Мәсиһчиләр буғда кими хәлбирләнәндә
ӨЛҮМҮНДӘН бир аз әввәл, Иса давамчыларына хәбәрдарлыг етди: «Шејтан сизләри тәләб етди ки, буғда кими хәлбирләсин» (Лука 22:31). Бу нә демәк иди?
Исанын дөврүндә буғда бичини чохлу вахт тәләб едән әзијјәтли иш иди. Әввәлҹә бичинчиләр тарладан сүнбүлләри јығырдылар. Сонра сүнбүлләри дәнәләмәк үчүн онлары бәрк бир шејлә дөјүр, ја да үстүндән һејвана гошулмуш киршәјә бәнзәр тохмаг сүрүрдүләр. Нәтиҹәдә дән саплагдан вә габыгдан ајрылырды. Сонра әкинчи гарышығы һаваја совурурду. Дәнләр, јәни бүтөв тохумлар хырмана дүшүр, күләши исә јел апарырды. Ахырда дәнләри јахшы-јахшы хәлбирләјирдиләр ки, зибилдән тәмизләнсин.
Исанын дедији кими, Шејтан һәм о дөврдә, һәм дә бу ҝүн мәсиһчиләрә амансыз һүҹумлар едир (Ефес. 6:11). Әлбәттә, гаршылашдығымыз һәр бир чәтинлији Шејтандан ҝөрмәк дүзҝүн олмазды (Ваиз 9:11). Бунунла белә, Шејтан нөгсансызлығымызы сарсытмаг үчүн әлиндә олан бүтүн имканлардан истифадә етмәјә чалышыр. Мәсәлән, о биздә вар-дөвләт далынҹа гачмаға, зәрәрли әјләнҹә нөвләринә вә ја әхлагсыз һәрәкәтләрә һәвәс ојада биләр. Бизә мәктәб вә ја иш јолдашларымыз, һәмчинин иманымыза шәрик олмајан гоһумларымыз васитәсилә тәзјиг ҝөстәрә биләр ки, дүнјанын тәклиф етдији тәһсил вә иш имканларындан там истифадә едәк. Үстәлик, Аллаһ гаршысында нөгсансызлығымызы итирәк дејә, Шејтан ачыг-ашкар тәгибләрдән дә истифадә едә биләр. Әлбәттә, бизи мәҹази мәнада хәлбирләмәк үчүн Шејтанын чохлу башга үсуллары да вар.
Биз бу ҝүҹлү дүшмәнә неҹә гаршы дура биләрик? Буну өз ҝүҹүмүзә едә билмәрик, чүнки Шејтан биздән ҝүҹлүдүр. Лакин билирик ки, Јеһова Шејтандан гат-гат ҝүҹлүдүр. Әҝәр Јеһоваја бел бағласаг, таб ҝәтирәк дејә, дуада тәкидлә мүдриклик вә ҹәсарәт истәсәк вә Онун рәһбәрлијинә там етибар етсәк, Шејтанын һүҹумларына гаршы дура билмәк үчүн О бизи мөһкәмләндирәҹәк (Мәз. 25:4, 5).
Сынагларла үзләшәндә, «хејирлә шәри ајырд етмәк» габилијјәтимиз олмалыдыр ки, Шејтанын фитнәләринә ујмајаг (Ибр. 5:13, 14). Јеһова бизә бу ҹүр габилијјәти инкишаф етдирмәјә көмәк едә биләр. Сонра нә олурса-олсун, дүз јолдан дөнмәмәлијик. Әҝәр Јеһованын рәһбәрлијинә әмәл едириксә, О, бизә ҹәсарәт верәҹәк ки, дүзҝүн давранмаға гәтијјәтли олаг (Ефес. 6:10).
Шејтан бизи буғда кими хәлбирләмәјә чалыша биләр. Анҹаг Јеһованын ҝүҹү сајәсиндә мөһкәм иманла Шејтана гаршы дура биләрик (1 Пет. 5:9). Бәли, Јеһованын Кәламы бизи әмин едир: «Иблисә... гаршы дурун вә о, сиздән гачаҹагдыр» (Јаг. 4:7).