‘Luratanakapax jupamp chikaw sarxi’
THEODORE JARACZ jilatax miércoles 9 uruna, alwa horasaruw junio phaxsin 2010 maran jiwawayxi, jupasti Jehová Diosan Qhanañchirinakapan Uraqpachan Jilïri Irpirinak taypinwa irnaqtʼaskäna. Uka jilatax 84 maranïnwa. Melita esposapampix 53 maranakaw jaqichatäpxäna, jichhax Melita esposapa, ukat kullakapa, mä sobrinopa ukat pä sobrinanakapaw qhiparapxi.
Jaracz jilataxa, Pike County, Kentucky Estados Unidos markanwa, septiembre 28, 1925 maran nasïna. Ukatxa, agosto 10, 1941 maranwa, 15 maranïsax Jehová Diosar jakäwip katuyasisin bautisasïna, ukat 17 maranïxasaw precursor regularjam irnaqtʼañ qalltäna, ukhamaw jiwañapkamax niya 67 maranakax sapüru Diosatak irnaqtʼawayi.
Khä 1946 maranwa, 20 maranïxasax Escuela Bíblica de Galaad de la Watchtower satäkis ukarux saräna. Uka escuela tukuyatarux Cleveland, Ohio, Estados Unidos markaruw tamanak tumptʼirïñapatak khitapxäna. Ukat 1951 maranxa, Australia markankir Sucursalan pʼiqtʼañapatakiw khitapxäna. Anuario de los testigos de Jehová 1983 sat libroxa, Jaracz jilatatxa akham siwa: “Uka jilatax Diosan mayitanakapxa wali respetompiw uñjäna, ukat Diosan Arup yatiyañatakis wali sum pʼiqtʼarakïna, ukaw jilat kullakanakarux wal yanaptʼäna” sasa.
Estados Unidos markar kutʼxasaxa, diciembre 10, 1956 maranwa, Jaracz jilatax Melita Lasko kullakamp casarasïna. Ukat panpachaniw tamanak tumptʼirjama, ukat tamanak tumptʼirinakan uñjiripjamax irnaqtʼapxäna, ukhamatwa Estados Unidos markan waljanir yanaptʼapxäna. Ukat 1974 mara niya tukuyaruw Jehová Diosan Qhanañchirinakapan Uraqpachan Jilïr Irpirjam irnaqtʼañapatakix jawsapxäna.
Jaracz jilatan Jehová Diosar taqi chuyma yupaychatapatxa, walja maranakaw amtasini, jupasti taqi chuymaw Diosan munañap phuqawayi. Esposapatakix wali suma jaqïnwa, ukat munañanakap thaqhañat sipansa mayninakan askip thaqhirïna (1 Cor. 13:4, 5). Jaqinakax chiqaparu ukat khuyapayasiñampi uñjatäpxañapwa munäna, ukhamatwa mayninakat taqi chuyma llakitapax uñjasïna. Ukatxa taqi chuyma ukat jan qarjtasa Diosan Arupat yatiyasaw jaqinakar munasitap uñachtʼayarakïna.
Jaracz jilatan jiwatapax llakisiyistuwa, kunattix taqi chuyma irnaqtʼawayi, Betelankiri ukat Uraqpachankir jilat kullakanakans wali munatänwa. Ukampis walja maranak Diosat jan jithiqtasa aka Uraqin luqtawayatapatxa wal kusistanxa. Chiqpachansa ‘jiwañkama Diosar arkaskakitapatxa, jakañ corona’ katuqpacha (Apo. 2:10). ‘Luratanakapax jupamp chikaw sarxi’ (Apo. 14:13).