3 | Biblian qellqat sarnaqäwinaka

BIBLIANJJA: ‘Jiwasjam jaqenakatwa’ parli, jupanakajj suma chuyman jaqenakäpjjänwa (SANTIAGO 5:17).

¿Kamsañsa muni?

Bibliajj walja chacha warminakatwa parli, jupanakajj kunayman llakinakanwa uñjasipjjäna. Sarnaqäwinakapat liytʼasajja, jupanakjam jikjjatasitaswa amuysna.

¿Kunjamsa yanaptʼistu?

Kunjamas jikjjatastan uk taqenis amuyapjjestaspa ukwa muntanjja, llaki usunïtan ukhaw jukʼampis uk muntanjja. Diosan nayra servirinakapajj kunjamas jikjjatasipjjäna, kunsa amuyapjjäna ukanak Biblian liytʼasajja, jupanakjam jikjjatasitaswa amuysna. Ukaw jan jiwas sapaki tʼaqesiskatas amuyañatak yanaptʼistaspa.

Yaqhepanakajj jan kamachtʼirjama, jan chʼamani jikjjatasisajj kamsapjjänsa ukwa Bibliajj cuenttʼistu. ¿Jumajj akham sirïtati: ‘Janiw aguantañ puedjjti, akhakamakëjjpan’ sasa? Moisés, Elías, David chachanakajj ukhamaw jikjjatasipjjäna (Números 11:14; 1 Reyes 19:4; Salmo 55:4).
Biblian Ana warmitwa parli, jupajj jan wawanïñ puedisajj wali llakitänwa, Peniná sat warmi masipajj jan wawanïtapat wal jiskʼacharakïna (1 Samuel 1:6, 10).
Inas jumajj Biblian parlki uka Job chachjam jikjjatassta, jupajj Diosar walsa confiykchïnjja, wali llakitäsajj akham sänwa: “Walpun vidajar uñista, janiw jukʼamp jakañ munjjti” sasa (Job 7:16).

Diosan uka servirinakapajja, taqeniw aynachtʼayir amuyunakapar atipjapjjäna. Jupanakat yateqasiñäni ukhajja, aynachtʼayir amuyunakar atipjarakiñäniwa.

¿Kunjamsa Bibliajj jupar yanaptʼawayi? Kevin

Trastorno bipolar sat usuw jan waltʼayitu

“Niya 50 maranïkayäta ukhaw trastorno bipolar usunïtaj yatiyapjjetäna. Awisajj taqe kunatakiw chʼamanïta, awisasti janis jakañajajj wakiskaspa ukhamaw amuyasta”.

Kunjamsa Bibliajj yanaptʼitu

“Apóstol Pedro chachjamaw jikjjatasta. Pantjasitanakap laykojja, janis kunatak sirvkaspa ukhamaw awisajj amuyasirïna. Ukanakat kutin kutin lupʼiskañat sipansa, jupat llakisir amigonakapan yanaptʼap thaqäna. Trastorno bipolar usunïtaj laykojja, awisajj jan waliw jikjjatasta. Ukhanakajja, pantjasitanakajat amtasajj janis kunatak sirvkirista ukhamaw amuyasta. Ukampis Pedro chachjamaw munat amigonakajamp yanaptʼayasta. Jupanakaw jan aynachtʼañataki, nayrar sartaskakiñatak yanaptʼapjjetu.

”Kunjamas Davidajj jikjjatasïna uka toqetwa lupʼirakta. Jupajj nayra pantjasitanakapatwa juchañchasïna, wal llakisirakïna. Awisajj jupjamaw jikjjatasirakta, kunanakantï pantjasiwaykta ukanakatwa juchañchasta. Ukatwa kuntï Salmo 51 texton Davidajj siskäna ukajj wal chuymachtʼitu. Versículo 3 ukanjja, ‘jan wali luratanakajatjja nayajj sum amuyasta, juchajajj nayraqatajankapuniwa’ sasaw säna. Wali llakitäkta ukhajj ukhamapuniw jikjjatasta, suma luratanakaj amuyañajj nayatak wali chʼamawa. Ukampis kuntï versículo 10 ukan siskäna uka arunakatwa lupʼta, ukan akham siwa: ‘Dios Tata, qʼoma chuymay churita, mä machaq amuyu churita, ukhamat ukajj jumat jan jitheqtañatak nayar yanaptʼañapataki’ sasa. Ukhamarakiw nä pachpat sum amuyañatak Diosar yanaptʼa mayista. Versículo 17 ukaw wal chuymachtʼarakitu, ukan akham siwa: ‘Dios Tata, chuyma pʼakintatäki humildëkaraki uka jaqerojj janiw apanukkätati’ sasa. Uka texto sapa kuti liytʼasajja, Diosajj qhawqsa munasitu ukwa amtta.

”Bibliankir uka sarnaqäwinakata, kunanaktï Diosajj churkitu ukanakat lupʼta ukhajja, Diosan promesanakaparojj jukʼampiw confiyta, ukaw aguantaskakiñataki, jan aynachtʼañatak yanaptʼitu”.