Јер күрәси садәҹә сынаг мејданыдырмы?
НӘҺАЈӘТ! О, имтаһан верди. Ики һәфтәлик јоруҹу имтаһанлардан сонра, ахыр ки, тәләбә гыз, дипломуну јахшы гијмәтләрлә ала билди. Инди о, чохдан арзуладығы ишә дүзәлә биләрди.
Бир чох инсанлар үчүн јер үзүндә һәјат, буна бәнзәр бир шејдир. Онлар бу һәјаты, һамынын кечмәли олаҹағы бир сынаг мејданы кими гәбул едирләр. Бу сынаглардан кечәнләри, өлүмдән сонракы һәјатын башга формасында, нә исә јахшы бир шеј ҝөзләјир. Әлбәттә, әҝәр индики һәјат - бир чохлары үчүн исә бу садәҹә мөвҹуд олмаг демәкдир - инсанларын үмид едә биләҹәкләри һәмин јахшы шеј олсајды, бу чох кәдәрли оларды. Мүгәддәс Китаб персонажы Ејуб, һәјатынын чох һиссәсини сағлам вә зәнҝинликдә кечирмәсинә бахмајараг, гејд етмишдир: “Инсан ки, гадындан доғулмушдур, ҝүнләри гысадыр вә сыхынты илә долудур” (Ејуб 14:1).
Инсанлардан чохунун дүшүнҹәләри, “Јени католик енсиклопедијасы”нын нөвбәти сөзләриндә әкс олунур: “Аллаһ инсаны ҝөјләр иззәти үчүн тә’јин едиб. [...] Белә нәтиҹәјә ҝәлмәк олар ки, инсанын хошбәхтлији, ҝөјләр сәадәтиндән ибарәтдир”. Бу јахынларда Мәсиһин Килсәси, Америка Бирләшмиш Штатларында сорғу кечирмишдир. Алынан мә’лумата әсасән, сорғуда иштирак едәнләрдән 87 фаизи, өләндән сонра ҝөјә ҝедәҹәкләринә инанырлар.
Өлүмдән сонра јер үзүнү тәрк едиб, даһа јахшы јерә дүшмәјә бир чох христиан олмајан кәсләр дә үмид едирләр. Мәсәлән, мүсәлманлар, ҝөјләр ҹәннәтинә дүшмәјә үмид едирләр. Чиндә вә Јапонијада јајылмыш “Тәмиз Торпаг” адлы буддист ҹәрәјанынын тәрәфдарлары инанырлар ки, әҝәр онлар Сонсуз Ишыг Буддасы - Амитабһанын адыны сајсыз-һесабсыз дәрәҹәдә тәкрарласалар, “Тәмиз Торпагда”, јә’ни “Гәрби Ҹәннәтдә” јенидән доғулаҹаг вә орада сонсуз олараг хошбәхт јашајаҹаглар.
Дүнјада мүгәддәс сајылан китаблар арасында, ән чох тәрҹүмә едилән вә ән чох пајланан Мүгәддәс Китабда, Јер күрәси һеч дә тәрк олунмасы лазым ҝәлән бир јер вә ја даһа јахшы һәјата апаран пиллә кими тәсвир олунмур. Мисал үчүн, Мүгәддәс Китабда дејилир: “Салеһләр јери мирас алыр вә онда әбәдијјән јашајырлар” (Мәзмур 37:29). Һәмчинин, Мүгәддәс Китабда Исанын мәшһур сөзләринә раст ҝәлирик: “Һәлимләр нә бәхтијардырлар! Чүнки јери мирас алаҹаглар” (Матта 5:5).
Јер үзүндә һәјатымызын мүвәггәти олмасы һаггындакы фикир ҝениш јајылмышдыр. Бу исә өлүмүн инсанлара хошбәхт һәјата јол ачдығыны нәзәрдә тутур. Әҝәр бу беләдирсә, онда өлүм әсл хејир-дуадыр. Анҹаг инсанларын әксәријјәтинин өлүм һаггында нөгтеји-нәзәри бу ҹүрдүрмү? Мәҝәр инсанлар өмүрләрини нәјин баһасына олурса-олсун узатмаға чалышмырлармы? Тәҹрүбә ҝөстәрир ки, әҝәр инсан нисбәтән сағламдырса вә тәһлүкәсизликдәдирсә, онда о өлмәк истәмир.
Лакин јер үзүндәки һәјат, фәлакәт вә изтирабларла долудур. Буна ҝөрә дә инсанларын әксәријјәти, ҝөјләри һәгиги сүлһ вә хошбәхтлик олан јеҝанә јер һесаб едирләр. Ҝөјләр һәгигәтәнми сүлһ вә хошбәхтлијин, пислик вә аһәнҝсизликдән азад бир јеридир? Вә доғурданмы өлүмдән сонракы һәјат јалныз ҝөјләрдә мүмкүндүр? Ола билсин ки, Мүгәддәс Китабын бу суаллара ҹавабы сизи тәәҹҹүбләндирсин.