Amuytʼayir arunakajj wali askiwa

Aka Oraqenjja, Jesusakiw wali suma Yatichirïnjja sasin waljaniw sapjje. ¿Jumajj ukhamti sarakta? Ukhamächi ukhajja, inas kunjamtï jupajj jisktʼanakampi ukat uñachtʼäwinakamp yatichkäna ukham yatichañatak chʼamachasiraksta. ¿Ukat kunjamsa amuytʼayir arunakamp yatichirïna uk amuyirïtati?

Parlktan ukhajj niya taqeniw ukham amuytʼayir arunakamp parltanjja. Ukat inas akham siri istʼirïstan: “Frutanakajj taqpachaw poqoratäjje sasaw sapjje, ukampis akanakajj janïraw poqoratäkiti”. Jan ukajj “Wawakäna ukhajja, jupajj wali ajjsarirïnwa, ukampis jichhajj janiw ajjsarirëjjeti” sasa.

Ukanakat sapa mayanjja, nayraqatjja mä amuyu qhanstayi, ukat ukjjarojja, jukʼampi sum amuytʼasiñapatakejj aka arunakampiw qallti: jan ukasti, ukampisa, antisasa, jan ukajj ukatsipana. Ukat awisajja, kuntï qalltan siski ukjjarojj jukʼampwa qhanañchi. Ukham parltan ukhajja, mayninakan sum amuytʼapjjañapatakiw yanaptʼtanjja.

Yaqhep arunakana jan ukajj yaqhep markanakan janis ukham parlañ yatitäpkchejja, kunatsa ukham parlañajj wakisi uk amuytʼañajj wali askïspawa. ¿Kunatsa? Kunatejj ukanakjja, Biblianwa walj jikjjattanjja. Ukat Jesusas ukhamwa parlirïna. Ukanakat mä qawqha amuytʼañäni: “Janirakiw mä lamparasa jamasaru uchañataki aqtayatäkiti, jan ukasti qhanawjar uchatäñapawa”; “Janiw [Moisesan leyinakap] apaqerit jutktjja jan ukasti kuntejj yatichañ munkistu uk phoqheriw juttjja”; “Istʼapjjaraktawa kunatï: ‘Janiw wachoqa juchan sarnaqätati’ satäkänsa ukjja. Ukampis nayajj sapjjsmawa, khititejj mä warmirojj munapayañataki uñtejja [...]”, ukat “Istʼapjjaraktawa kunatï satäkänsa ukjja: ‘Uñkatatajja, uñkatarakim; toqjjatajja, toqjjarakim’ sasa. Ukampis nayajj sapjjsmawa: Jan jumanakajj jan wali jaqerojj kutkatapjjamti, jan ukasti maynitejj maysa ajanut tʼajjllintätamjja, maysa ajanumppacha uñachtʼayarakim” (Mat. 5:15, 17, 27, 28, 38, 39).

Bibliankir yaqha libronakanjja ukham amuytʼayir arunak jikjjataraktanwa. Ukanakajja, kuntï lurañasäki uk sum amuytʼañataki jan ukajj kuna toqettï parlasktan uk jukʼamp sum qhanstayañatakiw yanaptʼistaspa. Jumatï wawanïstajja, aka arunakat amuykiptʼam: “Ukhamarak awkinaka, jumanakajj wawanakamarojj jan colerayapjjamti, jan ukasti cheqapar yatichasina sum uywapjjam, Tatitur iyawsapjjañapataki” (Efe. 6:4). Awk taykanakajj Jehová Diosan kamachinakaparjamaw wawanakapar uywapjjañapa sasakiw apóstol Pablojj ewjjtʼaspäna, ukat ukajj wali askïspänwa. Ukampis ¿kunjamsa uka ewjjtʼa jukʼamp sum qhanstaypachäna? Amuytʼayir arunakampiw akham säna: “Jan colerayapjjamti, jan ukasti cheqapar yatichasina sum uywapjjam, Tatitur iyawsapjjañapataki” sasa.

Ukat pachpa jaljanjja, apóstol Pablojj akham sänwa: “Janiw jaqenak toqeti nuwasktan, jan ukasti alajjpachanakankiri ñanqha ajayunak toqewa, [...] nuwastanjja” (Efe. 6:12). Uka amuytʼayir arunakajja, nuwasiñasajj kunja chʼamas ukwa sum amuytʼayistu. Janiw aleq jaqenak contrak nuwasktanti, jan ukasti ñanqha ajayunak contraw nuwastanjja.

KUNJAMSA UKANAKAT ASKINAK APSSNA

Éfeso markar qellqkasajja, Pablojj ukham amuytʼayir arunak wal apnaqarakïna. Ukanakat yatjjatañajja, kuntï Pablojj siskäna uk sum amuytʼañataki ukat ukarjam lurañatakiw yanaptʼistu.

Kuna amuytʼayir arunaktï Efesios 4 ukat 5 jaljan jikjjataski ukanak yatjjatañajj wali askipunïniwa. Uksti aka yatichäwin jikjjataski uka listanwa uñjjattʼasma. Ukanak liytʼkasajja, juma pachpatwa amuykiptʼasiñama. Ukat akhamwa jisktʼasirakisma: “¿Kunjamsa uka arunak katoqastjja? ¿Ukhaman jikjjatasisajj kuns lurtjja? ¿Amuytʼayir arunakat kuntï qalltan siski ukampiti jan ukajj ukjjar qhanañchki ukampich mayninakajj nayar uñtayapjjetu?” sasa. Ukanakat yatjjatkasintï kunanakansa chʼamachasiñama uk amuyasïta ukhajja, uk lurañamawa.

Uka listajja, familiana Diosar yupaychañataki aruman yatjjatañatakejj wali askirakiwa. Nayraqatjja, taqeniw kuntï ukan siski uk qʼal liytʼapjjaspa. Ukat mayniw kuntï amuytʼayir arunakat qalltan siski uk liytʼaspa, ukat ukjjarojj kamsisa uk mayninakaw amtasipjjañapa. Ukajja, kuntï uka amuytʼayir arunakajj qhanstayki uk kunjamsa phoqhapjjaspa uka toqet parltʼasiñatakiw yanaptʼani. Ukhamatwa sapa maynejj kunjamsa familiapansa jan ukajj yaqha cheqansa cristianjamajj sarnaqapjjañapa uk amuytʼasipjjani.

[6 janan fotopa] — ¿Amuytʼayir arunakan ukjjar jukʼamp sum qhanañchañatak siski uk amtastati?

Kunjamsa amuytʼayir arunakamp parlsna uk amuyäta ukhajja, jankʼakiw Biblia liytʼkasajj ukanak amuyäta ukat yatiyañatakejj kunja wakiskirisa uksa amuyarakïtawa. Inas yatiykasajj akham sischisma: “Jan jiwir almanïtanwa sasin waljaniw sapjje, ukampis Bibliajj akham siwa” sasa. Khititï Bibliat yateqaski ukarojj inas akham jisktʼchisma: “Diosampi Jesusampejj mayakïpjjewa sasin niya taqeniw sapjje; ukampis ¿Bibliarjamajj kunsa yateqawaytanjja? ¿Ukat jumajj kamsarakismasa?” sasa.

Biblianjja, walja amuytʼayir arunakaw utji, ukanakaw Jehová Diosar yupaychaskakiñataki ukat jaqenakar Bibliat yatichañatak yanaptʼistu.

Efesios 4 ukat 5 jaljanakan utjki uka amuytʼayir arunakat mä qawqha

Aka listjja, ¿janit familiana Diosar yupaychañataki aruman yatjjatapkasma?

“[Jaqenakajj] chʼamaktʼatawa chuymanakap qalarayasipjjatap [layku].” (Efe. 4:18, 19.)

“Ukampis jumanakajj janiw uka casta lurañanakjja Cristot yateqapktati, jumanakatejj cheqpachan juparu istʼapjjsta ukhamarak jupamp yatichatäpjjsta [...] ukajja.” (Efe. 4:20, 21.)

“Khititejj lunthatasirïkän ukajja jan jukʼamp lunthataskjjpanti.” (Efe. 4:28.)

“Jan ukasti irnaqañaru uskuspan.” (Efe. 4:28.)

“Jan wali arunakjj jan parlapjjamti.” (Efe. 4:29.)

“Jan ukasti suma arunakamp parlapjjam.” (Efe. 4:29.)

“Taqe chuyma usuyasiñasa, kʼapisiñasa, thithiñasa, arnaqasiñanakasa, ñanqha arusa jumanakatjja apaqatäpan, taqe ñanqha amtañasa ukhamaraki.” (Efe. 4:31, MT.)

“Ukatsipana jumanakajj purapat suma chuymanïpjjam, khuyapayasirinakäpjjam, purapat perdonasisa.” (Efe. 4:32, MT.)

“Janiw utjañapäkjjeti wachoqa jucha lurañanakajj, kuna kasta jan wali luräwinakasa ni michʼasiñanakasa.” (Efe. 5:3.)

“Jan ukasti, Diosaruw yuspagarañasajja.” (Efe. 5:4.)

“Nayrajj jumanakajj chʼamakanwa jakapjjäyäta.” (Efe. 5:8.)

“Ukampis jichhajja Tatitumpi mayachasipjjatamatjja, qhananwa jakjjapjjta.” (Efe. 5:8.)

“Chʼamakankirinakan jan kunatak sirviri luräwinakapanjja jan sarnaqapjjamti.” (Efe. 5:11.)

“Jan ukasti, uka jan wali luräwinakjja qhanaru apsupjjam.” (Efe. 5:11.)

“Uñtapjjamaya, wali amuyampi, kunjämsa sarnaqapjjta; janiw jan amuyuninakjamati.” (Efe. 5:15, MT.)

“Jan ukasti yatirinakjama; Tiempo apsusa.” (Efe. 5:15, 16, MT.)

“Jan loqhëpjjamti.” (Efe. 5:17.)

“Jan ukasti kunäkitejj Tatitun munañapajja uk amuyañaru uskusipjjam.” (Efe. 5:17.)

“Jan machjasipjjamti, machjasiñasti jiwañaruw api.” (Efe. 5:18.)

“Antisas qollan ajayumpi phoqtʼatäpjjam.” (Efe. 5:18.)

“[Criston] nayraqatapar jachʼañchat iglesia irpkatañataki, jan qʼañuchata, jan kuna phullchʼuni, jan kunamp kamachtʼata.” (Efe. 5:27.)

“Jan ukasti suma qʼoma Diosatak yaqhachata.” (Efe. 5:27.)

“Janiw khitis pachpa janchiparojj uñiskiti.” (Efe. 5:29.)

“Jan ukasti manqʼayiwa ukhamarak imaraki. Cristojj uka pachparakiw iglesiampejj luri.” (Efe. 5:29.)