Аллаһ сизи ҝөрүрмү?

ДАҺИ Јарадан Јеһова ҝөрә билирми? Әлбәттә, ҝөрә билир! Мүгәддәс Китаб ајдын мүлаһизә јүрүдүр: «Ҝөзләрә гурулуш верән ҝөрмәзми?» (Мәзмур 94:9). Јеһова инсанларын ҝөрә билдијиндән даһа чох шеј ҝөрүр. О бизим тәкҹә заһиримизи ҝөрмүр, һәм дә үрәјимизи ‘арашдырыр’ вә ‘јохлајыр’ (Сүлејманын мәсәлләри 17:3; 21:2). О бизим дүшүнҹәләримизи, нијјәтләримизи вә ән дәрин арзуларымызы мүәјјән едә билир.

Јеһова һәјатда үзләшдијимиз чәтинликләрдән аҝаһдыр вә јалварышларымыза ҹаваб верир. Мәзмурчу јазырды: «Рәббин ҝөзү салеһләрин үзәриндәдир, гулаглары онларын фәрјадларына ачыгдыр. Рәбб гәлбисыныглара јахындыр, О, руһән әзилмишләри гуртарыр» (Мәзмур 34:15, 18). Јеһованын вәзијјәтимизи баша дүшдүјүнү вә үрәкдән ҝәлән јалварышларымыза ҹаваб вердијини билмәк неҹә дә тәсәлливериҹидир!

Јеһова Аллаһын һәтта ҝизлиндә едилән ишләрдән дә хәбәри вар. Һәгигәтән дә, Аллаһын «ҝөзләри өнүндә һәр шеј чылпаг вә ачыгдыр. Она һесабат верәҹәјик» (Ибраниләрә 4:13). Демәли, истәр јахшы олсун, истәр пис, һеч бир һәрәкәтимиз Аллаһын диггәтиндән јајынмыр (Сүлејманын мәсәлләри 15:3). Мәсәлән, Јарадылыш 6:8, 9 ајәләриндә дејилир ки, «Нуһ Рәббин ҝөзүндә лүтф тапды» вә «о, Аллаһа јахын иди». Бәли, Нуһ итаәткар олдуғуна вә Аллаһын салеһлик нормалары илә јашадығына ҝөрә Јеһованын лүтфүнү вә хејир-дуасыны газанмышды (Јарадылыш 6:22). Нуһун мүасирләри исә, гәддар вә позғун идиләр. Аллаһ бу вәзијјәтә ҝөз јуммады. О «ҝөрдү ки, јер үзүндәки инсанларын шәр әмәлләри чохдур вә һәр заман онларын үрәјиндәки фикирләр вә нијјәтләр пислијә доғру јөнәлир». Нәтиҹәдә, Јеһова писләри мәһв етди, анҹаг Нуһу аиләси илә бирликдә сағ сахлады (Јарадылыш 6:5; 7:23).

Бәс сиз Јеһованын ҝөзүндә лүтф тапаҹагсынызмы? Доғрудан да, Јеһованын «ҝөзләри јер үзүнү сејр едир ки, үрәји бүтүнлүклә Онунла оланлары гүввәтләндирсин» (2 Салнамәләр 16:9). Тезликлә О, јер үзүндән бүтүн писләри силиб атаҹаг, һәлимләри исә хилас едәҹәк (Мәзмур 37:10, 11).