Diosar jakʼachasipxam

“Akax wawamax”

2 REYES 4:8-37

SINTI jan waltʼañanakar puriñax utjki ukanakatxa, mä wawan jiwatapaw taqi kunat sipansa jukʼamp llakkañaxa. Ukampis ukax janiw wiñayatakis chhaqtkaspa ukhamäkiti. ¿Kunatsa? Kunattixa jiwatat jaktayapxañapatakix walja chachanakaruw Diosax chʼam churäna sasaw Bibliax qhanañchi. Jupanakat maynix Eliseo profetänwa. Jupax kunjamsa mä jiskʼa yuqall wawar jaktayäna ukaw 2 Reyes 4:8-37 qillqatan qhanañchasi, uk jichhax uñjañäni.

Sunem sat markan qamasir mä chacha warmiw Eliseo profetar qurpachapxirïna ukat manqʼs waxtʼapxirïna. Mä uruxa, ukham sum katuqtʼapxatapat yuspärtʼasaxa, akham sasaw Eliseox uka warmir säna: “Jutir maratakixa aka pachpa urunakatakisti mä wawa amparamana ichtʼatäyätawa” sasa. Jupax janiw wawanïñ puedkänti, janipuniy wawanïkchïti sasaw amuyaspachäna. Ukampis wawanïñ horasax purinxänwa, Eliseo profetax arskäna ukax phuqasïnwa. Ukampis mä qhawqha tiempokiw kusisit jikxatasïna. Mä qhawqha maranakatsti, awkipampiw wawapax pampankaskäna ukhaw awkipar akham säna: “¡Ay pʼiqixa! ¡Pʼiqiwa usutu!” sasa. Ukspachaw utapar apapxäna, ukampis wawax taykapan jarphipxaruw jiwxäna (16, 19 ukat 20 jiskʼa tʼaqanaka). Jupax wali llakitaw kawkhantï Eliseo profetax ikirïkäna uka ikiñapxar wali kʼachat ichnuqäna.

Ukat chachapar jisktʼasaxa, jankʼakiw Eliseo profetar thaqhir mistuwayi. Ukatxa niya 30 kilometronak sarasax Carmelo sat qulluruw puri, ukanwa profetax jikxatasïna. Ukampis janiw uka warmix sint jachkänti. Eliseot nayrax Elías sat profetaw mä viudan yuqapar jaktayarakïna, ¿uk yatisat jan sint jachkpachäna? (1 Reyes 17:17-23.) ¿Eliseo profetax munat wawajarux jaktayarakiniw sasat atinispachäna? Janiw uk yatktanti. Ukampisa, Eliseo profetar irpañkamax janiw utapar kuttʼkänti.

Utar purisaxa, profetax ikirïki ukar sapakiw mantawayi. Ukanxa, wawarux jiwatwa ikiñ patan jikxatäna (32 jiskʼa tʼaqa). Ukat taqi chuymaw Jehová Diosar achiktʼasïna. Ukatxa jiwat wawan cuerpop qhumthapïna, “wawasti jukʼat jukʼat juntʼutatañ qalltäna”. ¡Wawax wasitatwa jakxäna, ukax mä milagrünwa! Eliseox jupar jawsasin “akax wawamax” sasin säna ukhaxa, uka warmix wali kusisitapuniw jikxataspachäna (34 ukat 36 jiskʼa tʼaqanaka).

Uka jaktäwit yatiñaxa, wawap jiwañan chhaqtayasipki ukanakarux wal chuymachtʼaspa ukat mä suytʼäw churarakispa. Jïsa, kunja llakitas awk taykanakax jikxatasipxi ukxa sumwa Jehová Diosax amuyi. Janiw ukakïkiti, Jupax jiwat wawanakaparus jaktayañwa munaraki (Job 14:14, 15). Ukhamarusa, millón millón jaqinakar jaktayañatakiw arsuwayaraki. Aka sarnaqäwit yatiqawayktan ukat Biblian ukham yaqha sarnaqäwit qillqatäki ukanakaxa, kunsa jutïrin lurani ukwa uñachtʼayistu.a

Ukampis jiwatanakatak mä suytʼäwit Biblian qillqatäki uk yatkasasa mä munat masisax jiwxi ukhax llaktʼasikipuntanwa. Sapa yuqall wawap jiwatapatwa, Diosar taqi chuyma luqtir mä jilatax akham säna: “Wawajar wasitat qhumantʼasxä ukhakiw llakijax chhaqtani” sasa. Ukhamäkchisa, jiwir familiaranakasampi amigonakasampix wasitatwa jikisxañäni, uka suytʼäwit lupʼiñaw llakimp jan aynachtʼañatak yanaptʼistani. ¡Jupanakar wasitat qhumantañäni ukhax wali kusiskañapunïniwa! Jïsa, Jehová Diosar jakʼachasiñax wali askipuniwa, kunattix Jupaw uka suma suytʼäwi churistu.

[Qhanañchäwi]