun utjistu. Kunjamtï Ezequielan visionapan jawirajj jiljjattkänjja, ukhamarakiw qellqatanakajj Diosat yatjjatañ munirinakatak jiljjattawayi. Ukatwa Bibliat apstʼat qellqatanakajj nayra maranakatpach lurasiski, taqe uka qellqatanakajj Internetan jw.org cheqanwa utj-jje, waranqa jila arunakanwa utjaraki. ¿Suma chuymani jaqenakarojj kunjamsa taqe uka qellqatanakas videonakas yanaptʼi?

12. 1) ¿Kunjamsa Bibliat apstʼat qellqatanakajj jaqenakar yanaptʼawayi? 2) ¿Kuna ewjjtʼanakas Ezequielan visionapan jiwasatak utjaraki? (Qhanañchäwi uñjjattʼäta).

¹² Jakañ churir uma. Ezequielajj aka arunakwa istʼäna: ‘Kawki cheqtï jawirajj paskani uka cheqanakan taqe kunaw jakani’ sasa. Jehová Diosar adorañatak markapar mantanipki ukanakarojja, kunjamsa Diosan yatichäwinakapajj jupanakar yanaptʼawayi uk amuytʼañäni. Diosan arunakap taqe chuym istʼawayapki uka jaqenakarojja, Biblian yatichäwinakapaw wal yanaptʼawayi. Ukampis Ezequielajj uñjkäna uka visionanjja, ewjjtʼa arunakaw utji. Yaqhepanakajj janiw Biblian yatichäwinakapar istʼañ munjjapjjeti, janirakiw Diosar istʼañsa, yatichäwinakaparjam sarnaqañsa munjjapjjeti. Ezequielan visionaparjamajja, jupanakajj Mar Muerto qotankiri ‘siniya lugaranakampi ñeqʼeni jiskʼa qotanakampi’ sasipjjewa.c ¡Jiwasajj janipuniw ukhamar purtʼasiñ munktanti! (Deuteronomio 10:16-18 liytʼañataki).

13. ¿Ezequielajj visionan uñjkäna uka qoqanakat kunanaksa yateqsna?

¹³ Manqʼañanak utjayiri qolliri qoqanaka. ¿Kunsa jawir jakʼan utjki uka qoqanakajj yatichistu? Uka qoqanakajj sapa phajjsiw frutanak utjayäna, laphinakapas qollarakïnwa (Ezeq. 47:12). Ukanakajja Diosajj wali wajjtʼasirïtapwa amtayistu, jupar serviñatakejj kunaymanit yanaptʼistu. Jaqenakajj Diosar jan servipjjatapat usutäpkaspasa manqʼat jiwatäpkaspas ukhamäpjjewa. Ukampis Jehová Diosajj wal jiwasar yanaptʼistu. Mä revistan yatichäwip liyiñ tukuyasasa, jachʼa tantachäwin qhep qhepa cancionap cantasasa, mä video uñtasasa, Broadcasting programa uñtasasa, wali kusisitätanwa. ¡Taqe ukanakajj wal chʼamañchistu! (Is. 65:13, 14). Diosar serviñatakis yanaptʼarakistuwa. Biblian yatichäwinakapajj Diosar confiyañataki, qʼañu juchanakat jitheqtañataki, jiwasatakik taqe kun jan munañatakiw yanaptʼistu, jan walinakat jitheqtañatakis yanaptʼarakistuwa. Mä jachʼa juchar purtʼasktan ukhajj usuntksnas ukhamawa, ukampis Jehová Diosaw waliptjjañasatakejj kunatï wakiski ukanak churistu (Santiago 5:14 liytʼañataki). Ezequielajj visionan qoqanak uñjkäna ukajja, suma cuidatätaswa uñachtʼayi.

14, 15. 1) ¿Ezequielajj visionan uñjkäna uka ñeqʼeni jiskʼa qotanakat kunsa yateqsna? 2) ¿Ezequielajj visionan uñjkäna uka jawirat kunsa yateqaraksna?

¹⁴ ¿Mar Muerto qotan utjkäna uka ñeqʼeni jiskʼa qotanakajj kunsa yatichistu? Jiwasajj janiw aka jan wali pachankir jaqenakjamäñ munktanti. Jupanakajj janiw Diosan yanaptʼap katoqasiñ munapkiti (Mat. 13:15). Janipun ukham lurañäniti. Ukham lursna ukhajja, janiw Jehová Diosan bendicionanakap katoqjjsnati. Cheqas jawirar uñtata Diosan walja bendicionanakap katoqasajj wali kusisitätanwa. Biblian yatichäwinakap taqe chuyma yatjjatktan ukhasa, predikir sarktan ukhasa, ancianonakajj munasiñampi yanaptʼapkistu ewjjtʼapjjarakistu ukhasa Ezequielajj visionapan mä jawira uñjkäna ukwa amtayistaspa. Diosan bendicionanakapajj jakañ chuririwa, qollarakiwa.

¹⁵ ¿Kunjamsa Ezequielan visionapajj jutïrin phoqasini? Kunjamtï yatjjatkañänejja, uka jawirajj paraison jukʼamp jachʼäniwa.

¿Kunjamsa Ezequielan visionapajj paraison phoqasini?

16, 17. 1) ¿Paraisonjja jukʼamp bendicionanakaw utjani sasajj kunatsa sissna? 2) ¿Paraison utjkani uka bendicionanakajj kunjamsa yanaptʼistani?

¹⁶ ¿Jumasa familiamasa amigonakamasa niyas paraisonkjjapjjasma ukham amuyirïtati? Ezequielan visionapat jukʼamp yatjjatañajja, kunjamas paraison jakasiñäni uk sum amuytʼañatakiw yanaptʼistani. Ukatakejj aka kimsa toqet yatjjataskakiñäni. Ukanakaw qhawqsa Jehová Diosajj munasistu uk uñachtʼayi.

¹⁷ Walja bendicionanaka. Paraisonjja bendicionanak utjayir jawirajj jukʼamp jachʼaruw tukuni, janiw Diosar serviñatakikejj yanaptʼkistaniti, jan ukasti Diosan bendicionanakap cheqpachapun phoqasirwa uñjañäni. Jesusajj Waranqa Maranak reyit apnaqkani ukhajja, Diosat jan jitheqtiri jaqenakajj Jesucriston sacrificioparjamaw jukʼat jukʼat perfecto jaqenakäjjapjjani. Janiw usuntañasa ni medicamentonakas utj-jjaniti, janirakiw hospitalanakasa, doctoranakasa, qollayasiñatak seguronakas utj-jjaniti. Uka bendicionanakjja khitinakatï Armagedón guerra jakkir pasapkani ukanakaw katoqapjjani, jupanakajj ‘walja jaqenaka’ sasin uñtʼatäpjjewa (Apoc. 7:9, 14). Paraíso qalltan utjkani uka bendicionanakajj wali musparkañäkchinisa, qhepatjja jukʼamp bendicionanakaw utjani. Ezequielajj visionan uñjkäna uka jawirajj kunjamtï jiljjattkänjja, ukhamarakiw bendicionanakajj jukʼamp jiljjattani.

18. Waranqa Maranak Jesusajj apnaqjjani ukhajja, ¿kunjamsa ‘jakañ churir umani jawirajj’ jukʼamp jiljjattani?

¹⁸ Jakañ churir uma. Jesusajj Waranqa Maranak apnaqjjani ukhajja, ‘jakañ churir umani jawirajj’ jukʼampiw jiljjattani (Apoc. 22:1). Paraisonjja walja millón jaqenakaw jaktanipjjani, jupanakajj wiñayatakiw jakapjjarakini. Diosan Reinopajj apnaqjjani ukhajja, jiwatat jaktañajj Diosan bendicionanakap taypinkaniwa. Walja tiempo ‘laqʼa polvon jakirinakajja’, mä arun ‘khitinakatï jiwjjasin jan chʼamanïpki ukanakajj’ jaktanipjjaniwa, jupanakajj jan jaktʼkay waljapunïpjjaniwa (Is. 26:19). Ukampis ¿jupanakajj wiñayatakit jakapjjani?

19. 1) ¿Kunsa Jehová Diosajj paraison churaskakistani, Apocalipsis 20:12 textojj uka toqet kamsisa? 2) ¿Paraison khitinakas ‘jayukʼaräpkaspas’ ukhamäpjjani?

¹⁹ Wiñayatakit jakapjjani janicha ukjja jupanakaw amtjjapjjani. Aka toqet amuytʼañäni, uka urunjja machaq rollonakaw jistʼaratäni. Ukhamasti, Jehová Diosan bendicionanakap taypinjja machaq yatichäwinakampi, Diosar serviñ toqet parlir yatichäwinakampiw utjani. Ukanak katoqañajj wali sumapunïniwa. Ukampis paraison jakirinakat yaqhepajja, janiw uka bendicionanak katoqañ munapkaniti, Diosarus janiw istʼañ munapkarakiniti. Jesusajj Waranqa Maranak apnaqkani ukan maynitï Dios contra saytʼani ukhajja, janiw ukhamak jaytatäkaniti (Is. 65:20). Uka toqet parlkasajja, inas Ezequielajj visionapan ñeqʼeni jiskʼa qotanakat amtasstan, uka lugaranakajj jayukʼarakïskänwa, janiw jakañajj utjkänti. Khitinakatï Diosan jakañ churir umap jan katoqasipkani ukanakajj jan amuytʼasirinakäpjjaniwa. Jesusajj Waranqa Maranak apnaqjjani uka qhepatjja, mä qhawqhanejj Supay toqet saytʼasisaw Dios contra saytʼasipjjani. Ukatwa Jehová Diosan leyinakaparjam jan sarnaqañ munirinakajj wiñayatak jiwayatäpjjani (Apoc. 20:7-12).

20. Ezequielajj visionan qoqanak uñjkäna uka profecian phoqasiñapatakejja, ¿kunsa Jehová Diosajj Waranqa Maranakan lurani?

²⁰ Manqʼañanak utjayiri qolliri qoqanaka. Jehová Diosajj janiw khitin jiwañapsa munkiti. Jesusajj Waranqa Maranak apnaqkani ukan wiñay jakañatakejja, kunjamtï Ezequielajj visionapan qoqanak uñjkäna ukar uñtatwa Diosajj yanaptʼarakistani. Paraisonjja janiw Diosar serviñatak yanaptʼanakak katoqkañäniti, jan ukasti Diosan promesanakap phoqasirwa uñjarakiñäni. Alajjpachanjja, Jesusampi 144.000 ajllitanakampiw Waranqa Maranak reyit apnaqapjjani. Jupanakajj sacerdotenakat servisajj Jesusan jaqenak layku jiwatapjjaruw bendicionanak utjayapjjani, Diosat jan jitheqtirinakarus perfecto jaqenakar tukupjjañapatakiw yanaptʼapjjarakini (Apoc. 20:6). Ezequielajj uñjkäna uka qoqanakajj achunakwa utjayäna, laphinakapajj qollatwa servïna, apóstol Juanajj ukar uñtasitwa mä visión uñjarakïna (Apocalipsis 22:1, 2 liytʼañataki). Uka visionanjja, ‘qoqanakan laphinakapasti markanakar qollañatakïnwa’. 144.000 ajllitanakajj sacerdotenakjam kuntï lurapkani ukanakajja, Diosan walja millón servirinakaparuw yanaptʼani.

21. 1) ¿Ezequielan visionapat yatjjatasajj kunjamakis jikjjatasta? (“Mä jiskʼa jawirajj jachʼaruw tukjje” sat recuadro uñjjattʼäta). 2) ¿Kunsa jutïr yatichäwin yatjjataskañäni?

²¹ Ezequielan visionapat yatjjatasajj wali kusisitätanwa, jutïr urunak suytʼañatakis yanaptʼarakistuwa. Paraison jakasiñajj wali sumapunïniwa. Jehová Diosajj walja waranqa maranak nayras uka visión Ezequielar uñjaykchïnjja, ukhat jichhakamaw Diosajj jaqenakan uka bendicionanak katoqapjjañapataki, jupan promesanakap phoqasir uñjapjjañapatak yanaptʼaski. ¿Jumajj niyas ukan jakasjjasma ukhamti amuyasta? Inas jumajj ‘¿nayajj paraison jakasiñ puedirakiristti?’ sasin jisktʼassta. Cheqas jumajj Paraison jakasirakismawa, ukwa Ezequielajj tukuyar uñjkäna uka visionajj uñachtʼayistu. Kunatsa ukham sistan ukwa jutïr yatichäwin yatjjataskañäni.

1, 2. 1) ¿Jehová Diosajj kun lurañapsa Ezequielar mayïna? 2) ¿Kuna jisktʼanakarus aka yatichäwin qhanañchaskañäni?

EZEQUIELAJJ 593 antes de Cristo (a.C.) maran uñjkäna uka visionajja, kunatï mä 900 maranak nayrajj Moisés ukhamarak Josué chachanakan urunakapan paskäna ukwa amtaypachäna. Uka urunakanjja Suma Oraqen qorpapajj kawkjakamas puriñapäna ukwa Jehová Diosajj Moisesar säna, uka qhepatjja kunjamsa Israel markan tribunakapar jaljasiñapäna ukwa Josué chachar qhanañcharakïna (Núm. 34:1-15; Jos. 13:7; 22:4, 9). Jichhajj niya ukham lurasiñapwa Jehová Diosajj mayïna. Ezequielarusa yaqha markar apatanakarusa, Diosajj Suma Oraqe Israelan tribunakapar jaljapjjañapatakiw mayïna (Ezeq. 45:1; 47:14; 48:29).

² Ezequielajj kuntï visionan uñjkäna ukajja, ¿kunsa juparusa yaqha markar apatäpkäna uka judionakarus yatichpachäna? ¿Uka visionajj kunjamsa jichhürun Jehová Diosan servirinakaparojj chʼamañchtʼistu? ¿Kunjamsa ukajj jutïrin jukʼamp sum phoqaspachäni?

Ezequielajj pusi garantianakwa visionan uñjäna

3, 4. 1) ¿Ezequielan qhep qhepa visionapajj kuna pusi garantianaksa yaqha markar apatanakarojj churäna? 2) ¿Kawkïr garantiatsa aka yatichäwin yatjjataskañäni?

³ Ezequielan qhep qhepa visionapajja, Ezequiel libron 40-48 capitulonakan qellqatawa (Ezeq. 40:1-48:35). Uka visionajja yaqha markar apatanakarojj pusi garantianakwa churäna, ukajj kunjamsa Israel markan phoqasiñapäna uka toqetwa parli. ¿Uka garantianakajj kawkirinakänsa? Maya, templonwa Dios saparuk mayamp adorasjjañapäna. Paya, Israel markarojj cheqapar uñjiri sacerdotenakampi suma awatirinakampiw pʼeqtʼañapäna. Kimsa, Israel markar kuttʼirinakat taqpachaniw herenciat oraqe katoqapjjañapäna. Pusi, Jehová Diosajj mayampiw jupanak taypinkañapäna.

⁴ Nayrïr pä garantianakajj kuna toqetsa parläna ukajja, aka libron 13 ukhamarak 14 yatichäwinakanwa qhanañchasi: ukarjamajj Jehová Dios saparukiw mayamp adorasjjañapäna, markarusti cheqapar uñjir awatirinakaw pʼeqtʼapjjañaparakïna. Aka yatichäwinjja, Diosajj herenciat oraqe katoqapjjäta siskäna uka kimsïr garantiatwa yatjjataskañäni. Jutïr yatichäwinsti, Jehová Diosajj markapampïñ arskäna uka pusïr garantiatwa yatjjataskarakiñäni (Ezeq. 47:13-21; 48:1-7, 23-29).

Aka oraqejj jumanakaruw herenciat jalanoqasini

5, 6. 1) Ezequielan visionaparjamajja, ¿kawkïr oraqes jalanoqasiñapäna? (Aka yatichäwi qalltan utjki uka dibujo uñjjattʼäta). 2) ¿Ezequielan visionapampejj kun yatichañsa Jehová Diosajj munäna?

⁵ Ezequiel 47:14 liytʼañataki. Ezequielajj uñjkäna uka visionanjja, ‘Edén jardinjam’ tukuñapäkäna uka oraqetwa Jehová Diosajj parläna (Ezeq. 36:35). Ukatsti Diosajj akham sänwa: ‘Israelan 12 tribunakapan oraqepwa herenciat churañatak oraqenakjam jalanoqapjjañama’ sasa (Ezeq. 47:13). Jalanoqasiñapäkäna uka ‘oraqejj’ Israel markan oraqepänwa, ukaruw yaqha markar apatanakajj kuttʼapjjañapäna, uka oraqejj suma oraqëjjañapänwa. Ukatjja kunjamtï Ezequiel 47:15-21 texton qellqatäkejja, uka oraqejj kawkjat kawkjakamänisa ukwa Jehová Diosajj wali sum qhanañchäna.

⁶ ¿Ezequielan visionapampejj kun yatichañsa Jehová Diosajj munäna? Oraqejj kawkjat kawkjakamänisa uk sum qhanañchasitapajja, Ezequielarusa mayni judionakarusa markasajj cheqapuniw sumaptayatäni sasin confiyapjjañapatakiw yanaptʼäna. Jehová Diosan garantiapajj kunjamsa phoqasini uk yatisajja, yaqha markar apat judionakajj wali chʼamañchtʼatäpjjpachänwa. Ukampis ¿cheqapunit Diosan markapajj herenciat mä oraqe katoqäna? Jïsa.

7. 1) ¿537 a.C. marat qalltasajj kunas pasawayi? ¿Kunsa ukajj amtayistu? 2) ¿Kunsa jichhajj yatjjataskañäni?

⁷ Ezequielajj visión uñjkäna ukhat 56 maranak pasjjäna uka qhepatjja, mä arun 537 a.C. marat qalltasajja, yaqha markar apat walja waranqa judionakaw Israel oraqer kuttʼapjjäna, mayampiw ukan jakañ qalltapjjarakïna. Kunatï uka tiempon paskäna ukajja, kunjamsa Diosan markapajj jichhürunakan nayrar sartawayi ukwa amtayarakistu. Diosan servirinakapajj mä oraqsa katoqapkaspa ukhamarakiwa. ¿Kunatsa ukham sistanjja? Jehová Diosaw jupar sum servipjjañapatakisa markapankapjjañapatakis servirinakapar yanaptʼawayi. Kunjamsa Suma Oraqejj nayra tiempon sumaptayatäna ukajja, Dios saparuk adorañat waljanakwa yaticharakistu. Cheqas jichha urunakanjja mä paraisonjamwa Diosarojj sirvtanjja. Ukampis janïr uka toqet sumpach yatjjatkasajja, Diosarojj mä paraisonjamwa adortan sasajj kunatsa sistan uk yatjjatañäni.

8. 1) ¿Nayra Israel marka lantejj kawkïr markas Jehová Diosan markapäjjäna? 2) ¿Kunas paraisor uñtat oraqejja? 3) ¿Kunapachas uka paraisojj uñstawayi, khitinakas ukankapjjaraki?

⁸ Israel oraqejj sumaptayatäniwa sasin parlki uka profeciajja, jutïrinwa phoqasini sasaw Jehová Diosajj mä visionan Ezequielar qhanañchäna. Ukarjamajj kunapachatï ‘David serviripajja’, mä arun Jesucristojj 1914 maran reyit apnaqañ qalltjjañapäna uka qhepatwa phoqasiñapäna (Ezeq. 37:24). 1914 marakamasti Israel markajj walja maranakaw Diosan markapjam jan uñtʼatäjjänti. Uka marka lantejj Diosan Israelapaw ajllitäjjäna, mä arun espíritu santomp ajllit cristianonakaw Diosan markapäjjäna (Mateo 21:43; 1 Pedro 2:9 liytʼañataki). Ukampis Jehová Diosajj janiw Israel marka lantejj yaqha markak ajlliskänti, jan ukasti Israelan oraqep lantejj paraisor uñtat yaqha oraqwa uttʼayarakïna (Is. 66:8). Kunjamtï 17 yatichäwin yatjjataniwayktanjja, Jehová Diosar mä paraisonjam adorktan ukaw uka oraqejja, ukanjja 1919 maratwa aka oraqenkasipki uka ajllit cristianonakajj Diosar adorasipki (“¿Kunatsa 1919 mara sistanjja?” sat recuadro 9 yatichäwin uñjjattʼäta). Marat mararjamajja, aka oraqen jakañ suyasipki, mä arun ‘yaqha ovejanakjam’ uñtʼatäpki ukanakajja, uka oraqenwa Diosarojj mä paraisonjam adorasipkaraki (Juan 10:16). Uka paraisojj jukʼampis jiltaskchejja, Armagedón pasatatwa Diosan taqpach bendicionanakap katoqañäni.

Igual igualaw oraqejj jaljasi

9. ¿Oraqejj kunjamas jaljasiñapäna uka toqet Jehová Diosajj kamsänsa?

⁹ Ezequiel 48:1, 28 liytʼañataki. Markan oraqepajj kawkjat kawkjakamäñapänsa uk sum qhanañchasajja, kunjamsa oraqejj jalanoqasiñapäna uka toqetwa Jehová Diosajj wali sum qhanañcharakïna. 12 tribunakajj katoqapjjañapäkäna uka oraqejja, norte toqet qalltasin sur toqekam purisin igual igualaw jaljasiñapäna, mä arunjja norte toqen Dan tribumpiw qalltasiñapäna, sur toqensti Gad tribumpiw tukuyasiñaparakïna. Sapa oraqejja largorojj inti jalsu toqenkir qorpat qalltasajj inti jalanta toqenkir mar Mediterráneo qotakamäñapänwa (Ezeq. 47:20).

10. Ezequielajj uñjkäna uka visionajja, ¿kuna garantiysa yaqha markar apatanakarojj churpachäna?

¹⁰ Ezequielajj uñjkäna uka visionajja, ¿kuna garantiysa yaqha markar apatanakarojj churpachäna? Visionan uñstkäna uka oraqejj wali suma jaljatänwa, ukhamätapaw markan oraqepajj wali suma jaljatäniwa sasin confiyapjjañapatak judionakar yanaptʼpachäna. Ukatjja 12 tribunakar markan oraqep sum jaljasitapajja, Israel markar kuttʼirinakan herenciat mä oraqe katoqapjjañapwa qhanstayarakïna. Ukhamasti taqeninwa oraqesa utasa utjañapäna.

11. ¿Oraqejj jaljaskäna ukat kunanaksa yateqsna? (“Oraqew jalanoqasi” sat recuadro uñjjattʼäta).

¹¹ ¿Ezequielajj uñjkäna uka visionat kunanaksa jiwasajj yateqsna? Uka visionarjamajja, janiw sacerdotenakakisa, levitanakakisa, ni pʼeqtʼirinakakisa Suma Oraqen herenciat oraqe katoqapjjañapäkänti, jan ukasti 12 tribunkirinakat taqpachaniw oraqe katoqapjjañapäna (Ezeq. 45:4, 5, 7, 8). Jichhürunakan ukhamarakiwa, janiw alajjpachar saririnakakisa jan ukajj ‘walja jaqenakjam’ uñtʼatäpki ukanak taypit Diosan markapar pʼeqtʼapki ukanakakisa Diosarojj mä paraisonjam adorapkiti (Apoc. 7:9).a Jan ukasti taqeniw Diosarojj paraisonjam adortanjja, Diosan markapan kuntï lurktan ukajj janis kunäkaspa ukhamsa amuyaskstanjja, taqeniw markapan mä lugaranïtanjja, ukhamätapajj walpun kusisiyistu.

¿Kuna pä toqetsa jan igualäpki, kunsa ukajj yatichistu?

12, 13. Israel markan tribunakaparojja, ¿oraq jalanoqañat Jehová Diosajj kamsänsa?

¹² Ezequielan visionapan oraqenak kunjam jalanoqasiñaptï Jehová Diosajj maykäna ukajja, janiw Moisesar oraq jalanoqañap maykäna ukhamäkänti. Oraqet parlkasasa jaqenakat parlkasasa, kuntï Diosajj Moisesampir Ezequielampir siskäna ukajj mayj mayjänwa. Jichhajj uka pä toqetwa yatjjataskañäni.

¹³ Oraqe. Walja jaqenakani tribunakarojja, Moisesajj jukʼamp jachʼa oraqwa churañapäna (Núm. 26:52-54). Ukampis Ezequielan visionapanjja, taqpach tribunakajj ‘mä igualak katoqapjjani’ sasaw Jehová Diosajj säna, jan ukajja notaparjamajj ‘sapa mayniw jilanakap kikpajj herenciat’ oraq katoqapjjañapäna (Ezeq. 47:14). Ukatwa norte toqet qalltasin sur toqer puriñkamajja, sapa tribur churaskäna uka oraqejj anchorojj mä igualakïñapäna. Ukhamasti taqpach israelitanakaw Suma Oraqen utjañapäkäna uka bendicionanak katoqapjjañapäna.

14. Jehová Diosajj kuntï extranjero jaqenakat siskäna ukajja, ¿kunansa Moisesar churaskäna uka Leyimpejj jan pachpäkäna?

¹⁴ Jaqenaka. Moisesar churaskäna uka leyejja extranjero jaqenakarojj jarkʼaqänwa, jupanakajj Jehová Diosarus adorapjjarakispänwa, ukampis jupanakajj janiw oraqenïpkaspänti (Lev. 19:33, 34). Ukhamäkchïnsa, kuntï Diosajj Ezequielar siskäna ukajj janiw Moisesar maykäna uka pachpäkänti. Diosajj akham sänwa: ‘Kawkïr tribun oraqepantï utjnoqkäna uka pachpa oraqenwa extranjerot jakirirojj mä herencia churapjjañama’ sasa. Ukham sasajja israelitanakampi extranjero jaqenakampejj igualakïpjjatapwa Jehová Diosajj uñachtʼayäna (Ezeq. 47:22, 23). Visionapanjja akwa Ezequielajj uñjäna, taqpach jaqenakajj mayachtʼataw Jehová Diosar adorapjjäna, janiw yaqhachasiñajj utjkänti (Lev. 25:23).

15. ¿Jehová Diosajj oraqempit jaqenakampit parlkäna ukajj kunjam Diosätapsa uñachtʼayistu?

¹⁵ Jehová Diosajj kunanaktï oraqempita jaqenakampit Ezequielar siskäna ukajja, yaqha markar apatanakarojj wal chuymachtʼpachäna. Diosan arunakap katoqasajja, israelitanakasa Jehová Diosar adorapkäna uka extranjeronakasa mä pachpa herenciakwa katoqapjjañapäna, ukwa yaqha markar apatanakajj amuyapjjäna (Esd. 8:20; Neh. 3:26; 7:6, 25; Is. 56:3, 8). Janiw ukakïkiti Jehová Diosatakejja taqpach servirinakapaw wali valoranejja, ukajj janipuniw mayjtʼkaniti (Ageo 2:7 liytʼañataki). Ukhamasti alajjpachar sarañsa jan ukajj aka oraqen wiñayatak jakañsa suyaskstanjja, uk yatiñajj walpun kusisiyistu.

16, 17. 1) ¿Oraqempit jaqenakampit yatjjatasajj kunanaksa yateqsna? 2) ¿Kuna toqetsa jutïr yatichäwin yatjjataskañäni?

¹⁶ ¿Oraqempita jaqenakampit yatjjatasajj kunanaksa yateqsna? Oraqpachankir jilat kullakanakampejj mayachtʼatäñasawa janiw yaqhachasiñajj utjañapäkiti, ukajj taqenin amuykayäñaparakiwa. Jehová Diosajj janiw khitirus yaqhachkiti. Ukatwa akham sasin jisktʼasiñasa: “¿Jehová Diosat yateqasisajj taqenir mä igualakti uñjtjja? ¿Jilat kullakanakajj kunjam jañchinïskpasa, kawkïr markatäskpasa jan ukajj qollqenïskpas janisa taqenirut respetomp uñjtjja?” sasa (Rom. 12:10). Jehová Diosajj taqeniruw jupar serviñasatak markapar katoqestu ukaw wal kusisiyistu. Markapankasajja alajjpachankir Awkisaruw taqe chuyma sirvtanjja jupat walja bendicionanakwa katoqaraktanjja (Gál. 3:26-29; Apoc. 7:9).

¹⁷ Jutïr yatichäwinjja, Ezequielajj qhep qhepa visionapan kuntï tukuyarojj uñjkäna uka pusïr garantiatwa yatjjataskañäni, ukarjamajja Jehová Diosajj yaqha markar apatanakampïñwa arsüna. Diosajj kuntï arskäna ukat kunanaksa yateqsna uksa yatjjataskarakiñäniwa.

1, 2. 1) ¿Kunatakis mä oraqejj yaqhachasiñapa? (Aka yatichäwi qalltan utjki uka dibujo uñjjattʼäta). 2) ¿Yaqha markar apata judionakarojj kunar confiyapjjañapatakis uka visionajj yanaptʼäna?

EZEQUIELAN qhep qhepa visionapanjja, Israel markan tribunakapar herenciat churaskäna uka oraqenak taypinjja mä oraqew yaqhachasïna, uka oraqejj Jehová Diosatakïnwa. Ezequielan visionapanjja wali musparkañ sutini mä markaw uñstarakïna. Uka visionarjamajja, yaqha markar apata judionakajj markapar kuttʼapjjañapäkäna ukhajj Jehová Diosaw jupanak taypinkañapäna. Uk yatiñajj jupanakar wal chʼamañchtʼäna.

² Jehová Diosar churañatak oraqetjja, Ezequielajj wali sum qhanañchi. Uka visionajj Jehová Diosan cheqpach servirinakapar kunanaksa yatichistu uk jichhajj yatjjatañäni.

Sagrado contribucionampi markampi

3. Jehová Diosataki yaqhachat oraqet parlkasajja, ¿Ezequielan visionapajj kuna phesqa cheqanakatsa parli, ukanakajj kunatakïnsa? (“Jehová Diosar churañatak oraqe jiltʼayapjjañama” sat recuadro uñjjattʼäta).

³ Jehová Diosataki yaqhachat oraqenjja mä jachʼa cuadrado oraqew utjäna. Ukasti ‘Diosatak jiltʼayat oraqe’ satänwa, norte toqet sur toqekamajja uka oraqejj 25.000 codonakanïnwa (13 kilómetros), inti jalsu toqet inti jalanta toqekamajja 25.000 codonakanirakïnwa. Uka oraqejj kimsar jaljatänwa. Alayankir oraqejja levitanakataki yaqhachatänwa, chika taypinkir oraqesti templompitaki sacerdotenakampitaki yaqhachatarakïnwa. Uka paypach oraqejj ‘Diosar churatäki uka oraqënwa’. Aynachankki ukajja, jan ukajj ‘jiltʼki uka oraqesti’ mayninakat sipan jiskʼakïnwa, ‘markankir taqpach jaqenakatakirakïnwa’ (Ezeq. 48:15, 20).

4. ¿Jehová Diosatak jiltʼayatäkäna uka oraqet kunsa yateqsna?

⁴ ¿Jehová Diosar churañatak oraqet kunsa yateqsna? Jehová Diosatakïkäna uka oraqew nayraqat yaqhachasïna, ukjjaruw jiltʼkäna uka oraqejj Israelan tribunakapar jalanoqasiskäna. Jehová Diosar adorañataki yaqhachatäkäna uka oraqejja jupar adorañatakïnwa, ukatwa mayni oraqenakat sipansa jukʼamp wakiskirïna (Ezeq. 45:1). Kunjamsa oraqenakajj jaljasïna ukajja, Jehová Diosar adorañajj jukʼamp wakiskirïtapwa yaqha markar apatäpkäna uka judionakar yatichpachäna. Jiwasatakejj kunanaktï Jehová Diosar adorañatak lurktan ukanakajj nayrankañaparakiwa, mä arunjja Biblia liyiñasa, tantachäwinakar jan faltasis sarañasa, predikir sarañasa jakäwisan nayrankañapawa. Jiwasatï Jehová Diosat yateqasisa kunatï wakiskirïki uk nayrar uchañäni ukhajja, jan jitheqtasaw jupar serviñäni.

‘Markasti uka taypinkarakiniwa’

5, 6. 1) ¿Markajj khitinkänsa? 2) ¿Uka markajj kawkïr markanakampis jan saskaspa, kunatsa ukham sistanjja?

⁵ Ezequiel 48:15 liytʼañataki. ¿‘Markasa’ uka marka jakʼankir lugaranakas kunamp sasisa? (Ezeq. 48:16-18). ‘Markan oraqepäñapatak churatäkäna’ uka oraqet parlkasajj Jehová Diosajj akham sasaw Ezequielar säna: ‘Uka oraqejj taqpach israelitanakankaniwa’ sasa (Ezeq. 45:6, 7). Ukhamajj markasa uka marka jakʼankir lugaranakas janiw ‘Diosar churatäki uka oraqëkänti’, jan ukajj kunjamtï Jehová Diosajj siskänjja janiw jupar ‘contribucionat churapkäna uka oraqëkänti’ (Ezeq. 48:9). Taqe ukanak yatjjasajja, kunsa uka markat yateqsna uk jichhajj uñjañäni.

⁶ Uka markajj janiw mayamp saytʼayata Jerusalén markäkaspati, ni uka markankir templopäkaspasa. ¿Kunatsa ukham sistanjja? Ezequielajj visionan uñjki uka marka taypinjja, janiw mä templojj utjkiti. Ukatsti janiw Israel markan sumaptayatäkäna uka markanakat maynirïkaspati. ¿Kunatsa ukham sistanjja? Janiw Jerusalenar kuttʼapkäna uka judionakasa ni wawanakapas Ezequielajj uñjkäna ukar uñtasit mä marka saytʼayapkänti. Janirakiw alajjpachankir mä markäkaspati. ¿Kunatsa ukham sistanjja? Uka markajj ‘aleq oraqenkakïnwa’, mä arunjja janiw uka oraqejj sagradökänti ni Diosar adorañataki oraqëkänsa (Ezeq. 42:20).

7. ¿Ezequielajj visionan uñjkäna uka markajj kunamp sasïnsa? ¿Marka sasajj kunatsa parlaskpacha? (Aka yatichäwi qalltan utjki uka dibujo uñjjattʼäta).

⁷ Ukhamajj Ezequielajj visionan uñjkäna uka markajj ¿kunamp sasïnsa? Ezequielajj uñjkäna uka pachpa visionanwa markasa oraqesa uñstäna (Ezeq. 40:2; 45:1, 6). Bibliarjamajja uka oraqejj janiw cheqpach oraqëkänti, ukhamasti markajj janirakiw cheqpach markäkpachänti. Marka siski uka arojja suma organistʼata walja jaqenakani markatwa amuytʼayistu. Ukhamajj Ezequielajj visionan uñjkäna uka cuadrado oraqenkir markajja, suma organistʼata pʼeqtʼirinakatwa (administracionatwa) parlaskpacha.

8. ¿Pʼeqtʼirinakajj kawkjansa lurañanakap phoqapjje, kunjamatsa uk yattanjja?

⁸ ¿Pʼeqtʼirinakajj kawkjansa lurañanakap phoqapjje? Ezequielan visionaparjamajja, markajj uka oraqe taypinkänwa. Ukhamasti pʼeqtʼirinakajj Jehová Diosar adorañatak kunanakatï Diosan markapan luraski uka taypinwa lurañanakap phoqapjje. ¿Markajj aleq oraqenkakiwa siski ukajj kamsañsa muni? Pʼeqtʼirinakajj janiw alajjpachankapkiti, jan ukasti aka oraqenkapjjewa sañwa muni. Taqe kunanaktï jupanakajj lurasipki ukajja, mä paraisonjam Diosar servisipki ukanakaruw yanaptʼi.

9. 1) ¿Jichhürunakan khitinakas pʼeqtʼasipki? 2) ¿Jesusajj Waranqa Maranak apnaqkani ukhajj kunsa lurani?

⁹ ¿Jichhürunakan khitinakas pʼeqtʼasipki? Ezequielan visionaparjamajja, mä ‘pʼeqtʼiriw’ marka apnaqäna (Ezeq. 45:7). Uka pʼeqtʼirejj janiw sacerdotëkänti janirakiw levitäkänsa, antisas marka uñjañatak uttʼayatänwa. Uka pʼeqtʼirejja, alajjpachar sarañatak jan ajllitäpki uka congregación pʼeqtʼirinakatwa amtayistu. Wali munasiri uka awatirinakajja, ‘yaqha ovejanakjam’ uñtʼatäpki uka taypinkapjjewa. Jupanakajj Jesucriston alajjpachankir gobiernopan wali humilde servirinakapäpjjewa (Juan 10:16). Jesusajj Waranqa Maranak apnaqkani ukhajj ‘principenakwa’ uttʼayani, mä arunjja wali wakichtʼat ancianonakwa ‘oraqpachan uttʼayani’ (Sal. 45:16). Jupanakajj Diosan Reinopampi apnaqatäsaw Diosan markaparojj Waranqa Maranakan uñjapjjani.

‘Jehová Diosaw ukanki’

10. ¿Markajj kamsatasa, ukham sutinïtapajj kunsa uñachtʼayi?

¹⁰ Ezequiel 48:35 liytʼañataki. Markajja ‘Jehová Diosaw ukanki’ satawa. Uka sutejj Jehová Diosan uka markankatapwa uñachtʼayi. Ezequielan visionapanjja, uka markajj jiltʼkäna uka oraqen chika taypinkatapwa Jehová Diosajj uñachtʼayäna. Ukham lurasajja yaqha markar apatanakarojj ‘mayampiw jumanak taypinkjjäjja’ siskaspas ukhamänwa, ukajj jupanakar walpun chʼamañchtʼpachäna.

11. ¿Ezequielajj visionan uñjkäna uka markatsa uka markan sutipatsa kunanakampsa yateqsna?

¹¹ ¿Kunanaksa Ezequielan uka profeciapat yateqsna? Uka markan sutipasa uka markan pʼeqtʼirinak uttʼayasitapasa, jupajj aka oraqenkir markapampïskatapwa uñachtʼayistu, jupajj janipuniw taqe chuyma servirinakapar jaytanukkaniti. Uka sutejj kamsañtï munki ukarjamajja, markajj janiw mä jaqer autoridad churañatak uttʼayatäkiti, jan ukasti Jehová Diosajj munasiñat churki uka leyinak phoqañ yanaptʼañatak uttʼayatawa. Sañäni, Diosajj janiw marka pʼeqtʼirinakar amtaparjamak oraq jalanoqapjjañapatak autoridad churkiti. Jan ukasti kunjamtï jupajj oraq jalanoqawayki uk pʼeqtʼirinakan respetapjjañapwa muni, mä arunjja kawkïr lugartï servirinakapar churañ amtawayki uk respetapjjañapwa muni. Janiw jan yäqañjamäki uka servirinakapar yaqhachapjjañapsa munkiti (Ezeq. 46:18; 48:29).

12. 1) ¿Uka markajj kunjamänsa, kunsa ukajj amuytʼayistu? 2) ¿Kunsa uka visionajj ancianonakar amtayi?

¹² ¿‘Jehová Diosaw ukanki’ sat markajj kunjamänsa? Nayra tiemponjja, markanakajj jachʼa murallanakampi muytatänwa, mä qhawqha punkunikïpjjarakïnwa. Ukampis uka markajj 12 punkunakanïnwa (Ezeq. 48:30-34). Cuadrado oraqenkkäna uka markajja, sapa ladon kimsa punkunïnwa. Ukajja pʼeqtʼirinakar jakʼachasiñajj facilakïtapa, Diosan taqe servirinakapar yanaptʼañatak listokïpjjatapwa uñachtʼayi. Ukatjja uka markan 12 punkunakanïtapajj ‘taqpach israelitanakatak’ jistʼaratätapwa uñachtʼayi (Ezeq. 45:6). Uka markan walja punkunakanïtapajj ancianonakar akwa amtayi, jupanakar jakʼachasiñajj facilakïñapa, mä paraisonjam Diosar servipki ukanakar yanaptʼapjjañapwa Jehová Diosajj muni.

Markanwa Diosar adorapjje, ukanwa yanaptʼapjjaraki

13. ¿Kuna lurañanaksa jaqenakajj markan phoqapjje?

¹³ Ezequielajj visionan uñjkäna uka oraqejj kunjamsa jalanoqasïna uka toqet jukʼamp sum amuytʼañatakejja, jupajj jakkäna uka urunakat parltʼaskakiñäni. Uka visionanjja, jaqenakajj kunayman luräwinak phoqasipkatapwa Jehová Diosajj säna. ‘Santuarion servipkäna’ uka sacerdotenakajja, sacrificionakwa Jehová Diosar loqtapjjañapäna, jupanakakiw Diosar serviñatakis jakʼachasipjjañaparakïna. ‘Templon servipkäna’ uka levitanakajja, ‘templon serviñampi ukhamarak kunanakatï ukan lurasiñapäki taqe ukanakamp phoqapjjañapänwa’ (Ezeq. 44:14-16; 45:4, 5). Janiw ukakïkänti, Ezequielan visionapanjja jaqenakaw marka anqäjjanakan trabajisipkarakïna. ¿Khitinakäpjjänsa jupanakajja?

14. ¿Marka anqäjjanakan trabajipki ukanakajj kunsa amtayistu?

¹⁴ Marka anqäjjanakan trabajipki ukanakajja ‘Israelan taqe tribunakapatwa jutapjje’, jupanakajj yanaptʼañatakiw ukankapjjaraki. ¿Kunatsa ukham sistanjja? Jupanakajj oraq yapuchapjjañapäna, ukhamat ‘markatak trabajirinakajj manqʼañanakanïpjjañapataki’ (Ezeq. 48:18, 19). Taqe ukanakajja kunanaktï jichhürun lurksna ukanakwa amtayistu. Mä paraisonjam Jehová Diosar sirvktan ukanakajja, taqeniw Criston ajllit jilanakapar yanaptʼsna, ‘walja jaqenakjam’ uñtʼatäpki uka taypit Jehová Diosajj markapar pʼeqtʼapjjañapatak uttʼayawayki ukanakarus yanaptʼaraksnawa (Apoc. 7:9, 10). Jupanakar yanaptʼañatakejja, kunanaktï suma phoqeri amuyasir esclavojj siskistu ukanakaruw istʼañasa, ukaw taqe kunat sipansa jukʼamp wakiskirejja.

15, 16. 1) ¿Ezequielan visionapajj kunsa yaticharakistu? 2) ¿Kuna lurañanakansa yanaptʼsna?

¹⁵ ¿Ezequielan visionapajj kunsa Jehová Diosar serviskakiñatakejj yatichistu? ‘Jehová Diosaw ukanki’ sat markanjja jan levitanakäpki uka 12 tribunakaw pä lugaranakan trabajipjje sasaw Diosajj qhanañchi: jupanakajj templon patiopana ukhamarak marka anqäjjanakanwa trabajipjje. ¿Uka lugaranakan kunas lurasi? Jehová Diosan templopankir patioparojja, taqpach tribunakaw sacrificionak loqtasin Diosar adorañatakejj mantapjje (Ezeq. 46:9, 24). Marka anqäjjankir lugaranakanjja taqpach tribunakatwa jaqenakajj utjaraki, jupanakajj markan oraqenakap yapuchasaw yanaptʼapjje. ¿Kunsa jupanakat yateqsna?

¹⁶ Jichhürunakanjja kunjamtï Ezequielan visionapan uñjaskäna ukhamarakiw walja jaqenakjam uñtʼatäpki ukanakajj lurapjjaspa, jupanakajj jachʼañchir sacrificionak loqtasaw Jehová Diosar ‘templopan’ adorapjje (Apoc. 7:9-15). ¿Kunjamsa jupanakajj jachʼañchir sacrificionak loqtapjje? Predicasa, tantachäwinakan arstʼasa, ukhamarak uka tantachäwinakan cantasa. Jupanakatakejj Jehová Diosar adorañajj wali importantewa (1 Crón. 16:29). Maysa toqetjja waljanirakiw Diosan markaparojj kunaymaninak luras yanaptʼapjje. Sañäni, yaqhepajj Tantachasiñ Utanak lurasa, sucursalanak lurasa, uka utanakar mantenimiento lurasa, yaqha ukhamanakan trabajisaw Jehová Diosan markapan yanaptʼapjje. Yaqhepasti ukanakan lurasiñapatakejj donacionanakapampiw yanaptʼapjjaraki. Diosan markapar taqe ukanakan yanaptʼasajja, ‘Diosar jachʼañchañatakis’ oraq yapuchapkaspa ukhamawa (1 Cor. 10:31). “Diosarojj ukham sacrificionakaw wal kusisiyi”, ukatwa jupanakajj Jehová Diosatak taqe chuyma trabajipjje, markaparus yanaptʼapjjaraki (Heb. 13:16). ¿Jiwasajj taqe ukanakan yanaptʼañatakejj chʼamachasisktanti?

“Machaq alajjpachanakampi machaq oraqempi suyasktanjja”

17. 1) ¿Ezequielan visionapajj kunjamsa jutïrin jukʼamp sum phoqasini? 2) Jesusajj Waranqa Maranak apnaqkani ukhajja, ¿kuntï aka oraqenkir pʼeqtʼirinakajj lurapkani ukajj khitinakarus yanaptʼani?

¹⁷ ¿Ezequielajj Jehová Diosar churañatak oraqe visionan uñjkäna ukajj jutïrin phoqasirakiniti? Jïsa. Ak amuytʼañäni: Ezequielajj ‘Diosar churatäki uka oraqe’ uñjäna, ‘Jehová Diosan santuariopaw’ uka oraqenkarakïna, uka santuariojj marka taypinkänwa (Ezeq. 48:10). Ukhamätapajj akar confiyañatakiw yanaptʼistu: Armagedón pasatat kawkjansay jakaskchiñänejja Jehová Diosajj jiwasampipunïniwa (Apoc. 21:3). Jesusajj Waranqa Maranak apnaqkani ukhajja aka oraqen pʼeqtʼapkani ukanakajja, mä arun khitinakatï Jehová Diosan markap uñjapjjañapatak uttʼayatäpkani ukanakajj oraqpachanwa Diosan servirinakapar yanaptʼapjjani. Jupanakajj munasiñampiw ‘machaq oraqe’ sasin uñtʼatäpki ukanakaru, jan ukajj suma chuyman jaqenakar pʼeqtʼapjjani (2 Ped. 3:13).

18. 1) ¿Kunatsa pʼeqtʼirinakajj Diosan gobiernoparjamaw apnaqapjjani sasin sissna? 2) ¿Uka markan sutipajj kunar confiyañatakis yanaptʼistu?

¹⁸ Ezequielajj visionan uñjkäna uka markajja, aka oraqen pʼeqtʼapkani ukanakampi sasiwa, jupanakajj Diosan gobiernoparjamaw taqe kuns lurapjjani. ¿Kunatsa ukham sistanjja? Bibliarjamajj uka 12 punkunakan markajja, Machaq Jerusalenampi sasiwa, alajjpachankir uka markajj 12 punkunakanirakiwa. Machaq Jerusalenajj Jesucristomp chik reyit apnaqanipkani uka 144.000 ajllit cristianonakampi sasiwa (Apoc. 21:2, 12, 21-27). Ukhamasti aka oraqen pʼeqtʼapkani ukanakajj kuntï Diosan Reinopajj amtkani ukarjamaw pʼeqtʼapjjani, taqe kuns phoqapjjarakini. ‘Jehová Diosaw ukankani’ sat markajja, wiñayatakiw Jehová Dios saparuk paraison adorasjjani sasin confiyañatakiw yanaptʼistu. Ukhamasti paraison jakañajj wali sumapunïniwa.