«Һәлә әҹәлим чатмамышды»

Ири зибил машыны сүрүҹүнүн нәзарәтиндән чыхды. Јолдан гыраға чыхыб сәки илә ҝедән бир әр-арвады вә 23 јашлы ҝәнҹ оғланы вурду. «Нју-Јорк Сити» гәзетинин вердији мәлумата ҝөрә, әр-арвад јериндәҹә кечинди, ҝәнҹ оғлан исә алдығы зәрбәдән һушуну итирди. Өзүнә ҝәлиб баш верәнләри биләндә, онун ағлына илк ҝәлән фикир бу олмушду: «Бунларын һәгигәт олдуғуна инана билмирәм. Аман Аллаһ, ҹанымы мәнә бағышла». Сонра о демишди: «Һәлә әҹәлим чатмамышды».

ЈӘГИН сиз буна бәнзәр һадисәләр ешитмисиниз. Бәла кимдәнсә јан кечәндә, инсанлар дејирләр ки, һәлә онун әҹәли чатмамышды, амма кимсә ҝөзләнилмәз һадисә нәтиҹәсиндә өләндә: «Бунунку да бура кими имиш» вә ја «Аллаһ билән мәсләһәтдир», гәнаәтинә ҝәлирләр. Буну истәр таленин, гисмәтин, алын јазысынын, истәрсә дә Аллаһын ајағына јазсынлар, мәнтиг етибарилә һамысы ејни шеји фикирләшир. Чохлары инаныр ки, һәјатларында баш верән һадисәләр вә онларын нәтиҹәләри әввәлҹәдән јазылыб вә буну һеч ҹүр дәјишмәк мүмкүн дејил. Инсанлар бу ҹүр гәнаәтә тәкҹә кимсә өләндә, јахуд һансыса һадисә баш верәндә ҝәлмирләр; бу фикир та гәдимдән мөвҹуддур.

Мәсәлән, гәдим бабиллиләр улдузларын вә онларын һәрәкәтләринин инсанларын ишләринә тәсир етдијинә инанырдылар. Буна ҝөрә дә рәһбәрлик үчүн ҝөјләрдән ишарә вә әламәт ахтарырдылар. Јунанлар вә ромалылар, киминин бәхтини пис, кимининкини јахшы јазмаг сәлаһијјәти илә һәтта баш аллаһлар сајылан Зевс вә Јупитерин ирадәсини белә, һәрдән санки көлҝәдә гојан тале илаһәләринә ситајиш едирдиләр.

Шәрг өлкәләриндә, һиндулар вә буддистләр инанырлар ки, инсанын һазырда башына ҝәләнләр онун кечмиш һәјатда етдикләринин нәтиҹәсидир вә онун индики һәјатдакы һәрәкәтләри ҝәләҹәк һәјатында нәләрлә үзләшәҹәјини мүәјјән едир. Христиан аләминин бир чох килсәләри дә дахил олмагла, башга динләр дә өзләринин алын јазысы тәлими илә јухарыда садаланан инанҹлары гәбул етмиш олурлар.

Буна ҝөрә дә тәәҹҹүблү дејил ки, елми ҹәһәтдән инкишаф етдији вә һәр шејә објектив бахылдығы ҝүман едилән әсримиздә бир чох инсанлар һәлә дә һәјатдакы вәзијјәтләрини, ҝүндәлик ишләринин нәтиҹәсини вә үмумијјәтлә һәјатларыны таленин идарә етдијинә вә она мүдахилә етмәк үчүн чох аз шеј едә биләҹәкләринә инанырлар. Сиз дә ми белә фикирләширсиниз? Доғруданмы һәјатдакы һадисәләр, мүвәффәгијјәтләр вә уғурсузлуглар, һәтта дүнјаја ҝәлишимиз вә өлүмүмүз габагҹадан мүәјјәнләшдирилиб? Һәјатынызы талеми идарә едир? Ҝәлин ҝөрәк Мүгәддәс Китаб бу суаллара неҹә ҹаваб верир.

[Иҹазә илә]

Ken Murray/New York Daily News