Suma amtanakaruw puriñasa ¿Kunatsa ukham lurañatak chʼamachasiñasa?

Mä jan uñtʼat lugarar puriñatakejja, ¿kunsa jumajj lurirïta?

1. 1. Chuymamar istʼasajj ¿“akäpachaw thakejja” sasinti mä jan uñtʼat thak sarirïta?

2. 2. ¿“Thak sarapki ukanakaw yatipjje” sasinakti jupanakar arkirïta?

3. 3. ¿Confiykañ mä GPS jan ukajj mä mapti uñjjattʼasirïta, jan ukajj thak sum uñtʼki uka amigomaruch jisktʼasirïta?

Jumatï nayrïr pä jisktʼanakarjam lurasma ukhajja, janiw kawkirutï puriñ munkta ukar purkapunismati. Ukampis jumatï kimsïr jisktʼarjam lurasma ukhajja, kawkirutï puriñ munkta uka cheqaruw purisma.

Jiwasan vidasajj mä thaksa sarksna ukar uñtasitarakiwa, uka thak sarkasajj mä cheqaruw puriñ muntanjja, mä arunjja cheqpach kusisiñwa jikjjatañ muntanjja. Ukatakejj suma amtanakar puriñaw wakisi, ukampis suma amtanakar puriñatakejj confiykañ yanaptʼaw utjañapa.

Kuna amtanakarutï purktan ukanakat yaqhepajj janiw sinti wakiskirïkiti, yaqhepanakasti wali wakiskirirakiwa. Jiwasatï suma amtanakar puriñäni ukhajja, kunas jiwasatakejj jukʼamp importante ukaw qhan amuyasini. Cheqas kuna amtanakarutï purktan ukajja, jiwasarusa familiaranakasarus jan waltʼayaspawa, jan ukajj kusisit jakasiñatakiw yanaptʼarakistaspa. Aka toqenakanwa suma amtanakar puriñasa:

• Ikintasiña ukat matrimonio toqena

• Honrädo trabajiña ukat qollqe toqena

• Wawanak uywañ toqena

• Mayninakar sum uñjañ toqena

Taqe ukanakan suma amtar purïta ukhajja, jumasa familiaranakamasa kusisitaw jakasipjjäta.

Taqeniw akham sasin jisktʼasiñasa: “¿Kunarjamas suma amtanakar purirista?” sasa.

Suma amtanakar puriñatakejj kunatsa Bibliar confiyañama, kunjamsa Bibliajj yanaptʼiristam ukanakwa aka revistan yatjjatäta.