Аллаһа јахынлашын
«Аллаһы тәглид един»
ЛҮТФКАРЛЫГ. Шәфгәт. Бағышламаг. Мәһәббәт. Тәәссүф ки, бу кими хүсусијјәтләри тәзаһүр етдирән инсанлара бу ҝүн надир һалларда раст ҝәлирик. Бәс сизә һеч елә ҝәлибми ки, нә гәдәр чалышсаныз да, бу ҹүр нәҹиб кејфијјәтләрә һеч вахт саһиб ола билмәјәҹәксиниз? Бизи мүһакимә едән үрәјимиз бизи инандырмаға чалыша биләр ки, бир чох манеәләр, мәсәлән, мөһкәм көк салмыш пис вәрдишләримиз, јахуд кешмәкешли кечмишимиз бу кејфијјәтләри инкишаф етдирмәјимизә јол вермәјәҹәк. Анҹаг Мүгәддәс Китаб тәсәлли верир: Јараданымыз билир ки, биз өзүмүздә мүсбәт кејфијјәтләри тәрбијә етмәк имканына маликик.
Аллаһын Кәламы һәгиги мәсиһчиләрә нәсиһәт едир: «Беләликлә, севимли өвладлар кими, Аллаһы тәглид един» (Ефеслиләрә 5:1). Бу сөзләр Аллаһын Өз хидмәтчиләринә етибар етдијини чох ҝөзәл ифадә едир. Аллаһ Өз хидмәтчиләринә неҹә етибар едә биләр? Јеһова Аллаһ инсаны Өз сурәтиндә вә бәнзәриндә јаратды (Јарадылыш 1:26, 27). Беләликлә дә, инсанлара Өз кејфијјәтләринә бәнзәр кејфијјәтләр вердиa. Буна ҝөрә дә Мүгәддәс Китаб мәсиһчиләри ‘Аллаһы тәглид етмәјә’ тәшвиг едәндә санки Јеһова Өзү онлара дејир: «Мән сизә инанырам. Билирәм ки, гејри-камиллијинизә бахмајараг, мүәјјән дәрәҹәдә Мәнә бәнзәјә биләрсиниз».
Аллаһын һансы кејфијјәтләрини тәглид едә биләрик? Ҹавабы ајәнин контекстиндән тапмаг олар. Диггәт јетирин ки, Павел Аллаһы тәглид етмәк нәсиһәтинә «беләликлә» сөзү илә башлајыр. Бу сөз ајәни лүтфкарлыг, шәфгәт вә бағышламаг һагда данышылан әввәлки ајә илә бағлајыр (Ефеслиләрә 4:32; 5:1). Аллаһы тәглид етмәјә тәшвиг етдикдән сонра, нөвбәти ајәдә Павел мәсиһчиләри фәдакар мәһәббәт ҝөстәрәрәк јашамаға чағырыр (Ефеслиләрә 5:2). Доғрудан да, лүтфкарлыг, шәфгәт, мәһәббәт ҝөстәрмәјә, үрәкдән бағышламаға ҝәлдикдә, һәр биримизин тәглид етмәси үчүн мүкәммәл нүмунә вар. Бу, Јеһова Аллаһдыр.
Бизи Аллаһа бәнзәмәјә нә тәшвиг етмәлидир? Павелин сөзләриндә бизи һәрәкәтә тәшвиг едән тутарлы сәбәб ҝәтирилир: «Севимли өвладлар кими, Аллаһы тәглид един». Бу фикир сизин үрәјинизи риггәтә ҝәтирмирми? Јеһова хидмәтчиләринә нәвазишлә севдији өвладлары кими бахыр. Балаҹа оғлан атасына охшамаға чалышдығы кими, һәгиги мәсиһчиләр дә сәмави Аталарына бәнзәмәк үчүн әлләриндән ҝәләни едирләр.
Јеһова инсанлары Ону тәглид етмәјә мәҹбур етмир. Әксинә, О, ләјагәтимизә һөрмәт ҝөстәрәрәк, бизә ирадә азадлығы вериб. Буна ҝөрә дә, Аллаһы тәглид едиб-етмәјәҹәјимизи өзүмүз сечирик (Ганунун тәкрары 30:19, 20). Анҹаг һеч вахт јаддан чыхармајын ки, Аллаһа мәхсус кејфијјәтләри тәзаһүр етдирмәк сизин имканыныз дахилиндәдир. Сөзсүз ки, Аллаһы тәглид етмәк үчүн әввәлҹә Ону јахшы танымаг лазымдыр. Онун мисилсиз хүсусијјәтләри милјонларла инсаны ҹәлб едәрәк Ону тәглид етмәјә тәшвиг етмишдир. Мүгәддәс Китаб сизә Аллаһын кејфијјәтләри вә јоллары һагда чох шеј өјрәнмәјә көмәк едә биләр.
[Һашијә]
a Колослулара 3:9, 10 ајәләри ҝөстәрир ки, Аллаһын сурәтиндә јарадылмаг мүәјјән хүсусијјәтләрә саһиб олмаг демәкдир. Аллаһы разы салмаг истәјәнләр ‘Јараданын сурәтинә бәнзәр тәрздә тәзәләнән’ ‘јени мәнлији’ ҝејинмәјә тәшвиг олунурлар.