‘Taqe markanakaru, taqe casta jaqenakaru ukat kunayman parlasir jaqenakaru’ Diosan arunakapat yatiyañatakejja, Jehová Diosan Testigonakapajj 750 jila arunakaruw Bibliat apstʼat qellqatanak apsupjje (Apocalipsis 14:6). ¿Kunjamsa uk lurapjje? Walja markanakanwa qellqerinakapajj utji ukat mä qhawqha jilat kullakanakaw yaqha arunakar jaqokipapjjaraki. Jupanakajj Jehová Diosan Testigonakapäpjjewa.

Nayraqatjja, inglés arutwa qellqtʼasi. Oraqpachan Jilïr Irpirinakaw Comité de Redacción satäkis ukan irnaqtʼirinakarojj uñjapjje, jupanakajj Nueva York markankir Betelankapjjewa. Qellqerinakatjja, mä qhawqhanejj ukankapjjewa, yaqhepajj yaqha markankir Betel utanakankapjjarakiwa. Departamento de Redacción satäkis ukankir jilatanakaw kunjamsa qellqerinakajj irnaqtʼapjjani uk uñjapjje. Ukham yaqha markanakat qellqerinakanïñajj wali askipuniwa, ukhamatwa taqe markankir jaqenakan chuymapar purtʼañatakejj kunayman markanakat qellqasispa.

Yaqha arunakar jaqokipirinakaruw aptʼayasi. Kunapachatï mä qellqatajj tuktʼayatäjje ukat aptʼayasiñatak aprobatäjje ukhajja, computadoranak toqew oraqpachankir yaqha arur jaqokipirinakar aptʼayasi, jupanakaw arunakapar jaqokipapjje. Cheqpach suma arunak jikjjatañatakiw uka jilat kullakanakajj wal chʼamachasipjje, ukhamat kuntï inglés arut yatichaski uk arupan sum amuyasiñapataki (Eclesiastés 12:10).

Computadoranakampiw yanaptʼasipjje. Mä computadorajj janiw mä qellqer lanti, jan ukajj yaqha arur jaqokipir lanti irnaqtʼkaspati. Ukampis qellqatanak jankʼak lurasiñapatakiw yanaptʼaspa. Ukanwa jaqokipañatak yanapanaka, diccionarionaka ukat yaqhanakas utji. Jehová Diosan Testigonakapajja, Sistema Electrónico de Edición Plurilingüe (MEPS) programa uñstayapjje. Ukaw jaqokipañatak wal yanaptʼi, ukampiw kunayman arut qellqatanak mä computadorar apantasin dibujonakampi jaqthaptayapjje ukat imprimisiñapatak wakichjjapjjaraki.

Yaqhep arunakajja, mä qhawqha waranq jaqenakamp parlatakiwa, ukampis ¿kunatsa Jehová Diosan Testigonakapajj uka arunakampir jaqokipañatak wal chʼamachasipjje? Diosan munañapwa phoqhasipki, Jupajj “taqenin qhespiyatäñapwa muni, kunatejj cheqäki uk uñtʼapjjañaparaki” (1 Timoteo 2:3, 4).

• ¿Kunjamsa Bibliat apstʼat qellqatanakajj lurasi?

• ¿Kunatsa Jehová Diosan Testigonakapajj Bibliat apstʼat qellqatanak walja arunakar jaqokipapjje?

Sapa maraw Jehová Diosan Testigonakapajj millón millón Biblianaka, jan ukajj yaqha qellqatanak lurapjje ukat gratisakiw jaqenakar churapjje; Tantachasiñ Utanaksa, sucursalanaksa lurapjje, askichapjje ukat sum uñjapjjaraki; walja betelitanakaru, misioneronakaruw gastonakapatak churapjje ukat jan waltʼäwin uñjasipki uka markanakar yanaptʼañatakiw qollqe apayapjjaraki. ¿Kawkitsa taqe ukanak lurañatakejj qollqe apsupjje?

Janiw diezmos, ofrendas ni kuna qollqes mayiskiti. Diosan arunakapat yatiyañatakejj walja qollqes munaskchejja, Jehová Diosan Testigonakapajj janiw jaqenakar qollqe mayipkiti. Patak jila maranak nayrajja, Diosaw yanaptʼaskistu sasaw payïri Yatiyañataki revistan qhanañchasïna, ukat akham sarakïnwa: “Diosan markapajj janiw kunapachas mayjaskaniti, janirakiw jaqen yanaptʼap thaqkaniti” sasa. Ukhamapuniw phoqhasiwayi (Mateo 10:8).

Chuymapat churapki uka qollqempiw yanaptʼasipjje. Jehová Diosan Testigonakapan Bibliat yatichapjjatapajja, walja jaqenakan suma uñjatawa, ukatwa qollqemp yanaptʼapjje. Ukat Jehová Diosan Testigonakapaw Diosan munañap aka Oraqpachan lurasiñapataki tiempopampi, chʼamapampi, qollqepamp yanaptʼapjjaraki (1 Crónicas 29:9). Tantachasiñ Utanakansa ukat jachʼa tantachäwinakajj apaski ukanakansa, qollqe iranttʼañatak cajanakaw utji, ukaruw khititï munki ukajj mä qhawqha iranttʼaspa. Internetan jw.org toqes qollqemp yanaptʼasirakispawa. Qollqepamp yanaptʼirinakatjja, niya taqeniw pisin jakasirïpjje, Jesusajj parlkäna uka pobre viudar uñtatäpjjewa, jupajj pä jiskʼa qollqekwa templonkir cajanakar iranttʼäna (Lucas 21:1-4). Ukhamajj “sapa mayniw, kunjämtï chuymapanjja amtki ukhamarjam churaña[taki]” mä qhawqha qollqe yaqhachtʼaspa (1 Corintios 16:2; 2 Corintios 9:7).

Qollqemp yanaptʼasa, Jehová Diosar jachʼañchañ munapki ukanakarojja, Diosaw yanaptʼasipkakiñapatak chʼamañchtʼani, janiw uka toqet pächasktanti, ukhamatwa Diosan Reinopat yatiyasiskakini ukat munañapas lurasiskakini (Proverbios 3:9).

• ¿Kunansa Jehová Diosan Testigonakapajj yaqha religionanakat mayjäpjje?

• ¿Kunjamsa qollqe churatanakajj apnaqasi?

Tantachasiñ Utanakanjja, Diosan Reinopat yatjjatapjje, Jesusatakis uk yatiyañaw nayrankäna (Lucas 8:1).

Jehová Diosar yupaychañatak luratawa. Kunjamsa ‘Diosan Reinopat suma yatiyäwinak’ yatiyasispa, ukwa Tantachasiñ Utanakan amuytʼapjje (Mateo 24:14). Tantachasiñ Utanakajj janiw kikpäpkiti, yaqhepajj jiskʼäspa, jan ukajj jachʼäspa, ukampis janiw sinti jachʼanakäpkiti, ni sinti kʼachachtʼatäpkisa ukat yaqhepanjj walja tamanakaw tantachasipjjaraki. Aka qhepa maranakanjja, tamanakajj wal jiljjattawayi, ukatwa waranq waranq Tantachasiñ Utanakajj lurasiwayi (sapürus mä phesqa Tantachasiñ Utanakas luraskaspa ukhamawa). ¿Kunjamats uk lurapjje? (Mateo 19:26.)

Tantachasiñ Utanaka lurasiñapataki chuymapat churapki uka qollqempiw lurasi. Markankir sucursalaruw uka qollqjja apayjjapjje, ukat Tantachasiñ Uta lurapjjañapataki jan ukajj Tantachasiñ Utap askichapjjañapatakiw sucursalajj tamanakar uka qollq apayjjaraki.

Waljaniw Tantachasiñ Utanak lurasiñapatak jan qollq mayisin yanaptʼapjje. Walja markanakanwa Tantachasiñ Utanak Lurañataki Gruponaka uttʼayasiwayi. Ukan irnaqtʼir jilat kullakanakampi ukat jupanakar yanaptʼañ munirinakampiw kawkhantï markapan mä Tantachasiñ Uta lurañ wakischi uka cheqar jayäskpans sarapjje, ukhamatwa tamanakarojj Tantachasiñ Utanaka lurasiñapatak yanaptʼapjje. Yaqha markanakanjja, wakicht’at jilat kullakanakaruw uttʼayasiraki. Jupanakaw Tantachasiñ Utanak machaqat lurañsa, jan ukajj askichañsa tamanakar yanaptʼapjje. Tantachasiñ Uta luraskipanjja, uka toqet wali yatjjattʼata jilat kullakanakaw jan qollqe mayisaki tamankirinakar yanaptʼapjje. Ukampis jila partejj pachpa tamankir jilat kullakanakaw mä Tantachasiñ Uta lurañatak yanaptʼapjje. Cheqas Jehová Diosan qollan ajayupampi ukat taqe chuyma irnaqtʼir jilat kullakanakan yanaptʼapampiw ukanakajj lurasi (Salmo 127:1; Colosenses 3:23).

• ¿Kunjamatsa aka oraqpachan Tantachasiñ Utanak lurapjje?