Иса гышдамы анадан олуб?

МҮГӘДДӘС КИТАБДА Исанын нә вахт анадан олдуғу дејилмир. Анҹаг орада јазыланлардан ҝөрүнүр ки, о, гышда доғулмајыб.

Исанын доғулдуғу Бет-Лехем шәһәриндә гышда һансы һава шәраити мүшаһидә олунурду? Ибрани тәгвиминә әсасән, кислев ајында (нојабр-декабр ајларына мүвафигдир) адәтән сојуг вә јағышлы һава олурду. Ондан сонра тевет ајы (декабр-јанвар) ҝәлирди. Бу, илин ән сојуг ајы иди вә бә’зән бу вахт Јәһуди јајласында һәтта гар јағырды. Ҝәлин ҝөрәк Мүгәддәс Китабда һәмин әразидә һаванын неҹә кечдији һагда нә дејилир.

«Езра» китабындан өјрәнирик ки, кислев ајында һава һәгигәтән дә сојуг вә јағмурлу кечирди. Езра јазыр ки, «доггузунҹу ајын [кислев] ијирмисиндә» халг Јерусәлимә топлашмышды. Инсанлар мејданда отурараг, «јағышдан... әсә-әсә» дејирди: «Јағыш вахтыдыр, бајырда дајанмаға тагәтимиз јохдур» (Езра 10:9, 13; Јеремја 36:22). О вахт һәмин әразидә јашајан чобанларын өз сүрүләри илә гышда ачыг сәма алтында ҝеҹәләмәмәләринин сәбәби ајдындыр.

Лакин Мүгәддәс Китабда дејилир ки, Иса доғулан ҝеҹә чобанлар чөлдә гојунларыны ҝүдүрдүләр. Мүждәчи Лука јазыр ки, чобанлар Бет-Лехем јахынлығында «ҝеҹә чөлдә өз сүрүләринин кешијини чәкирдиләр» (Лука 2:8-12). Диггәт јетирин ки, чобанлар јалныз ҝүндүзләр дејил, ҝеҹәләр дә чөлдә галырдылар. Онларын сүрүләри дә бүтүн ҝеҹәни чөлдә олурду. Чобанлар гышда, сојуг вә јағмурлу һавада ачыг сәма алтында јашајардылармы? Әлбәттә, јох! Исанын доғулмасы һаггында Мүгәддәс Китабда верилән мә’лумат ҝөстәрир ки, о, гышда доғулмајыбa.

Мүгәддәс Китабда Исанын өлүмүнүн дәгиг тарихи верилир, амма нә вахт доғулдуғуна ишарә едән мә’лумат чох аздыр. Сүлејман падшаһын сөзләри јада дүшүр: «Јахшы ад әтирли јағдан, өлүм ҝүнү исә доғум ҝүнүндән јахшыдыр» (Ваиз 7:1). Буна ҝөрә дә тәәҹҹүблү дејил ки, Мүгәддәс Китабда Исанын хидмәти вә өлүмү һаггында тәфсилаты илә мә’лумат верилдији һалда, нә вахт доғулдуғу һагда, демәк олар ки, һеч нә дејилмир.