¿Jumajj amttati?

¿2025 maran Yatiyañataki sat revistanakajj mistkäna ukanak liytʼawaytati? Ukhamächi ukhajj aka jisktʼanakar qhanañchtʼam:

¿Kuna razonanakats Jehová Diosar jachʼañchtanjja?

Jehová Diosarojj wal respetatasata ukat taqe chuyma munasitasatwa jachʼañchtanjja, jaqenakan jupar uñtʼapjjañap munatasatwa jachʼañcharaktanjja (w25.01, página 3).

Maynitï chuym ustʼaychistu ukhajja, ¿kunas jupar perdonañatak yanaptʼistani?

Maynejj chuym ustʼayistu ukhajj wal chuym usuyassna; ukampis jiwasatï perdonañäni, jan coleratäjjañäni ukhajja, janiw chuyma ustʼatäjjañäniti (w25.02, páginas 15 y 16).

¿Kunatsa Marcosajj waynanakatakejj wali yateqaskayajja?

Marcosajj mayninakaruw servirïna. Pablojj misionerot payïr viajepan jan irpañ munkäna ukhajja, Marcosajj wal chuym usuyaspachäna, ukampis janiw desanimaskänti. Marcosajja, Pablomp sum apasiskakiñataki experienciani jilatanakamp sum apasiskakiñatakiw chʼamachasïna (w25.04, página 27).

“Nayaw sutim jupanakar uñtʼayta” sasajj ¿kamsañsa Jesusajj munaskäna? (Juan 17:26).

Discipulonakapajj Diosan Jehová sutip sum yatipjjäna. Ukhamajj janiw Jesusajj Diosan sutip yatichañat parlkänti, jan ukasti Jehová Diosajj kunjam Diosasa, kuna amtanisa, kunanaksa luri, kunjam chuymanisa ukanakatwa parlaskäna (w25.05, páginas 20 y 21).

Humilde chuymanïñäni ukhajja, ¿taqe kun yatta sasinti amuyañäni?

Janiw taqe kunpun yatktanti. Sañäni, akapachan tukusïwipajj kunürünisa, Diosajj kunsa jiwasar yanaptʼañatakejj lurani uks janiw yatktanti. Janirakiw qharürojj kunas pasani, qhawqsa jiwasar uñtʼistu uks yatktanti (w25.06, páginas 15 al 18).

Qellqatanakasat liytʼkasasa mä discurso istʼkasas ¿kunjamsa ukanakampejj mayninakar yanaptʼsna?

Akham sasaw jisktʼassna: “¿Kunjamsa jaqenakan chuymapar purtʼañatakejj yanaptʼitaspa? ¿Kawknïr uñachtʼäwisa jan ukajj ejemplosa mä cheqa yatichäwit parltʼañatakejj yanaptʼitaspa? ¿Khitis uka toqet yatiñ munaspa?” sasa (w25.07, página 19).

Davidar perdonatapajj ¿kunsa Jehová Diosat yatichistu?

Davidajj jachʼa juchanakaruw purtʼasïna, ukampis taqe chuym arrepentisitapat Jehová Diosajj perdonänwa (1 Rey. 9:4, 5). Jehová Diosajj juchanakas perdonjjestu ukhajja, janipuniw juchanakasat amtasisajj jutïrin castigkistaniti, ni juchañchkistanisa (w25.08, página 17).

Yateqerisatï mä yatichäw jan sum amuykani jan ukajj jan katoqasiñ munkani ukhajj ¿kunsa lursna?

Janiw sum amuyañapkam mä yatichäwin qheparañasäkiti, jan ukasti yatjjataskakiñasawa, yaqha horasanwa uka yatichäwit wasitat yatjjatsna (w25.09, página 24).

‘Jan juchan chʼamapamp engañjayasipjjamti’ sasajj Bibliajj ¿kamsañsa muni? (Heb. 3:13).

Juchajj jan walinak lurañaruw apistu, Jehová Diosan munasiñapats sapa kutiw payachasiyarakistu uk sañ muni (w25.10, página 16).

¿Kunjamsa taqe chuym orassna?

1) Jehová Diosajj kunjam chuymanisa ukwa lupʼiñasa. 2) Kuna problemanakas utjistu ukwa janïräkipan lupʼiñasa ukat Jehová Diosaruw cuenttʼañasa, inas khitirus jan perdonktan uka toqet amtasis orassna. 3) Janiw apur apur orasiñasäkiti, wali jay orasisaw kunjamas jikjjatastan uk Jehová Diosar cuenttʼsna (w25.10, páginas 19 y 20).

¿Kunjamsa jilïr jilat kullakanakar yanaptʼsna?

Sapa kutiw visittʼañasa jawsañasaraki. Doctoran ukaruw compañtʼsna jan ukajj predikirisa estudiosarus compañtʼayasiraksnawa (w25.11, páginas 6 y 7).

Casarasïwi urupan Jehová Diosar jachʼañchañatakejj ¿kunsa novionakajj lurapjjaspa?

Markan leyinakaparjamaw phoqapjjañapa. Casarasipki uka urojj Jehová Diosaruw jachʼañchapjjañapa, kunanaktï uka urun lurapkani ukanakajj espíritu santon achupwa uñachtʼayañapa. Wali amuyumpiw isthaptʼasipjjañapa, kʼachachtʼasipjjañaparaki. Jan Bibliarjamäki uka costumbrenak rechazapjjañapawa, qhana arunakampi ukat respetompiw parlapjjañaparaki (w25.12, páginas 21 al 24).