Аллаһа јахынлашын
Һеч вахт әдаләтсизлик етмәјән Һаким
ӘДАЛӘТ. Дүзҝүнлүк. Гәрәзсизлик. Бу ҹүр нәҹиб кејфијјәтләр сизи ҹәлб етмирми? Биз инсанларда анаданҝәлмә тәләбат вар ки, бизимлә әдаләтлә рәфтар етсинләр. Тәәссүфләр олсун ки, буҝүнкү дүнјада әдаләтсизлик баш алыб ҝедир. Анҹаг там етибар едә биләҹәјимиз бир Һаким вар. Һәмин Һаким һәмишә дүзҝүн давранан Јеһова Аллаһдыр. Бу, Јеһова илә Ибраһим арасында олан вә Јарадылыш 18:22-32 ајәләриндә јазылмыш сөһбәтдә ајдын олмушдуa.
Јеһова Ибраһимә Содом вә Һоморрадакы вәзијјәти јохламаг гәрарыны билдирәндә Ибраһим орада ола биләҹәк салеһ инсанлар, еләҹә дә гардашы оғлу Лут үчүн тәшвишә дүшдү. Ибраһим Јеһоваја јалварараг деди: «Доғруданмы, Сән салеһи дә ҝүнаһкарла бирҝә мәһв едәҹәксән? Әҝәр бу шәһәрдә әлли нәфәр салеһ адам олса... әлли нәфәр салеһ адамын хатиринә бу јерә рәһм етмәјәҹәксән?» (23, 24-ҹү ајәләр). Аллаһ ҹәми 50 нәфәр салеһ тапылса, һәмин шәһәрләрә рәһм едәҹәјини деди. Ибраһим, адамларын сајы тәдриҹән он нәфәрә енәнә кими, беш дәфә дә Јеһоваја јалварды. Һәр дәфә дә Аллаһ билдирирди ки, әҝәр орада дедији гәдәр салеһ инсан тапылса, шәһәрләри дағытмајаҹаг.
Ибраһим Аллаһла мүбаһисәми едирди? Әсла! Бу, онун тәрәфиндән һәдсиз дәрәҹәдә дикбашлыг оларды. Ибраһимин данышығында дәрин һөрмәт вә тәвазөкарлыг һисс олунурду. О өзүнү «тоз вә күл» адландырырды (27, 30-32-ҹи ајәләр). Бундан башга, Ибраһимин сөзләриндә Јеһованын әдаләтли Аллаһ олдуғуна әминлик һисс олунурду. Аллаһын салеһ адамы ҝүнаһкарла бирҝә өлдүрмәсинин ағласығмаз олдуғуну Ибраһим бир дәфә дә јох, дүз ики дәфә «Сән буну еләмәзсән» демәклә вурғулады. Јеһованын садиг хидмәтчиси әмин иди ки, «дүнјанын Һакими белә әдаләтсизлик етмәз» (25-ҹи ајә).
Ибраһим дедикләриндә јанылырдымы? Һәм һә, һәм дә јох. Содом вә Һоморрада ән азы он нәфәр салеһ адамын олдуғуну дүшүнмәклә о сәһв едирди. Лакин Аллаһын һеч вахт ‘салеһи дә ҝүнаһкарла бирҝә мәһв етмәјәҹәјини’ демәкдә о, тамамилә һаглы иди. Аллаһ әхлагсызлыгла долу шәһәрләри мәһв едәндә салеһ Лут вә онун ики гызы мәләкләрин көмәјилә гуртулду (2 Петер 2:7-9).
Бу һадисәдән Јеһова һагда нә өјрәнирик? Ибраһимә шәһәрләри јохламаг нијјәтини сөјләмәклә, әслиндә Јеһова ону һиссләрини билдирмәјә тәшвиг едирди. Сонра досту Ибраһим кечирдији нараһатчылыглары ифадә едәндә Јеһова ону сәбирлә динләди (Јешаја 41:8). Бу һадисә бизә Јеһованын һәлим Аллаһ олдуғуну вә јер үзүндә јашајан хидмәтчиләрини алчалтмадығыны, әксинә, онларын ләјагәтинә һөрмәт етдијини неҹә дә ҝөзәл баша салыр! Ајдындыр ки, биз Јеһоваја, һеч вахт әдаләтсизлик етмәјән Һакимә, там етибар едә биләрик.
[Һашијә]
a Бу һалда, Јеһованы Онун адындан данышан мәләк тәмсил едирди. Диҝәр нүмунә Јарадылыш 16:7-11, 13 ајәләриндә јазылыб.
[14-ҹү сәһифәдәки шәкил]
Ибраһим Содом вә Һоморра шәһәрләри үчүн Јеһоваја јалварырды