Ajjsarirïkchiyätsa misioneratwa serviyäta

Viena (Austria) markanwa 1951 maran nasiwayta. Ajjsarirïkchiyätsa Jehová Diosar chuymatpach orasiñ janiw ajjsarkayätti, ukatwa sapa kut orasirïta. Familiajajj catolicöpjjänwa, ukampis llätunka maranïkayäta ukhajja, papitujaw Jehová Diosan Testigonakapamp Bibliat yateqañ qalltäna, qhepatjja mamitajaw Bibliat yateqañ qalltarakïna.

Viena markankir Döbling congregacionaruw sarañ qalltapjjayäta. Familpachaw Bibliat yatjjatapjjayäta, tantachäwinakarus sarapjjayäta, asambleanakans yanaptʼapjjarakiyätwa. Uka tiemponjja Jehová Diosar taqe chuym munasiñwa papitujajj yatichitäna. Oracionanakapansa, nayasa kullakajas precursorat servipjjañajatakiw Jehová Diosar mayirïna. Ukampis ukhajj janiw nayajj precursoräñ pienskayätti.

PRECURSORAT SERVIÑ QALLTAYÄTA

1965 maranwa bautisasta, ukhajj 14 maranikïskayätwa. Ukampis jan uñtʼatanakampi predicacionan parlañ wal ajjsarayäta. Mayninakat sipans janis kunäkiristsa ukhamwa amuyasiyäta, ukatwa wayn tawaqo masinakajamp sum apasiñ wal munayäta. Ukat bautisaskayäta uka qhepatjja, jan Testigöpkäna uka wayn tawaqonakampiw chikachasiñ qalltayäta. Jupanakamp sint chikachasiñajj jan walïtap sum yatiyäta, ukatwa jupanakamp chikachasiñajj gustkchitäna ukhas jan kusisitäkayätti. Ukampis jupanakat jitheqtañajj chʼamakïnwa. ¿Kunas yanaptʼitäna?

Uka maranakanjja, 16 marani Dorothée sat tawaqow publicadorat serviñ qalltäna. Juparojj utat uta predicañ wal gustäna. Nayajj jupat mä jukʼa jilirïyätwa, ukampis awisakiw predikir sarirïta. Awk taykajajj Testigöpjjänwa, Dorothée kullakasti familiapan sapakiw Testigöna, usuntat mamitaparuw uñjañaparakïna. Ukhamäkchïnsa predikirejj mistupunirïnwa. Taqe ukanakat lupʼiñaw Jehová Diosar jukʼamp serviñatak yanaptʼawayitu. Mä qhawqha tiempot panpachaniw precursoräjjapjjayäta, nayraqatajj precursor auxiliarjamaw servipjjayäta, ukjjarojj precursor regularäjjapjjayätwa. Dorothée kullakajj taqe chuymaw predikirïna, uk uñjañaw nayar chʼamañchtʼitäna. Jupaw nayrïr estudio jikjjatañatak yanaptʼawayitu. Ukhamatwa jukʼat jukʼat utat utsa, callenakansa, yaqha lugaranakans predicañ jan ajjsarjjayätti.

Precursorjam mä mara serviskayäta ukhajja, precursor especialatwa Heinz sat jilatar congregacionajar khitanipjjäna. Jupajj Canadá markan jakasir Testigo jilapar visittʼir sarasaw Bibliat yateqañ qalltatayna. Nayrïr kut uñtʼkayäta ukhatpachaw jupajj gustitäna. Jupajj misionerot serviñ munäna, nayasti janiw misioneräñ munkayätti. Ukatwa qalltan janis jupar munaskirista ukham tukuyäta. Ukampis qhepat uñtʼasiñwa qalltapjjayäta, ukat casarasisajja Austria markan precursorat servisipkakiyätwa.

MISIONERAT SERVIÑWA AMTAYÄTA

Esposojajj misionerot serviñ wal munäna, uka toqet walja kutiw parlitäna. Ukampis janiw obliguirjam parlirïkituti, antisas akham jisktʼanakwa jisktʼirïtu: “Niyakejjay jan wawanïkstanjja, ¿janit Jehová Diosar jukʼamp serviñatak chʼamachasksna?” sasa. Wali ajjsarirïkchiyätsa precursoräjjayätwa, ukampis misionerjam janiw serviñ puedkiristti sasaw amuyayäta, ajjsarayasirakiyätwa. Ukhamäkchïnsa esposojajj pacienciampiw misionerjam serviñat awisajj parlitäna. Ukat naya pachpatak sinti llakisiñat sipansa, mayninakar kunjamsa yanaptʼirista uka toqet lupʼiñatakiw yanaptʼitäna. Esposojan arunakapajj wal yanaptʼitäna.

Tiempompejj misionerat serviñ munjjayätwa, ukatwa Galaad Escuelar sarañatak solicitud phoqantapjjayäta. Ukampis siervo de sucursal jilatajj inglés aru jukʼamp sum yateqañajatakiw chʼamañchtʼitäna. Ukarjamaw lurayäta, ukat kimsa maranak qhepatjja serbocroata aru parlir mä congregacionaruw Salzburgo (Austria) markar asignapjjetäna, uk janiw suyapkayätti. Paqallqo maranakaw uka aru parlirinakar predicapjjayäta, uka paqallqo maranakat mä maraw circuitot servipjjarakiyäta. Serbocroata aru parlañajj chʼamakïkchïnsa, walja estudionakanïpjjayätwa.

1979 maranjja, Bulgaria markar vacacionat sarapjjañajatakiw mayipjjetäna, ukampis janiw vacacionat sarapkayätti ni predikiris sarapkayätti, kuna laykutejj uka markan predicacionajj jarkʼatänwa. Uka markankir phesqa kullakanakatakiw qellqatanak jamasat apapjjañajäna, jupanakajj Bulgaria markankir Sofía sat capitalapanwa jakasipjjäna. Uka qellqatanak jamasat apañ walpun ajjsaräyäta, ukhamäkchïnsa Jehová Diosaw uka asignacionamp phoqañatak yanaptʼitäna. Uka kullakanakajj carcelarus sarapkchispänjja, jan ajjsarasa ukat kusisitaw Jehová Diosar servipjjäna. Ukaw chʼama asignacionanakamp phoqañatak chʼamañchtʼitäna.

Uka tiempon wasitatwa Galaad Escuelar sarañatak solicitud phoqantapjjayäta, ukampis jichha kutejj uka escuelar sarañatak invitapjjetänwa. Estados Unidos markaruw sarpachañäni ukat Inglés arut uka escuelan yateqpachañäni sasaw amuyapjjayäta. Ukampis noviembre de 1981 maranjja, Wiesbaden (Alemania) sucursalanwa Galaad Escuelajj apasiñ qalltäna. Alemán arutwa uka escuelajj apasïna, uka aru entiendiñajj nayatakejj jukʼamp facilakïnwa. Kawkirus asignapjjetu uk cuenttʼapjjäma.

GUERRANAKAJJ UTJKÄNA UKA MARKANWA PREDICAPJJAYÄTA

Kenia markaruw khitapjjetäna. Uka markankir sucursalajja, “¿aka jakʼankir Uganda markan servipjjasmati?” sasaw jisktʼapjjetäna. Tunka maranak nayrajja, ukan mä golpe de Estadow utjäna, Idi Amin generalaw presidenter puestopat apaqäna, jupaw Uganda mark apnaqjjäna. Uka maranakanjja, walja jaqenakaw jiwarapjjäna, walja millón jaqenakarakiw wal tʼaqesipjjäna. Ukat 1979 maranjja, mayampiw golpe de Estadojj utjäna. Ukhamajj guerranakamp tukjat markar sarañajj janiw munañjamäkänti. Ukampis Galaad Escuelanjja, Jehová Diosar confiyañatakiw wakichtʼawayapjjetu, ukatwa iyaw sasin uka markar sarapjjayäta.

Uganda markanjja, sinti jan walinakaw utjäna. Esposojajj Anuario 2010 ukan akham sänwa: “Gobiernojj janiw umsa, luza qhansa, kunatï jakasiñatak munaski ukanaks churjjänti. Telefononakas janiw funcionjjänti. Jilapartejj arumanakaw jaqenakajj jaqe masipar armanakamp disparapjjäna, lunthatapjjarakïna. Ukatwa arumthapjjäna ukhajj utanakapat jan mistjjapjjänti, jan utar mantanipjjañapatakisa jan ukajj jan jiwayat uñjasiñatakis wal jaqenakajj orasipjjarakirïna” sasa. Ukhampachas jilat kullakanakajj jan jitheqtasaw Jehová Diosar servisipkakïna.

1982 maranjja, esposojampejj Uganda markan Kampala capitalaparuw puripjjayäta. Nayrïr phesqa phajjsinakajj Sam ukat Christina Waiswa jilat kullakan utapanwa alojasipjjayäta, jupanakajj phesqa wawanakanïpjjänwa. Pusi familiaranakapaw utapan jakapjjarakïna. Kunja suma katoqtʼasirïpjjänsa uk uñjasajj wal musparapjjayäta, jupanakajj urun may kutikiw manqtʼasipjjäna. Jupanakamp jakasajj waljanakwa yateqawayapjjta, taqe ukanakajj misionerot servisajj wal yanaptʼapjjetäna. Um jan ina chʼusar tukjañwa yateqapjjayäta. Jukʼa umampikiw bañasipjjerïta, ukat uka umjja bañotakiw imjjapjjerïta. Qhepat 1983 maranwa mä uta katupjjayäta, ukan qamasiñajj segurokïnwa.

Predicañajj wali kusiskañapunïnwa. Mä phajjsejja, 4.000 jila revistanakwa jaqenakar jaytapjjayäta. Ukampis ukat sipansa, jaqenakan Diosar respetapjjatapa, Bibliat wal parlañ munapjjatapaw jukʼamp kusiskañänjja. Esposojasa nayasa, sapa mayniw tunkat qalltasin tunka phesqani estudionakanïpjjerïta, jupanakajj wali yateqaskañäpjjänwa, kuna laykutejj sapa semanaw tantachäwinakar kayuk jutapjjeri, kuttʼjjapjjarakiri. Ukampis jupanakajj kusisitapunïpjjeriwa, janiw quejasipjjerïkiti.

1985 ukat 1986 maranakanjja, Uganda markan pä guerranakampiw utjarakïna. Thakinakan controlajj utjkäna uka cheqanakanjja, walja kutiw armantat yoqall wawanakar uñjapjjerïta. Ukatwa sapa kuti Jehová Diosar orasipjjerïta, ukhamat predickasajj amuytʼasirïñataki ukat tranquilokïñataki. Diosajj istʼapjjetänwa, Bibliat jukʼamp yatiñ munir mä jaqer jikjjatasajja, janiw ajjsarayasjjapjjerïkti.

Yaqha markankir jaqenakar predicañajj wal gustapjjarakitäna. Tartaristán (Rusia central) markankir Murat ukat Dilbar Ibatullin matrimonioruw Bibliat yatichapjjayäta. Murat chachajj doctoränwa, panpachaniw bautisasipjjäna, jichhakamas Jehová Diosar servisipkakiwa. Qhepatjja, Ucrania markankir Tatjana Vileyska warmiruw uñtʼayäta, jupajj llakimp wali aynachtʼatänwa, jiwayasiñ kunwa munäna. Tatjana warmejj bautisasjjasajj markaparuw kuttʼjjäna, ukat Bibliat apstʼat qellqatanak traducisaw Diosar servirakïna.a

YAQHA JAN WALINAKANWA UÑJASIPJJAYÄTA

1991 maran Austria markan vacacionankasipkayäta ukhajja, uka markankir sucursalajj Bulgaria markanwa servipjjäta sasaw yatiyapjjetäna. Europa del Este cheqan comunista gobiernojj jan apnaqjjäna uka qhepatjja, Bulgaria markan predicacionajj janiw jarkʼatäjjänti. Kunjamtï siskayätjja, Bulgaria markan predicacionajj jarkʼatäkäna ukhaw uka markar qellqatanak esposojamp jamasat apapjjayäta, ukampis jichhajj predicañatakiw uka markar khitapjjetäna.

Uganda markar janiw kuttʼapjjätati sasaw sapjjetäna. Ukhamajj janiw yänak aptasirisa jilat kullakanakat despedisiris kuttʼapkayätti, cheqakiw Alemaniankir Betelar sarapjjayäta, ukanwa mä auto churapjjetäna, uka autotwa Bulgaria markakam sarapjjayäta. Sofía markaruw asignapjjetäna, ukan mä 20 jilat kullakanakaw utjäna.

Bulgaria markan yaqha jan walinakanwa uñjasipjjayäta. Janiw uka markan parlaski uka aru yatipkayätti. Búlgaro arut aka pä qellqatanakakiw utjäna: La verdad que lleva a vida eterna ukat Bibliat apstʼata sarnaqäwinaka. Estudionak jikjjatañajj chʼamarakïnwa. Ukhampachas wali kusisitaw predicapjjayäta. Ortodoxa Iglesiaw uk amuyäna, ukatwa jan waltʼayañ munapjjetäna.

1994 maranjja, Gobiernojj janiw Testigonakarojj religionarjam uñj-jjapjjetänti, ukatwa walja jaqenakajj janis mä religionäpkirista ukham uñjapjjetäna. Mä qhawqha jilat kullakanakaruw arrestapjjäna. Televisionansa, radionsa, yaqha ukhamanakansa, sinti jan wali kʼarinakwa Testigonakat parlapjjäna, akham sapjjänwa: “Wawanakaparojj jiwayapjjewa, jiwayasipjjañapatakiw cristiano masinakapar mayipjje” sasa. Predicañajj wali chʼamänwa. Wali qhoru jan ukajj phiru jaqenakampiw jikisipjjayäta, jupanakajj wal arnaqapjjetäna, policiaruw jawsapjjäna, taqe kunampiw jaqtʼapjjetäna. Janiw qellqatanakas yaqha markanakar apayañjamäkänti, janirakiw tantachasiñatak lugaranakajj jikjjatañjamäkänti. Mä kutejja, policianakaw tantachasisipkayäta ukar mantanipjjäna, ukharukiw tantachäwejj tukuyasjjarakïna. Janipuniw ukham jan walinak uñjapjjerïkti. Uganda markan janiw ukhamäkänti, jaqenakajj wali munasirïpjjänwa, wali sum istʼapjjarakitäna. Ukhamäkchïnsa kusisitakiw servisipkayäta.

Jilat kullakanakamp chikachasiñaw ukham kusisitäñatak wal yanaptʼapjjetäna. Jupanakajj Diosar uñtʼapjjatapat wal kusisipjjäna, jupanakamp chikäpjjatajats wal yuspärapjjarakitäna. Wali mayachtʼatäpjjayätwa, maynit maynikamaw cuidasipjjarakiyäta. Esposojampejj ak yateqawayapjjta: kuna asignacionankkasasa, problemanakasat sipans jaqenakat llakisiñäni ukhajja kusisitäñäniwa.

Mä qhawqha maranakatjja, janiw jan walinakajj añch utj-jjänti. 1998 maranjja, Gobiernojj wasitatwa Testigonakarojj mä religionjam uñj-jjäna, búlgaro arurojj walja qellqatanakaw traducisjjarakïna. 2004 maranwa Betel utajj uka markan Jehová Diosar katuyasjjarakïna. Jichhajja, 57 congregacionanakaw Bulgaria markan utj-jje, 2.953 jilat kullakanakaw utj-jjaraki. 2024 maranjja, Jesusan jiwatap amtañatakejj 6.475 ukhaniw tantachasiwayapjje. Sofía markan nayrajj phesqa kullakanakakiw utjäna, jichhajj llätunka congregacionanakaw utj-jje. Aka profecía phoqasir sum uñjawayapjjta: “Jiskʼäki ukajja waranqaniruw tukuni” (Is. 60:22).

JAN WALINAKARUW SAYKATAPJJTA

Usuntañas utjakirakïnwa. Doctoranakajj walja tumoranakwa katuwayapjjetu, pʼeqejans mä tumor katuwayapjjarakiwa. Tumoranak chhaqtayañatakejj mä tratamiento katoqayäta, India markaruw sararakiyäta, ukanwa mä doctorajj 12 horanak operitäna, ukhamat pʼeqenkir tumor niya taqpach chhaqtayañataki. Waliptañkamajja, India markankir Betelanwa quedasiyäta, ukat Bulgaria markaruw kuttʼjjapjjayäta.

Esposojarusti Huntington sat mä jan wali usu katupjjarakïna, nasïwitpachaw uka usunëjjatayna. Jukʼat jukʼat janiw sarnaqañsa, sum parlañsa, ni onjjtañs puedjjänti. Taqe kunanwa yanaptʼa munjjäna. Awisajj janis yanaptʼañatakejj chʼamajj utj-jjetaspa ukhamwa amuyasiyäta, janiw sapakejj yanaptʼirjamäkayätti, ukaw llakisiyitäna. Ukampis mä wayna jilataw yanaptʼapjjetäna, jupaw sapa kuti esposojar predikir irpäna. Ukham usutätapajj janiw uka jilatarojj mayjtʼasiykänti. Yanaptʼa munkayäta ukhajja, jupaw esposojar sum cuidañatak yanaptʼitäna. Jan wawanïñsa esposojampejj amtawayapkstjja, Jehová Diosajj uka wayna jilataruw churawayapjjetu, jupajj nanakatakejj mä wawjamapunïnwa (Mar. 10:29, 30).

Esposojajj cáncer usunïtapat 2015 maranwa jiwjjäna. Uka qhepat wali sapakiw amuyasiyäta, jan nayamp chikäjjatapajj janiw cheqaw sañjamäkänti. Jupat wal piensta, janiw jupat armaskti (Luc. 20:38). Urunjja, kunjamsa parlasirïna, kamsirïtansa, kunanaksa ewjjtʼirïtäna ukanakatwa amtasta. Jehová Diosar panin serviwayapjjatajat walpun kusista.

NAYAR YANAPTʼATAPAT WAL DIOSAR YUSPÄRTA

Jehová Diosajj jan walinakan wal yanaptʼawayitu. Misionerat serviñajatakis yanaptʼawayituwa, wali ajjsarirïkasas jaqenakar munasiñamp uñjañatakiw yanaptʼawayitu (2 Tim. 1:7). Yanaptʼapampiw sullkajampejj Diosar servisipkta. Sullkajajj esposopampiw circuitot servisipki, Europankir serbia aru parlir taqe congregacionanakaruw visitasipki. Papitujajj oracionapan mayirïkäna ukajj phoqasiwayiwa.

Bibliat yatjjatañajj sumak jikjjatasiñatakiw yanaptʼitu. Jan walinakan uñjasisajja, ‘taqe chuyma’ Jesusjam Jehová Diosar wal orasiñwa yateqawayta (Luc. 22:44). Nadezhda (Sofía) congregacionajankir jilat kullakanakajj wali munasiñampiw uñjapjjetu, uka toqew Jehová Diosajj oracionanakajar istʼaskatap amuyta. Jupanakajj jupanakampïñatakiw sapa kuti invittʼapjjetu, qhawqsa munasipjjetu uks sapjjarakituwa, ukajj wal kusisiyitu.

Jiwatanakajj jaktanipkani uka uru wal suyta. Niyas papit mamitajajj jaktanjjaspa, waynäkasin casarasipkäna niya ukhamäpkaspas ukhamwa piensta, kullakajajj uka jakʼans manqʼa phaykaspa, esposojajj caballop jakʼans saytʼatäkaspa ukhamwa amuytʼarakta. Ukanakat piensañaw jan llakisiñatakisa, Jehová Diosar yuspärañatakis yanaptʼitu.

Kunanaksa jakäwijan lurawayta uk amuytʼasasa jutïrit lupʼisasa, Davidjamaw jikjjatasta, jupajj akham sänwa: “Nayatï jakkasin Jehová Diosan suma chuymanïtapar jan confiykiriskayäta ukhajja, janiw aguantkiriskayätti. Jehová Diosar suytʼam, jan ajjsaramti, chuymaman chʼamani saytʼasim. Jïsa, Jehová Diosar suytʼam” sasa (Sal. 27:13, 14).