Әлавәләр

Мәсиһи валидејнләрә исмарыҹ

Валидејнләр, сөзсүз ки, сиз әзиз өвладынызын Јеһованы севмәсини вә өзүнү Она һәср етмәсини истәјирсиниз. Ушағыныза вәфтизә һазыр олмаға неҹә көмәк едә биләрсиниз? Онларын вәфтизә һазыр олдуғуну неҹә мүәјјән етмәк олар?

Иса давамчыларына тапшырмышды: «Бүтүн халгларын ичиндә шаҝирд һазырлајын, онлары... вәфтиз един» (Мәт. 28:19). Бу ајәјә әсасән, әсас тәләб инсанын шаҝирд олмасыдыр, јәни вәфтиз олмаг истәјән инсанын Мәсиһин тәлимләрини баша дүшүб гәбул етмәси аздыр, о һәмчинин Мәсиһин изләри илә ҝетмәлидир. Буну һәтта нисбәтән балаҹа ушаглар да баҹарар.

Ушагларыныз үчүн јахшы нүмунә олун вә Јеһованын тәлимләрини онлара ашылајын (Ган. 6:6—9). Бунун үчүн Јеһованын Шаһидләринин дәрҹ етдији «Мүгәддәс Китаб тәлимләри» вә «Аллаһын мәһәббәтиндән һеч вахт ајрылмајаг» китабларынын көмәји илә онлара Мүгәддәс Китаб һәгигәтләрини өјрәдин, онларда Мүгәддәс Китаб принсипләри үзәриндә дүшүнмәк вә онлара ујғун јашамаг габилијјәти јетишдирин. Ушагларыныза көмәк един ки, әгидәләрини өзләри сәрбәст шәкилдә мүдафиә етмәји баҹарсынлар (1 Бут. 3:15). Сиздән өјрәндикләри, сизин руһландырыҹы сөзләриниз, Мүгәддәс Китабын мүталиәсиндән, аиләви ибадәтдән, ибадәт ҝөрүшләриндән, јахшы достлардан алдыглары биликләр вә ешитдикләри хош сөзләр ушагларыныза вәфтиз олунмаға вә ондан сонра да инкишаф етмәјә көмәк едәҹәк. Өвладларыныза руһани мәгсәдләрә ҹан атмаға һәмишә көмәк един.

Мәсәлләр 20:11 ајәсиндә јазылыб: «Һәтта ушаг да әмәлләриндән таныныр, отурушу-дурушу тәмизми, дүрүстмү бәлли олур». Оғлан вә ја гыз олмасындан асылы олмајараг, ушағын һансы һәрәкәтләринә әсасән онун Иса Мәсиһин шаҝирди олдуғуну вә вәфтизә һазыр олдуғуну мүәјјән етмәк олар?

Вәфтиз олмаг истәјән ушаг валидејнләринә гулаг асмалыдыр (Һәв. 5:29; Кол. 3:20). Мүгәддәс Китабда 12 јашлы Иса һаггында дејилир ки, о, валидејнләринин сөзүндән чыхмырды (Лука 2:51). Тәбии ки, сиз ушагларыныздан камиллик ҝөзләмәмәлисиниз. Амма әҝәр ушаг вәфтиз олмаг истәјирсә, о, Исанын нүмунәсини изләмәли вә валидејнләринә гулаг асан бир ушаг кими танынмалыдыр.

О һәмчинин Мүгәддәс Китаб һәгигәтләрини өјрәнмәјә һәвәсли олмалыдыр (Лука 2:46). Бәс ушағыныз ибадәт ҝөрүшләринә ҝедир, орада фәал иштирак едир? (Зәб. 122:1). Һәр ҝүн һәвәслә Мүгәддәс Китабы охујур вә мүталиә едир? (Мәт. 4:4).

Вәфтиз олмаға ҹан атан ушаг Падшаһлығы һәјатында һәр шејдән үстүн тутур (Мәт. 6:33). О, иманыны башгалары илә бөлүшмәк мәсулијјәти дашыдығыны баша дүшүр. Хидмәтин мүхтәлиф нөвләриндә иштирак едир, мүәллимләринә вә мәктәб јолдашларына Јеһованын Шаһиди олдуғуну демәјә утанмыр. Мәсиһи һәјаты вә ибадәти ҝөрүшүндә алдығы тапшырыглара мәсулијјәтлә јанашыр.

О, әхлаги ҹәһәтдән тәмиз галмаг үчүн пис достлардан узаг дурур (Мәс. 13:20; 1 Кор. 15:33). Бу, онун мусиги, филм, телевизија програмлары, видеоојунлар сечиминдән вә Интернетдән истифадә етмәјиндән ҝөрүнүр.

Әксәр ушаглар валидејнләринин әзијјәтини јерә вурмајыб, һәгигәти мәнимсәјиб вә ҝәнҹ јашларында вәфтиз олунублар. Вәфтиз ушагларынызын Јеһова илә мүнасибәтләриндә әламәтдар мәгамдыр. Гој Јеһова сизә ушагларыныза бу мәгсәдә чатмаг үчүн ҝөстәрдијиниз ҹәһдләрә хејир-дуа версин.

Вәфтиз олунмамыш тәблиғчиләрә исмарыҹ

Јығынҹагла бирҝә вәфтиз олунмамыш тәблиғчи кими хидмәт етмәк шәрәфдир. Руһани ҹәһәтдән ирәли ҝетдијиниз үчүн сизи тәрифләјирик. Сиз Мүгәддәс Китабы өјрәнмәклә Аллаһы танымысыныз, Онун вәдләринә иман ҝәтирмисиниз (Јәһ. 17:3; Ибр. 11:6).

Јәгин, Јеһованын Шаһидләри илә Мүгәддәс Китабы өјрәнмәздән әввәл сизин һансыса динлә әлагәниз олуб, ја да үмумијјәтлә һеч бир динә аидијјәтиниз олмајыб. Ола билсин, Мүгәддәс Китаба зидд ҝедән ишләрлә мәшғул олмусунуз. Амма инди сиз иманынызы әмәлдә ҝөстәрирсиниз — төвбә етмисиниз, јәни әмәлләринизә ҝөрә пешман олмусунуз; јолунуздан дөнмүсүнүз, јәни пис әмәлләрдән әл чәкмисиниз вә Аллаһын јолуну тутмусунуз (Һәв. 3:19).

Јахуд да, ола билсин, Мүгәддәс Јазылары көрпәликдән билирсиниз. Буна ҝөрә дә мәсиһиләрә јарашмајан давранышдан вә ҹидди ҝүнаһлардан узаг олмусунуз (2 Тим. 3:15). Сиз һәмјашыдларын тәзјигинә гаршы дурмағы вә Јеһованын ҝөзүндә пис ишләрә тәһрик едән диҝәр тәләләрдән узаг ҝәзмәји өјрәнмисиниз. Сиз пак ибадәтин тәрәфини тутмагла вә етигадынызы тәблиғ етмәклә Аллаһа иманынызы ҝөстәрмисиниз. Хидмәтдә мүәјјән тәҹрүбә топламысыныз вә Јеһоваја вәфтиз олунмамыш тәблиғчи кими хидмәт етмәк гәрарына ҝәлмисиниз.

Јеһованы сонрадан танымағыныздан вә ја Онун јолларыны ушаглыгдан өјрәнмәјиниздән асылы олмајараг, ола билсин, сиз руһани инкишаф јолунда нөвбәти ики аддымы атмаға — һәјатынызы Јеһоваја һәср етмәјә вә вәфтиз олунмаға һазырлашырсыныз. Сиз дуада Јеһоваја әбәдијјән садиг галмаг гәрарында олдуғунузу билдирәрәк һәјатынызы Она һәср едә биләрсиниз (Мәт. 16:24). Сонра һәсролунманызын символу олараг суда вәфтиз олунмаг лазымдыр (Мәт. 28:19, 20). Һәјатынызы Јеһоваја һәср етмәклә вә вәфтиз олунмагла Онун хидмәтчиси олаҹагсыныз. Бизә неҹә дә бөјүк шәрәф нәсиб олуб!

Мүгәддәс Китабдан өјрәндијиниз кими, ола билсин, сынагларла үзләшәҹәксиниз. Јадыныздадырса, вәфтиз олунандан дәрһал сонра «Аллаһын руһу Исаны чөллүјә апарды ки, Иблис ону имтаһана чәксин» (Мәт. 4:1). Исанын шаҝирди кими вәфтиз олунандан сонра да сизи сынаглар ҝөзләјир (Јәһ. 15:20). Сынаглар мүхтәлиф ола биләр. Аилә үзвләриниз сизә гаршы чыха биләр (Мәт. 10:36). Ола билсин, мәктәб јолдашларыныз, иш јолдашларыныз вә ја кечмиш дост-танышларыныз сизи лаға гојаҹаглар. Исанын Марк 10:29, 30 ајәләриндә јазылмыш сөзләрини һәмишә јадынызда сахлајын: «Әмин олун, мәним јолумда вә мүждә уғрунда евини, баҹы-гардашыны, анасыны, атасыны, ушагларыны, јахуд тарлаларыны гојуб ҝәлән мүтләг бу дөврдә тәгибләрлә јанашы јүзгат артыг ев, гардаш, баҹы, ана, ушаг вә тарла, ҝәләҹәкдә исә әбәди һәјат алаҹаг». Одур ки, бундан сонра да Јеһоваја јахын олмаға вә Онун салеһлик нормаларына ујғун јашамаға ҹан атын.

Вәфтиз олунмаг истәјинизи ағсаггаллар шурасынын координаторуна билдирин. Бу мөвзудан сонра ҝәлән суалларын әсасында ағсаггаллар сизинлә мүзакирә апараҹаг вә сизин вәфтизә јарарлы олуб-олмадығынызы мүәјјән едәҹәкләр. Бу суаллары әввәлҹәдән мүталиә вахты өзүнүз арашдыра биләрсиниз.

Мүзакирәјә һазырлашанда ҝәтирилән ајәләри охујуб үзәриндә дүшүнүн. Истәсәниз, китабда вә ја башга јердә гејдләр апара биләрсиниз. Мүзакирә вахты бу гејдләрдән истифадә етмәк вә китабы ачыг сахламаг олар. Әҝәр һансыса суалы баша дүшмәк чәтиндирсә, сизә Мүгәддәс Китабы өјрәдән адамдан вә ја ағсаггаллардан көмәк истәјә биләрсиниз.

Мүзакирә вахты суаллара узун-узады вә мүрәккәб ҹаваб вермәјә еһтијаҹ јохдур. Садә, конкрет шәкилдә вә өз сөзләринизлә ҹаваб вермәк дүзҝүн олар. Јахшы оларды ки, суалларын чохуна ҹаваб верәндә тәсдиг олараг Мүгәддәс Китабдан бир-ики ајә ҝәтирәсиниз.

Әҝәр Мүгәддәс Китабын әсас тәлимләри барәдә кифајәт гәдәр билијиниз јохдурса, ағсаггаллар тәдбир ҝөрәҹәк ки, Мүгәддәс Китабдан алдығыныз дәгиг биликләри өз сөзләринизлә ифадә едә билмәјиниз вә башга вахт вәфтиз олунмағыныз үчүн сизә көмәк ҝөстәрилсин.

[Ағсаггалларын нәзәринә: вәфтиз олунмаг истәјәнләрлә мүзакирәјә даир рәһбәрлик 208—212 сәһифәләрдә јерләшир.]