Thomas Emlyn chachajj ¿Dios contra parlirïnti jan ukajj kunatï cheqäki uk arjjatirïncha?

THOMAS EMLYN chachajj ¿khitïpachänsa? ¿Kunatsa cheqa yatichäwinak taqe chuym arjjatpachäna? ¿Kunsa jupat yateqassna?

Uk yatjjatañatakejja, Inglaterra ukat Irlanda markanakan 1600 tukuya maranakat 1700 qallta maranakkamajj kunas pasäna uk amuytʼañäni. Uka tiemponjja, Inglaterra markankir Iglesiajj wali munañanïnwa, ukampis walja jaqenaka ukat gruponakaw Iglesia contra saytʼapjjäna.

¿KHITÏNSA EMLYN CHACHAJJA?

Ukham jan waltʼäwinak utjkäna ukhaw Thomas chachajj mayo 27, 1663 maran Stamford (Lincolnshire, Inglaterra) markan nasïna. Ukat 19 maranëjjäna ukhaw iglesian arstʼañ qalltäna. Tiempompejja, Londres markan jakiri mä jilïri warmin (condesa) tatakurapäjjänwa, qhepatjja Belfast (Irlanda) markaruw sarjjarakïna.

Uka markanwa mä iglesia sarayañ qalltäna, Dublín markansa ukat yaqha cheqanakansa ukhamarakiw yanaptʼäna.

¿KUNATSA DIOS CONTRAS PARLKASPA UKHAM JUCHAÑCHAPJJÄNA?

Uka maranakanwa Thomas chachajj Bibliat jukʼamp sum yatjjatäna, ukatwa kimsa diosanakat mayar apthapitaw (Trinidad) sapki uka yatichäwit pächasjjäna. Mateo, Marcos, Lucas ukat Juan libronakat sum yatjjatasajja, Trinidad yatichäwejj kʼarïtap amuyjjäna, ukat janiw ukar creyjjänti.

Jupajj kuntï Trinidad yatichäwit amuyjjän uk janis ukaratpach yatiykchïnjja, Dublín markankir iglesiankirinakajj Trinidad toqet jan yatichjjatapjja amuyapjjänwa. Ukhamïpansti, kuntï amuyjjta ukarojj jan walitwa uñjapjjaspa sasin amuyasaw akham qellqäna: “Kuntï creyjjta uk qhanañchapjjerismajja, janiw tatakuräjjeristti” sasa. Ukat junio 1702 maranjja, pä tatakura masinakapaw ‘kunatsa Trinidad toqet jan yatichjjta’ sasin jisktʼapjjäna. Janiw nayajj uka yatichäwir creyjjti sasaw säna. Ukat cargop jaytjjañatakiw mayïna.

Mä qawqha urunakatjja, Inglaterra markaruw sarawayjjäna, ukat tunka semananakatjja, jan waltʼäwinakap askichiriw Dublín markar kuttʼäna ukat Londres markaruw sarjjañ amtäna. Dublín markankkasajja, kuntï creyjjäna ukar arjjatañatakiw mä jiskʼa qellqat apsüna, ukanjja kunatsa Jesusarojj Diosarjam jan uñjañasäki ukwa Bibliamp qhanañchäna. Uk liytʼasajja, Dublín markankir iglesiankirinakajj wal colerasipjjäna, ukat tribunalaruw quejasipjjäna.

Ukat junio 14, 1703 maranwa Thomas chachar katuntapjjäna ukat reinan tribunalapar apapjjäna. Ukat True Narrative of the Proceedings (La historia verdadera del juicio) sat libropanjja, akham sänwa: “Jesusajj janiw Diosjamäkiti sasin mä libro qellqatajatwa, Dios contras parlkirista ukham juchañchapjjetu” sasa. Uka juiciojj janipuniw walïkänti. Kunattejj Irlanda markankir paqallqo tatakuranakajj juezanakampiw qontʼasipjjäna, ukat Thomas chacharojj janiw kuns arsuyapkänti. Ukat wali respetat Richard Levins sat abogadojj akham sasaw Thomas chachar säna: “Jan sinttʼasisaw mä qamaqerjam katuntapjjätam, janiw leyis jumatakejj utjkaniti” sasa. Juicio tukuyatarojja, tribunal supremo sarayiri Richard Pyne chachajj ukankirinakarojj akham sarakïnwa: “Tatakuranakajj akankasipkiwa” sasa. Ukampejja, juiciojj amtatarjam jan luraskani ukhajja, castigatäpjjätawa sañsa munkaspa ukhamänwa.

Thomas chacharojj juchañchapjjänwa, ukatsti tribunalankir mä jilïrejja, ‘kuntï qellqkta ukampejj pantjastwa sasin yatiyjjam’ sasaw säna. Jupajj janiw uk lurañ munkänti, ukatwa multa mayipjjäna ukat mä maratakiw carcelar jistʼantapjjäna. Multa pagañatakejj janiw qollqenïkänti ukatwa pä mara carcelankäna, ukat mä amigopaw qawqhtï pagañapäkän uk iraqapjjañapatak autoridadanakar mayïna. Ukhamatwa julio 21, 1705 maran carcelat mistjjäna. Jiskʼachat uñjasisaw akham sispachäna: “Kunatï cheqäki ukat Diosar jachʼañchki ukar arjjatatajätwa tʼaqhesiskta” sasa.

Ukat Londres markaruw sarjjäna. Ukanjja, William Whiston chacharuw uñtʼäna, juparojj Bibliat kunatï cheqäki ukarjam mä qellqat apsutap laykurakiw yaqhachapjjäna. Jupajj Thomas Emlyn chacharojj wal respetäna, ukat “cristiano religión uñstayiri ukat utjañapatakis chʼamañchiri” sasaw säna.

¿KUNATSA TRINIDAD YATICHÄWEJJ JANIW CHEQÄKITI SÄNA?

Thomas chachajj Whiston ukat wali yatjjattʼat Isaac Newton chachanakjamarakiw Atanasiano Credon Trinidad toqet parlki ukajja, janiw Bibliarjamajj cheqäkiti sasin amuyjjäna. Ukat akham sasaw qellqäna: “Trinidad toqet sum amuytʼasa ukat Bibliat sum yatjjatasajja, [...] uka yatichäwit kuntï amuyktan ukajj janiw cheqäkiti sañatakejj walja razonanakaw utji” sasa. Ukat akham sasaw tuktʼayjjäna “Jesucriston Awkipa ukat Diosapakiw Taqe Kunjjar Munañanejja” sasa.

¿Kunatsa ukham amuyjjpachäna? Bibliat sum yatjjatasaw Jesusampi, Awkipampejj janiw pachpäpkiti sasin amuyjjäna. Uka qellqatanakat mä qawqha uñjañäni (Thomas Emlyn chachan arunakapajj altʼayatäkis ukawa):

• Juan 17:3. “Cristojj Diosawa jan ukajj jupa sapakiw Diosajja sasin janipuniw qhanañchaskiti.” Awki saparukiw “cheqpach Dios” sasin uñtʼasi.

• Juan 5:30. “Yoqajj janiw munañapak lurkiti, jan ukasti Awkin munañapwa luri.”

• Juan 5:26. “Awkiw Yoqaparojj jakäwi churäna.”

• Efesios 1:3. “Jesucristojj Diosan Yoqapawa sasinsa uñtʼaskchejja, janipuniw Awkejj Diosan Awkipawa sasajj kawkhans qhanañchaskiti; jan ukasti, Jesucriston Awkipawa sasinwa walja kuti qhanañchasi.”

Taqe ukanakat sum amuykiptʼasajja, Thomas chachajj jan pächasisaw akham säna: “Biblianjja, Awkimpi, Yoqampi ukat Qollan Ajayumpejj pachpakïpjjewa sasin janipuniw kawkhans qhanañchkiti” sasa.

¿KUNSA THOMAS CHACHAT YATEQASSNA?

Jichhürunakanjja waljanirakiw Biblian cheqa yatichäwinakap arjjatañ ajjsarayasipjje. Thomas chachajj janiw ajjsarayaskänti. Antisas akham sänwa: “Maynitï Bibliat sum yatjjatasin kunatï cheqäki uk amuyjjasas jan khitirus yatiykchi ukhajja, ¿Biblia liyitapas ukat sum yatjjatatapas kuna askirakisti?” sasa. Janipuniw cheqa yatichäwinak imtʼañ munkänti.

Thomas chachana ukat jupjam yaqha chachanakan sarnaqäwipajj ¿kuns amuytʼayistu? Cheqa yatichäwinak janiw imtʼañasäkiti, jan ukasti yaqhachat uñjaskasas arjjataskakiñasawa. Taqeniw akham jisktʼasiñasa: “¿Kunas jukʼamp wakiskirejja? ¿Biblian cheqa yatichäwinakap arjjataña, jan ukajj jaqenakamp jachʼañchatäñacha?” sasa.