Әзиз адамын өлүмү
2007-ҹи ил 17 ијул, чәршәнбә ахшамы, ахшам саат једди радәләриндә Сан-Паулонун мәркәзиндә Бразилијанын ән бөјүк һава лиманында сәрнишин тәјјарәси учуш-енмә золағындан чыхды. Тәјјарә әсас јолу кечиб јүк анбарына ҝирди. Бу бәдбәхт һадисәдә тәхминән 200 инсан һәјатыны итирди.
БРАЗИЛИЈАНЫН ән дәһшәтли тәјјарә гәзасы һесаб олунан бу бәдбәхт һадисә доғмаларыны итирәнләрин јаддашында һеч вахт силинмәјәҹәк из бурахды. Јахыныны итирәнләрдән бири дә Клаудите иди. Тәјјарәнин гәзаја уғрадығыны о, телевизордан ешитди. Онун оғлу Ренато да тәјјарәдә иди. Онун ҹәми 26 јашы варды. Октјабр ајында евләнмәји планлашдырырды. Клаудите чарәсиз һалда оғлунун ҹиб телефонуна зәнҝ едәрәк онунла әлагә јаратмаға чалышды, анҹаг ҹаваб верән олмады. О, үзүстә јерә дүшүб, һөнкүр-һөнкүр ағлады.
Антже 1986-ҹы илин јанвар ајында фаҹиәли автомобил гәзасында нишанлысыны итирмишди. О, хәбәри ешидәндә ҝүҹлү сарсынты кечирди. «Әввәлҹә гулагларыма инанмадым. Мәнә елә ҝәлирди ки, пис јуху ҝөрүрәм, гәфләтән ојаныб бунун һәгигәт олмадығыны ҝөрәҹәјәм. Тир-тир әсир вә дәһшәтли ағры һисс едирдим, санки кимсә гарныма ағыр зәрбә вурмушду». Сонракы үч ил әрзиндә Антже депрессијадан әзијјәт чәкди. Гәзанын үстүндән 20 илдән чох кечсә дә, Антже баш верәнләри хатырлајанда һәлә дә тир-тир әсир.
Бу ҹүр фаҹиә илә үзләшән, јәни доғма адамыны ҝөзләнилмәдән итирән инсанын кечирдији һиссләри садәҹә сөзләрлә ифадә етмәк гејри-мүмкүндүр. Белә анларда инсан сарсынты кечирир, мәјуслуға гапылыр, донуб-галыр, гулагларына инанмыр. Лакин өлүмүн ҝөзләнилмәз олмадығы һалда белә, мәсәлән, әзиз адам узунмүддәтли хәстәликдән сонра өләндә дә, кәдәр һисси чох ҝүҹлү ола биләр. Һеч ким әзиз адамынын өлүмүнә там һазыр олмур. Ненсинин анасы узун мүддәт хәстә јатандан сонра 2002-ҹи илдә вәфат етди. Бунунла белә, анасы өлән ҝүнү Ненси сарсынты ичиндә хәстәханада јерә чөкдү. Она елә ҝәлирди ки, һәјат бүтүн мәнасыны итириб. О вахтдан беш ил кечиб, лакин һәлә дә анасы јадына дүшәндә Ненси ағлајыр.
Доктор Һоли Приҝерсон демишдир: «Үз верән иткинин вурдуғу јара һеч вахт сағалмыр, инсанлар она садәҹә алышырлар». Һәр неҹә олурса олсун, әҝәр өлүм әзиз адамынызы әлиниздән алыбса, дүшүнә биләрсиниз: «Өләнә ҝөрә гүссә чәкмәк дүзҝүндүрмү? Әзиз адамын иткисинә неҹә дөзмәк олар? Ону нә вахтса ҝөрәҹәјәмми?» Бу вә диҝәр суаллар нөвбәти мәгаләдә мүзакирә олунаҹаг.
[Иҹазә илә]
EVERTON DE FREITAS/AFP/Getty Images