Aka revista liytʼirinakan jisktʼäwinakapa

¿Kunapachkamas suma yatiyäwinak predikpachañäni?

Jesusajj akham sänwa: “Reinon aka suma yatiyäwinakapajja, aka oraqpachanwa yatiyasini, ukhamat taqe markanakan yatipjjañapataki. Ukjjaruw akapachan tukusiñapajj jutani” sasa (Mat. 24:14). Uka textona, Mateo 24:6 y 13 texton uñstki uka ‘tukusiña’ arojja, griego arurjamajj Supayan apnaqat akapachajj Armagedonan tukjatäkani ukatwa parlaski (Apoc. 16:14, 16). Ukhamajj Armagedonajj niy qalltkani ukhakamaw predicaskakiñäni. Kuntï sisktan ukajja, janiw kunjamtï nayrajj amuykayätan ukhamäjjeti.

Jachʼa Babiloniajj tukjatäjjani, jachʼa tʼaqesiñ tiempojj qalltkarakini ukhakamakiw predicañäni sasaw amuyayätanjja (Apoc. 17:3, 5, 15, 16). ‘Jachʼa tʼaqesiñ tiempojj qalltkani ukhajja, Jehová Diosajj janiw yaqha jaqenakarojj jupar uñtʼapjjañapatak mä oportunidad churjjaniti’ sasaw amuyarakiyätanjja (Is. 61:2). Ukat akhamwa amuyarakiyätanjja: ‘Jachʼa tʼaqesiñ tiempo janïr qalltkipan Jehová Diosat jan jitheqtapkani ukanakakiw salvasipjjani’ sasa. Uka salvasirinakajja, Jerusalenan tʼunjäwipat (607 mara, antes de Cristo) salvasipkäna uka judionakar uñtasitäpkaspasa ukhamwa amuyayätanjja, judionakajj Diosar adorapjjatapata ukat jan walinak uñisipjjatapatwa salvasiñatak janïräkipan marcatäjjapjjäna (Ezeq. 5:11; 9:4). Ukampis ukajj janiw kuntï Jesusajj Mateo 24:14 texton siskäna ukarjamäkiti. Uka textorjamajja, Armagedonajj niy qalltkani ukhakamaw jaqenakajj suma yatiyäwinak katoqasis Dios toqet saytʼasipjjaspa.

Niyakejjay Mateo 24:14 textot jukʼamp qhan amuyjjstanjja, Apocalipsis 16:21 texto jukʼamp sum amuytʼañasaw wakisiraki, uka textojj jachʼa qala chhijchhinakatwa parli. Uka textonakat jukʼamp sum amuytʼasajja, Apocalipsis 16:21 textojj kunjamsa yaqhep jaqenakajj predicktan uka arunak jan sum katoqasipkani ukwa mä jukʼamp qhanañchi. Kunjamtï Pablojj siskänjja, ‘salvatäpkani ukanakajj’ kuntï yatiykañäni ukjja suma yatiyäwinakjamaw katoqasipjjani. Ukampis Diosan enemigonakapajj kuntï yatiykañäni uk janiw sum katoqapkaniti, kuna laykutejj jupanakatakejj jan wali yatiyäwinakäniwa (2 Cor. 2:15, 16). Yatiyatasarojj uñisipjjaniwa, kuna laykutejj aka jan wali pachajj Supayan apnaqatätapa, niya tukusiñampïtapwa yatipjjani (Juan 7:7; 1 Juan 2:17; 5:19).

Maysa toqetjja, Apocalipsis 16:21 textojj chhijchhejj “wali jachʼapunïnwa” sasaw qhanañcharaki. Ukhamajj jachʼa tʼaqesiñ tiemponjja, jukʼampiw predikpachäñäni. Ukhamatwa Jehová Diosan sutipajj jukʼamp uka tiempon uñtʼayasini (Ezeq. 39:7). Ukhamajj Jachʼa Babiloniajj tukjatäjjani uka qhepatjja, ¿suma yatiyäwinak katoqasir jaqenakajj utjaskpachäniti? Amuyatajj utjaniwa. Inas uka tiempon jaqenakajj “falso religionanakajj tukjatäniwa” sasin yatiykayätan ukat amtasipjjchini, jan ukajj ukhak yatipjjchini.

Tunka plaganak qhepat niya ukhamaw Egipto markan pasarakïna. Jehová Diosajj ‘Egipto markan taqe diosanakapar castigkäna’ uka qhepatjja, jan israelit ‘walja jaqenakaw’ Diosan markapar mayachasipjjäna (Éx. 12:12, 37, 38). ¿Kunatsa yaqha markat jutir uka jaqenakajj Dios toqet saytʼasiñ amtapjjpachäna? Inas kunjamsa Moisesan arsut tunka plaganakajj phoqasïna uk uñjasin ukham amtapjjchïna.

Jachʼa Babilonian tukjasitap qhepat Jehová Dios toqet saytʼasipkani ukanakajja, aka oraqenkasipkani uka Criston jilanakaparuw apoyapjjani, ukhamatwa ovejanakjam uñjatäpjjarakini (Mat. 25:34-36, 40). Ukampis Armagedonajj niy qalltkani, aka oraqenkasipkani uka ajllitanakajj alajjpachar apatäpkani ukhakamakiw uk lurapjjaspa.

Kunatï qhanañchtʼasiwayki ukajja, Jehová Diosajj kunja munasirisa khuyapayasirisa ukwa uñachtʼayistu. “Janiw khitin jiwañapsa jupajj munkiti, jan ukasti taqenin arrepentisipjjañapwa muni” (2 Ped. 3:9).