Suma chuymanïsaw LURÄNA

JOHN waynan awkipajj Gujarat (India) sat jiskʼa markanwa bautisasïna, ukhatjja 60 maranakaw pasjje. Mamapasa, jupasa, phesqa jil kullakanakapas catolicopjjänwa, janirakiw awkipan religionapat kuns yatiñ munapkänti.

Mä urojja, awkipajj John waynar akham sänwa: ‘Congregacionajankir jilatatak mä sobre aparapita’ sasa. Jupajj uka alwarakiw mä lata jistʼarkasajj lukʼanap kharintasitayna. Ukhamäkchïnsa, awkipar istʼañ laykojj mä jiskʼa trapomp chʼoqtʼasisaw uka sobre apäna.

Awkipan amigopan utapar purïna ukhajja, jilatan esposapaw katoqäna, jupajj Jehová Diosan Testigoparakïnwa. John waynan lukʼanap kharintat uñjasajja, kullakajj jankʼakiw qolla imañap apsunisajj jan jenqʼechañapatak qolltʼäna, chʼoqtʼarakïna. Ukat juntʼum wakichtʼasajja, Bibliatwa John waynar parläna.

Uk uñjasajja, John waynajj janiw Testigonakar nayrjam uñisjjänti. Ukatwa kullakar pä toqet jisktʼäna. Jesusajj Diosäkaspasa, Mariarus orañäkaspa ukhamwa John waynajj amuyäna, ukampis awkipajj janiw ukham amuykänti. Kullakajj gujarati sat aru parlañwa yateqatayna, ukatwa uka pä jisktʼanakaparojj pachpa arupata, Bibliampi qhanañchäna. Ukatsti, “Estas buenas nuevas del reino” sat folletwa churarakïna.

Uka folleto liytʼasajja, kuntï liytʼkäna ukajj cheqätapwa John waynajj amuyäna. Ukat iglesiar sarasajj kuntï kullakar jisktʼkäna uka pachpwa tatakurar jisktʼäna. Tatakurajj wal coleräna, Biblia jaqtasajj akham sänwa: “¿¡Supayarut tukjjta!? ¿Kawkjansa Jesusajj janiw Diosäkiti sasin Bibliajj qhanañchi? ¿Kawkjansa Mariarojj janiw rezañäkiti sasin qhanañchi? ¿¡Kawkjansa!?” sasa. John waynatakejj tatakuran ukham colerasitapajj janiw walïkänti, ukatwa akham säna: “Janipuniw mayampsa Católica Iglesiar sarjjäti” sasa. Uksti phoqarakïnwa.

John waynajj Jehová Diosan Testigonakapampiw Bibliat yatjjatañ qalltäna, ukatsti Jehová Diosaruw serviñ qalltjjarakïna. Familiapat yaqhepajj ukhamarakiw lurapjjäna. John jilatan kupi lukʼanapajj jichhakamaw tʼirïski. Kullakajj suma chuymampi qolljjatkän ukat jichhakamajj 60 maranakas pasjjchejja, kunjamsa ukajj Diosan arunakap uñtʼañataki yanaptʼäna uk wali munasiñampiw amtaskaki (2 Cor. 6:4, 6).