Aka revista liytʼirinakan jisktʼäwinakapa
2 Tesalonicenses 3:14 textorjamajj ¿ancianonakati jan ukajj sapa mayni cristianoch maynir señalañapa?
Tesalónica markankir cristianonakarojj apóstol Pablojj akham sänwa: “Maynitejj aka cartan qellqat arunakar jan istʼkanejja, jupar señalapjjam” sasa (2 Tes. 3:14, nota). Uka instruccionajj ancianonakatakiwa sasaw nayrajj sayätanjja. Maynitï walja kuti ewjjtʼatas Biblian wiñay yatichäwinakap pʼakintaskakchïna ukhajja, ancianonakajj congregacionan amuyasipjjañapatakiw mä discurso arstʼapjjañapäna. Ukhat aksarojj jilat kullakanakajj janiw uka cristianomp chikachasjjapjjañapäkänti, jan ukasti tantachäwinakana ukat predicacionanakwa jupamp chikachasipjjaspäna.
Ukampis jichhajj akham amuyjjtanjja: Pablon ewjjtʼaparjamajj sapa mayni cristianow wakisitarjam uk amtjjañapa. Ukhamajj janiw ancianonakan maynir ewjjtʼañatak mä discurso arstʼapjjañapäjjeti. ¿Kunatsa ukajj mayjtʼayasiwayi? Kuna toqetsa Pablojj parlaskäna uk amuytʼañäni.
Pablojj Tesalónica congregacionan mä qhawqhanin ‘jan wal sarnaqasipkatapwa’ amuyäna. Jupanakajj janiw Diosan Aruparjam ewjjtʼatajj istʼasipkänti. Uka nayra visitapan akham sasaw jupanakar säna: “Maynitejj jan trabajiñ munkchejja, janirak manqʼpanti” sasa. Ukampis yaqhepajj puedipkchïna ukhas janiw mantinisiñatak trabajiñ munapkänti. Kunatï jupanakar jan waktʼki ukaruw mitisipjjarakïna. ¿Kunjamsa cristianonakajj jupanakar uñjapjjañapäna? (2 Tes. 3:6, 10-12).
“Señalapjjam” sasaw Pablojj säna. “Señalapjjam” sasin traducitäki uka griego arojja, señalatäki ukajj khitisa uk amuyaña, jan wal luratapamp jan apayasiñatak wal amuyasiña sañ muni. Pablon uka ewjjtʼapajj taqpach congregacionatakïnwa, janiw ancianonak mayatakïkänti (2 Tes. 1:1; 3:6). Ukhamajj mä cristianotï Diosan Arupankir ewjjtʼarjam maynin jan sarnaqatap amuychïna ukhajja, congregacionan sapa mayniw ‘jupamp chikachasiniti’ janicha uk amtjjañapäna.
Ukhamajj ¿congregacionat apsutäki uka jaqerjamat uka cristianor uñjapjjäna? Janiwa, Pablojj akham sarakïnwa: “Mä jilarjam ewjjtʼasipkakim” sasa. Ukhamajj taqe cristianonakaw tantachäwinakansa predicacionans jupamp chikachasisipkaspäna, ukampis kusistʼañ horasanakansa jan ukajj yaqha ukhamanakans jupamp chikachasiniti janicha uk sapa mayniw amtjjañapäna. ¿Kunatsa uk lurapjjañapäna? “Ukhamat phenqʼasiñapataki” sasaw Pablojj qhanañchäna. Uka jilatampi jan ukajj kullakamp jan chikachasjjañajja, jan wal luratapat phenqʼasiñapataki cambiañapatakiw jupar yanaptʼaspäna (2 Tes. 3:14, 15).
¿Kunjamsa jichha tiempon ukarjam luraraksna? Nayraqatajj kuntï Pablojj siskäna ukarjamaw cheqapunit maynejj ‘jan wal sarnaqaski’ uk segurtʼasiñasa. Pablojj janiw concienciaparjam kun lurañs amtapki, ukampis jan jiwasjam amtapki uka jilat kullakanakat parlkänti. Janirakiw aleq mä kun lurasina jan ukajj arsusin chuym ustʼayapkistu ukanakat parlkänti. Antisas kawkïr jilat kullakanakatï Biblian qhana ewjjtʼap katoqasisajj amanut jan ukar istʼapki ukanakatwa parlaskäna.
Ukhamajj jiwasatï mä jilatana jan ukajj mä kullakan Biblian ewjjtʼaparjam jan sarnaqatap amuystan ukhajja,a kusistʼañ horasanakansa yaqha ukhamanakans sapa mayniw jupampejj chikachasiñäniti janicha uk amtjjañasa. Niyakejjay ukajj sapa maynitäjjchejja, janitï utasan jakir familiasäkchi ukhajj janiw yaqhanakar uka toqet parlañasäkiti. Ukampis uka cristianompejj tantachäwinakansa predicacionans chikachasiskakiñäniwa. Jan wal sarnaqatap apanukjjani ukhajja, jupampejj taqe horasanwa chikachasjjañäni.
a Inas mä cristianojj puedkchi ukhas mantinisiñatak jan trabajiñ munkchiti, jan Testigöki ukamp noviañ munapunchi, congregacionan churaski uka instruccionanakata jan ukajj Biblian yaqhep yatichäwinakapat jiskhisisajj tʼaqanoqtañanak utjaychi, jan ukajj inas arunak apnaqerïchi (1 Cor. 7:39; 2 Cor. 6:14; 2 Tes. 3:11, 12; 1 Tim. 5:13). Ukanak luririnakajj ‘jan wal sarnaqapjjatapwa’ uñachtʼayapjje.