Валидејнләр, ушагларынызын еһтијаҹыны тә’мин един!
УШАГЛАР, хүсусилә валидејнләр тәрәфиндән верилән рәһбәрлијә вә гајғыкешликлә едилән ислаһа еһтијаҹ дујурлар. Бу һагда бразилијалы педагог Танја Загури демишдир: “Ушаглар анҹаг өз хошларына ҝәләни етмәјә мејллидирләр. Бу сәбәбдән, онларын давраныш тәрзи мүәјјән чәрчивәдән чыхмасын дејә, нәзарәт етмәк ваҹибдир. Бунун үчүн илк нөвбәдә валидејнләр ҹавабдеһдирләр. Әҝәр валидејнләр өз вәзифәләрини иҹра етмәзләрсә, ушаглар нәзарәтдән чыхарлар”.
Лакин ҹәмијјәтдә өзбашыналыг вә сәрбәстлик һөкм сүрдүјү үчүн, бир чох өлкәләрдә јухарыда верилән мәсләһәтә риајәт етмәк чәтиндир. Валидејнләр көмәји һарада ахтара биләрләр? Аллаһ горхусуна малик олан валидејнләр е’тираф едирләр ки, “ушаглар Рәбдән мирасдыр” (Мәзмур 127:3). Буна ҝөрә дә онлар, ушагларын тәрбијәси үчүн рәһбәрлији Аллаһын Кәламы олан Мүгәддәс Китабда ахтарырлар. Мәсәлән, Сүлејманын мәсәлләри 13:24 (МКШ) ајәсиндә дејилир: “Оғлундан көтәји әсирҝәјән санки она нифрәт едәр, оғлуну севән она дүзҝүн тәрбијә верәр”.
Мүгәддәс Китабын бурада истифадә етдији “көтәк” сөзү јалныз физики ҹәза мә’насыны вермир; даһа доғрусу, бу сөз - нөвүндән асылы олмајараг мүәјјән ислаһы нәзәрдә тутур. Әслиндә инадҹыл ушағы чох вахт сөзлә дә ислаһ етмәк мүмкүндүр. Сүлејманын мәсәлләри 29:17 (МКШ) ајәсиндә дејилир: “Оғлуна тәрбијә вер ки, ҹанын динҹ олсун, көнлүн бундан ләззәт алсын”.
Ушагларда мәнфи хүсусијјәтләрин инкишаф етмәмәси үчүн, онлары мәһәббәтлә ислаһ етмәк зәруридир. Ушаглары ардыҹыл вә меһрибанҹасына ислаһ етмәклә, сиз, валидејнлик гајғысы ҝөстәрмиш олаҹагсыныз (Сүлејманын мәсәлләри 22:6). Валидејнләр, руһдан дүшмәјин! Сиз, Мүгәддәс Китабын сағлам, фајдалы мәсләһәтләринә риајәт етмәклә, Јеһова Аллаһын лүтфүнү әлдә едәҹәк вә өвладларынызын һөрмәтини газанаҹагсыныз.