SARNAQÄWI
‘Wali valorani mä perla’ jikjjatapjjta
WINSTON jilatampi Pamela (Pam) esposapampejj Australasia cheqankir sucursalanwa servisipki. Kusisitas jakasiwayapkchejja, jan walinakanwa uñjasiwayapjje. Sañäni, yaqha markanakanwa yatinoqtapjjañapäna, wawapas janïr naskipanwa jiwjjäna. Ukhamäkchïnsa, Jehová Diosarusa jilat kullakanakarus munasisipkakiwa, kusisitaw yatiyasipkaraki. Aka entrevistanjja, mä qhawqha experiencianakapwa cuenttʼapjjestani.
Jilata Winston, ¿kunjamsa Diosar thaqañ qalltayäta?
Diosar jan creyir familiana, Queensland (Australia) markanwa jilsuwayta. Niyakejjay jakapkayäta uka granjajj markat wali jayankchïnjja, mä jukʼa jaqenakarukiw uñtʼayäta. 12 maranïkasaw Diosar thaqañ qalltta. “Jumat kunatï cheqäki uk uñtʼañ yanaptʼita” sasaw Diosar mayisirïta. Tiempompejj Adelaida (Australia Meridional) markaruw trabajir sarjjayäta. 21 maranïsajj Sydney markaruw pasiytʼir sarayäta, ukanwa Pamelar uñtʼayäta. Jupajj israelismo británico sat religionatwa parlitäna. Uka religionankirinakajja, “Reino Unido cheqankir markanakajj Israelankir chhaqata tribunakat jutirïpjjewa” sasaw creyipjje. “Uka tribunakajja, 700 (a.C.) maranakan yaqha markar apatäpkäna uka alay toqenkir tunka tribunakäpjjewa” sasaw creyipjjaraki. Adelaida markar kuttʼjjasajja, trabajir masijaruw uka toqet parlayäta. Jupajj Testigonakampiw Bibliat yateqañ qalltatayna. Testigonakajj kunarutï creyipki uka toqet mä qhawqha horanak jupamp parlasajja, Diosajj mayisitajar istʼatapwa amuyayäta. Diosajata ukat Reinopatwa kunatï cheqäki uk yateqaskayäta. Cheqas ‘wali valorani mä perlwa’ jikjjatayäta (Mat. 13:45, 46).
Kullaka Pam, jumajj ukhamarakiw tawaqökasin ‘wali valorani uka perla’ thaqañ qalltayätajja. ¿Kunsa jikjjatañatak lurawayta?
Diosar creyir mä familiana, Coffs Harbour (Nueva Gales del Sur) sat markanwa jilsuwayta. Awk taykajasa, abuelonakajasa, israelismo británico sat religionan yatichäwinakaparuw creyipjjäna. “Reino Unido cheqankir markanakat jutirinakaruw Diosajj jukʼamp munasi” sasaw sullka jilajarusa, jilïr kullakajarusa, jilaparte primonakajarusa, nayarus yatichapjjetäna. Ukajj janjamakiw ukhamäkänti, janirakiw Diosan jakʼapankkiristsa ukham amuyaskayätti. Ukatwa 14 maranïsajj jakkayäta uka cheqankir walja iglesianakar sarayäta. Sañäni, adventistas del séptimo día, anglicanos, bautistas ukanakaruw sarayäta. Jupanakajj janiw Diosar uñtʼañatak yanaptʼapkitänti.
Qhepatjja, Sydney sat markaruw jakir sarjjapjjayäta. Ukanwa pasiytʼir jutkäna ukhajj Winston esposojar uñtʼayäta. Kunjamtï jupajj siskejja, religionat parlapjjatajatwa Testigonakampi Bibliat yateqañ qalltäna. Qhepatjja, Bibliankir walja textonakani cartanakwa apayanitäna. Qalltan ukanak liytʼasajj wal llakisiyäta, colerarakiyätwa. Ukampis jukʼat jukʼatwa Diosat kunatï cheqäki uk yateqaskataj amuyasiyäta.
Winston jakʼapan jakañatakejja, Adelaida markaruw 1962 maran sarjjayäta. Jupajj Thomas Sloman jilatampiru Janice esposapampiruw jupanakamp jakañajatak parlatayna. Jupanakajj Papúa Nueva Guinea markanwa misionerot servipjjatayna. Jilat kullakajj wali munasiñampiw katoqtʼapjjetäna. 18 maranikïskchiyätsa, Jehová Diosar jukʼamp uñtʼañatakiw yanaptʼapjjetäna. Ukatwa Bibliat yateqañ qalltarakiyäta, mä jukʼa tiemponakwa kuntï yateqkayäta ukajj cheqätap amuyayäta. Casarasisajj wali kusisitaw Winston esposojampejj Diosar serviñ qalltapjjayäta. Kunatï pasapkitäna ukajja, ‘wali valorani perla’ jikjjatapkayäta uk jukʼamp valoranit uñjañatakiw yanaptʼapjjetäna.
Jilata Winston, ¿Diosar serviñ qalltkayäta uka maranakajj kunjamänsa?
A. Congregacionanak tumptʼasajj kawkïr islanakarutï sarapkayäta ukaw mapan uñjasi.
B. “Sellos postales” ukanaka. Kiribati, Tuvalu sat markanakajja, nayrajj islas Gilbert y Ellice sasin uñtʼatäpjjänwa.
C. Funafuti sat coralanakani islajj Tuvalu markankiwa. Misioneronakajj janïr sarapkäna ukhaw ukar visittʼapjjayäta.
Casarasipkayäta uka qhepatjja, Jehová Diosajj jupar jukʼamp serviñatakejj ‘mä jachʼa punku llawirarapipjjetäna’ (1 Cor. 16:9). Uka punkjja, congregacionanak tumptʼir Jack Porter jilataw uñachtʼayapjjetäna. Jichhajj Australasia cheqankir sucursalanwa uka jilatampejj sucursal sarayirit servisipkta. Uka tiemponjja, jupampi Roslyn esposapampiw precursor regularat servipjjañajatak chʼamañchtʼapjjetäna. Phesqa maraw ukham servipjjayäta. Ukatjja, 29 maranïkayäta ukhaw Pacífico sur cheqankir islanakar congregacionanak tumptʼirit khitapjjetäna. Uka tiemponjja, Fiyi markankir sucursalaw uka islanakankir congregacionanakar uñjäna. Kiribati, Nauru, Niue, Samoa, Samoa Norteamericana, Tokelau, Tonga, Tuvalu, Vanuatu sat islanakaruw visitir sarapjjayäta.
Uka maranakanjja, jayankir yaqhep islanakankirinakajj janiw Testigonakan yatichäwinakapar confiyapkänti, ukatwa jupanakar suma amuytʼasis Bibliat parlapjjañajäna (Mat. 10:16). Congregacionanakajj janiw jachʼäkänti, ukatwa awisajj kawkin alojasiñas jan utjkänti. Ukhamajj yaqha jaqenakaruw alojasiñatak mayipjjerïta, jupanakajj munasiñampiw katoqtʼapjjetäna.
Jilata Winston, Bibliat apstʼat qellqatanak yaqha arunakar jaqokipasiñap wal muntajja. ¿Kunas ukatak yanaptʼawaytam?
Jilïr irpirinakatak escuelajj Samoa islan apaskäna ukanwa sarayaskta.
Khä tiemponjja, tongano arun mä qhawqha tratadonakampi folletonakampikiw Tonga sat islankir jilat kullakanakatak utjäna. Ukatwa inglés arut La verdad que lleva a vida eterna sat libromp Bibliat yatichapjjerïna. Ukhamasti, jilïr irpirinakataki pusi semanan apaskäna uka escuelanwa, inglés aru mä jukʼa yatiri kimsa jilïr irpirinakajj uka libro tongano arur jaqokipapjjäna. Qhepatjja, Pam esposajaw kuntï jilatanakajj traducipkäna uk maquinamp qellqjjäna. Uka hojanakjja, Estados Unidos markankir sucursalaruw imprimisiñapatak apayapjjayäta. Kimsaqallqo semananwa uka librojj tukuyasïna. Janis suma traducitäkchïnjja, tongano aru parlirinakat waljaniruw Diosar uñtʼapjjañapatak yanaptʼawayi. Esposajampejj janis traduciñ yatipkstjja, ukaw qellqatanak yaqha arunakar jaqokipasiñap wal munañatak yanaptʼawayapjjetu.
Kullaka Pam, ¿islanakan jakañajj Australia markan jakañjamarakïnti?
Congregacionanak tumptʼasajja, uka autonwa mä kutejj alojasipjjayäta.
Janiwa. Yaqhep lugaranakanjja, mosquitonakajj waljaw utjäna, wali juntʼurakïnwa, jachʼa achakunaka, usunakaw utjarakïna, awisajj mä jukʼa manqʼakiw utjapjjerïtu. Ukampis jaypʼunakajja, fale sat utajan lamar qota uñchʼukisaw samartʼapjjerïta. Polinesia cheqanjja, jan perqani, pajat lurat techoni utanakaruw samoano arun ukham uñtʼasi. Phajjsi arumanakanjja, palmeranakajj wali sumaw uñjasiri, phajjsis ukhamarakiw lamar qotan sum uñjasiri. Ukanak uñjasajj wal lupʼipjjerïta, Diosatsa mayisipjjarakirïtwa, ukaw jan wali amuyunakamp jan aynachtʼañatak yanaptʼapjjetäna.
Wawanakajj wal gustapjjerïtu. Jupanakajj lartʼayasiri, yaqha markat jutir janqʼo jaqenakar wal uñchʼukiri ukhamäpjjänwa. Mä kutejj Niue sat islaruw sarapjjta, ukanjja, Winstonan wali tʼawrantat amparap llamktʼasajj akham sasaw mä yoqallitojj säna: “Phuyunakamajj wali sumawa” sasa. Uka yoqall wawajj janiw mä kutis ukham tʼawrantat ampar uñjkänti, ukatwa kunar uñtatas uk jan sañ puedkänti.
Uka cheqanjja, jilaparte jaqenakajj wali pobrëpjjewa, uk uñjañajj wali llakkañänwa. Uka lugarajj wali sumäkchïnsa, umañatak qʼoma umajj jukʼakiw utjäna, janiw suma doctoranakas utjkänti. Ukhamäkchïnsa, jilat kullakanakajj janiw sint llakisipkänti, ukham jakañ yatitäpjjänwa. Familiap jakʼan jakasisasa, Jehová Diosar mä Tantachasiñ Utan yupaychasas wali kusisitäpjjänwa. Uk uñjañaw kunatï jukʼamp wakiskirïki uk lurañataki ukat mä jukʼampik jakasiñatak yanaptʼawayapjjetu.
Kullaka Pam, awisajj jan yatitäkayäta ukhamanakanwa uma jikjjatañamäna, manqʼsa phayañamäna, ¿kunjamsa ukanak lurirïta?
Pam esposajaw Tonga sat islan isi tʼajjsuski.
Awkijaw lawanakamp nina naktayañsa, ukamp phayañsa, jukʼampik jakasiñsa, yaqha ukhamanaksa yatichawayitu, ukatwa jupar wal yuspärta. Mä kutejj Kiribati islar visitapkayäta ukhajja, pajat lurat techoni, bambú sat alinakamp lurat perqani, coralanakamp lurat pisoni utanwa alojtʼasipjjayäta. Phaytʼasiñatakejja, oraqwa pʼiytʼayäta, coco sillpʼinakampiw nina naktayarakiyäta. Phujur um waytir sarayäta ukhajja, mä qhawqha warminakamp chikaw fila lurayäta. Jupanakajja, pä metroni lawar chinkatat juchʼus sogampiw um waysupjjerïna. Uka uma waysuñajj chawlla katuñ cañar uñtasitänwa. Anzuelo lantejja, mä lata chinkatatänwa. Uka lata jaqontasajj facilakwa um waytapjjeri. Ukampis nayar waktʼitäna ukhajja, inakiw lata walja kuti umar jaqontayäta, janiw umajj phoqantkänti. Uk uñjasajj taqeniw larusipjjäna, laruñ tukuyjjasajj jupanakat mayniw yanaptʼitäna. Uka islanakankir jaqenakajj yanaptʼapjjapunirïtuwa, wali munasirïpjjarakïnwa.
Uka islanakan serviñajj jumanakatak wali kusiskañänwa, ¿mä qhawqha experiencianak cuenttʼapjjetasmati?
Winston: Uka islanakankir jaqenakajj kunjamsa jakasipjjäna uk yatiñajj chʼamakïnwa. Jilat kullakanakajj manqʼa wajjtʼasajj qʼalwa churapjjerïtu. Ukampis taqpach manqʼantañat sipansa, jupanakatakiw jiltʼayapjjañajäna. Qalltan uk jan yatisajj qʼalwa manqʼantapjjerïta. Qhepat janiw ukham lurjjapjjayätti. Ukhamanaksa lurapkchiyätjja, jilat kullakanakajj janiw nanakat jan walinak parlapjjerïkiti. Jupanakajj niya sapa sojjta phajjsit tumptʼir sarapjjerïta uk wal suyapjjeri. Yaqha markat jutirinakatjja, nanakarukiw uka jilat kullakanakajj uñtʼapjjetäna.
Niue sat islanwa mä qhawqha jilat kullakanakamp yatiyir saraskta.
Congregacionanak tumptʼañajja, Testigonakar jukʼamp uñtʼapjjañapatakiw jaqenakar yanaptʼäna. Uka cheqankir Testigonakakis religionap uñstayasipkaspa ukhamwa waljanejj amuyapjjäna. Ukampis yaqha markat jutir Testigonakar uñjasajja, “Testigonakajj janiw aka markanak utjkiti” sasaw amuyapjjäna, wal musparapjjarakïna.
Pam: Kunatï Kiribati sat islan paskäna uk janipuniw armkäti. Ukanjja, mä jiskʼa congregacionaw utjäna, mä jilïr irpirikiw utjarakïna, jupajj Itinikai Matera satänwa. Uka jilatajj nanakar sum uñjañatak wal chʼamachasirïna. Mä urojja, mä canastar mä kʼawna aptʼataw purinïna. “Akajj jumanakatakiwa” sasaw sapjjetäna. Uk uñjasajja, “¡mä kʼawnarakisä!” sasaw wal kusisipjjayäta. Ukajj chuymarupuniw purtʼapjjetäna.
Kullaka Pam, wawamajj janïr naskipanwa jiwjjäna, ¿kunas ukhajj yanaptʼawaytam?
Pacífico sur cheqankkasaw 1973 maran usuriptayäta, ukatwa Australia markar kuttʼjjapjjayäta. Pusi phajjsitjja, wawajajj janïr naskipanwa jiwjjäna. Esposojajj nayjamarakiw wal llakisïna. Tiempompejj janis sint llakisjjchiyätjja, Yatiyañataki 15 de abril, 2009 revistajj mistkäna ukhakamajj wawajat amtasiskakiyätwa. Uka revistanjja, “Aka revista liytʼirinakan jisktʼäwinakapa” siski ukan “¿Purak manqhan jiwxapxi uka wawanakax jaktanipxaniti?” sat yatichäwiw mistüna. Ukan akham sänwa: “Jehová Dios sapakiw kuntï lurkani ukjja yati [...]. Cheqpachansa, kunatï cheqäki ukpunwa lurani. Jehová Diosajj ‘Supayan luratanakap tʼunjiriwa’ Yoqapar khitanini, ukhamatwa kunatï akapachan tʼaqesiykistu ukanak chhaqtayani” sasa (1 Juan 3:8). Uka yatichäwejja, Testigonakajj ‘wali valorani perla’ jikjjatawayktan uk jukʼamp valoranit uñjañatakiw yanaptʼapjjetäna. Cheqas kunanaktï Diosan Reinopajj jutïrin lurkani uk yatiñajj wal chuymachtʼistu.
Wawajajj jiwjjäna uka qhepatjja, wasitampiw Diosar sapürunjam serviñ qalltapjjayäta. Mä qhawqha phajjsinakajj Australia markankir Betelanwa servipjjayäta, qhepatsti, congregacionanak tumptʼiritwa servipjjarakiyäta. Nueva Gales del Sur ukat Sydney cheqan utjki uka jiskʼa markanakan pusi maranak servisipkayäta ukhajja, Australia markankir sucursalan servipjjañajatakiw 1981 maran invittʼapjjetäna, jichhakamaw ukan servisipkta.
Jilata Winston, Pacífico sur cheqankir islanakan servitamajja, ¿Australasia cheqankir sucursalan serviñatak yanaptʼawaytamti?
Jïsa, wal yanaptʼawayitu. Qalltanjja, Australia markankir sucursalaw Samoa, Samoa Norteamericana cheqankir congregacionanak uñjäna. Qhepatjja, Nueva Zelanda markankir sucursalampi, Australia markankir sucursalampejj mayakëjjapjjänwa. Jichhajja, Australasia cheqankir sucursalaw Cook, Niue, Nueva Zelanda, Samoa, Samoa Norteamericana, Timor Oriental, Tokelau, Tonga islanakankiri ukhamarak Australia markankir congregacionanak uñjaski. Ukanakat walja cheqanakar visittʼiriw Betelat khitapjjetäna. Ukankir jilat kullakanakamp serviñajja, walpun Betelan serviñatak yanaptʼawayitu.
Winston jilatampi Pam esposapampejj Australasia cheqankir sucursalanwa servisipki.
Kunatï pasawayapkitu ukarjamajja, akwa tukuyañatak sirista. Janiw jilïrinakakejj Diosar thaqapkiti, familiaranakapajj janis Diosar uñtʼañ munapkchejja, wayn tawaqonakas ukhamarakiw ‘wali valorani perla’ thaqapjje (2 Rey. 5:2, 3; 2 Crón. 34:1-3). Jehová Diosajj wali munasir Diosawa. Jupajj taqe jaqenakana, mä arunjja, wayn tawaqonakana, jilïrinakana salvasipjjañapwa muni.
Diosar thaqañ qalltapkayäta ukat jichhakamajj 50 jila maranakäjjewa, ukhajja, qhawqsa Jupar servipjjañajäna uk janiw yatipkayätti. Cheqansa, Diosan Reinopat kunatï cheqäki uk yatiñajj ‘wali valorani mä perlar’ uñtasitawa. ¡Janipuniw kunäkipansa uk aptʼasiñ munapkti!