Griego Arut Qollan Qellqatanakajja, walja kutiw apóstol Pablotsa ukat Bernabé chachatsa parli. Jupanakajj nayrïr maranakan utjkäna uka tamanakaruw tumptʼir sarapjjerïna. ¿Kunatsa? Taqe chuymaw cristian jilat kullakanakapat llakisipjjäna. Ukat kunjamäsipkänsa uk yatiñatakejj wasitatwa Pablojj kuttʼañ munäna. Wali jaya sarañäkchïnsa, jupanakar chʼamañchtʼañatakejj sarañ munapunïnwa (Hechos 15:36). Jichhürunakanjja, ukhamarakiw tamanak tumptʼirinakajj jilat kullakanakat llakisipjje.

Jilat kullakanakaruw chʼamañchtʼapjje. Maran pay kutiw Tamanak tumptʼir jilatajj niya 20 tamanakar visittʼir sari ukat mä semanaw sapa tamamp irnaqtʼaraki. Uka jilatanakajj wali yatjjattʼatäpjjewa, ukhamajj taqeniw jupanakatsa, ukat jaqechatäpjjchi ukhajj esposanakapatsa yateqasipjjaspa. Jupanakajj taqeniruw uñtʼañ munapjje, waynanakarusa, jilïrinakarusa. Ukat tamankirinakampiw Diosan arunakapat yatiyirisa ukat yatichirisa sarañ munapjje. Janiw ukakïkiti, jilïr irpirinakampiw jilat kullakanakar tumptʼir sarapjje, ukat taman tantachäwinakansa, jachʼa tantachäwinakansa jilat kullakanakar chʼamañchtʼañatakiw wali sum arstʼapjjaraki (Hechos 15:35).

Taqe jilat kullakanakatwa llakisipjje. Uka jilatanakajja, kunjamsa tamanakajj Diosar yupaychasipki uka toqetwa wal llakisipjje. Ukat kunjamsa tamajj nayrar sarantaski uk yatiñatakejj jilïr irpirinakampi ukat taman yanapirinakapampiw tantachasipjje, ukat taman luräwinakapamp sumpach phoqhapjjañapatakis ewjjtʼapjjarakiwa. Diosan arunakap jukʼamp sum yatiyapjjañapatakiw precursoranakar yanaptʼapjje. Ukat machaqanakajj kunjamsa nayrar sarantasipki uk istʼañasa ukat jupanakar uñtʼañasa, uka jilatanakatakejj wali kusiskañawa. Jupanakajj taqe chuymaw tamamp chika, ‘mayninakar serviñatak chʼamachasisipki’ (2 Corintios 8:23). Kunjamsa Diosar taqe chuyma servipjje ukat atinisipjje uk uñjasajj taqeniw yateqasipjjaspa (Hebreos 13:7).

• ¿Kuna amtampis tamanak tumptʼirinakajj tamanakar visittʼapjje?

• Tamamar visittʼir jutkani ukhajja, ¿kunjamsa jukʼamp askinak jikjjatasma?

Kunapachatï jan waltʼäwinakajj utjki ukhajja, Jehová Diosan Testigonakapajj jankʼakiw jilat kullakanakar yanaptʼañatak onjjtasipjje. Ukhamatwa cheqpach munasirïpjjatap uñachtʼayapjje (Juan 13:34, 35; 1 Juan 3:17, 18). ¿Kunjamsa yanaptʼasipjje?

Qollqempis yanaptʼapjjarakiwa. Judea markan machʼa tiempojj utjkäna ukhajja, jankʼakiw Antioquia markankir jilat kullakanakajj Diosar yupaychir masinakapar qollqemp yanaptʼapjjäna (Hechos 11:27-30). Kunapachatï yaqha markankir jilat kullakanakajj jan waltʼäwin jikjjatasipjje ukhajja, ukhamarakiw Jehová Diosan Testigonakapajj tamanakap toqe qollqempis, jan ukajj yaqha ukhamanakampis yanaptʼapjje (2 Corintios 8:13-15).

Chʼamapampis yanaptʼapjjarakiwa. Jan waltʼäwinakajj utjki uka cheqanjja, jankʼakiw jilïr irpirinakajj tamankirinakar thaqtapjje, taqenis walikïsipkit janicha uk yatiñkama. Yanaptʼañatak uttʼayat jilatanakaw kunjamsa manqʼañanaka, isinaka ukat umsa churasispa uk uñjapjje, ukat qollayasiñasa, jan ukajj qorpachasiñ utanak wakisi ukhasa, jupanakarakiw uk uñjapjje. Ukat Jehová Diosan Testigonakapatjja, waljaniw utanaka, jan ukajj Tantachasiñ Utanak askichañatakisa ukat yaqhanakan yanaptʼañatakis chuymapatjam sarapjje. Jupanakajj mayachtʼata, junto trabajañar yatitäpjjewa, ukatwa jan waltʼäwinakajj utjki ukhas jankʼak yanaptʼasipjjaraki. Cheqans Diosar ‘iyawsir masinakaparuw yanaptʼapjje’, ukampis yaqhanakar yanaptʼañajj wakischi ukhas yanaptʼapjjarakiwa, yaqha religionatäskpansa (Gálatas 6:10, MT).

Diosan Arupampiw chuymachtʼapjje. Jan waltʼäwinakan uñjasipki ukhaw jaqenakajj chuymachtʼatäñ wal munapjje. Ukat ‘chuymachasir awkjamajja’, ukharakiw Jehová Diosajj jupanakar chuymachtʼi (2 Corintios 1:3, 4). Ukatwa Jehová Diosan Testigonakapajj kuntï Bibliajj jutïritak siski uk llaktʼatanakar yatiyapjje, ukarjamajj niyaw Diosan Reinopajj jan waltʼäwinaksa ukat tʼaqhesiñanaks chhaqtayani (Apocalipsis 21:4).

• Jan waltʼäwinak utjki ukhajja, ¿kunjamatsa Jehová Diosan Testigonakapajj jankʼak yanaptʼasipjje?

• ¿Kunjamsa llaktʼatanakar Diosan Arupamp chuymachtʼapjje?

Jiwañapajj jakʼankjjäna ukhaw Jesusajj pusi arkirinakapamp tantachasïna: Pedro, Santiago (jan ukajj Jacobo), Juan ukhamarak Andrés. Ukatsti, jupajj kuttʼankani ukat akapachajj tukuskani ukhajj kunanakas pasañapäna uka toqenakat qhanañchkasajja, akham sasaw arkirinakapar jisktʼäna: “¿Khitiraki amuyasiri, cheqap uywatasti, khitirutï uywiripajj utapankirinakjjaru uchawayi, horasaparu manqʼa jupanakaru churañapatakejja?” sasa (Mateo 24:3; 24:45, MT; Marcos 13:3, 4). Uka arunakarjamajja, mä uywirjamaw Jesusajj mä tama uttʼayañapäna ukat jupanakaw qhepa urunakan arkirinakapar manqʼa churapjjañapäna, mä arunjja, Diosan Arupat yatichapjjañapäna. ¿Khitinakarus uttʼaypachäna?

Qollan ajayump ajllita, Jesusan mä qhawqha arkirinakapäpjjewa. Uka ‘uywatajja’, Jehová Diosan Testigonakapan Oraqpachan Jilïr Irpirinakapa sasin uñtʼatäpjjarakiwa. Uka uywataw Diosan servirinakapar Bibliat apstʼat yatichäwinakap manqʼäkaspas ukham horasapar churi. Ukatwa Jehová Diosan Testigonakapajj ‘horasapar manqʼanak’ katoqañ suyapjje (Lucas 12:42).

Uka uywataw Diosan utap uñji (1 Timoteo 3:15). ‘Amuyasiri Cheqapa Uywatajj’ aka Oraqenkiri Jehová Diosan markap uñjañatak uttʼayatäpjjewa, Jesusaw uka luräwi jaytawayi, ukatwa Diosan markapan utjir yänakap uñjapjje, Diosan arunakapat yatiyasiñapatak yanaptʼapjje ukat tamanak taypis yatichapjjaraki. Janiw ukakïkiti, Diosan yupaychirinakapar kunanakatï wakisi ukanak horasapar churañatakejja, Diosan arunakap yatiyañataki apnaqaski uka Bibliat apstʼat qellqatanakampisa ukat kunanakatï tantachäwinakansa, jachʼa tantachäwinakansa yatichaski, ukanakampiw Diosan arunakapat yatichapjje.

Uka ‘uywatajj’ cheqapawa, kunattejj Diosan suma yatiyäwinakapsa ukat Biblian yatichäwinakapsa cheqaparuw yatichi, ukat Criston yänakaps wali amuyumpiw aka Oraqen uñji, ukatwa amuyasiri satarakejja (Hechos 10:42). Jehová Diosaw taqe luratanakap bendiciski, ukatwa markapajj jukʼamp jiljjattaski ukat yatichäwinakapas jilarkirirakiwa (Isaías 60:22; 65:13).

• Arkirinakapar Diosan Arupat horasaparu yatichañapatakejja, ¿khitirus Jesusajj uttʼayawayi?

• ¿Kunatsa uka ‘uywatarojj’ cheqapawa ukat amuyasiriwa sasin sissna?