‘Mä sapa markarukiw tukuyäjja’

1, 2. 1) ¿Kunatsa yaqha markankir judionakajj sustjasipjjpachäna? 2) ¿Kuna yatiyäwsa jichha kutin katoqapjje? 3) ¿Kuna jisktʼanakarus aka yatichäwin qhanañchaskañäni?

EZEQUIELAJJA Babiloniankapkäna uka judionakarojj Diosan walja profecianakapwa yatiyäna. Uka profecianakat nayrïrejj juchañchäwi arunakänwa, ukjjar arskäna ukanakas juchañchäwi arunakarakïnwa (Ezeq. 3:24-26; 4:1-7; 5:1; 12:3-6). Ezequielajj demostracionamp uñachtʼaykäna uka profecianakajja, judionakar juchañchañatakïnwa.

² Ezequielajj mayampi yaqha profecía uñachtʼayañatak judionak nayraqatan saytʼaskäna ukhajja, judionakajj wal sustjasipjjpachäna. Inas jupanakajj akham sapjjchïna: “¿Jichhajj kuna juchañchäwi arunaksa katoqarakiñäni?” sasa. Kuntï Ezequielajj yatiykäna ukajj janiw mayni profecianakjamäkänti. Jichha kutinjja, uka profeciajj janiw juchañchäwi arunakanïkänti, jan ukasti mä suma yatiyawinïnwa (Ezeq. 37:23). ¿Kuna profecía arunaksa Ezequielajj yaqha markar apata judionakar yatiyäna? ¿Kamsañsa ukajj munäna? ¿Kunjamsa uka profeciajj jichhürunakan phoqasiraki? Ukanak yatjjatañäni.

‘Amparajanjja mä sapa lawakïniwa’

3. 1) ¿‘Judá markatakïkäna’ uka lawajj kunamp sasïnsa? 2) Efrainan lawapajj tunka tribunakani Israel markamp sasïnwa sasajj ¿kunatsa sistanjja?

³ Jehová Diosajj pä lawanakar qellqjjatañapwa Ezequielar mayïna. Mä lawanjja ‘Judá markataki’ sañapänwa, mayninsti ‘Efrainan lawapa, Joseataki’ sañaparakïnwa (Ezequiel 37:15, 16 liytʼañataki). ¿Uka pä lawanakajj kunamp sasïnsa? ‘Judá markatakïkäna’ uka lawajja, Judá ukhamarak Benjamín tribunakampi sasïnwa. Uka pä tribunakajja, Judá chachat jutiri reyinakamp apnaqatäpjjänwa. Ukhamarus sacerdotenakajj templon servipjjatap laykojja, sacerdotenakampi uka reyinakampejj purapatwa yanaptʼasipjjäna (2 Crón. 11:13, 14; 34:30). Ukhamasti Judá markanjja, Davidan familiapat jutir reyinaka Leví tribut jutir sacerdotenakaw utjäna. Ukatjja ‘Efrainan lawapajj’ tunka tribunakani Israel markamp sasïnwa. ¿Kunatsa? Uka tunka tribunakarojja, nayraqatajj Efraín tribut jutir Jeroboán reyiw apnaqäna. Tiempompejja, Efraín tribuw tunka tribunakani Israel markan jukʼamp chʼamanïna (Deut. 33:17; 1 Rey. 11:26). Tunka tribuni markanjja, janiw Davidan familiapat jutir reyinakasa ni Leví tribut jutir sacerdotenakas utjkänti.

4. Kuntï Ezequielajj pä lawanakampejj lurkäna ukajj ¿kunsa uñachtʼayi? (Aka yatichäwi qalltan utjki uka dibujo uñjjattʼäta).

⁴ Jehová Diosajja ‘uka pä lawanak mayachthapim, ukhamat mä sapa lawakïñapataki’ sasaw Ezequielar säna. Yaqha markar apat judionakajja, kuntï Ezequielajj lurkäna uk uñjasajj akham sasaw jisktʼapjjäna: ‘¿Ukanakajj kamsañs muni uk janit sapkitäta?’ sasa. Ezequielajja kuntï Diosajj lurañ amtki ukwa ukajj uñachtʼayi sasaw jupanakar säna. Uka pä lawanakat parlkasajja, Diosajj akham sänwa: ‘Jupanakarojj mä sapa lawarukiw tukuyäjja, amparajanjja mä sapa lawakïniwa’ sasa (Ezeq. 37:17-19).

5. Ezequielajj pä lawanak mayachthapkäna ukajj ¿kamsañsa munäna? (“Pä lawanakaw mayachthapisi” sat recuadro uñjjattʼarakïta).

⁵ Ukjjarusti, pä lawanakan mayachthapisitapajj kamsañsa munäna ukwa Jehová Diosajj Ezequielar qhanañchäna (Ezequiel 37:21, 22 liytʼañataki). Yaqha markar apatanakajj Israel oraqer kuttʼjjapjjañapäkäna ukanakajja, ‘mä sapa markarukiw’ tukupjjañapäna. Mä arunjja, pä tribuni Judá markankirinakampi tunka tribuni Israel (Efraín) markankirinakampejj mayakëjjapjjañapänwa (Jer. 30:1-3; 31:2-9; 33:7).

6. Ezequiel 37 capitulonjja ¿kuna pä suma profecianakas utji?

⁶ Ezequiel 37 capitulonjja, kunjamsa Diosaruk adorasjjani uka toqet parlir pä suma profecianakaw utji. Maya, Jehová Diosajj yaqha markar apatanakaruw markapar kuttʼjjañapatak salvi (versículos 1-14). Paya, mayampiw jupanakar mayachthapi (versículos 15-28). Uka pä suma profecianakajj akwa sañ muni: Diosajj markapar salvaspawa, mayachthapirakispawa.

‘Taqe cheqanakat jupanakar tantachtʼäjja’

7. Diosatakejj janiw kun lurañas chʼamäkiti, ¿kunjamsa 1 Crónicas 9:2, 3 textojj ukhamätap uñachtʼayi?

⁷ Jaqen amuyupatakejja, yaqha markar apatäpkäna uka judionakar salvañasa mayachthapiñasa chʼamäspawa.a Ukampis, “Diosatakejj taqe kunas lurasikispawa” (Mat. 19:26). Jehová Diosajj kuntï arskäna uk phoqänwa. 537 antes de Cristo maranwa judionakajj Babiloniat mistjjapjjäna, uka qhepatjja Diosaruk mayamp adorjjañatakejj paypach markankir judionakaw Jerusalenar kuttʼapjjäna. Ukjja Bibliajj aka arunakampiw qhanañchi: ‘Judá, Benjamín, Efraín, Manasés uka chachanakat jutiri yaqhepanakajja, Jerusalén markanwa jakañ qalltapjjäna’ sasa (1 Crón. 9:2, 3; Esd. 6:17). Kunjamtï Diosajj arskänjja, pä tribuni Judá markankirinakampiru tunka tribuni Israel markankirinakampiruw mayachthapisïna.

8. 1) ¿Kuna profecía arunaksa Isaiasajj arsüna? 2) ¿Kuna wakiskir pä toqenakatsa Ezequiel 37:21 textojj parli?

⁸ Mä 200 maranak nayrajja, markapar kuttʼjjasajj kunjamsa Israel ukhamarak Judá markanakajj mayakëjjañapäna uka toqetwa Isaiasajj profecian arsüna. Jehová Diosajja ‘Israelat taqe toqer ananukutanakaruw’ tantachthapini, ‘Judá oraqet taqe toqer ananukutäpki ukanakarus oraqen pusi thiyanakapatpachwa’ tantachthapini, ‘Asiria markat misturinakarus’ tantachthapirakiniwa sasaw Isaiasajj säna (Is. 11:12, 13, 16). Jehová Diosajja arsutaparjamaw ‘kawkïr markanakar ananukutäpkäntï uka markanakat israelitanakar’ salvjjäna (Ezeq. 37:21). Aka pä toqet amuytʼañäni: nayraqatajja, Diosajj ‘Judá’ ukhamarak ‘Efraín’ markanakarojj ‘israelitanaka’ sasaw sisjjäna, ukham sasajj mä markarjamak jupanakar uñj-jjatapwa uñachtʼayäna. Maysa toqetjja, israelitanakajj janiw Babilonia markatak kuttʼapjjañapäkänti, jan ukasti walja markanakata, mä arunjja ‘taqe cheqanakatwa’ Israel oraqer kuttʼapjjañapäna.

9. Yaqha markar apatanakajj Jerusalenar kuttʼjjapjjäna ukhajja, ¿kunsa Jehová Diosajj jupanakan mayachtʼatäpjjañapatakejj luräna?

⁹ Yaqha markar apatanakajj Jerusalenar kuttʼjjapjjäna ukhajja, jupanakar mayachtʼañatakejj kunatï wakiski ukwa Jehová Diosajj churäna. Jupajj suma awatirinakwa ajllïna, ukanakat yaqhepajj akanakänwa: Josué sat jachʼa jilïr sacerdote, Zorobabel, Esdras, Nehemías chachanaka. Ageo, Zacarías, Malaquías chachanakarus profetat uttʼayäna. Diosar taqe chuyma serviri uka chachanakajja, Diosan arunakaparjam sarnaqapjjañapatakiw israelitanakar chʼamañchapjjäna (Neh. 8:2, 3). Ukatjja Diosan markap contra enemigonakapajj saytʼapkäna ukhasa, Diosajj uka jan wali jaqenakan amtanakap jan phoqasiyasaw israelitanakar jarkʼaqäna (Est. 9:24, 25; Zac. 4:6).

10. ¿Kunsa tiempompejj Supayajj luräna?

¹⁰ Jehová Diosajj wali munasiñampis taqe ukanak lurkchïnjja, israelitanakat jilapartejj janiw Diosaruk adorjjapjjänti. Kuntï jupanakajj lurapkäna ukanakajj Biblian qellqatawa, Israel markar kuttʼjjapjjäna uka qhepatwa ukajj qellqasïna (Esd. 9:1-3; Neh. 13:1, 2, 15). Kuttʼapkäna ukhat janïraw 100 maranakas paskänti, ukhaw israelitanakajj Diosar jan sum adorjjapjjänti, ukatwa ‘nayan ukar kuttʼanipjjam’ sasin Diosajj säna (Mal. 3:7). Jesusajj aka oraqer jutkäna ukhajja, judionakan religionapajj walja sectanakar tʼaqanoqtatäjjänwa, Diosat jitheqtat awatirinakaw jupanakar pʼeqtʼarakïna (Mat. 16:6; Mar. 7:5-8). Supayan amtapajj phoqasïnwa, jupajj Diosan markaparuw tʼaqanoqtayäna. Ukhamäkchïnsa, Jehová Diosajj kuntï markapar mayachthapiñat arskäna ukajj phoqasiñapänwa. ¿Kunjamas ukajj phoqasïna?

‘David servirijaw jupanakan reyipäni’

11. 1) Diosajj kuntï markapar mayachthapiñat arskäna uka profeciajj ¿kunapachas jukʼamp phoqasiñapäna? 2) ¿Aka oraqer jaqoqanitäsajj kun lurañatakis Supayajj wal chʼamachasïna?

¹¹ Ezequiel 37:24 liytʼañataki. Jehová Diosajj kuntï markapar mayachthapiñat arskäna ukajja, ‘David servirijajj’ reyïkani, mä arun Jesusajj reyit uttʼayatäkani uka qhepatwa phoqasini sasaw qhanañchäna. 1914 maranwa Jesusajj reyit uttʼayatäjjäna (2 Sam. 7:16; Luc. 1:32).b Uka tiempotakejja, Israel marka lantejj ajllit cristianonakaw Diosan markapäjjäna, jupanakajj Diosan Israelapa sasin uñtʼatäpjjewa (Jer. 31:33; Gál. 3:29). Supayajj alajjpachat jaqoqanitäsajj Diosan markapar tʼaqanoqtayañatakiw wal chʼamachasiwayi (Apoc. 12:7-10). Sañäni, Russell jilatajj 1916 maran jiwjjäna uka qhepatjja, apostatanakar tukupkäna ukanak toqew ajllit cristianonakar tʼaqanoqtayañ Supayajj munäna. Ukampis uka apostatanakajj mä jukʼa tiempot Diosan markapat mistjjapjjänwa. Ukatjja Diosan markapar pʼeqtʼapkäna uka jilatanakaruw Supayajj carcelar llawintayäna. Ukhamäkchïnsa, janiw Diosan markapar chhaqtaykänti. Diosar taqe chuyma servipkäna uka ajllit cristianonakajj mayachtʼatäsipkakïnwa.

12. ¿Kunatsa Supayajj Diosan Israelapar tʼaqanoqtayañ jan puediwayki?

¹² Nayra Israel markat sipansa, Diosan Israelapaw Supayan yantʼanakaparojj jukʼamp saykatawayi. ¿Kunatsa Supayan amtapajj jan phoqasiwayki? Ajllit cristianonakajja, Jehová Diosan leyinakaparjam sarnaqañatakiw wal chʼamachasiwayapjje. Ukatwa Jesucristo Reyejj jupanakar jarkʼaqawayi, jupajj niyaw Supayarojj atipjani (Apoc. 6:2).

Diosajj ‘mä sapa’ markarukiw servirinakapar tukuyani

13. Pä lawanakat parlir profeciajja, ¿kunsa Dios saparuk mayamp adorasiñap toqet qhanstayi?

¹³ Pä lawanakan mayaruk tukutapajj ¿kamsañsa jichhürunakan muni? Kunjamtï yatjjataniwayktanjja, uka pä lawanakat parlir profeciajj kunjamsa pä gruponakajj mayachthapisiñapäna ukwa uñachtʼayi. Ukatjja Jehová Diosaw uka gruponakar mayachthapiñapäna, ukwa jukʼamp uñachtʼayi. Ukhamasti, ¿pä lawanakat parlir profeciajj Diosaruk adorasiñap toqet kunsa qhanstayi? Diosaw servirinakaparojj ‘mä sapa’ markaruk tukuyani, ukwa uka profeciajj qhanstayi (Ezeq. 37:19).

14. Pä lawanakat parlir profeciajja, ¿kunjamsa 1919 maran jukʼamp phoqasïna?

¹⁴ Diosan markapajj 1919 maran qʼomachatäjjäna Diosar serviñas wali sumäjjäna uka qhepatjja, pä lawanakat parlir profecian jukʼamp phoqasitapaw qhan amuyasïna. Uka tiemponjja mayachthapit marka taypinkirinakat jilapartejja, reyinakata ukhamarak sacerdotenakat alajjpachan serviñwa suyapjjäna (Apoc. 20:6). Uka ajllit cristianonakajj ‘Judá markatakïkäna’ uka lawampi sasïnwa, ukanjja Davidan familiapat jutir reyinakampi Leví tribut jutir sacerdotenakampiw utjäna. Ukampis qhepatjja, jukʼat jukʼatwa aka oraqen jakañ suyasipki uka cristianonakajj uka ajllit cristianonakar mayachtʼasisipkäna. Jupanakajj ‘Efrainan lawapampi’ sasïnwa, ukanjja janiw Davidan familiapat jutir reyinakasa ni Leví tribut jutir sacerdotenakas utjkänti. Uka pä gruponakaw Diosan markapäpjje, Jesucristo Reyimpi pʼeqtʼatäsajj mayachtʼatarakiw Jehová Diosar servipjje (Ezeq. 37:24).

‘Jupanakasti nayan markajäpjjarakiniwa’

15. Ezequiel 37:26, 27 texton qellqatäki uka profecía arunakajj ¿kunjamsa phoqasiski?

¹⁵ Ezequielan profeciaparjamajja, ajllit cristianonakamp chikajj walja jaqenakaw Diosaruk adorañ munapjjañapäna. Jehová Diosajj markapat akham sänwa: ‘Waljaniruw tukuyäjja’, ‘carpajajj jupanakampïniwa’ sasa (Ezeq. 37:26, 27; nota). Uka arunakajja, Ezequielajj jakkäna ukhat mä 700 maranak pasatat kuntï apóstol Juanajj arskäna ukwa amtayistu. ‘Walja jaqenakat’ parlkasajja, Juanajj akham sänwa: “Tronon qontʼatäki uka Diosajja jupanakar jarkʼaqañatakiw mä carpa wakichani” sasa (Apoc. 7:9, 15). Ajllit cristianonakampi walja jaqenakampejja jichhürunakan mä sapa markakïpjjewa, uka markajj Diosan markapawa, jupaw markapar jarkʼaqaraki.

16. Ajllit cristianonakampi aka oraqen jakañ suyasipki ukanakampi mayachtʼatäpjjañap toqetjja ¿kunsa Zacarías profetajj arsüna?

¹⁶ Ajllit cristianonakampi aka oraqen wiñayatak jakañ suyasipki ukanakampi mayachtʼatäpjjañap toqetwa Zacarías profetajj parlarakïna. ‘Markanakankir kunayman arunak parliri 10 chachanakat’ parlkasajj akham sänwa: ‘Mä judío jaqen isipat katthapisipjjani, akham sapjjarakiniwa: “Jumanakampiw nanakajj sarañ munapjjta, kuna laykutejj Diosajj jumanakampïskatapwa nanakajj istʼapjjta” sasa’ (Zac. 8:23). ‘Mä judío jaqe’ siskchisa, uka arunakajj janiw mä jaqetak parlkiti, jan ukasti mä grupo jaqenakatwa parli. Uka pachpa textonjja ‘jumanakampiw’ siski uka arojj waljanit parlaskatapwa uñachtʼayistu. Ukajj aka oraqenkir ajllit cristianonakatwa parlaski, jupanakaw Diosan Israelap taypinkapjje (Rom. 2:28, 29). ‘10 chachanakajja’, aka oraqen wiñayatak jakañ suyasipki uka cristianonakamp sasirakiwa. Jupanakaw ajllit cristianonakat wal katuntasisajj jupanakamp chik sarapjje (Is. 2:2, 3; Mat. 25:40). ‘Isipat katthapisipjjani’, ‘jumanakampiw nanakajj sarañ munapjjta’ siski uka arunakajja, uka pä gruponakajj wali suma mayachtʼatäpjjatapwa uñachtʼayi.

17. Jichhürun Diosan markapajj kunja mayachtʼatäñapänsa uka toqet ¿Jesusajj kamsänsa?

¹⁷ Jesusajja uka pä gruponakajj ‘mä sapa tamakïpjjaniwa’, nayaw jupanakan awatiripätjja sasin siskäna ukhajja, inas kuntï Ezequielajj mayachthapiñ toqet arskäna uka arunak amtchïna. Uka pä gruponakajj akanakawa: jupan ovejanakapa (ajllit cristianonaka), ‘yaqha ovejanaka’ (aka oraqen jakañ suyasipki uka cristianonaka) (Juan 10:16; Ezeq. 34:23; 37:24, 25). Kuntï Jesusajj qhanañchkäna ukasa kuntï nayra profetanakajj sapkäna ukasa, jichhürun ajllit cristianonakampi aka oraqen jakapkani ukanakampejj kunja mayachtʼatäpjjesa ukwa uñachtʼayi. Falso religionajj walja gruponakar tʼaqanoqtatawa, ukampis jiwasajj wali suma mayachtʼatätanwa, ukajj mä milagrowa.

‘Templojajj wiñayatakiw jupanak taypinkani’

18. Ezequiel 37:28 textorjamajja, ¿kunatsa Diosan markapajj jan ‘aka mundonkirïpjjañapäkiʼ?

¹⁸ Ezequielajj mayachtʼatäñ toqet parlkäna uka profecian qhepa arunakapajj akwa uñachtʼayi: Diosan markapajj janipuniw tʼaqanoqtkaniti (Ezequiel 37:28 liytʼañataki). Diosan markaparojja ‘jupanak taypinkki’ uka templow mayachthapi, mä arun Jehová Diosaruk adorapjjatapaw mayachthapi. Diosan servirinakapatï ‘santo jaqëñataki’, mä arunjja Supayan apnaqata akapachat jitheqtañatak chʼamachasisipkakini ukhakiw Diosan templopajj jupanak taypinkani (1 Cor. 6:11; Apoc. 7:14). Akapachat jitheqtat sarnaqañajj kunja wakiskirisa ukwa Jesusajj qhan uñachtʼayäna. Discipulonakapatak taqe chuyma mayiskäna ukhajja, akham sänwa: “Santo Awki, [...] jupanakar uñjam, ukhamat jupanakajj mayakïpjjañapataki”. ‘Jupanakajj janiw aka mundonkirïpkiti [...]. Kunatï cheqäki uka taypiy jupanakarojj santor tukuyam’ sasa (Juan 17:11, 16, 17). Jesusajja ‘jupanakajj mayakïpjjpan’, janirak ‘aka mundonkirïpjjpanti’ sasaw säna.

19. 1) ¿Kun lurañatak chʼamachasisas Diosat yateqasitas uñachtʼaysna? 2) Janïr jiwayatäkäna uka arumajja, ¿kunsa Jesusajj mayachtʼatäñ toqet discipulonakapar säna?

¹⁹ Jesusajj uka textonakwa “Santo Awki” sasin Diosar säna. Jehová Diosajj santo jan pantjasiri ukhamawa. Israel markarojja Jupajj akham sänwa: ‘Nayasti santo Diosätwa, jumanakajj santo jaqëpjjañamarakiwa’ sasa (Lev. 11:45). Niyakejjay Diosat yateqasiñatak chʼamachasstanjja, uka arunakar istʼasapuniw sarnaqañ muntanjja (Efes. 5:1; 1 Ped. 1:14, 15). Jaqenakat parlkasajja, ‘santoʼ sasin Biblian jaqokipaski uka arojj ‘jitheqtataʼ sañwa muni. Jesusajj janïr jiwayatäkäna uka arumaw uka aru aytäna, discipulonakapajj taqʼa tʼaqa sarnaqañatak chʼamañchir akapachat jitheqtatäpjjani ukhakiw mayachtʼatäpjjani sasaw qhanstayäna.

“Supayat jarkʼaqañamatakiw maysma”

20, 21. 1) ¿Jehová Diosajj jarkʼaqetaniwa sasin jukʼamp confiyañatakejja ¿kunas yanaptʼistu? 2) ¿Kunsa sapa maynejj lurañasa?

²⁰ Testigonakajj kunja mayachtʼatäpjjesa ukajja, Jehová Diosajj Jesusan aka oracionapar istʼatapwa uñachtʼayi, Jesusajj akham sasaw mayisïna: “Supayat jarkʼaqañamatakiw maysma” sasa (Juan 17:14, 15 liytʼañataki). Supayajja janiw Diosan markaparojj tʼaqanoqtayañ puedkiti, uk uñjasaw Diosan yanaptʼapar jukʼamp confiytanjja. Ezequielajj arskäna uka profecianjja, pä lawanakajj mayarukiw amparapan tukuñapäna. Ukhamasti Jehová Diosaw markaparojj amparapamp Supayat jarkʼaqasajj mayachthapi, ukajj mä suma milagrowa.

²¹ Ukhamajja, ¿kun lurañatakis sapa maynejj chʼamachasiñasa? Diosan markapan wali suma mayachtʼatäñapatakiw chʼamachasiñasa. Ukatjja sapa maynirakiw Jehová Dios saparuk templopan adorañatak chʼamachasiñasa. ¿Kamsañsa uka arunakampejj muntanjja? Jutïr pä yatichäwinakanwa uka toqet yatjjataskañäni.