Бу дүнја һара ҝедир?
Бүтүн дүнјада һәр ҝүн ҹидди проблемләр вә сарсыдыҹы һадисәләр һагда хәбәр верилир! Бүтүн бунлар нә демәкдир?
ТӘҺЛҮКӘСИЗЛИК. Базарларда бомбалар партлајыр. Мәктәбләрдә мүәллимләр вә шаҝирдләр атәшә тутулур. Валидејнләр ушагларыны гыса мүддәтә нәзарәтсиз гојан кими онлары оғурлајырлар. Ҝүнүн ҝүнорта чағында гадынлары вә јашлылары сојурлар.
ДИН САҺӘСИ. Динләр мүһарибәләрдә иштирак едән тәрәфләри дәстәкләјирләр. Руһаниләр ҝеносиддә иштирак етмәкдә иттиһам олунурлар. Дин рәһбәрләри ҝәнҹләрин әхлагыны позур, килсә исә онларын ҹинајәтини өрт-басдыр едир. Килсәјә ҝәләнләрин сајы ҝет-ҝедә азалыр, килсәләр исә сатылыр.
ЕКОЛОҜИЈА. Ҝәлир әлдә етмәк наминә мешәләр мәһв едилир. Одун ахтарышында олан јохсуллар әтрафдакы ағаҹларын һамысыны кәсирләр. Јералты сулар чиркләндирилмишдир, ону ичмәк тәһлүкәлидир. Сәнаје туллантылары вә бә’зи мүасир балыг ову нөвләри балыгларын јох олмасына сәбәб олур. Һава о дәрәҹәдә чиркләндирилмишдир ки, нәфәс алмаг мүмкүн дејил.
ЈАШАМАГ ҮЧҮН ВӘСАИТ. Мә’лумат верилдији кими, Сахара сәһрасынын ҹәнубунда јерләшән Африка рајонларында адам башына иллик ҝәлир 480 АБШ доллары тәшкил едир. Тиҹарәтчиләрин тамаһкарлығына ҝөрә мүәссәләр дағылыр, минләрлә инсанлар ишсиз галыр. Фырылдагчылар әманәтчиләри гәнаәт етдикләри һәр шејдән мәһрум едир.
ГИДА ЧАТЫШМАЗЛЫҒЫ. Бүтүн дүнјада һәр ҝүн тәхминән 800 000 000 адам аҹ галыр.
МҮҺАРИБӘЛӘР. ХХ әсрдә баш верән мүһарибәләрдә 100 000 000-дан артыг адам һәлак олмушдур. Нүвә силаһы, о гәдәрдир ки, бүтүн бәшәријјәти дәфәләрлә мәһв етмәк олар. Вәтәндаш мүһарибәләринин сајы артыр. Терроризм дүнја мигјасында артыр.
ЕПИДЕМИЈАЈАЛАР ВӘ МҮХТӘЛИФ ХӘСТӘЛИКЛӘР. 1918-ҹи илдә башлајан “испанка” грипиндән 21 000 000 адам өлмүшдүр. Бу ҝүн ГИЧС “бәшәр тарихиндә ән мәһведиҹи пандемијаја” чеврилмишдир. Хәрчәнҝ вә үрәк хәстәликләри дә инсанлара чох изтираблар ҝәтирир.
Бу башлыгларын нә һагда бәһс етдији барәдә дүшүнүн. Онлар бир-бирилә һеч бир әлагәси олмајан һадисәләрәми ишарә едир? Јохса бу һадисәләр дүнјада јаранмыш буҝүнкү вәзијјәти характеризә едәрәк, мүәјјән мә’на кәсб едир?
[5-ҹи сәһифәдә олан чәрчивә]
Аллаһ һәгигәтән дә бизим рифаһымызын гајғысына галырмы?
Сарсыдыҹы һадисәләр барәдә хәбәр тутдугдан вә ја ағыр иткиләр јашадыгдан сонра бир чохлары Аллаһын онлары бу ҹүр бәдбәхтликләрдән хилас етмәк үчүн нәјә ҝөрә мүдахилә етмәдијинин үзәриндә дүшүнүрләр.
Аллаһ һәгигәтән дә гајғыкешдир. Артыг индидән О бизә сағлам рәһбәрлик вә һәгиги раһатлыг верир (Матта 11:28-30; 2 Тимотејә 3:16, 17). О, зоракылыға, хәстәликләрә вә өлүмә бирдәфәлик сон гојмаг үчүн лазыми тәдбирләр ҝөрүб. Онун тәгдим етдији јардым сүбут едир ки, О, мүәјјән бир халгын јох, бүтүн халглардан, гәбиләләрдән вә дилләрдән олан инсанларын гајғысына галыр (Һәвариләрин ишләри 10:34, 35).
Аллаһын ирадәсинин јеринә јетирилмәси бизи нә дәрәҹәдә марагландырыр? Сән јери вә ҝөјү Јараданын Ким олдуғуну билирсәнми? Онун ады нәдир? Онун нијјәтләри нәдән ибарәтдир? Бу суалларын ҹавабыны Мүгәддәс Китабда тапмаг олар. Орада Аллаһ бизә зоракылыға, хәстәликләрә вә өлүмә сон гојмаг үчүн һансы тәдбирләри ҝөрдүјү һаггында данышыр. Бу дәјишикликләрин фајдасыны өз үзәримиздә һисс етмәјимиз үчүн биздән нә тәләб олунур? Биз ҝәрәк Аллаһын Өзү вә нијјәтләри һаггында билик әлдә едәк. Аллаһын вә’дләринә иман етмәсәк, онлар бизә фајда верә биләрми? (Јәһја 3:16; Ибраниләрә 11:6) Һәмчинин Аллаһын тәләбләринә мүвафиг давранмаг лазымдыр (1 Јәһја 5:3). Буну етмәк үчүн сән кифајәт гәдәр мараг ҝөстәрирсәнми?
Аллаһын буҝүнкү шәраитләрин мөвҹуд олмасына јол вермәсинин сәбәбини баша дүшмәк үчүн, биз чох зәрури олан мүбаһисәли суалын нәдән ибарәт олдуғуну анламалыјыг. Бу суал Мүгәддәс Китабда изаһ едилир. Һәмин мүбаһисәли суал һаггында бу брошүранын 15-ҹи сәһифәсиндә охумаг олар.