“Kunanakas pasäna ukjja qellqatanak pachpaw qhanañchi”

ALEMANIA markankir Adolf Hitler sat cancillerajj apnaqkäna ukhajja, kunayman jan waltʼäwinakaw utjäna, ukhaw jupajj waranq waranqa cartanak katoqäna. 1945 maranjja, kunapachatï Rusia toqenkir jaqenakajj Berlín marka jakʼanakan jakasjjapjjäna ukhajja, walja cartanakwa Moscú markan imatäñapatak apapjjäna. Uka toqet khitisa ukat kunatsa qellqäna uk sum yatjjatañatakisti sarnaqäwinakat yatjjattʼat Henrik Eberle sat jaqew wali sum uka cartanakat amuykiptʼatayna, ukanakasti Moscú markan imatänwa. Uka yatjjatäwitjja aka qhepa maranakanwa cartas a Hitler sat libron qhanañchasiwayi.

“Profesoranakasa, yateqerinakasa, monjanakasa, sacerdotenakasa, jan trabajoninakasa, empresarionakasa, cuartelan pʼeqtʼirinakasa ukat yaqha militaranakasa (SA [tropas de asalto]), Hitler chachar qellqapjjarakïnwa” sasaw uka yatjjattʼat jaqejj saraki. “Yaqhepanakajj Mesiasäkaspas ukham jachʼañchapjjäna ukat yaqhanakasti jan wali luririt uñtʼapjjarakïna.” ¿Iglesian peqtʼirinakapajj uka jan wali luräwinakapat carta apayapjjarakpachänti? Jïsa, ukampis mä jukʼakïnwa.

Ukampis Henrik Eberle sat jaqejj Jehová Diosan Qhanañchirinakapan Alemania markpachat apayat cartanak jikjjatäna, ukanjja nazis sat uñtʼat jaqenakan jan wal luräwinakapat denunciapjjäna. Kunja jan wal uñjatäpjjänsa ukjja Jehová Diosan Qhanañchirinakapajj 50 markanakatwa 20.000 cartanak qellqapjjäna ukat telegrama taypitsa apayapjjarakïnwa. Ukatjja waranq waranqaniw katuntata ukat patakats jilanirakiw jiwayat uñjasipjjäna. Henrik chachastï akham saskakiwa: “Jehová Diosan Qhanañchirinakapajj jukʼanikïpkchïnsa, janiw ajjsartʼayasipkänti ni iyawsäwits aynachtʼapkänti, taqe uka millón millón Alemania soldadonak nayraqatan aguantapjjäna, uka toqet amuytʼañajj wali wakiskiriwa” sasa.