Дуалар вәзијјәти дәјишдирә биләрми?
БИЗЛӘРДӘН һансымыз нәји исә дәјишмәјин мүмкүн олмадығы чәтин вәзијјәтләрлә гаршылашмајыб? Мүгәддәс Китабдан ҝөрүндүјү кими, һәвари Павел чыхылмаз кими ҝөрүнән вәзијјәтләрдә дуанын көмәк етдијини өз тәҹрүбәсиндән билирди.
Павели Ромада һагсыз олараг һәбсә салдыглары заман, о, һәмиманлыларындан онун үчүн дуа етмәји хаһиш етмишди: “Дуа етмәнизи хүсусилә хаһиш едирәм ки, мән даһа тез сизә гајтарылым” (Ибраниләрә 13:18, 19). Башга бир вахт Павел өз әминлијини билдирмишдир ки, Аллаһ онун тезликлә азадлыға чыхмасына даир едилән дуалара ҹаваб верәҹәкдир (Филимона 22). Павели, доғрудан да, тезликлә азадлыға бурахдылар вә о, өзүнүн миссионер хидмәтини давам етдирди.
Бәс дуа сизин вәзијјәтиниздә дә тә’сир гүввәсинә малик ола биләрми? Ола биләр. Лакин јадда сахламаг лазымдыр ки, дуа — садәҹә дүшүнүлмәдән едилән дини ајин дејил. Бу, бизим севән вә гүдрәтли сәмави Атамызла етдијимиз дәјәрли сөһбәтдир. Биз ҝәрәк конкрет хаһишләримизи горхмадан дуада сөјләјәк, сонра да сәбирлә Јеһованын ҹавабыны ҝөзләјәк.
Аллаһ һәмишә һәр етдијимиз дуаја бирбаша ҹаваб вермир вә О, һәмишә буну бизим ҝөзләдијимиз шәкилдә вә ја вахтда да етмир. Мәсәлән, Павел ‘бәдәниндәки нештәр’ барәсиндә дәфәләрлә дуа етмишди. Аллаһ Павелин проблемини арадан галдырмады, лакин она нөвбәти сөзләрлә тәсәлли верди вә ону мөһкәмләндирди: “Лүтфүм сәнә јетәр; чүнки Мәним гүдрәтим зәифликдә камилләшир” (2 Коринфлиләрә 12:7-9).
Биз дә әмин ола биләрик ки, Аллаһ мүәјјән проблеми арадан галдырмаса да, она таб ҝәтирә билмәмиз үчүн чыхыш јолу ҝөстәрәҹәкдир (1 Коринфлиләрә 10:13). Тезликлә Аллаһ бүтүн бәшәријјәти изтираблардан азад едәҹәкдир. Һәләлик исә, бизим вәзијјәтимизи “дуаны ешидән”ә мүраҹиәт етмәк мүәјјән дәрәҹәдә дәјишә биләр (Мәзмур 65:2).