¿Yatiyätati?

Nayra tiemponjja, ¿kunjamsa nina apapjjerïna?

JAYA cheqaru sarasina sacrificio loqtañatakejja, kunjamsa Abraham chachajj wakichtʼasïna uka toqetjja akham sasaw Génesis 22:6 qellqatan qhanañchi: “Abrahamasti sacrificiotaki lawanak katusinjja Isaacaruw qʼepjjaruyi, ukatsti cuchillo katu, ninampi kuna, ukat panpachaniw sarawayapjjäna” sasa.

Kunjamsa nayra tiempojj nina naktayapjjerïna (jan ukajj laktayapjjerïna) uka toqetjja, janiw nayra qellqatanakajj qhanañchkiti. Abraham chachajj sacrificio loqtañataki sarkäna ukat parlasajja, mä yatjjattʼat chachajj siwa: ‘Abraham chachatï nina nakkirpach apaspäna ukhajja, janjakiw nakhaskirpach puriykaspänti’ sasa. Abrahamampi Isaacampejj jayaw sarapjjäna. Ukhamasti, Génesis 22:6 qellqatan nina sasajja, kunanakas nina naktayañatakejj wakisïna uka toqetwa amuyatajj parlaski.

Nayra tiemponjja, nina naktayañajj wali chʼamänwa sasaw yaqhepanakajj sapjje. Ukampis nina naktayañat sipansa, uta jakʼapankirit sankʼa (jan ukajj kʼaja) wajjtʼayasis nina naktayañajj janiw chʼamäkaspänti. Ukatwa yaqhep yatjjattʼatanakajj akham amuyapjje: ‘Abrahamajj nina naktayañatakejja, cadenampi chintʼat mä phukhuruw sankʼanak appachäna, uka sankʼajj uka arumatäpachänwa’ sasa (Isa. 30:14). Mä phukhuru sankʼa apasajja, maynejj kawkhankkasas waña lawampejj ninjja naktayakispänwa.