Е’тибарлы рәһбәрлијә еһтијаҹ дујуругму?

БУ ҜҮН бир чохлары елә һесаб едирләр ки, хејри шәрдән ајырмағы баҹарырлар вә истәдикләри кими һәрәкәт етмәјә һаглары вар. Башгалары исә зәнн едирләр ки, инсана мәмнунлуг ҝәтирән һәр шеј мәгбулдур. Та гәдимдән инсан ҹәмијјәтинин әсасы кими һесаб олунан никаһ вә аилә, бу ҝүн бөһран вәзијјәтини јашајыр (Тәквин 3:5).

Мексикада јашајан Вероникаa илә баш верән һадисәни нәзәрдән кечирәк. О данышыр: “Бирҝә јашадығымыз аилә һәјатынын 15-ҹи илдөнүмү әрәфәсиндә әрим мәнә хәбәр верди ки, башга бир гадынла әлагәси вар. О деди ки, һәмин гадын ондан ҹавандыр вә өзүнү онун јанында хошбәхт һисс едир, буна ҝөрә дә ону тәрк етмәјәҹәкдир. Ән јахын достумун артыг јанымда олмајаҹағы фикри мәни сарсытды. Әввәлләр мән елә дүшүнүрдүм ки, инсана ән ҝүҹлү јараны јахын адамларынын өлүмү вурур. Лакин хәјанәтә таб ҝәтирмәк мәним үчүн даһа чәтин олду: мән севдијим адамы итирдим, о исә мәни инҹитмәјә давам едирди”.

Бу исә, артыг бошанмыш вә бир оғула саһиб олан, лакин өз аталыг борҹуну јеринә јетирмәкдән имтина едән 22 јашлы кишинин һадисәсидир. О елә һесаб едир ки, анасы онун вә онун оғлунун гајғысына галмалыдыр. Әҝәр анасы онун бүтүн тәләбләрини јеринә јетирмирсә, о өзүндән чыхыр вә санки тәрбијәсиз ушаг кими ону тәһгир етмәјә башлајыр. Бу ҹүр һүҹумларын гаршысында онун анасы өзүнү көмәксиз һисс едир.

Бу кими һаллара аз-аз тәсадүф олунмур. Бүтүн дүнјада бошанмаларын вә әрлә арвадын ајры јашадығы һалларын сајы ҝет-ҝедә артыр. Чохлу сајда ушаглар, јени һәјата башламаг үчүн ата вә ја анасынын евдән ҝетмәсинин аҹысыны чәкирләр. Бә’зи ҝәнҹ оғлан вә гызлар әтрафдакылара, о ҹүмләдән валидејнләринә гаршы һөрмәт һиссини итирмишләр вә онлар кечмиш нәсил үчүн ағласығмаз кими ҝөрүнән һәрәкәтләрә јол верирләр. Бир чох өлкәләрдә јенијетмәләр арасындакы ҹинси әлагә, наркоманија, ҹинајәткарлыг, һәмчинин мүәллимләрин вә валидејнләрин ушаглар тәрәфиндән гәтлә јетирилмәси ади һала чеврилиб. Јәгин сиз дә разылашаҹагсыныз ки, проблемләр јалныз аилә һәјатында вә ушагларын тәрбијәси мәсәләсиндә дејил, башга саһәләрдә дә јараныр.

Биз бу кими һадисәләрин шаһиди оланда, чашгынлыг ичиндә галырыг: “Ҹәмијјәтлә нә баш верир?” Әҝәр инсанлар һәгигәтән дә хејирлә шәри ајырд едә билирләрсә, бәс нә үчүн бу гәдәр һәлл олунмамыш проблемләр галыр? Биз рәһбәрлијә еһтијаҹ дујмуругму? Вахтын сынағындан чыхмыш е’тибарлы рәһбәрлији һарадаса тапмаг мүмкүндүрмү? Бир чох инсанлар Аллаһа инандыгларыны вә Онун Кәламына е’тибар етдикләрини иддиа етсәләр дә, дејәсән, бу онларын һәјатында һеч ҹүр әкс олунмур. Бәс Аллаһын мәсләһәти бизә неҹә көмәк едә биләр? Бу һагда нөвбәти мәгаләдә данышылаҹаг.

[Һашијә]