¿YATIYÄTATI?
¿Kunatsa apóstol Pablotakejj Roma markatäñajj wali askïna?
Pablojj akham sänwa: ‘César emperadora uñjitpan’ sasa
Romanonakajj uka Imperion kawkhans jakasipkchïnjja, derechonakapajj respetatänwa ukat askinaksa katoqapjjarakïnwa. Jakapkäna uka cheqan leyinakaparjamajj janiw katuyatäpkänti, Roma markan leyinakaparjam katuyatäpjjänwa. Mä kunats kʼarintatäpjjän ukhajja, uka cheqankir leyinakaparjamajj juchañchatäpjjaspänwa, ukampis derechopajj Roma markankir tribunalampi istʼatäñapänwa. Jiwayatäñatak juchañchasïn ukhajja, emperadorampi uñjatäñatakiw mayispäna.
Nayra patak maranakan Cicerón sat mä apnaqerejj uka derechonakarjamaw akham säna: “Romano jaqer ñachʼantañajja, jan walipuniwa; jawqʼjañajj jiwayañamp sasiwa; jiwayañajj awkisarus jiwayksna ukhamawa” sasa.
Apóstol Pablojj Roma markpachanwa Diosat yatiyäna. Jupajj kimsa kutiw romano jaqjamajj derechonakapat arsusïna: 1) ‘Jawqjjasajj derechonakaj janiw respetapktati’ sasaw juezanakarojj Filipos markan säna. 2) Jerusalén markanjja, jan jawqʼjayasiñatakejj romano jaqëtapwa yatiyäna. 3) Juchañchañatak apapkäna ukhajja, ‘César emperador uñjitpan’ sänwa (Hechos 16: 37-39; 22:25-28; 25:10-12).
Nayra tiemponakanjja, ¿kunjamsa awatirinakar pagasirïna?
Uwijanaka, cabritonak alasisin contrato lurataw cuneiforme qellqanakampi qellqatäski (2050 nayrapach maranakana)
Jacob chachajja, Labán sat tiopatakejj 20 maraw uywap awatirïna. 14 maranakajja, pä phuchap layku ukat 6 marasti, uywanak laykuraki (Génesis 30:25-33). Mä revista qellqatanjja, akham siwa: “Nayra qellqerinakatakisa, Biblia liyirinakatakisa, kunjamtï Labán chachampi Jacob chachampi uywanak toqet mä amtar puripkän ukajj wali uñtʼatänwa” sasa (Biblical Archaeology Review).
Amuytʼañataki, Irak markan Nuzi ukat Larsa sat cheqanakanjja, nayra tiempon contrato qellqatanak ñeqʼet lurat tablillanakan jikjjatapjjäna. Contratonakajj mä maratakikiw jila partejj lurasirïna; tʼarwa yawiñ horasaw qalltasirïna ukat uka tiemporurakiw tukuyjjerïna. Awatirejj qawqhay awatirjamächi ukarjamakiw awatiñ katoqerïna. Qawqha maranisa, orqoti qachucha ukanak qellqtʼasirïnwa. Mara pasatatjja, dueñojj uywa qallunaka, tʼarwa, queso ukat yaqha ukhamanak katoqapjjerïna. Jiltʼanakajj awatiritakëjjerïnwa.
Awatirirojj qawqha qachu uywanakjjay dueñojj awatiychi ukarjamaw uywajj mirtirïna. Sañäni, 100 qachu uywatjja, mä 80 qallunakaw utjañapäna. Awatiritï jan sum awatkchïna ukhajja, pagopatwa iraqasirïna. Ukhamatwa awatirejj sum awatiñatak chʼamachasirïna.