Аллаһын ирадәси будурму?

“Ҝөјдә олдуғу кими, јердә дә Сәнин ирадән олсун” (Матта 6:10).

САРСЫЛМЫШ Хулио вә Кристинанын ҝөзү гаршысында дөрд ушағы јанды. Онларын дајанаҹагда сахладыглары машынларына, сүрүҹүсү сәрхош олан башга бир машын чырпылмыш, машын јанмышды. Бешинҹи ушағы, Маркосу, аловун ичиндән хилас едә билдиләр. Лакин аловдан алдығы хәсарәт ону һәмишәлик ејбәҹәр һала салмышды. Онун доггуз јашы варды. Ата дәрин кәдәр ичиндә иди. О, өзүнә вә доғмаларына белә сөзләрлә тәсәлли верирди: “Бу, Аллаһын ирадәсидир. Һәр неҹә олурса-олсун, ону гәбул етмәлијик”.

Бу кими дәһшәтли һаллар баш верәркән, чохлары белә реаксија ҝөстәрирләр. Онлар белә дүшүнүрләр: “Бир һалда ки, Аллаһ һәр шејә гадирдир вә бизим гејдимизә галыр, демәли, анламаг чәтин олса да, баш верән һадисәнин бизим үчүн һансыса хејри вар”. Сиз бу фикирлә разысынызмы?

Јахшы вә ја пис һәр нә баш верирсә-версин, бүтүн бунлар Аллаһын ирадәсинин тәзаһүрүдүр. Бу ҹүр фикир адәтән чохларына Рәббин дуасы кими таныш олан вә Иса Мәсиһин јухарыда ситат ҝәтирилән сөзләринә әсасланыр. Аллаһын ирадәси ҝөјдә јеринә јетир, елә дејилми? Мәҝәр “јердә дә Сәнин ирадән олсун” дејә дуа едәркән, биз јер үзүндә баш верәнләрин Аллаһын ирадәси олдуғуну е’тираф етмирикми?

Чохлары бу ҹүр мүлаһизәләрин доғрулуғуна шүбһә едирләр. Онларын фикринҹә, бу о демәкдир ки, Аллаһ Өз јаратдығы инсанлара гаршы шәфгәт һиссиндән мәһрумдур. “Севән Аллаһ ҝүнаһсыз инсанларын башына дәһшәтли ишләрин ҝәлмәсини неҹә истәјә биләр? — дејә онлар сорушур. — Әҝәр Аллаһ бунунла бизә нә исә өјрәтмәк истәјирсә, онда бу үсулла нә өјрәнмәјин мүмкүн олдуғу ајдын дејил”. Ола биләр ки, сиз дә ејни һиссләри јашајырсыныз.

Исанын анабир гардашы шаҝирд Јагуб бу һагда јазмышдыр: “Имтаһан олунан заман, гој һеч ким: “Аллаһ мәни имтаһан едир”,— демәсин. Чүнки Аллаһ писликлә имтаһан олунмур вә Өзү дә һеч кими имтаһан етмир” (Јагуб 1:13). Аллаһ пислик мәнбәји дејил. Буна ҝөрә дә, сөзсүз ки, бу ҝүн јер үзүндә баш верәнләрин һамысы Аллаһын ирадәсилә олмур. Мүгәддәс Јазыларда һәмчинин инсанын, халгларын вә һәтта Иблисин ирадәсиндән сөз едилир (Јәһја 1:13; 2 Тимотејә 2:26; 1 Петер 4:3). Разы дејилмисиниз ки, Хулио вә Кристинанын башына ҝәләнләр севән сәмави Атанын ирадәси ола билмәзди?

Бәс онда Иса өз давамчыларына “Сәнин ирадән олсун” дејә дуа етмәји өјрәдәркән, әслиндә нәји нәзәрдә тутурду? Бу, садәҹә хүсуси һалларда Аллаһын мүдахиләси үчүн олан хаһиш идими, јохса Иса бизә даһа ваҹиб вә јахшы шеј — һәр кәсин үмид едә биләҹәји бир дәјишиклик үчүн дуа етмәји өјрәдирди? Ҝәлин, Мүгәддәс Китабын бу һагда нә дедијини нәзәрдән кечирәк.

[Иҹазә илә]

Car: Dominique Faget-STF/AFP/Getty Images; child: FAO photo/B. Imevbore