«Һәр шеј дәјишди...»

БИР киши, Јеһованын Шаһиди олан ики гыз она баш чәкәндән сонра бу сөзләри јазмышдыр: «Аллаһын мәнә ҝөндәрдији ики “мәләк” һаггында сәбирсизликлә гоһумларыма данышмаг истәјирәм». Бир нечә һәфтә бундан габаг, онун 45 ил бирҝә һәјат сүрдүјү арвады вәфат етмишдир. Бу киши бәрк хиффәт чәкирди. Боја-баша чатмыш ушаглары она тәсәлли верирдиләр, лакин онлар узагда јашајырдылар. Дост вә гоншуларындан она баш чәкән јох иди.

Бу киши онун јанына ҝәлмиш гызлара, «мән Аллаһдан узағам вә Она дуа етмирәм», деди. Гызлар она башсағлығы вердиләр вә «Өлән әзизләримиз үчүн һансы үмид вар?» трактатыны гојдулар. Киши һәмин ахшам трактаты охуду вә тәскинлик тапды.

Бир нечә ҝүндән сонра мәсиһчи гызлар бу кишијә тәкрарән баш чәкдиләр. Онлар нараһат олдуглары үчүн тәзәдән она дәјмәји гәрара алдыгларыны сөјләдиләр. О, сонра јазыр: «Мән инана билмирәм! Ики нәфәр тамамилә јад адам мәнә гајғы ҝөстәрир вә әһвалымы хәбәр алыр». Гызларын Мүгәддәс Китабдан охудуглары сөзләр ону чох руһландырды. Онлар јенә дә ҝәләҹәкләрини сөјләдиләр. Бу иш она дәрин тә’сир бағышладығындан бу һагда мәктуб јазмаг гәрарына ҝәлди вә бу мәктубу јахынлыгда јерләшән Јеһованын Шаһидләринин Падшаһлыг Залына ҝөндәрди.

Оғлуна јахын олмаг үчүн бу киши көчмәк гәрарына ҝәлди. Көчмәздән әввәл Јеһованын Шаһидләринин јығынҹағында олду. Мәсиһчи гызлардан биринин аиләси ону наһара дә’вәт етди. О јазыр: «Мән көчүрәм, амма һеч вахт о гызлары вә јығынҹағынызы унутмајаҹағам вә сизин үчүн дуа едәҹәјәм. Бәли, мән инди даима дуа едирәм. Бу гызларын сајәсиндә һәр шеј дәјишди. Мән һәмишә онлара миннәтдар олаҹағам».