¿Biblian ewjjanakapajj yanaptʼistaspati?

YAQHEPAJJ JANIW SAPJJEWA. Mä doctorajja, ‘Bibliajj janiw yanaptʼkistaspati, 1920 maran lurat mä librompis jichhürun Química yatichañ munksna ukhamawa’ sasaw säna. Bibliar jan respetir mä jaqejj inas akham sischispa: ‘Jichhak uñstir mä computador apnaqañ yateqañatakejja, nayra computadoran manualap ¿liytʼasmati?’ sasa. Jupanakajja, Biblian ewjjanakapajj janiw yanaptʼkistaspati sasaw sapjje.

Jichhürunakanjja, kunayman yanaptʼanakaw utji, tecnologiajj yanaptʼarakistuwa. Ukhamasti ¿Bibliajj janit yanaptʼjjestaspa? Internetanjja, walja yanaptʼanaka ukhamarak ewjjtʼanakaw utji. Televisionanjja, walja yatjjattʼatanakaruw (psicólogos, gurús, escritores) kunsa amuyapjje uk yatiñatak entrevistapjje. Ukhamarus kunayman ewjjanakan walja libronakaw utji, ukajja libro luririnakarojj wal qollqechaski.

Ukham walja yanaptʼanak utjipanjja, ¿Biblia liyiñajj janit wakisjje? Biblian qellqasitapat niya 2.000 maranakaw pasjje. Bibliar jan respetapki ukanakajja, ¿cheqpunt parlasipkpacha? Janiwa. Cienciampi tecnologiampejj jankʼakiw maranakampejj mayjtʼi, ukampis jaqenakajj janiw mayjtʼapkiti, pachpak amuyasipki. Jaqenakajj kusisit jakasiña, mä amtamp jakasiña, familjam sum jakasiña, suma amigonakanïñsa munasipkakiwa.

Bibliajj walja maranak nayras qellqaskchïnjja, uka toqet walja yanaptʼanakaniwa. Bibliajj taqe kun lurir Diosasan amuytʼayatawa. Taqeniruw jakäwisan yanaptʼistaspa, jan waltʼäwinakar saykatañatakis yanaptʼarakistaspawa (2 Timoteo 3:16, 17). Janiw ukakïkiti, ewjjanakapajj wiñayatakiwa, janirakiw kunapachas paskaniti. Biblia pachpaw akham sasin qhanañchi: “Diosan arupajj jakkiriwa” sasa (Hebreos 4:12).

¿Ukajj cheqäskapuniti? ¿Bibliajj cheqapunit yanaptʼistaspa? Aka Yatiyañataki revistajja, qalltat tukuykamajj mä toqetakwa qhanañchi, akjjar mistkani uka revistanakas ukham wakichtʼatarakïniwa. Ukaw uka jisktʼanakar qhanañchañatak yanaptʼätam.