Jehová Diosan Testigonakaparojja, jilat kullakanakar yatichtʼapjjatapatwa uñtʼasi. Cheqansa, Diosan Reinopat sapürunjam yatiyasipki uka jilat kullakanakarojja, jukʼamp sum yatiyapjjañapatakiw wakichtʼasi (2 Timoteo 4:5).

Precursoranakatak Escuela. Precursorjam mä mara irnaqtʼasaw maynejj sojjta urutaki uka escuelar saraspa. Uka escuelajj mä Tantachasiñ Utanwa apasispa. ¿Kuna amtampis uka escuelajj wakichasiwayi? Jehová Diosar jukʼamp jakʼachasipjjañapataki, Diosan arunakap sum yatiyapjjañapataki ukat Diosatak irnaqtʼasipkakiñapatakiw uka escuelajj precursoranakar yanaptʼi.

Diosan Reinopat Yatiyirinakataki Escuela. Jukʼamp yatiyirinakajj munaski uka cheqanakar sarirjamäpki uka precursoranakar wakichtʼañatakiw uka escuelajj apasi. Pä phajjsitakiw ukar sarapjjaspa. Jupanakajj akham sapjjewa: “Akankasktwa nayajj, nayar khitasita” sasa. Ukhamatwa Jesusat yateqasipjje, jupaw aka Oraqer jutasajj Diosan arunakap sum yatiyäna (Isaías 6:8; Juan 7:29). Yaqha cheqar sarjjasajja, kunatï jakañatak wakiski ukampikiw precursoranakajj jakapjje. Kunaymanin jakasir markanakaw utji, yaqha costumbrenakani, yaqhepajj juntʼu jan ukajj thaya, ukat manqʼanakas mayj mayjarakiwa, ukhampachaw jupanakajj uka markanakar sarapjje. Awisajj yaqha aru parlañwa yateqapjjañaparaki. Ukhamajj uka cheqanakan sum irnaqtʼapjjañapataki ukat Jehová Diosarusa markaparus jukʼamp yanaptʼapjjañapatakiw uka escuelajj precursoranakar yanaptʼi. 23 maranit 65 marankamaw soltero jilat kullakanakasa ukat casarat jilat kullakanakas uka escuelar sarapjjaspa.

Escuela Bíblica de Galaad de la Watchtower. Hebreo arunjja, Galaad sutejj “qhanañchañatak qala montona” sañwa muni. 1943 maranwa uka escuelajj apasiñ qalltasiwayi, ukhat jichhakamajja, 8.000 jila jilat kullakanakaruw misioneronakjam ‘taqe akapachankir jaqenakaru’ yatiyir sarapjjañapatak khithasiwayi (Hechos 13:47). Nayrïr misioneronakajj Perú markar puripjjäna ukhajja, janiw ni mä tamas utjkänti, jichhajj 1.000 jila tamanakaw utj-jje. Ukat Japón markar puripjjäna ukhajja, jilat kullakanakajj janiw ni tunkarus puripkänti, jichhajj 200.000 jiläjjapjjewa. Galaad escuelar sarapki ukanakajja, phesqa phajjsinwa Diosan Arupat sum yatjjatapjje. Misioneronaka, tamanak tumptʼirinaka, sucursalanakan irnaqtʼapki uka jilat kullakanaka ukat precursores especiales sasin uñtʼatäpki ukanakaw uka escuelar sarapjjaspa. Oraqpachan yatiyaski ukajj nayrar sartaskakiñapataki ukat tamanakar chʼamañchtʼapjjañapatakiw jilat kullakanakarojj Galaad escuelan wakichtʼasi.

• ¿Kuna amtampis Precursoranakatak Escuelajj wakichasiwayi?

• Diosan Reinopat Yatiyirinakataki Escuelarojja, ¿khitinakas sarapjjaspa?

Jehová Diosan markap sarayirinakajj janiw pagatäpkiti. Jan ukasti, ‘Tatitun tamap uñjapjjañapatakejj’ yatjjattʼat jilatanakaruw uttʼayasi, kunjamtï nayrïr cristianonakajj lurapjjerïna ukhama (Hechos 20:28). Uka jilïr irpirinakasti, Diosar yupaychañan suma saytʼatäpjjewa, jupanakaw Diosan tamap uñjapjje ukat sarayapjjaraki, ukjja ‘janiw phoqham sat laykuki, ni qollqe munañ laykukisa lurapkiti, jan ukasti taqe chuymaw [“Dios nayraqatan”, NM] lurapjje’ (1 Pedro 5:1-3). ¿Kunjamsa jilat kullakanakar yanaptʼapjje?

Jupanakaw tamankirinakar sum uñjapjje. Jilïr irpirinakaw tama sarayapjje ukat Diosar jakʼachasipjjañapatakiw tamar yanaptʼapjjaraki. Jehová Diosaw jupanakar uttʼayi, uk yatisajj janiw jilat kullakanakar munañapar apnaqapkiti, jan ukasti kusisit jikjjatasipjjañapatakiw yanaptʼapjje (2 Corintios 1:24). Mä awatirejj wali munasiñampiw sapa mayni uwijanakapar uñji, ukhamarakiw jilïr irpirinakajj Diosan tamapat sapa maynir uñtʼañatak chʼamachasipjje (Proverbios 27:23).

Diosan munañap lurapjjañapatakiw yanaptʼapjje. Sapa semanaw jilïr irpirinakajj tantachäwinak sarayapjje, uka tantachäwinakaw Diosar yupaychañan jilat kullakanakar chʼamañchi (Hechos 15:32). Uka jilatanakaw Diosan arunakapat yatiyasiñapatak pʼeqtʼapjje, tamankirinakampis yatiyapjje ukat kunjamsa yatiyasiñapa uksa yatichapjjaraki.

Sapa mayniruw yanaptʼapjje. Diosar yupaychañ chʼamañchtʼañatakiw jilat kullakanakar visittʼapjje ukat tantachäwinakansa jupanakampejj parltʼapjjarakiwa. Ukatjja Qollan Qellqatanakampiw chʼamañchtʼapjje ukat chʼuymachtʼapjjaraki (Santiago 5:14, 15).

Jilïr irpirinakajj janiw taman luräwinakapampik phoqhapkiti, jan ukasti niya taqeniw familiapar uñjapjje ukat trabajapjjaraki. Uka jilatanakajj walja lurañanakampiw phoqhapjje, ukatwa wali respetompi uñjatäpjjañapa (1 Tesalonicenses 5:12, 13).

• ¿Kunanaksa jilïr irpirinakajj lurapjje?

• ¿Kunjamatsa sapa maynir munasipjjatap uñachtʼayapjje?

Bibliarjamajja, ‘jilïr irpirinaka ukat taman yanapirinakapaw’ taman lurañanakamp phoqhapjje (Filipenses 1:1, NM). Sapa tamanwa ukham jilatanakajj utji. Ukampis ¿kunjamsa jupanakajj tamar yanaptʼapjje?

Jilïr irpirinakaruw yanaptʼapjje. Taman yanapirinakapajj Dios chuyma, atiniskaña ukat taqe chuyma irnaqtʼirïpjjewa, yaqhepajj waynäpjjewa, yaqhepasti jilïr jaqenakäpjjarakiwa. Ukat sapa tantachäwin kuna wakiskir lurañanakatï utjki ukanakampis phoqhapjjarakiwa. Ukhamatwa jilïr irpirinakajj Diosan arunakapat yatichapjjaspa ukat jilat kullakanakar tumptʼiris sarapjjarakispa.

Wakiskir lurañanakanïpjjewa. Taman yanapirinakapajja, wali munasiñampiw tantachäwir jutirinakar katoqapjje. Yaqhepajj Bibliat apstʼat qellqatanakwa tantachasirinakar churapjje, kawkhansa tamankirinakajj Diosan arunakap yatiyapjjani uksa qhanañchtʼapjje ukat taman kuna qollqe apnaqañas utji ukhajj yanaptʼapjjarakiwa. Mayninakasti, microfononaka, jan ukajj yaqha ukhamanakwa uñjapjje. Janiw ukakïkiti, kunjamtï jilïr irpirinakajj sapki ukarjamaw chuymankipstat jilat kullakanakar yanaptʼapjje ukat Tantachasiñ Uta qʼomachañansa, jan ukajj askichañansa yanaptʼapjjarakiwa. Kuna lurañanakay taman utjchi ukanakampejj jankʼakiw phoqhapjje, ukatwa taqenis jupanakar wali respetomp uñjapjje (1 Timoteo 3:13).

Diosan Aruparjamaw sarnaqapjje. Taman yanapirinakapajj cristianjamaw sum sarnaqapjje, ukatwa jupanakar ajllisiwayi. Arstʼäwinakapas taqenir chʼamañchkiriwa. Ukat Diosan arunakap sum yatiyapjjaraki, uk uñjasaw mayninakajj jukʼamp yatiyir sarañ munapjje. Wali yanaptʼasirïpjjatap laykusti, jukʼamp kusisita ukat mayachtʼat sarnaqañaw taman utji (Efesios 4:16). Ukat tiempompejj jilïr irpirjamaw taman irnaqtʼapjjarakispa.

• ¿Kunjam jaqëpjjes taman yanapirinakapajja?

• ¿Kunjamsa taman yanaptʼapjje?