Taqe Tantachasiñ Utanakaw Diosan qollan sutip apapjje, ukatwa uka Utajj qʼomäñapa ukat suma uñjatäñaparaki. Ukham lurañajj wali askiwa, ukhamatwa Jehová Diosar yupaychasirakispa. Cheqans taqeniw qʼomachañatak yanaptʼapjjaspa.

Tantachäwinak tukuyatarojj qʼomachañatak yanaptʼañajj wali askiwa. Sapa tantachäwi tukuyataruw tantachasirinakajj uka Uta qʼomachapjje ukat semanan mä kutiw jukʼamp sum qʼomachapjjaraki. Mä jilïr irpiri, jan ukajj taman mä yanapiripaw kunjamsa qʼomachasini uk mä listarjam uñji, akarjama: pichsuña, piso qʼomachaña, aspiradoramp qʼomachaña, qʼañunak picharaña, sillanak qʼomachaña ukat yäpar uchaña, bañonak qʼom jarsuña, ventananaka espejonaka qʼomachaña, anqäjjanak askichaña ukat basuranak liwtaña. Ukat maran mä kutiw Tantachasiñ Uta kʼuchut kʼuchu sum qʼomachasiñaparaki. Wawanakar qʼomachayañas askirakiwa, ukhamatwa Diosar yupaychañ Utar respeto uñachtʼayapjjañapatak yatichasirakispa (Eclesiastés 5:1).

Tantachasiñ uta askichañatak yanaptʼañajj wali askipuniwa. Tantachasiñ Utan sumäskakiñapataki ukat jutïrin jan jilpach gastañatakejja, sapa maraw Uta manqhanaksa ukat anqäjjanaksa sum uñakipapjje, ukhamatwa kuna askichañas wakisi ukanak amuyapjje (2 Crónicas 24:13; 34:10). Tantachasiñ Utajj sumäki ukat qʼomäki ukhajja, Diosar yupaychañatak mä suma Utawa. Tantachasiñ Uta qʼomachirinakajja, uka Utar wali respetompi uñjapjjatapa ukat Jehová Diosar wal munasipjjatapwa uñachtʼayapjje (Salmo 122:1). Ukhamatwa yaqha jaqenakas Diosan markapar wali askit uñjapjjaraki (2 Corintios 6:3).

• ¿Kunatsa Jehová Diosan Testigonakapajj Diosar yupaychañ Utanakap sum uñjapjje?

• ¿Kunjamsa mä Tantachasiñ Utajj qʼomachasiñapa?

¿Bibliat jukʼamp yatjjatañ munasmati? Walja sarnaqäwinakaw ukan utji, nayra markanakatsa parlarakiwa, ¿janit uka toqenakata, jan ukajj mä jiskʼa tʼaqatsa jukʼamp yatjjatañ munkasma? Ukat inas akham jisktʼasirïsta: “¿Diosan Arupajj llakinakajan yanaptʼitaspati?” sasa. Ukhamächi ukhajja, Tantachasiñ Utan utjki uka bibliotecaruw sarasma.

Jukʼamp yatjjatañataki yanapanakaw bibliotecan utji. Inas Jehová Diosan Testigonakapan Bibliat apstʼat qellqatanakapajj jan taqpach utjkstamti, ukampis Tantachasiñ Utan utjki uka bibliotecanwa jichhak misturi qellqatanakajj utji. Ukat kunayman Biblianakaw utjaspa, diccionarionaka ukat yaqha qellqatanaka. Tantachäwi janïr qalltkipana, jan ukajj tukuyataruw uka qellqatanak uñjjattʼasma. Ukat mä computadoratï ukan utjchejja, Watchtower Library, siski uka programaw ukan utjarakispa, ukanwa Bibliat apstʼat qellqatanakajj utji ukat kun thaqhañas janiw chʼamäkiti, ukampiw arunakatsa, yatichäwinakatsa ukat jiskʼa tʼaqanakatsa yatjjatasma.

Cristianjam Jakañataki ukat Yatiyañataki tantachäwin arstʼapki ukanakaruw wal yanaptʼi. Uka tantachäwitaki arstʼäwinakam sum wakichtʼasiñatakiw bibliotecan yatjjatasma. Cristianjam Jakañataki ukat Yatiyañataki tantachäwi pʼeqtʼir jilataw uka biblioteca uñji, ukat Bibliat apstʼat qellqatanakajj phoqhatäskiti, janicha ukat yäpar uchatäskiti uksa juparakiw uñji. Uka jilata, jan ukajj Bibliat yatichirimaw uka qellqatanakat yatjjatañ yanaptʼapjjeristam. Ukampis jan armasimti, Tantachasiñ Utan utjki uka qellqatanakajj janiw apsusiñapäkiti ni raytʼasiñapäkisa, yäparuw apnaqasiñapa.

Diosan cheqa yatichäwinakap jikjjatañatakejja, ‘jila alani yänakarjamaw thaqhañasa’ sasaw Bibliajj qhanañchi (Proverbios 2:1-5). Cheqa yatichäwinak thaqhañ qalltañatakejja, Tantachasiñ Utan utjki uka bibliotecaw wal yanaptʼiristam.

• Tantachasiñ Utan utjki uka bibliotecanjja, ¿kuna yanapanakas yatjjatañatak utji?

• Bibliotecan utjki uka yanaptʼanakat sum yatjjatañatakejja, ¿khitis yanaptʼiristam?

Jesusajj arkirinakapar akham sänwa: “Jumanakan qhanamajj jaqenakatakejj qhantʼarakpan. Ukham suma wali luräwinakam uñjasa jumanakan Dios Awkimaru yupaychapjjañapataki” sasa (Mateo 5:16). Uka arunakarjam lurañatakejja, Jehová Diosan Testigonakapajj Internet satäkis ukampiw yanaptʼasipjje. Internetanjja, jw.org/ay sat cheqaw utji, ukanwa Jehová Diosan Testigonakapajj kunjamsa Diosar yupaychasipki ukat kunanaksa lurapjje ukanak yatiyasi. ¿Kunanakampis ukan utji?

Jaqenakan jisktʼanakaparuw qhanañchasi. Kunanaktï jaqenakajj wal jisktʼasipki ukanakaw ukan qhanañchasi. Amuytʼañataki, ¿Tʼaqhesiñanakajj tukusjjpachäniti? ukat ¿Jiwatanakajj jaktanipjjpachäniti? sat tratadonakajj 600 jila arunakanwa Internetan utji. Traducción del Nuevo Mundo sat Biblias 130 jila arunakanwa utji, ukat Bibliat yatjjatañatakejja walja libronakaw utjaraki, sañäni, ¿Kunsa Bibliax chiqpachapuni yatichi?, sat libro, jichhak misturi Yatiyañataki ukat ¡Despertad!, sat revistanakas utjarakiwa. Uka cheqar mantasajja, walja qellqatanakwa liytʼasma, istʼasma ukat utaman istʼañatakis apaqasirakisma (MP3, PDF, jan ukajj EPUB). Janiw ukakïkiti, Diosan Reinopat yatiñ munirinakar yatichañatakejja, kawkïr aruttï yateqañ munki uka arutwa qellqatanak imprimtʼarapisma. Ukat amparamp parlirinakatakis walja videonakaw utji, dramäkaspas ukham Bibliat liytʼatanaka, Bibliat apstʼat qʼochunaka ukat dramanakas utjarakiwa.

Jehová Diosan Testigonakapat yatiyi. Kunjamsa jupanakajj oraqpachan yatiyasipki, kunjamsa yaqhanakar yanaptʼapjje ukat yaqha ukhamanakatwa yatiyi, uka toqenakat parlir videonakas utjarakiwa. Kunürunakas jachʼa tantachäwinakajj apasini ukat Jehová Diosan Testigonakapan sucursalanakapatsa yatiyarakiwa.

Jehová Diosan Testigonakapajja, Internetamp yanaptʼasisaw Biblian cheqa yatichäwinakapampi, taqe jaqenakar yanaptʼañatak Oraqpachan qhantʼapjje, Antártida sat jaya cheqarus puripjjarakiwa. Jehová Diosan “arunakapajj jankʼaki taqe cheqanakar puriñapata[kiw]”, Jehová Diosan Testigonakapajj oracionanakapan mayipjje, ukhamat Diosaru jachʼañchasiñapataki (2 Tesalonicenses 3:1).

• Internetan jw.org/ay sat cheqajja, ¿kunjamsa jaqenakar Biblian cheqa yatichäwinakap uñtʼapjjañapatak yanaptʼi?

• ¿Kunsa uka cheqar mantasajj yatjjatañ munasma?