Сиз чәтинликләрин өһдәсиндән ҝәлә биләрсиниз
ЈАШАДЫҒЫМЫЗ бу чәтин ҝүнләрдә чохларынын башына бәлалар ҝәлир. Анҹаг Аллаһа олан мәһәббәт вә Онун принсипләринә бәсләдикләри сәдагәтин сајәсиндә мәсиһчиләр бу чәтинликләрин өһдәсиндән уғурла ҝәлирләр. Бу неҹә мүмкүндүр? Бу суалын ҹавабыны Иса Мәсиһин бир мәсәлиндә ајдын ҝөрмәк олар. Орада Иса өз итаәткар шаҝирдләрини «евини даш үзәриндә гуран ағыллы адама» бәнзәдирди. О дејирди: «Јағыш јағды, селләр ҝәлди, јелләр әсди вә о евә һүҹум етди. Ев учмады; чүнки тәмәли даш үстә гурулмушду» (Матта 7:24, 25).
Фикир верин: мәсәлдәки адам ағыллы олса да, онун да башына јағыш, селләр, ҝүҹлү күләкләрә бәнзәр бәлалар ҝәлир. Иса бу мәсәлдә шаҝирдләринин проблемсиз, сакит, динҹ һәјат сүрәҹәкләрини демәди (Мәзмур 34:19; Јагуб 4:13-15). Әксинә, о ҝөстәрди ки, бу ҹүр чәтинликләрә габагҹадан һазырлашмаг вә онлара таб ҝәтирмәк мүмкүндүр.
Иса мәсәлинә бу сөзләрлә башлады: «Мәним бу сөзләрими ким ешидиб онлары һәјата кечирәрсә, ону өз евини даш үзәриндә гуран ағыллы адама бәнзәдирәм». Иса бурада ев тикмәкдән јох, мәсиһчи шәхсијјәтини вә давранышыны формалашдырмагдан данышырды. Мәсиһин сөзләринә гулаг асанлар ағылла вә дүшүнҹә илә һәрәкәт едирләр. Онлар өјрәндикләрини тәтбиг етмәклә һәјатларыны Мәсиһин ‘даша’ бәнзәјән тә’лимләри үзәриндә гурурлар. Мәсәлдә бир мараглы ҹәһәт дә вар: даш торпағын үзүндә дејилди. Она чатмаг үчүн «газыб дәринә» ҝетмәк лазым иди (Лука 6:48). Ејнилә, Мәсиһин шаҝирдләри дә вар гүввәләри илә чалышараг, Аллаһа хош олан кејфијјәтләри јетишдирирләр. Бу, онлары Аллаһла јахынлашдырыр (Матта 5:5-7; 6:33).
Бәс јағыша, селә, бәрк күләјә бәнзәр чәтинликләр мәсиһчиләрин ‘евинин’ тәмәлинин мөһкәмлијини сынајанда онлар нә едирләр? Мәсиһин тә’лимләринә бәсләдикләри сәдагәт вә јетишдирдикләри диҝәр кејфијјәтләр белә сынаглар заманы онлары мөһкәмләндирир. Әләлхүсус, гаршыдан ҝәлән Һар-Меҝидон мүһарибәсиндә бу кејфијјәтләр онларын әзмли олмаларына көмәк едәҹәк (Матта 5:10-12; Вәһј 16:15, 16). Бәли, Мәсиһин тә’лимләринә әсасән јашајанларын чоху сынагларын өһдәсиндән уғурла ҝәлирләр. Буну сиз дә баҹараҹагсыныз (1 Петер 2:21-23).