Casadonaka, Jehová Diosamp yanaptʼayasipjjam

1, 2. 1) ¿Kunatsa 24.000 israelitanakajj Suma Oraqer jan mantapkäna? 2) ¿Kunsa uka sarnaqäwit yateqsna?

ISRAELITANAKAJJ janïr Suma Oraqer mantapkäna ukhajja, jupanakat waljaniw ‘moabita warminakamp wachoq jucha lurapjjäna’, ukatwa Jehová Diosajj 24.000 israelitanakar jiwarayäna. ¡Ukajj wali llakkañapunïnwa! Walja maranakaw uka oraqer mantañ suyapjjäna, ukampis janïr mantkasaw qʼal aptʼasipjjäna. Cheqas wachoq juchar purtʼasipjjatap laykuw uka oraqer jan mantapkänti (Núm. 25:1-5, 9).

² Israelitanakan sarnaqäwipajja “qellqatawa jiwasanakan amuytʼasipjjañasataki, ukatsti jan ukham lurañasataki” (1 Cor. 10:6-11). Jiwasajj ukhamarakiw Paraisor niy mantañampïsktanjja, ‘qhepa urunakanwa’ jakasipktanjja (2 Tim. 3:1; 2 Ped. 3:13). Ukampis yaqhep jilat kullakanakajja, Jehová Diosan yatichäwinakapar jan istʼasaw wachoq juchar purtʼasipjje, ukham jan walinak lurasajj llakita ukat jan walinakanwa uñjasipjje. Jupanakatï jan arrepentisipkani ukhajja, jutïrin janiw wiñay jakañ katoqapkaniti.

3. ¿Kunatsa casado chacha warminakajj Jehová Diosampi yanaptʼayasipjjañapa? (23 janankir foto uñjjattʼam.)

³ Akapachajja, qʼañu luraña amuyunakampi phoqantatawa. Ukhamajj uka jan walinakampi jan apayasiñatakejja, casado chacha warminakajj Jehová Diosampi yanaptʼayasipjjañapawa (Salmo 127:1 liytʼañataki). Kunjamsa casado chacha warminakajj kusisit jakasipjjaspa ukwa aka yatichäwin phesqa toqet yatjjataskañäni: 1) chuyma jarkʼaqasisa, 2) Diosar jakʼachasisa, 3) cristianjam sarnaqasa, 4) sum parltʼasisa, ukat 5) chacha warmi jakañatakejj kunanakas munasi ukanak phoqasa.

CHUYM JARKʼAQASIPJJAM

4. ¿Kunjamatsa yaqhep jilat kullakanakajj wachoq juchar purtʼasiwayapjje?

⁴ Yaqhep cristianonakajja, jan walinak uñchʼukisaw wachoq juchar purtʼasiwayapjje. Jesusasti sänwa: “Khititejj mä warmirojj munapayañataki uñtejja, niyaw chuymapanjja jupampi wachoqa juchjja lurjje” sasa (Mat. 5:27, 28; 2 Ped. 2:14). Jilat kullakanakat waljanejja, pornografía uñchʼukisa, jan wali qellqatanak leyisa, jan ukajj kunanakatï amuyur jan waltʼaykaspa ukanak Internetan uñchʼukisaw wachoq juchar purtʼasiwayapjje. Yaqhepanakasti, videonak uñchʼukisa, televisionan jan wali programanak uñchʼukisaw wachoq juchanak uñtapjje. Yamas yaqhepanakajj, clubes nocturnos jan ukajj kawkhantï isinaka apsusisina thoqopki (striptease) uka utanakaruw sarapjjarakitayna.

5. ¿Kunatsa chuymas jarkʼaqasiñasa?

⁵ Yaqhepanakajja, jan chachapäki jan ukajj jan warmipäki ukanakamp sum uñjatäñwa thaqhapjje, ukatwa jan walinakar purtʼasiwayapjjaraki. Akapachankir jaqenakajj wachoq juchajj walikïkaspas ukhamwa uñjapjje, uka amuyunakampi ukhamarak kʼarintasir chuymampi apayasisajja, maynejj yaqhanakampiw sarnaqañ munjjaspa (Jeremías 17:9, 10 liytʼañataki). Jesusajj akham sänwa: “Chuyma manqhatwa jan wali amtañanakajj juti, jaqe jiwayañanaka, wachoqa juch lurañanakasa” sasa (Mat. 15:19).

6, 7. 1) Chuymasan jan wali amtanakapamp apayassna ukhajja, ¿kunas pasaspa? 2) ¿Kunas wachoq juchar jan purtʼasiñatak yanaptʼistaspa?

⁶ Kunapachatï maynejj chuymapan jan walinak amuyjje ukhajja, kunanaktï chacha warmjam parlasipjjañapäki ukanakjja khitirutï chuymapan munasjje ukarukiw parljjaspa. Ukatsti panipajj jukʼamp uñjasiñwa thaqapjjarakispa. ‘Jan jikisiñatwa jikistanjja’ sasin inas sapjjarakchispa. Ukanak lurasajja, jukʼamp munasiñaw utj-jjaspa, jan wali lurañanakarus puripjjarakispawa. Ukhamanakan sarnaqasipkakispa ukhajja, jan walïtap yatkasinsa ukanak jaytañajj chʼamäjjaspawa (Pro. 7:21, 22).

⁷ Taqe ukanakajj aleq parltʼasiñampikiw qalltaspa, ukampis qhepatjja, amparat katthapisiña, qʼayachasiña, jampʼatisiña, qhomasiña ukat yaqha ukham jan walinak lurañaw utj-jjaspa. Diosan Arup yatkasinsa, kuntï warmipampiki jan ukajj chachapampik lurapjjañapäki ukanakwa yaqhampi lurjjapjjaspa. ‘Jan wali amtanakapamp atipayasisajja’, wachoqa jucharuw purtʼasipjjaspa (Sant. 1:14, 15). ¡Ukajj wali llakkañapunïspawa! Jehová Diosampitï yanaptʼayasipjjaspa ukhajja, janiw ukhamar purtʼasipkaspati. Chacha warminakarojja, Diosajj jupatakjam sarnaqapjjañapatakiw yatichi. Ukhamajja, ¿kunas sum sarnaqapjjañapatak yanaptʼaspa?

JEHOVÁ DIOSAR JAKʼACHASIPJJAM

8. Diosamp sum apasiñajja, ¿kunjamsa yanaptʼistu?

⁸ (Salmo 97:10 liytʼañataki.) Jehová Diosamp sum apasiñajja, wachoq juchar jan purtʼasiñatakiw yanaptʼistu. Ukhamajja, Diosar jukʼamp uñtʼañatakisa, ‘munat wawanakapjam munasiñan jakasiñatakis’ chʼamachasiñäni ukhajja, janiw ‘wachoq jucha lurañarusa, ni kuna casta jan wali luräwinakarusa’ purtʼaskañäniti (Efe. 5:1-4). “Wachoqa juch luririnakarojja”, Diosajj juchañchaniwa. Uk yatisajja, casado chacha warminakajj yaqhampi jan sarnaqañatakiw chʼamachasipjjañapa (Heb. 13:4).

9. 1) ¿Kunatsa Joseyajj wachoq juchar jan purtʼaskäna? 2) ¿Kunsa José waynat yateqsna?

⁹ Yaqhep jilat kullakanakajja, trabajiñ tukuyjjasaw Jehová Diosar jan servir masinakapampi yaqha cheqanakar sarapjje, ukham sarnaqasaw wachoq juchar purtʼasiwayapjje. Yaqhepanakasti trabajo pachpanwa yantʼat uñjasipjjaraki. Ukaw José waynampejj pasäna. Patronapan warmipajj jupampiw ikintasiñ munäna, sapürupuniw Joseyar arjjayäna. Mä urusti isit katthapisinwa akham säna: “Iktʼaskañäni” sasa. Ukampis Joseyajj Jehová Diosamp sum apasiñ munatap laykojja, jalsuwayjjänwa. Ukham luratapatjja, Joseyajj trabajopwa aptʼasïna, carcelan llawintat kunaw uñjasïna, ukampis Jehová Diosajj jupar bendicïnwa (Gén. 39:1-12; 41:38-43). Ukhamasti, cristiano jilat kullakanakajj trabajopansa yaqha cheqanakansa, kunanakatï wachoq juchar purtʼasiykaspa ukanakat amuyasipjjañapawa.

CRISTIANJAM SARNAQAÑATAK CHʼAMACHASIPJJAM

10. ¿Kunjamsa cristianjam sarnaqañajj chacha warmir yanaptʼaspa?

¹⁰ Cristianjam sarnaqañajja, ‘Diosan munañaparjama, qʼoma cheqa kankañan jakañawa’. Ukaw cristiano chacha warminakarojj wachoq juchar jan purtʼasiñatak yanaptʼani (Efe. 4:24). Cristianjam sarnaqerinakajja, janiw ‘wachoqa juchan sarnaqapkiti, janirakiw qʼañu luräwinaksa, jañchipan munañanakapsa, ni jan wali amtanakapsa lurapkiti, janirakiw michʼäpkisa’ (Colosenses 3:5, 6 liytʼañataki). Colosenses qellqatanjja, “jan utjkjjpanti” sasin siski uka arojja, kunanakatï wachoq jucharu purtʼasiykaspa ukanak jan lurjjaña sañwa muni. Ukatsti, kunanakatï wachoq jucha lurañar purtʼasiykaspa ukanaksa maynejj apanukuñapawa (Job 31:1). Jiwasatï Jehová Diosan yatichäwiparjam sarnaqañäni ukhajja, jan walinak uñisiñäniwa, sumäkis uk lurañwa munañäni (Rom. 12:2, 9).

11. Cristianjam sarnaqañajja, ¿kunjamsa chacha warminakar sum apasiñatak yanaptʼi?

¹¹ Chacha warminakajja, cristianjam sarnaqasajj Jehová Diosatwa yateqasipjje (Col. 3:10). Kunapachatï paciencianïñataki, ‘khuyapayasirïñataki, suma jaqëñataki ukhamarak jiskʼar tukuñampi, llampʼu chuymampi’ sarnaqañataki chʼamachasipjje ukhajja, jukʼamp sumwa apasipjje, Jehová Diosas jupanakar yanaptʼarakiwa (Col. 3:12). Ukatsti ‘Criston sumankañapampi chuymanakapan apnaqayasipjjani’ ukhajja, sumwa jakasipjjani (Col. 3:15, NM). ‘Munasiñampi’ uñjasiñasti, purapat respetompi sarnaqañatakiw yanaptʼarakini (Rom. 12:10).

12. ¿Kunas casadonakarojj kusisit jakasiñatak yanaptʼaspa?

¹² Sid chachampiru Sonja esposapampirojja, akham sasaw jisktʼasïna: ‘¿Kunas chacha warmi kusisit jakasiñatak yanaptʼawayapjjtamjja?’ sasa. Chachasti sänwa: “Munasiñamp uñjasiñatakipuniw chʼamachasipjjta. Llampʼu chuymanïñas wali wakiskirirakiwa” sasa. Esposapasti sarakïnwa: “Munasiñampi parltʼasiñaw wali wakiskirejja. Purapat altʼat chuymampi uñjasiñatakis wal chʼamachasipjjarakta” sasa.

SUMA ARUNAKAMPI PARLTʼASIPJJAM

13. Chacha warmi sum apasipjjañapatakejj ¿kunas wali wakisirejja, ukat kunatsa?

¹³ Chacha warminakajja, munasiñ arunakampiw sum apasiñatakejj parltʼasipjjañapa. Yaqhepanakajj janiw ukham lurapkiti, chachaparu warmiparu respetomp parlañat sipansa, jan uñtʼatanakaru ukat uywanakaparukiw suma arunakampi parlapjje. Chacha warminakatï ‘chuyma ustʼayir arunakampi, colerat chuymampi, jachʼat artʼasiñanakampi, jan wali arunakampi toqesipjjani’ ukhajja, janiw sum apasjjapjjaspati (Efe. 4:31). Ukhamasti, jan wali arunakampi toqesiñat sipansa, munasiñampi sum parltʼasiñatakiw chʼamachasipjjañapa, ukhamatwa purapat sum apasipjjani (Efe. 4:32).

14. Sum apasiñatakejja, ¿kunsa chacha warminakajj jan lurapjjañapäki?

¹⁴ Chacha warminakajj parlasipjjañapawa, ukajj wali wakiskiriwa. Bibliajj ‘amuktʼañ horasatsa’ parlkchejja, janipuniw amuki jan parlasisa sarnaqapjjañapäkiti (Ecl. 3:7). Alemania markankiri mä kullakajja, akham siwa: “Amuki sarnaqasajj mayniruw chuym ustʼaysna [...]. Ukampis jan waltʼäwinakan jikjjatasisajja, colerampiw atipayassna, cheqas ukajj janiw walïkaspati. Jan amuytʼasisaw chachasarusa warmisarusa chuym ustʼaysna. Ukham lurasajj jukʼampikiw jan walinakan uñjassna” sasa. Chacha warminakajja, janiw toqesisa ni amuki sarnaqasas jan waltʼäwinakap askichapkaspati. Ukampis sapa kuti jan toqesiñataki chʼamachasipjjani, jan waltʼayasisas jankʼak askichapjjani ukhajja, jukʼampiw chacha warmjamajj sum apasipjjani.

15. ¿Kunjamsa parltʼasiñajj casadonakar yanaptʼaspa?

¹⁵ Chachasa warmisa kunanaksa amuyapjje ukat kunjamsa jikjjatasipjje ukanakat parltʼasipjjani ukhajja, jukʼamp sumwa apasipjjani. Kunsa ukat kunjamsa arsupjjani ukanakat amuytʼasipjjañapajj wakisirakiwa. Ukhamajja, jan waltʼäwinakan uñjasisajj suma arunakampi, munasiñampi parltʼasipjjañapawa, ukhamatwa purapat suma istʼasiñajj utjani (Colosenses 4:6 liytʼañataki). Ukhamasti, casadonakajj chʼamañchtʼkiri suma arunakampi parltʼasipjjañapawa, ukhamatwa jukʼamp munasipjjani (Efe. 4:29).

¿KUNANAKSA CHACHA WARMINAKAJJ PHOQAPJJAÑAPA?

16, 17. 1) Kunjamsa chuymanakapan jikjjatasipjje uka toqetjja, ¿kunatsa chacha warminakajj purapat llakisipjjañapa? 2) ¿Kunatsa chacha warmjam phoqañat llakisipjjañapa?

¹⁶ Casado chacha warmejja, jupa pachpat llakisiñat sipansa, kunatejj maynitak askïki ukwa thaqhañapa, ukhamatwa jukʼamp sum apasipjjani (Fili. 2:3, 4). Kunjamsa chachapasa warmipasa jikjjatasi ukwa amuyañapa, ukat kunsa jaqechatjamajj phoqañapa ukanakatsa llakisiñaparakiwa (1 Corintios 7:3, 4 liytʼañataki).

¹⁷ Yaqhepanakajj casado chacha warmjam phoqañapäki ukhajja, janiw munasiñ uñachtʼayasipkiti, ukajj wali llakkañawa. Maysa toqetjja, yaqhepa chachanakajj warmipar munasiñampi uñjapjjaspa ukhajj jiskʼachatäpkaspas ukhamwa amuyasipjje. Ukampisa, Bibliajj akham siwa: “Chachanakasti warminakamampejj suma chuymanïpjjarakim” sasa (1 Ped. 3:7). Chachajj akwa amtañapa: chacha warmjam sarnaqañajj janiw ikintasiñ mayakïkiti, jan ukasti chachajj sapüruw warmipar munasiñapa ukat sum uñjañaparaki, ukhamatwa warmipajj kusisit jikjjatasini. Kunapachatï purapat llakisipjjani munasipjjani ukhajja, panpachanirakiw kusisitäpjjani.

18. Casadonakarojja, ¿kunas chacha warmjam jukʼamp munasipjjañapatak yanaptʼani?

¹⁸ Chacha warminakajja, janipuniw kunäkipansa yaqhampi sarnaqapjjañapäkiti. Ukampis munasiñajj jan utj-jje ukhaw yaqhepanakajj yaqhampi sarnaqañ thaqapjje (Pro. 5:18; Ecl. 9:9). Ukatwa Bibliajj casadonakar akham ewjjtʼi: “Jan maynis maynis ‘janiw’ sasipjjamti, jan ukasti [...], jumanak pura arustʼasipjjasma mä tiempo jan jakʼasiñataki ukkhakiw ‘janiw’ sasipjjasmajja” sasa. ¿Kunatsa? Ukhamat Supayampi jan yantʼayasiñataki (1 Cor. 7:5). Chachatsa warmitsa Supayampi yantʼayasis wachoq juchar purtʼasispa ukhajja, janipuniw akchʼas walïkaspati. Chachapana jan ukajj warmipan askip nayraqat thaqhapjjani, kunjamsa jikjjatasipjje ukanakatsa llakisipjjani, jaqechata chacha warmjamas sum phoqapjjarakini ukhajja, jukʼampiw chacha warmjamajj munasipjjani (1 Cor. 10:24).

CHACHA WARMJAM SUM SARNAQAÑATAK CHʼAMACHASIPJJAM

19. ¿Kun lurañsa taqe chuyma amtañasa, ukat kunatsa?

¹⁹ Janïr Suma Oraqer mantapkäna ukhajja, 24.000 israelitanakaw Moab pampan wachoq juchar purtʼasipjjäna. Jiwasajj niyaw Paraíso Oraqer mantañampïsktanjja, janiw jupanakjam jan walinak lurañasäkiti. Israelitanakarojj kunas pasäna uk qhanañchasajja, Bibliajj akham siwa: ‘Khititejj chʼamanïtapa amuyasejja, wal amuytʼaspan ukatarak tinkuskaspa’ sasa (1 Cor. 10:12). Ukhamajja, chacha warmjamajj sum apasiñatakiw chʼamachasiñasa, Jehová Diosarusa chachasarusa jan ukajj warmisarusa janiw kunäkipansa jaytanukuñasäkiti (Mat. 19:5, 6). Aka ewjjtʼanakar istʼañajj wali wakiskiriwa: “Taqe kunsa askpun lurapjjam, ukhamata Diosajj jumanakar sumana jikjjatañapataki, jan juchani ni kuna qʼañunsa” sasa (2 Ped. 3:13, 14).