Иса пејғәмбәрдән нә өјрәнирик?

Хошбәхтлијә неҹә наил олмаг олар?

Хошбәхтлијин ачары нәдир?

▪ Иса пејғәмбәр өзүнүн ән мәшһур тәблиғинә хошбәхтлик һаггында сөзләрлә башлады. О деди: «Руһани немәтләрә сусајанлар нә хошбәхтдирләр» (Матта 5:3). Бу сөзләрлә о, нә демәк истәјирди? Руһани немәтләр дедикдә нә нәзәрдә тутулур?

Биз, о ҹүмләдән һејванлар јашамаг үчүн нәфәс алмаға, јемәк јемәјә вә су ичмәјә еһтијаҹ дујуруг. Лакин биз хошбәхт олмаг үчүн, һејванлардан фәргли олараг, даһа бир тәләбатымызы — һәјатын мәнасыны баша дүшмәк тәләбатыны да өдәмәлијик. Бу тәләбаты өдәмәкдә јалныз Јарадан көмәк едә биләр. Буна ҝөрә Иса пејғәмбәр демишдир: «Инсан јалныз чөрәклә јашамамалыдыр, Јеһованын ағзындан чыхан һәр сөзлә јашамалыдыр» (Матта 4:4). Руһани немәтләрә сусајан инсанлар она ҝөрә хошбәхтдирләр ки, онларын «хошбәхт Аллаһ» олан Јеһова илә сых мүнасибәтләри вар. Аллаһ исә Өз нөвбәсиндә онлара ҝәләҹәјә үмид верир вә бу да онларын хошбәхтлијинә сәбәб олур (1 Тимотејә 1:11).

Иса инсанлара үмид әлдә етмәјә неҹә көмәк едирди?

▪ Иса демишди: «Һәлимләр нә хошбәхтдирләр, чүнки Јер онларын олаҹаг» (Матта 5:5). Иса хәстәләрә шәфа вермәклә вә өлүләри дирилтмәклә инсанлара үмид верирди. Бундан әлавә, Иса јер үзүнә үмид хәбәри илә ҝәлмишди. «Аллаһ дүнјаны о гәдәр севир ки, јеҝанә Оғлуну онун уғрунда гурбан верди; буну она ҝөрә етди ки, она иман едәнләрин һеч бири мәһв олмасын, һамысы әбәди јашасын», — дејә о изаһ етди (Јәһја 3:16). Аллаһа табе олан инсанлар јер үзүндә әбәди һәјат мүкафатыны алаҹаглар. Һәлим вә һеч вахт гоҹалмајан инсанлар арасында јашамағын нә демәк олдуғуну бир тәсәввүр един! Мәһз буна ҝөрә дә Мүгәддәс Китабда дејилир: «Үмидинизә севинин» (Ромалылара 12:12). Иса һәмчинин бу ҝүн дә неҹә хошбәхт ола биләҹәјимизи дә изаһ етди.

Исанын сөзләринә әсасән, хошбәхтлијә неҹә наил олмаг олар?

▪ Иса Мәсиһ инсанлар арасында мүнасибәтләрә, никаһа, һәлимлик вә ја тәвазөкарлыға вә мадди шејләрә мүнасибәтә даир фајдалы мәсләһәтләр вермишди (Матта 5:21—32; 6:1—5, 19—34). Онун мәсләһәтләринә риајәт етсәк, индики һәјатда хошбәхтлијә наил ола биләрик.

Сәхавәтли олмаг хошбәхтлијә сәбәб олур (Һәвариләрин ишләри 20:35). Мәсәлән, Иса бир дәфә демишди: «Гонаглыг верәндә евинә касыблары, шикәстләри, чолаглары, корлары чағыр. Бах, онда үрәјин шад олаҹаг, чүнки бу адамларын сәнә вермәјә һеч нәләри јохдур» (Лука 14:13, 14). Өзүнү јох, башгаларыны дүшүнән инсанлар сөзүн әсил мәнасында хошбәхтлијә наил олурлар.

Илк нөвбәдә хошбәхтлијә нә сәбәб олур?

▪ Инсанлар үчүн бир шеј едәндә бу бизә севинҹ ҝәтирир, амма Аллаһ үчүн етдијимиз шејләр исә бизә хошбәхтлик ҝәтирир. Бу, һәтта өз ушагларыны севән вә онлара ҝөрә гүрур дујан валидејнләрин хошбәхтлији илә мүгајисә олуна билмәз. Иса ҹамаата тәлим верән заман баш верән һадисәдән буну јахшы ҝөрмәк олар. «Иса данышаркән ҹамаатын арасындан бир гадын уҹадан деди: “Сәни бәтниндә дашыјан вә дөшләри илә әмиздирән гадын нә хошбәхтдир!” Анҹаг Иса деди: “Әксинә, Аллаһын сөзүнү ешидиб она әмәл едәнләр хошбәхтдирләр!”» (Лука 11:27, 28).

Иса Аллаһын ирадәсини јеринә јетирмәкдән севинҹ вә мәмнунлуг дујурду. Аллаһын ирадәси одур ки, бүтүн инсанлар әбәди һәјата үмид верән хош хәбәри ешитсинләр. Бир гадынла бу үмиди бөлүшдүкдән сонра Иса деди: «Мәним јемәјим мәни ҝөндәрәнин ирадәсини јеринә јетирмәк вә Онун ишини тамамламагдыр» (Јәһја 4:13, 14, 34). Ејни илә сән дә Аллаһын хошуна ҝәлән ишләри ҝөрмәклә, мәсәлән, Мүгәддәс Китабдакы һәгигәтләри инсанлара чатдырмагдан хошбәхтлик дуја биләрсән.

Әлавә мәлумат үчүн Јеһованын Шаһидләри тәрәфиндән дәрҹ едилән «Мүгәддәс Китаб әслиндә нә өјрәдир?» китабынын 1-ҹи фәслинә бахын.

[16-ҹы сәһифәдәки шәкил]

Сөзүн әсил мәнасында хошбәхт олмаг үчүн һәјатын мәнасыны баша дүшмәк лазымдыр