Јашлы олса да, тәнһалыға гапылмады
БИР чохлары јаша долдугҹа тагәтдән дүшүр вә өзләрини ҹәмијјәтдән тәҹрид едирләр. Исвечрәнин Ҹеневрә шәһәриндә 95 јашында вәфат едән Фернан Риварол белә инсанлардан дејилди. О тәк галырды, чүнки һәјат јолдашы вәфат етмиш, гызы исә аиләси илә ајры јашајырды. Вахтынын чох һиссәсини евдә кечирмәли олса да, о тәнһа дејилди. О, тез-тез гонаг отағында маса архасында әјләшәрәк инсанлара зәнҝ едир вә онларла Мүгәддәс Китаб һаггында данышырды.
Мараглы һадисәләрлә зәнҝин һәјатында елә вахт олмушдур ки, Фернан ҹәмијјәтдән сөзүн әсл мә’насында тәҹрид едилмишди. 1939-ҹу илдә Авропада Икинҹи Дүнја мүһарибәси башламаздан бир гәдәр әввәл Фернан вә һәјат јолдашы Јеһованын Шаһиди олдулар вә хидмәтдә фәал иштирак етмәјә башладылар. Мүгәддәс Китабдан өјрәндикләринә әсасән о, һеч кимә зәрәр вурмамаг гәрарына ҝәлди. Бу сәбәбдән о, ишини итирди вә үмумиликдә беш ил јарым һәбсханада јатды. Бу вахт әрзиндә о, јолдашындан вә балаҹа гызындан ајры дүшмүшдү.
Кечмишини јада салараг Фернан дејир: «Бир чохлары дүшүнүрдүләр ки, мән даими ишими атараг аиләми аҹ-сусуз бурахдым. Инсанлар мәнә нифрәтлә бахыр вә ҹинајәткар кими давранырдылар. Лакин о чәтин ҝүнләрими дүшүнәндә илк нөвбәдә јадыма Јеһованын бизә неҹә дајаг олдуғу вә көмәк етдији дүшүр. О вахтдан чох илләр өтсә дә Јеһоваја олан е’тибарым зәифләмәјиб».
Фернанын иманы ону Мүгәддәс Китаба әсасланан үмидини телефонда башга инсанларла бөлүшмәјә тәшвиг едирди. Һәмсөһбәти мараг ҝөстәрәндә, о она Мүгәддәс Китаба әсасланан әдәбијјат ҝөндәрирди. Бир мүддәт сонра јенидән һәмин адама зәнҝ едиб ҝөндәрдији әдәбијјат барәдә фикрини өјрәнирди. Бә’зән инсанлар Фернана миннәтдарлыг мәктубу јазырдылар. Бу ону чох севиндирирди.
Ола билсин, Фернан кими, бир нәфәр сизә баш чәксин вә ја зәнҝ етсин. Нә үчүн онун ҝәтирдији хәбәрлә таныш олмајасыныз? Јеһованын Шаһидләри өз е’тигадларыны сизинлә бөлүшмәјә һәмишә шаддырлар.