Yaqhepajj phoqasiwa, ukampis jila partejj janiw phoqaskiti

¿Kunas jutïr urunakan pasani uk yatiñ munasmati? Waljaniw uk yatiñ munapjje. Ukatwa walja jaqenakajj kunanakas jutïrin pasani ukanak qhanañchañatakejj wal chʼamachasipjje, sañäni:

• CIENTIFICONAKAJJA, kuna jan waltʼäwinakas Oraqen utjani, jallojj purintanit janicha ukat yaqha ukhamanak yatiñatakejja, jichhak uñstki uka maquinanakampiw yanaptʼasipjje, ukatakejj walja qollqwa gastapjje.

• YATJJATIRINAKAJJA (ANALISTAS), jutïrin qollqe toqetsa, política toqetsa kunjamänisa ukanakatwa yatjjatapjje. Qollqejj utjaskaniti janich ukanak sum yatitapatjja, Warren Buffett sat wali qamir jaqerojj “yatiritwa” uñtʼapjje. Nate Silver chachajja, política toqeta, peliculanak lurapki uka toqet jutïrin kunjamänisa ukanak qhanañchañatakejja, numeronakampiw (estadísticas) yanaptʼasi.

• YAQHEP NAYRA QELLQATANAKAJJA, profecía arunakäkaspas ukham uñtʼatäpjjewa. Amuytʼañataki, kuntï Michel de Notredame (Nostradamus) sat chachajj 1500 maranakan qellqawayki ukajja, jichhürunakanwa phoqasiski sasaw walja jaqenakajj amuyapjje. Maysa toqetjja, cultura maya calendarioparjamajja, diciembre 21, 2012 maranwa aka Oraqen ‘walja jan waltʼäwinakajj utjani’ sasaw walja jaqenakajj amuyapjjäna.

• IGLESIA PʼEQTʼIRINAKAJJA, Oraqpachanwa jan waltʼäwinakajj utjani, sasaw iglesianakapar walja jaqenak sarapjjañapatakejj sapjjäna. Harold Camping sat chachampi arkirinakampejja, Oraqejj 2011 maränwa tukjatäni sasaw sapjjäna, ukampis pantjasipjjänwa.

• PSÍQUICOS sasin uñtʼatäpki uka jaqenakajja, kunas jutïrin pasani ukanakat suma yatjjatatäpkaspas ukhamwa amuyasipjje. Edgar Cayce ukat Jeane Dixon chachanakajja, kuntï 1900 maranakatak arsuwayapkän ukanakat mä qawqhajj phoqasïnwa, ukampis jila partejj janiw phoqaskänti. Sañäni, Jeane Dixon chachajja, 1958 maranwa Kimsïr Jachʼa Chʼajjwäwejj (III Guerra Mundial) qalltani sasaw säna. Edgar Cayce chachasti, 1975 maranakanwa Nueva York markajj jachʼa lamar qotar chhaqantjjani sarakïnwa.

Kunas jutïr urunakan pasani uk ¿yatsnati? Yatsna ukhajja, janiw kunjamtï jichhürojj jaktan ukham jaksnati.