Diosar jakʼachasipxam
Wajchanakan awkipa
“DIOSAX wajchanakan awkipawa, [...] jupax qullan utjäwipan jaki.” (Salmo 68:5.) Jehová Diosan amuytʼayat uka arunakaxa, ¡chuymsa chʼallxtayistuwa! Jïsa, jan khitin yanaptʼirinïpki ukat khitinakatï wajchäpki jupanakaruxa, Diosax arxati ukat khuyaptʼayi ukhamawa. Israelitanakar kamachinak churkäna ukanwa ukax sum amuyasi. Biblianxa “wajcha” uka arux Éxodo 22:22-24 uka jiskʼa tʼaqanakanwa nayraqat uñsti.a
Leyix akham sänwa: “Janiw jan walinak lurasina tʼaqhisiyapxätati [...] wajchanakarusa” sasa (22 jiskʼa tʼaqa). Diosax uka arunakampixa, janiw khuyaptʼayasipxätaw sasak siskänti, jan ukasti mä kamachi phuqhapxañapatakiw mayïna. Jan awkini qhipariri wawanakaxa, jan khitin uywata jan khitin uñjata ukhamaw uñjasipxäna. Ukatwa Jehová Diosax wajchanakar jarkʼaqänxa: janiw jan walinak lurasina “tʼaqhisiyapxätati” sänwa, yaqhip qillqatanakax uka arxa, “munañapar apnaqaña”, “jan walinakamp tʼaqhisiyaña” ukat “wal irnaqayaña” ukham jaqukipapxaraki. Diosatakix kunatsa wali wakiskirïpachäna uka kamachi phuqhañaxa, uk jichhax uñjañäni.
Leyix akham sänwa: ‘jumatix tʼaqhisiyäta ukaxa jupanakax nayaruw arnaqasipxitani, ukatsti nayax jupanakan arnaqasitanakapxa istʼäwa’ sasa (23 jiskʼa tʼaqana). Uka jiskʼa tʼaqanakanxa Diosax markpachar (jumanaka sasa) parlasaxa, maynirukiw (juma sasa) parläna. Ukhamaxa, sapa maynis ukat markpachas uka kamachi phuqapxañapänwa. Jehová Diosaxa wajchanakarux uñjaskänwa ukat mayisitanakapar istʼañatakis yanaptʼañatakis jankʼakïnwa, ukax kamachinakapan qhanaw amuyasi (Salmo 10:14; Proverbios 23:10, 11).
Mä wajchax wali tʼaqhisiyatäsin Diosar mayisïna ukhaxa, ¿kunas pasäna? “Nayax colerataxa, jumanakarux espadampkamaw jiwarayapxäma” sänwa Jehová Diosaxa (24 jiskʼa tʼaqa). Mä qillqataxa uka jiskʼa tʼaqat parlkasax akham qhanañchtʼi, “walpun colertʼasiña” mä arun “colerax pʼiqirus maqatkaspa” ukham sañ muni sasa. Ukampisa, wajchanakar arxatas jucha mutuyirixa janiw israelankiri taripirïkänti (juez), jan ukasti Jehová Dios pachpaw taripäna (Deuteronomio 10:17, 18).
Jehová Diosax pachpakïskiwa (Malaquías 3:6). Jichhürunakanxa, wajchanakat sinttʼasiskakiwa (Santiago 1:27). Ukhamax janipuni armapxañäniti: wajcha wawanakaru tʼaqhisiyañaxa Jehová Diosaru mä arunxa wajchanakan awkiparuw colerayi. Wajcha wawanakar tʼaqhisiyapki ukanakaxa ‘Diosan jachʼa colerapat’ janiw qhispipkaniti (Sofonías 2:2). Jupanak pachpaw aka arunakan chiqätap yatipxarakini: “¡Wali axsarkañawa jakkir Diosan amparaparu jaltʼañaxa!” (Hebreos 10:31).
[Qhanañchäwi]
a Uka aruxa niya pusitunk kutiw Biblian uñsti. Hebreo arut jaqukipatäki ukax yuqall wawanakataks parlkichixa, Moisesax katuqkäna uka Leyix imill wawanakampachat parli (Números 27:1-8).