Nayrïr maranakanjja, mä qhawqha ‘jilïr jilatanakampi ukat apostolanakampiw’ Jerusalenan jilïr irpirinakjam irnaqtʼapjjäna. Jupanakaw cristiano ajllit taman sutipjjaru, wali wakiskir amtanak amtapjjäna (Hechos 15:2). Mä amtaruk puriñatakejja, Qollan Qellqatanakatwa sum yatjjatapjjäna ukat Diosan qollan ajayupampiw irpayasipjjarakïna (Hechos 15:25). Ukhamarakiw jichhürunakan lurasiski.

Diosan munañap lurañataki ajllit chachanakäpjjewa. Alajjpachar sarañataki ajllita, Oraqpachan Jilïr Irpirinakajja, Diosan Arupat yatjjatañatakiw wal chʼamachasipjje, ukat Diosan markap sarayañatakisa ukat kunjamsa Jupar yupaychasiñapa uka toqenakatsa wali yatjjattʼatäpjjewa. Janiw ukakïkiti, oraqpachankir jilat kullakanakatakejj kunanakas wakisi uk amuytʼañatakejj sapa semanaw tantachtʼasipjje. Kunjamtï nayrïr maranakan lurapjjerïkänjja, ukhamarakiw Biblian yatichäwinakaparjam jilat kullakanakar yatichapjje, ukanakajj cartanakampi, tamanak tumptʼirinakampi, jan ukajj yaqha jilatanakampiw tamanakar yatiyasi. Ukhamatwa Diosan markapajj mä amtampiki taqe kuns lurapjjañapatak yanaptʼapjje (Hechos 16:4, 5). Jupanakarakiw manqʼäkaspas ukham Diosan yatichäwinakap wakichapjje, Diosan Reinopat yatiyasiñapatak chʼamachapjje ukat khitinakas taman luräwinakapamp phoqhapjjaspa uks uñjapjjaraki.

Diosan qollan ajayupampiw irpayasipjje. Oraqpachan Jilïr Irpirinakajj Taqe Kunjjar Munañani Jehová Diosampi ukat tama pʼeqtʼiri Jesusamp irpayasipjje (1 Corintios 11:3; Efesios 5:23). Uka jilatanakajj janiw Diosan tamapjjar munañanïpkaspas ukham tukupkiti, jan ukasti mayni ajllitanakjamaw ‘Corderor’, mä arunjja, Jesusar ‘arkapjje kawkirutejj jupajj sarki ukaru’ (Apocalipsis 14:4). Kunapachatï jupanakata ukat kuntï lurapki ukanakat oracionanakasan amtasktan ukhajja, Oraqpachan Jilïr Irpirinakajj wali yuspäratäpjjewa.

• ¿Khitinakas nayrïr maranakan jilïr irpirinakäpjjäna?

• Oraqpachan Jilïr Irpirinakajja, ¿kunjamsa Diosamp irpayasipjje?

Hebreo arunjja, Betel sutejj ‘Diosan Utapa’ sañ muni (Génesis 28:17, 19). Betel utanakajj Oraqpachanwa utji, sutipas wali askirakiwa, ukanwa Diosan arunakap yatiyasiñapatak yanaptʼapjje ukat sarayapjjaraki. Oraqpachan Jilïr Irpir jilatanakajja, Nueva York (Estados Unidos) markan utjki uka Betelankapjjewa, jupanakaw kunjamsa yaqha markanakankir sucursalanakajj irnaqtʼasipki uk uñjapjje. Ukat khitinakatï Betel utan irnaqapki ukanakajja, mä familiar uñtataw jakapjje, trabajapjje, manqʼapjje ukat Bibliatsa yatjjatapjjaraki, ukatwa Betel familjam uñtʼatäpjje (Salmo 133:1).

Jupanakat armtʼasisaw familjam mä suma cheqan irnaqtʼapjje. Betelan jakapki ukat trabajapki uka jilat kullakanakajja, Jehová Diosar yupaychañan suma saytʼata, Jupar katuyasita servirinakäpjjewa ukat sapürunjamaw Diosan munañap lurapjje ukat Reinopat yatiyasiñapatakis yanaptʼapjjaraki (Mateo 6:33). Taqeniw cuartonïpjje, manqʼañanïpjje ukat gastonakapatakis mä qhawqha churatäpjjaraki, ukampis janiw mä sueldo katoqapkiti. Betelanjja, kunaymanin trabajapjje, oficinanakana, manqʼañatak wakichasa, utanak qʼomachasa, askichasa, lavanderiana, ukat kawkhantï revistanaka, libronaka imprimtʼaski ukanwa yanaptʼapjjaraki, yaqhanaksa lurapjjarakiwa.

Diosan Reinopat yatiyasiñapatakiw wal irnaqtʼapjje. Biblian cheqa yatichäwinakapajj taqe jaqenakar yatiyasispa, uka amtampiw sapa Betel utan wal irnaqtʼapjje. Aka folletot amuytʼañäni: Nayraqatjja, Oraqpachan Jilïr Irpiri jilatanakan yanaptʼapampiw qellqasiwayi ukat kawkhanakantï aka Oraqpachan yaqha arunakar jaqokipapki ukanakaruw computadoranak toqe aptʼayasiwayi, ukat yaqhep markanakanwa jachʼa maquinanakat ratuk imprimisiwayi, ukhamatwa 110.000 jila tamanakar apayasjjaraki. Taqe ukanak lurasiñapatakejja, Betelankir familiaw wal irnaqtʼawayi, ukhamatwa Diosan suma yatiyäwinakap yatiyasiñapatak yanaptʼapjje. Cheqans Diosan arunakap yatiyañaw taqe kunat sipans wali wakiskirejja (Marcos 13:10).

• ¿Khitinakas Betel utan trabajapjje, ukat kunampis jupanakar yanaptʼasi?

• Sapa markankir Betel utanjja, ¿kuna wakiskir luräwinsa yanaptʼapjje?

Betel utan irnaqtʼir jilat kullakanakajja, mä markana, jan ukajj walja markanakan Diosan arunakap yatiyasiñapatakejj kunaymaninak lurapjje, sañäni, Bibliat apstʼat yatichäwinakwa yaqha arunakar jaqokipapjje, revistanaksa, libronaksa imprimtʼapjje, Bibliat apstʼat qellqatanak cajanakar uchapjje, videonaka, jan ukajj istʼañatak grabacionanak lurapjje ukat kuna lurañatï wakiski ukanaksa lurapjjarakiwa.

Sucursalan sarayirinakaw kunjamsa irnaqtʼasiski uk uñjapjje. Oraqpachan Jilïr Irpirinakaw mä sucursal uñjapjjañapatakejj wakichtʼat kimsa, jan ukajj jukʼamp jilïr irpirinakar uttʼayapjje. Uka jilatanakaw kunjamsa markapankir jilat kullakanakajj Diosar yupaychañan sarantasipki ukat kuna jan waltʼäwinakans uñjasipjjaspa, ukanak Oraqpachan Jilïr Irpir jilatanakar yatiyapjje, ukhamatwa jupanakajj kuna yanapanakas Bibliat apstʼat qellqatanakansa, tantachäwinakansa, ukhamarak jachʼa tantachäwinakansa jutïritak wakichasispa ukanak amuytʼjjapjje. Oraqpachan Jilïr Irpirinakajja, sutipjjar sucursalanakar visittʼapjjañapatakejj yaqha jilatanakar khithapjjapuniwa, ukhamatwa sucursalan sarayapki uka jilatanakarojj kunanakas sucursal sarayañatak yanaptʼaspa ukanak amuytʼayapjje (Proverbios 11:14). Sucursalar visittʼir jilatajja, uka cheqan jakir jilat kullakanakar chʼamañchtʼañatakiw mä jachʼa tantachäwin arstʼaraki.

Tamanakaruw yanaptʼapjje. Sucursalanwa machaq tamanak uttʼayasiñapatakejj amtapjje. Ukat precursoranakasa, misioneronakasa, tamanak tumptʼirinakasa, kunjamsa irnaqtʼasipki uksa uñjapjjarakiwa. Janiw ukakïkiti, jachʼa tantachäwinakajj kunürunakas apasini, Tantachasiñ Utanakas kunjamsa lurasini ukanak wakichapjje ukat Bibliat apstʼat qellqatanak tamanakar apayapjje. Taqe kunatï mä sucursalan luraski ukanakajja, Diosan Reinopat yäpar yatiyasiñapatakiw yanaptʼi (1 Corintios 14:33, 40).

• Sucursal sarayirinakajja, ¿kunjamsa Oraqpachan Jilïr Irpirinakar yanaptʼapjje?

• ¿Kunanaksa mä sucursalan lurapjje?